Ka Nupepa Kuokoa, Volume XLVI, Number 39, 24 September 1909 — O NA ADIMARALA NA MALIHINI HANOHANO. [ARTICLE]

O NA ADIMARALA NA MALIHINI HANOHANO.

He anaina hookipa nui a hanohano ka i haawiia i na Adimarala ame na aliikoa o na mokukaua i ku iho nei ma ke awa e Kapena Rees, ke aliikoa Amerika Kiekie nana e heomalu a e kiai nei i ke Kahua Hoolulu o na moku ma Hawaii nei, ame Mrs. Rees, ma ka auwina la Poaha aku nei ma ke kihapai Pleaeanton, ma kahi kokoke i Punahou, a malaila i halawai aku ai kekahi mau haole kamaaina o Honolulu nei me na malihini aukai. O kekahi anaina hanohano loa ia i ikeia oiai na keonimana ame na lede iloko o ko lakou mau aahu nani. Malalo o kekahi kumulaau ohai nul i hele a luluu i na lau uliuli i hookipaia aku ai na malihini a he kohu halelole maoli no i hoomakaukau mua ia no ia hana. O Walter F. Dillingham ame Lukanela Holmes na keonimana hoolauna i na malihini i na kamaaina. Malaila pu ae o Mrs. Walter F. Frear kahi i hoolaulea pu ai me na malihini wahine oluna ona mokukaua. Ua kokuaia oia e na lede lehulehu ma ka hoomakaukau ana i na meaai mama ke kope a pela aku, me ke komo pu ana me na malihini ma ka hoolauna ana ia lakou. He anaina nui kela i koho waleia aku aia ma kahi o na haneri. Malaila pu ae ka hapanui o ka poe koikoi o ka aina. Malaila pu ka bana Hawaii kahi i hoonanea ai i kela anaina ike malihini me ka hoomau i ko lakou paani ana a hiki i ka hookuu ana o na hana ma ka liora eono ahiahi. He aahu koa piha ko na Adimarala ame na aliikoa apau.