Ka Nupepa Kuokoa, Volume LV, Number 25, 22 June 1917 — Ka Pono Koho Baloka o na Wahine [ARTICLE]

Ka Pono Koho Baloka o na Wahine

Ua lilo ka ninau pono koho baloka, o na wahine ma Hawaii nei, i ninau hoala pinepineia mai e kakou ma na manawa ae nei i hala, o ka oi loa aku, iloko o na'hana kalaiaina, me ka manao, o kekahi ninau ia, e alakoia ai ka noonoo o na kanaka, ma ke kakoo ana i na aoao kalaiaina kuloko o kakou e hoala mai ana i keia ninau.

Ua hookomoia aku e ka Elele Kuhio iloko o ka ahaolelo lahui, he bila kanawai, maluna o keia ninau koho baloka o na wahine, e hoihoi mai ana i ka hooholo ana i keiā ninau, na nVmana koho baloka o keia Teritore ma kekahi koho baloka laula, ina paha ua makemake i o kakou e loaa keia pono i na wahine aole paha. ( He mea maikai io ka loaa ana o ka pono koho i na mea apau, ke ike kakou i ka waiwai o ia mea, ame ke ano e hoohanaia ai, ma ke alahele kupono elike me ko kakou makee mau ana i ko kakou mau kulana pakahi, aka ina ua nele ko kakou hoomaopopo maoli ana i ka waiwai ame ka pomaikai o keia pono, alaila, ua like pu no ia, me ko kakou haawi ana aku i ka pahi ame ka pu panapana, i na keiki liilii, i maopopa ole i na pilikia ame na poino e hoea mai ana, ma ka lawelawe hemahema ana i kela mau mea. Aia he mahele mahuahua o na wahine maloko o keia Teritore, i loaa maoli ia lakou ka naauao, me ka makee ia lakou iho; a aia no hoi he mahele o ko kakou poe wahine, i hiki ōle ke hoomaopopo i ka waiwai o keia mea he pono koho, e puni wale ai i na alakai hewaia, e ka poe i makemake e lilo aku na kakoo ana, ma ko lakou aoao, no kekahi mau hana a lakou i makemake nui ai, no ko lakou mau pomaikai ponoi iho; nolaila aole no keia he mea maalahi no kakou ka olelo,ana ae, he oi aku ke kupono, e loaa io keia pono koho i ko kakou poe wahine ma Hawaii nei. Oiai nae, ua hooko wale aku la no ka Elele Kuhio, elike me na mea a kakou i ake aku ai iaia e hana aku maloko o ka ahaolelo lahui, o kakou no na lunakanawai, na lakou e hooholo aku i keia ninau, ina no ka waihoia mai imua o kakou ma kekahi koho haloka ma keia mua aku, a makou e manaoio nei, ua loaa ia kakou na ike laula, no ka kakou mea e hana aku ai maluna o keia ninau.