Ka Nupepa Kuokoa, Volume LII, Number 48, 27 November 1914 — HE HOALOHALOHA NO MRS. SUSAN KAHOA [ARTICLE]

HE HOALOHALOHA NO MRS. SUSAN KAHOA

Mr. Lunahooponopono o ka Nupepa Kuokoa, Aloha oe:- E oluolu mai kou ahonui ma kahi kaawale o kau hiwahiwa i ke poomanao e kau ae la maluna. Elike me ka ohu i nee ae mai na kuahiwi ae, pela no ka lono kaumaha i oili ae, ma ke ahiahi o ka Poalima la 6 o Novemaba, e hoike ana o Mrs. Susan Kahoa, ua hala i ke ala hoi ole mai, a o ka hooko ia ana hoi ia o ka mea i palapala ia: "O ke kanaka i hanau ia e ka wahine, he hapa kona mau la, a ua piha i na popilikia, puka mai no ia me he pua la a oki ia aku a holo aku no ia me he aka la, aole ia e mau." Ma ka Lani Kuu Home e maha mau ai, Pokole paa ole kuu noho maanei. O ka makuahine aloha i haalele mai la i keia ola honua ana, he makuahine hooikaika i na hana pono o kou mau Ekalesia o Ewa, he makuahine oia kamaaina, a i aloha ia e na mea apau, he puuwwai hamama ame ka lokomaikai. Ua kukulu iho oia i ka Ahahui Manawalea Imipono Kristiano ma Kalauao, Ewa, i ka la 7 o Aperila, 1898, a ke mau nei ke ku ana a ia ahahui ma nawalea ahiki i keia la, a ua lilo oia i lunahoomalu no keia ahahui ahiki iho la i kona hoi ana aku la e pili me kona Haku aloha. Ma ko Iesu mau lima, Ma Kona poli no, Malaila au e malu, A maha maikai pu. Nolaila, aole kakou e lohe hou ana i kona leo, ua hala, ua nalu, ua pau kana hana ma keia ao. Nolaila, hooholoia o makou o na lala o kona ahahui, ke komo pu aku nei me oe ke kane i hoonele ia i ka hoapili he wahine, ame na kaikamahine i hoonele ia i ka makuahine ame ka ohana apau e auamo a e kaana pu i na ehaeha, na kaumaha ame na luuluu no kau mea aloha he wahine. E hooholo hou ia ke komo pu aku nei makou me oe ma ke noi ana i ka Makua lani e hoomama ia mai kou mau luuluu e ka mea hana i hea aloha mai: "E hele mai oukou apau i o'u nei, e ka mea luhi ame ka mea kaumaha, a na'u oukou e hoomaha aku." Nolaila, Hooholoia, i hookahi kope i ka Nupepa Kuokoa, a i hookahi kope i Ka Hoaloha. O makou iho no me ka haahaa, Mrs. K. Archer, Mrs. Levaro, Mrs. H. Pooloa, Mrs. Mele Kahumoku, Miss Lidia Kahoa, Mrs. Ema Mossman, Mrs. Hukimoto, Mrs. Oili, Mrs. Makaala, Mrs. Keaka Uilama, Mrs. Puou, Miss Namale.