Ka Nupepa Kuokoa, Volume LII, Number 18, 1 May 1914 — MELE NO KUU AINA. [ARTICLE]

MELE NO KUU AINA.

E hoi ke aloha i ka aina. Ka makani wehe kapa o ke Koolau, Ka makani kaulana na ka malihini, Haaheo i ka luna o Nu'uanu. He nu ka makani ka'u i lohe, Eia kuu kino i Puuhale. E ha'i aku ana i ka meahou, He ukana lualau na ka ohana, Manaia aku kou makemake, Opu lokoino he aloha oe. He aloha na hoa o ka inea, Ka nohona o ka hale o ka ehaeha. Ke hea mai nei kuu lei loke, E hoi maua me ke aloha. He aloha kuu pua waioleka, Aia i ka la'i o ke kaona, Kuu hoa o ka ua me ka makani, Na po kehau ua liilii. Ilaila kaua ike iho ai, I ka eha lima ole a ke aloha. Haina ia mai ka puana. E hoi ke aloha i ka aina. Hakuia e Lepeka Nuhi, Kalihi