Ka Nupepa Kuokoa, Volume LVI, Number 8, 22 February 1918 — Untitled [ARTICLE]

Eia iloko o ka ahaolelo lahui i keia la ka make ame ke ola o ka Moi Alekohola ma Hawaii nei; ua hookomo ku la ka Elele Lahui Kuhio he bila kanawai hookapu waiona iloko o ka hale o na lunamakaainana, a ma na hiohiona maopopo loa ke nana aku, elike me na manao e pahola la iloko o na hale kaukanawai a elua, ua kokoke loa mai i ka manawa e kaiehuia aku ai ka Moi Alekohola mai Hawaii aku nei no keia manawa o ke kaua. Ina no ka hoea i'o mai o ia hopena, alaila he manawa keia no ka hoomakaukau ana, no ka mea ma ka la 1 o ka mahina ae nei o Iulai, e lalau okoa mai ai na lima kakauha o ke kanawai hookapu waioaa federala, a kinai aku i ke kupuino nana i hoopoino aku i na ola he nui.