Ka Nupepa Kuokoa, Volume XLVIII, Number 52, 27 December 1912 — MAMULI O KA INO O KA MOANA I LOHI LOA AI [ARTICLE]

MAMULI O KA INO O KA MOANA I LOHI LOA AI

Iloko o ke ehuehn me na makani ino pakaawili e pakuikui mau aku ana mamua o ke alahele, pii mai na ale kawahawaha me he kuahiwi la ke kiekie a uhi maluna o ka oneki, i alo mai ai ka mokuahi lawe ukana o ka laina mokuahi Matson ka Hyades, ahiki i ke ku ana i Honolulu nei ma ka hora 9 o ka po Poaha aku nei, he 12 la mahope o kona haalele ana aku ia Seattle, ka mua loa o kana mau kelepa lohi loa i ikeia iloko o kekahi mau mahina loihi i hala. He elua la ka lohi o ka Hyades mahope o kona manawa mau e ku mai ai, hookahi kumu o ka lohi ana mamuli mai no ia o ka ino o ka moana pela ka hoakaka ana ae a ke Kapena Youngren. I kulike ai me na hoakaka a ke kapena. o keia kelepa mai la a ka Hyades o kekahi ia o na kelepa mua ana i ike ai i ka nui o ka ino o ka moana, pa kaawili ka pa ana a ka makani, ma ke kukulu hema mai i kekahi manawa, a mamua pono aku i kekahi manawa, a ma ka akau mai, a iloko ka o kela loli mau o ka pa a ka makani me ka ikaika wale no i na manawa apau, he kumu kaohi i ka hoonee mua ana mai i ka holo ana o ka moku, a eia no ka ka loaa ana mai o ka makani maikai a ua hiki mai ka moku mai kahi he 22 degere lalitu. Ma keia kelepa a ka Hyades i ku mai la he 90,000 kapuai papa maluna ona ame 3500 tona ukana no Honolulu nei; he 40,000 kapuai papa ame 450 tona ukana no Kaanapali. Ma ke kakahiaka Poalima mai ka hoomaka ana e hu 'e i kona ukana a ma ke ahiahi Poaono mai ka holo ana no ke Awa Allen.