Ka Nupepa Kuokoa, Volume LVI, Number 23, 7 June 1918 — HE HOALOHALOHA NO P. I. AINIU [ARTICLE]

HE HOALOHALOHA NO P. I. AINIU

Aloha na hale o makou i makamaka ole, O ke alahele mauka o huli wale la - e, Huli wale; Ke huli wale ae nei no i ka makamaka ole, I ka noho ole i ka hale e ike aku ai - e, E kanaenae aku ai la hoi ia oe, E Pilipo Iwikauikaua e. Ia oe no e! E Mr. Lunahooponopono o ka Nupepa Kuokoa, Aloha oe:—Ina he wahi kaawale kekahi o ka hiwahiwa a ka lahui ka Nupepa Kuokoa, ka ipukukui nana e hoomalamalanma nei i ka Lahui Hawaii, alaila, e oluolu oe e hookomo iho i ka puolo a ke aloha keiki nona ke poomanao e kau ae la maluna; i ike mai ai na ohana, na hoaloha, na makamaka apau o ka maua lei hele loa e noho ana mai ka la hiki ae ma Kumukahi, a ka welona a ka la ma Lehua. Ua hanauia ka maua lei aloha Pilipo Iwikauikaua Ainiu ma Kaumakapili, i ka ua kukalahale i ka la'i o Honolulu, Maraki 19, 1894, a ua piha iaia na makahiki he 24, a make ma ka Poaono, la 11 o Mei, a i ka hora 3 a oi o ke awakea; ua laweia aku kona kino lepo ma ka pa ilina Kakolika, a na ke Kahunapule Kakolika na hoomaikai ana maluna o kona kino a nalo aku la no ka manawa mau loa. Auwe ka maua lei hele hookahi, heaha la hoi neia hala nui au i manawaino mai nei oe ia makou, a kaupale ka ike ana mai? Aohe hala, oiai, o ko ke Akua kuleana no ia; ka Moi o na Moi ame ka Haku o na Haku e noho ana ma na lani kiekie loa. Eia makou la e Pilipo Iwikauikaua Ainiu. E hoona ae ana i ko aloha, Pehea la ia e pau ai, Ua sila a hoopaa i ka manao, Ua eha au mamuli o ko aloha. Ua hoonaauaoia no oia ma ke kula apana o Napoopoo nei, i ka wa ia Mr. Anaru ame Wm. Kekapa, a hoounaia i ke kula Kamehameha, i ka 1911; eha makahiki i ke kula; a o ka hapa hope loa no hoi ia, alaila hookuu loa ia, loaa no i na onawaliwali ma ke kino a hala wale aku la. Nolaila, o maua kona mau makua, J. Ainiu ame Mrs. Leialoha J. Ainiu, ua ike maoli aku maua i kaua mau hanalima akamai, o ia no kona hana ana i na pila kika, na pila ukulele, a eia no kana mau pila i hana ai nona ponoi, a he akamai ma ka hana uwila i a 'oia

ai ma ke kula Kamehameha. Manao ae la ke ola o na la palupalu, eia ka o ia ke haalele e mai ana ia maua ame ka ohana. E Kona kaiopua i ka la'i e, ka aina i ka maka o ka opua ka ua; aina kaulana no hoi i ke kaohi i ke kukuna o ka la, ua pau kou ike ana ia P. I. Ainiu. Ua hala ka puulena aia i Hilo, ua imi aku la i na kupuna; ua pau ka ike ana, ua hala, ua kuu ka luhi no ka manawa pau ole, a ua hoi aku la oia me kona Haku aloha. E hoomaikaiia Oia. Ua waiho iho oia mahope nei he kuku, he mau makua, kona mau hoahanau lehulehu, na makamaka ame na hoaloha. Ke hooki nei maua me ka manao kaumaha no ka maua lei aloha he keiki, a ke haawi nei maua i ko maua hoomaikai a nui i na makamaka ame na hoaloha o ka maua lei, i lu iho i na wehi pua like ole maluna o ke kino lepo o ka maua mea i aloha ai, a na ka Haku e hoopomaikai mai ia kakou apau. Ke haawi aku nei maua i ko maua aloha i na limahei o ka papapa'i ame na keiki hoonohohua kepau o kou keena. O maua iho no me ka luuluu, MR. & MRS. AINIU, Me ka Ohana. Napoopoo, Mei 16, 1918. PARIS, Iune 4.– Ua alaiia aku ka nee hou ana mai a na Kelemania imua ma kahi kokoke i ka ululaau Neuilly o na koa Amerika i komo mai ai i ka laina kaua ma ka aoao komohana o ke Ahua Champagne.