Ka Nupepa Kuokoa, Volume LIII, Number 10, 5 March 1915 — KUU POKII HELE LOA DAVID L. KAAIKUOHA. [ARTICLE]

KUU POKII HELE LOA DAVID L. KAAIKUOHA.

Mr. Lunahooponopono o ka Nupepa Kuokoa, Aloha oe—Oluolu mai hoi oe i ka'u puolo me ka waimaka, ma kekahi o na keena kaawale o ka milimili a ka lahui i ike mai ai na kini o maua e noho mai la mai ka la hiki ae ma Kumukahi, a ka la kowelo i ka ili o ke kai o Lehua. Oiai, me ka nanea a haupu ole ae, ua pae mai la he leo mai ka aina mai o ka ehaeha, mai kekahi mai o kona mau hoaloha o ia aina malihini, o kuu pokii, ua hala aku la ma kela Kanaana Hou, ua haalele mai la ia'u me ka makuakane o makou, me na kaikuana o maua ame na moopuna lehulehu a makou e noho mai la i ka la welawela o ke kaona; aloha, aloha wale! Waiho na iwi o Kamahele i ka aina malihini, pela no hoi i ka hoapili he wahine. Ua hanau ia kuu pokii ma Waionui, N. Kohala i ka mahina o Mei 24, 1880, na ko makou mama Malina Apakee ame Thomas W. Kaaikuohaokanihomauole, ko makou papa e paiauma pu aku nei ma keia aoao o ka muliwai eleele o ka make. O kuu pokii nei, ka panina pau o ko makou hanau ia ana, a i ka elima o kona mau makahiki ua lilo iho la makou apau i poe keiki makuahine ole, a oiai, no makou e liilii ana, a o na kaikuaana o makou i nunui, a mare oia no o Mrs. Frauk K. Kalama ame Mrs. E. K. McGiffin; ua lei makuahine ole iho la ko makou papa iaia, a ua lilo pu iho la no hoi makou apau i mau keiki na ko makou mau kaikuaana hanaumua. Kuu pokii aloha e, manaonao wale hoi e! Ua hoonaauao ia oia ma ke kula apana o Honomakau, ma ka olelo Hawaii ame ke kula olelo Beritania ma Ainakea, a i ka A. D. 1896 no ke kula o Lahainaluna, a mamuli o kona piha me ke aloha makua ua haalele aku la oia i ka imi ana i ka naauao, oiai, o ke aloha makua ka mea nui iaia; a i kona hoi ana mai no ka aina hanau, ua lilo koke no oia i kokua amara no ka hui mahiko o Union Mill, me kona pili paa no me ko makou makuakane, a i ka A. D. 1904 lawe oia i ka lima akau o Mrs. D. Kealina, a ma ia la mai kona pili aloha ana me ka wahine, ame ke aloha makua a na ka loohia ana i ke ma'i hookae a ka malihini i hookaawale no ka aina o ka ehaeha, a ma ka la 8 o Ianuari i hala aku la, ua haalele loa mai la oia ia makou a huna na maka nalo i ke aouli. He loea kakaolelo oia, a he leo no hoi no ka aoao Repubalika i na wa hakoko kalaiaina. He koho mau ia oia i kiure hookolokolo, a ua noho ma ka oihana makai, a kulana kristiano pu no hoi kona. Ua hoopiha ia mai makou apau me ke aloha kumakena poina ole nona. He aloha makua oiaio, a he kupaa naue ole i ka hoapili he wahine, he mau lei haule ole ia nona a na ka make i hookaawale ae a oiai, o ka la o ka make, me he aihue la i ka po, oiai, ua paa kana olelo, o ka mea a ka wahine i hanau ai, ua piha i na popilikia he nui, a pela no ke kulana i loaa i kuu pokii a hala wale aku la no. No ia mea, e hoomaikai ia o Iehova Nana no i haawi mai, a Nana no i lawe aku. Me keia manewanewa aloha no kuu pokii, ke hoomaikai aku nei au, a o makou no apau, i ka Lunahooponopono a me na keiki ulele hua meka'a o kou keena. Owau no, MRS. DAVID E. KANAINA. Kaauhuhu Homestead, N. Kohala, Hawaii, Feb. 24, 1915.