Ka Nupepa Kuokoa, Volume XLVIII, Number 32, 9 August 1912 — MAI PAU HE HAU HALE MA MANOA I KE AHI [ARTICLE]

MAI PAU HE MAU HALE MA MANOA I KE AHI

Ina aole ka nui o na kanaka haiia ma ka hooikaika ana e kinai i kekahi ahi o ka a ana ae ma ka auwina la o ka Poalua nei, a pela no hoi ka eleu o ka hoikeia ana mai i na hala kaawai e Miss Rose Davison, ua manaoia, ua poino maoli kekahi mau hale lehulehu, e hiki aku ai ke poho ma kahi o ka iwakalua-kumamalima, a kanalima paha kaukani dala. O kahi o kela ahi o ka a ana ae, ma kahi kokoke no ia i ka home o Mr. J. H. Young, mauka o Manoa, eia nae aohe maopopo aku o ka poe e noho kokoke mai ana, e lilo ana paha kela ahi i mea hoopilikia mai. He nui no na kanaka e hana ana ma kekahi mau wahi kokoke mai, aia no ko lakou noonoo ma ka lakou hana. Mahope iho nae o ka hora ekahi ma kela auwina la, ua huli hoi aku la o Miss Davison mai ke taona aku nei no kona home, a ike aku la oia i ka a mai o ke ahi, me kona hoomaopopo pu ana aku i ka poino o kekahi mau hale lehulehu oiai ke nee mai la ke ahi imua, e hamu ana i na mauu maloo ame na laalaau liilii. Mailoko aku o ka uwahi i ike aku ai oia i kona lio, i ke ku mai, i hoopaaia i ke kumulaau, o kona kelepona koke mai la no ia i ke poe o ka oihana kinaiahi; a mahope o kela manawa, hele aku la e hookuu i kona lio, a kauoha pu aku la i na kanaka hana ma kela ame keia wahi, e hele mai e kinai i ke ahi. Mamuli o ka lakou mau hooikaika ana, ma ke oki ana mai i na wahi e hiki ole ai i ke ahi ke palahalaha loa aku, pela i hoopakeleia mai ai he mau hale lehulehu, eia nae o na papa ame na pili, ma kahi kokoke o ke ahi, ua pau i ka a ia, a pela no hoi ka loaa lihi ana mai o kekahi hale, eia nae he wahi pilikia uuku loa ia, mamua o ka hamu holookoaia ana ae e ke ahi.