Ka Nupepa Kuokoa, Volume XLVII, Number 26, 1 July 1910 — KA WAI KAU MAI O KEANAE. [ARTICLE]

KA WAI KAU MAI O KEANAE.

E ka Nupepa Kuokoa, Aloha oe: Ke o mau nei keia huaololo ma na pali Koolau o Maui iloko o ke Kalana o Maui nei apuni keia Paeaina. He aneane kanakolu a kanaha paha mai ka la 1 mai o Iune, 1910 nei, eia makahiki i hala, ke puai mau nei no ia me ke aheahe iloko o na keiki hanau o keia aina. Na hooheno o ka aina i keia mau la ke hana ia nei kekahi alanui hou i ike ole ia i na wa i hala no ka loa o hookahi mile, a oi a emi mai paha, no ka laula o 14 kapuai a hiki i 20, nani keia. He pali keia e hana ia nei mea ole nae ia ia Hanaio. Ua puka ae nei he ahahui i hoohui ia lakou iho ma ka inoa o Hui Hoolewa o ka Ekalesia o Keanae, mamuli o ka make ana o kekahi hoahanau (lala) o lakou. Ua kukuluia keia ahahui ma ka mahina o Feberuari, 1910, maiwaena mai o na hoahanau kane, wahine, e noho ana iloko o ka Ekaleaia mai ka wai anu o Wailua nui a hiki i ka wai pahihi mai o Oopuola i Koolau. Ma ka po o ka la 15 ame 16 malama ai na lala o ka ahahui i ke kino o ka mea make. a ma ka hora 10 a. m. Poaha i malamaia ai kona pule hoolewa a lawe aku iaia ma ka pa ilina o ke Kakolika ma Wailua. O na lilo apau e pili ana i ka mea make, ua auamo ka hui ia man koikoi apau me ka ui ole aku i ka ohana. Kou oiaio, K. K. O. Keanae, Maui, Iune 22, 1910.