Ka Nupepa Kuokoa, Volume LII, Number 45, 6 November 1914 — HALA KUU KAIKAMAHINE! HALA PU NO ME KA ANO'I! ALOHA WALE. [ARTICLE]

HALA KUU KAIKAMAHINE! HALA PU NO ME KA ANO'I! ALOHA WALE.

Mr. Lunahooponopono, Aloha nui:— E oluolu mai kou hanohano e hookomo iho ma kahi kaawale o ka Nupepa Kuokoa i ka'u wahi puolo waimaka luuluu no kuu kaikamahine, i ike mai ai na kini mai ka la Hiki a ka la Komo i ka ilikai o Lehua. Ua hala kuu kaikamahine aloha, ua nalo, ua haalele mai ia'u kona makuakane. Ua hanauia kuu kaikamahine ma Napoopoo i ka pali kapu o Keoua, Kona Hema, Hawaii, i ka la 25 o Maraki, 1895, a make ma ka la 1 o Okatoba, 1914. Nolaila, ua piha i kuu kaikamahine Bessie Kawahanoeau na makahiki 19, me na la keu. Ua hanauia oia mai ka puhaka mai o Mrs. Kalehuamakanoe me Mr. John Au. O ka makuahine o keia kaikamahine, he kaikamahine hanai oia na ko'u makuahine ame kuu papa. Ua hoohuaia mai ko laua mau puhaka mai he 19 keiki, he 12 i make mua, a koe mai 7. A make aku la o Bessie Kawahanoeau ka inoa o kona kupunawahine. O ka mea walohia a'u e hoomanao ae ai, oia no ke akaka ole o ka aina kahi i make ai. Oiai, ua leka mai kona kaikuaana ia'u mai Honolulu mai, ua make ia o kaina aia i Maui, aia la i Maui hea? Ma keia mea, nui ko'u kaumaha, luuluu, ame ka mokumokuahua o ka manao.

Ma ka mahina o Aperila, ua nonoi mai kona kaikuaana ia'u e lawe i kuu kaikamahine no ka laweia o ka makuahine i Kalihi, Honolulu. a ua ae aku la au. A ma ka la 13 kau ka makuahinc ma Likelike ma Hookena ae, oia ka mahina o Aperila a ma ka la 14 noho i ka halema'i o Kalihi. A o na keiki, ame na moopuna aku ma ka mokuahi Mauna Loa aku, A. D. 1912. A ma ka mahina o Okatoba, hiki aku la au i Honolulu, a kokoke i kuu wa hoi mai i Kona nei, ua koi aku au e hoi mai maua, ua olelo mai kela ia'u, "e papa, e hoomanawanui oe a laweia o mama i Molokai, alaila, hoi aku au.'' Auwe no hoi ka leo o kuu kaikamahine e! Walohia wale e! E like me ke ao e nalowale ana a e hele aku ana; pela ka ka mea e iho ana i ka lua kupapau, aole oia e ea hou ae iluna. Aole oia e hoi hou i kona hale, aohe hoi e ike hou kona wahi iaia. Pela e moe iho ai ke kanaka, aole ku hou ae; aole lakou e ala hou mai, a pau aku na lani, aole hoi e hooku hou ia, mai ko lakou hiamoe ana. Alaila, e hoi ka lepo i ka honua elike me ia mamua, a o ka uhane e hoi i ke Akua nana ia i haawi mai. Me na keiki hoonoho hua ka anoi, a o ke aloha pau ole me ka Lunahooponopono. Owau no me ka luuluu, Z. P. KALOKUOKAMAILE. Napoopoo; Okatoba 30, 1914.