Ka Nupepa Kuokoa, Volume LII, Number 43, 23 October 1914 — KO MAKOU MAKUAHINE ALOHA UA HALA. [ARTICLE]

KO MAKOU MAKUAHINE ALOHA UA HALA.

Mr. Lunahooponopono, Aloha oe—E oluolu oe e hoike ae ma kahi kaawale o ka kakou pepa i keia manao maluna ae i ike mai ai ka ohana ame na hoaloha. Ma ka hora 12 o ke awakea o ka la 10 o Okatoba o keia makahiki i haalele mai ai ko makou makuahine aloha Mrs. Mauna Lonohiwa Koomoa i keia ola ana ma ko makou home ma Weha, Hamakua, Hawaii. Ua hanauia oia ma Weha, Hamakua, Hawaii i Okatoba 10, o ka makahiki 1858, mai ka puhaka mai o Kaheananui Pele ame Mr. L. Kaoo. Ma ka la 8 o Okatoba, 1873, ua hoo huiia oia me Mr. L. M. Lonohiwa ma ka berita maemae o ka mare. Ua loaa mai na keiki mai ko laua puhaka mai he 4 o ola nei. Ma ka makahiki 1901, na hoohui hou ia ko makou makuahine aloha me Chas Koomoa. Nolaila ua haalele iho ko makou maknahine aloha ia makou na keiki, na moopuna he 15 ame ke kane Chas. Koomoa i hoonele ia i ka makua, a hoi aku la oia ma ka poli aloha o ka Haku Iesu Kristo, Nana no i haawi mai a nana no i lawe aku. Ke haawi aku nei makou, na keiki, na moopuna ame ke kane i ka hoo maikai he nui i ka poe i haawi mai i ka lakou kokua ia makou. O makou iho no na keiki, na moopuna ame ke kane i hooneleia i ka wahine, iloko o ka luuluu ame ke kaumaha. Mr. David M. Lonohiwa, Mrs. Nancy L. Cheu In Po, Mrs. Ruth L. Kauhaihao, Mrs. Lottie L. Johnson, Mr. Chas. Koomoa, Mr. Chas. J. Kauhaihao, Mrs. Violet K. Lonohiwa, Mr. Chas. Johnson, Mr. Cheu In Po.