Ka Nupepa Kuokoa, Volume LIV, Number 3, 21 January 1916 — KA INO NUI MA PELEKUNU. [ARTICLE]

KA INO NUI MA PELEKUNU.

E ka Lunahooponopono o ke Kilohana Pookela a ka Lahui, Welina pu kaua:E oluolu mai hoi i wahi rumi kaawale no keia wahi puolo e kau ae la maluna. Ma ka Poalima, la 7 o Ianuari nei, i hoomaka mai ai keia ino, ma ka hoike ana mai o ke kai i kona huhu, ke hele la a pii i na pali. Ma ka Poaono ae hoi, he o ia mau no ka ikaika o ka nalu; a na ia ikaika o ke kai i hoonee ae i kekahi aoao o ka hale Papaa, e ku nei ma ke awa kumoku o Waulua, ma Pelekunu nei; he eono paha kapuai ke kaawale mai ke kahua ae. O ka waa e pili pu ana ma keia hale, ua hoonee pu ia e ke kai, ina paha aole i hihia pu me ke kaulahao, o ka haule no ia ilalo o keia pali kiekie o 40 a 50 paha kapuai ke kiekie, ina aole nao [ ] i ka papaa. Ua hoomaka pu no hoi ka ua ma kela Poaono me ka ikaika me ka makani akau e pa ana mai ka moana mai; [ ] ia mau hiona e nanaia aku ana, aia hoi, ikeia aku la ke kahe mai o ka wai mai na pali kuhoho mai o ua aina nei; ia hu ana o keia wai i ke kahawai nui, he ku i ka weliweli ke nana aku i na hana a ka wai. Ua hoomau ia keia mau ano pela a po keia la, mai ia po a ao ae Sabati, ua oi hou ae ka haule ikaika ana mai o ka ua me ka mau no o ka makani ma ka akau. Ma keia la a awakea, me he mea la ua oi pakolu aku ka ikaika o ka wai; o na kumulaau nunui e ku ana ma kona alahele, ua hooliloia lakou i mea ole; o na pihaa moe wai o uka, na laau mai na pali hanee mai, hookahi ia hului ana a ka wai, ku ae i kahakai. O na aina pili kokoke i ke kahawai, ua kokoke e oo, ua lawe ka wai i kekahi hapa a koe iho kekahi hapa. He mau puaa e hele ana ma hai o ke kahawai, ua lawe ka wai eha puaa, a koe aku elua. O kahi nae o ka laki aole ola i poino, aka o ka weliweli o ia ka mea i kau iho i na kupa o ua aina nei. I ka Poakahi ana ae, i ike ia aku ai ka nui hewahewa o ka ukana a ka wai, ke hele la a uhi paapu ia ka paala o makou nei e ka wahie, mai kahi aoao [ ] kahi aoao. He oi aku keia o ka [ ] ikeia ma keia awawa. Ua ohi na mea apau i ka wahie, aole hiki ke pau, no ka nui palena ole. O kekahi pilikia nui a ka wai i hana iho la ma Pelekunu nei, o ia ka hooneleia nae o kekahi hapa o na aina mahi kalo, me ka wai, oiai ua lawe aku ka wai i kekahi hapa o ka auwai e komo mai ai ka wai ia mau aina a ke waiho nei na kalo me ka maloo; ina aole e loaa he hoopo nopono maikai ana, me kekahi poe mea aina e pili ana i keia auwai, alaila e pilikia loa ana. I ka hooki ana i keia mau meahou, ke haawi pu aku nei i ko'u aloha i ka lunahooponopono ame na keiki oniu hua o ka papapa'i, ka welina pu ana. Kou no a mau, Joseph Makalei. Pelekunu, Ianuari 13, 1916.