Ka Nupepa Kuokoa, Volume LIII, Number 30, 23 July 1915 — PAU KA HANA MAANEI. [ARTICLE]

PAU KA HANA MAANEI.

Ma ka pauaho ana mai o David Kalauokalani, Makua, i keia ola ana ma ka Poalua aku la i hala, i pau ai kana mau hana maanei, eia nae, iloko o na hoomanao ana a ka poe i ike a i kamaaina iaia, ma na hana apau i komo pu aku ai oia me lakou, aole lakou e poina ana nona. Iloko o na hana kalaiaina ua lilo o David Kalauokalani, Makua, he alakai no ka Aoao Home Rula, ua nana aku na kanaka iaia me he makua la e alakai ana ia lakou ma na alahele e pono ai ka noho aupuni ana; ua ku aku oia ma kela aoao kalainaina me ka hoomanawanui, ahiki i ke koe kakaikahi loa ana mai o ka poe iloko o kela aoao, akahi no oia a haalele aku, a ku ae ma ka aoao ana i manaoio ai, he aoao ia e pono ai kona lahui. Ma ke ano luna aupuni, ua paa o David Kalauokalani, i kekahi mau oihana ano nui o ka lehulehu, me ka hooko pono ana i kana mau hana elike me kana mau mea i ike ai he pono, a iwaena o na kanaka Hawaii ilike aku na makahiki me ko David Kalauokalani, Makua, oia kekahi o na kanaka, i kamaaina iwaena o na haole, a i nana mai iaia me na manao hilinai, ma o kana mau hana la. Ma kona manawa e kokua ana ma ka hoopuka ana i ka nupepa Home Rula, ke hoomanao mau nei ke Kuokoa, i kona mau manao hoakaka naauao maloko o kela nupepa, maluna o na ninau i pili loa i ke ola o ka lahui, a ma ia mau kalai manao ana, i hoike okoa mai ai oia i kona kulana kanaka makua, ma ka lawe ole mai i na manao kamalii, a hoakamai, no ka mahalo ia mai, aka ua kukulu mau aku oia i na mea oiaio imua o ka lehulehu, e hiki ole ai ke hoole ia ae ka oiaio o ia mau hoakaka mai kana peni mai. Iloko o ke kaumaha ame ka minamina, ke komo pu aku nei ke Kuokoa, me ka ohana i hoonele ia i ka makua, no ka pauaho ana mai o David Kalauokalani, Makua i keia ola ana.