Ka Nupepa Kuokoa, Volume LIV, Number 33, 18 August 1916 — KUU LEI DAIMANA POINA OLE UA HALA. [ARTICLE]

KUU LEI DAIMANA POINA OLE UA HALA.

E ae mai i ka'u wahi puolo e panee aku nei ma kekahi oneki kaawale o kou kino lahilahi e kuu Kuokoa i ike mai na kini makamaka, e noho ana ma ka puka ana o ka la ma Kumukahi, a i lohe aku ka welona a ka la i Lehua i na ko o Halaalii. Ua haalele mai kuu lei aloha, kuu keiki, ma ka auwina la o ka la 6 o keia mahina i keia ola mauleule ana, a niau palanehe aku la e hooipo me Kanepolohiwaanuuakea, a noho aku la oe i ka hale leo ole o ke aloha ole. Walohia wale oe e kuu lei aloha! Ua hanau ia ma Wainiha o Jos. L. Paakiki, mai ka puhaka aku o Kaike (w) ame John Paakiki, ma ka la 3 o lune, 1892 ;nolaila ua piha iaia na makahiki 44, 2 mahina, me na la keu o ka hanu ana i na ea ehaeha o keia noho ana, a haalele mai la ia'u i kona mama ame kona mau pokii, me na keiki e paiauma aku ana me ka leo walohia o ke aloha. Aloha ino kuu keiki o kuu mau la opio! Ua hoonaauaoia o Jos. L. Paakiki ma ke Kula o Kamehameha, a e ike iho ana kona mau hoa imi naauao, ua hala ko lakou hoa luhi o ka imi ana i ka naauao, i pono no keia noho kino ana i ola ai kona noho ana ame kona ohana ame kona mau hoaloha. Aloha wale oe e kuu keiki leo ole mai ia'u ame kou mau pokii ame kau kaikamaliine e pa'iauma aku nei i kona noho makua ole. Eia nae ua ko ka ka Baibala, o Kou makemake ke hanaia, a hoi aku ka uhane me oe. E ha hala o Naue i ke kai ua pau kou kipehi ana i na ea aala kupaoa ma na papalina nohea o J. L. Pakiki; ua pau pu hoi kou kilinahe aala ana e na lipoa o na pali nihoniho o Kikiopua; ua pau pu kou hooma-u ana e na huna wai kuauhoe, i na lehelehe waliwali o kuu lei aloha, oiai ua kahea mai la ka leo o ka anela o ka Haku, e hoi aku oe e pili iaia; nolaila ua pau, ua kuu ka luhi, ua moe i ka moe kau me hooilo, a hiki mai ka la o ke keiki e kahea mai ai e ala, alaila ilaila hui aku au a ike i kou helehelena walohia aloha. Nolaila ke haawi nei au i ka hoomaikai, i ka Lunahooponopono ko'u welina, ame na keiki ulele hua mekala o ka papapa'i ko'u aloha nui. MRS. PAAKIKI. Wainiha, Kauai.