Ka Nupepa Kuokoa, Volume LVI, Number 28, 12 July 1918 — KUU ABBIE PUAOI UA HALA. [ARTICLE]

KUU ABBIE PUAOI UA HALA.

E ka Nupepa Kuokoa, Aloha oe me ka paumako;-E oluolu mai kou ahonui e auamo aku i kaʻu wahi puolo kaumaha o ka luuluu ma kekahi kaawale o kou kino lahilahi, a nana hoi ia e hii hele aku, a hoike ae i ka nui o na kini ohana, na makamaka ame na hoaloha, o kuu wahine e noho ana mai ka hikina a ka la i Kumukahi, ma ka Moku o Keawe, a hoea loa aku i ka welona a ka la i Lehua, o kuu wahine aloha, Abbie Puaoi, ua haalele mai oia i keia ola ana, a niau palanehe aku la ma ke alahele o na mea hanu ola apau. Ua haalele iho oia iaʻu ame na lei aloha a maua, e u aku nona iloka o ke kaumaha ame ka luuluu mokumokuahua o ka naau, ma ke kakahiaka o ka Poalima, Iune 28, 1918, ma ka hapalua o ka hora ehiku; mahope o kona kaamaʻi ana no hookahi pule wale no. Auwe, luuluu wale! Ua hanauia kuu wahine aloha ma Hookena, Kona Hema Hawaii i ka la 22 o Dekemaba, 1887, mai ka puhaka mai o kona mau makua, Mr. John Nahinu ame Mrs. Kapule Nahinu. Ua lawe hanaiia oia iloko o kona wa bebe e kona makuahine hanai, Mrs. Louisa Aukai Joseph {illegible}, o Nawiliwili, Kauai. a pela iho la oia i kaawale mai ai mai kona mau makua mai, a noho i ka Mokupuni Kaili La. Ua hoonaauaoia oia ma ke kula aupu;ni ma Lihue, Kauai, a ma ka mahina o Novemaba o ka makahiki 1909, i hoohuiia ae ai maua iloko o ka berita o ka mare; nolaila ua piha ia maua na makahiki o ka noho aloha pu ana iloko o ia berita laahia, a haalele wale mai la oia ia'u, ma kahi o ka ewaiu makahiki me na mahina ehiku, a hiamoe aku la iloko o ka hiainoe mau loa. Auwe, kuu minamina i kuu wahine aloha i haalele mai iaʻu ame na lei a-i a maua he mau keiki, a naʻu hookahi e paiauma aku iloko o ka luuluu ame ke kaumaha, no ka mea ua hala aku la ka wahine, ka makua o na lei a maua. He wahine akahai kuu Abbie, he oluolu, he heahea me ka waipa-he, he aloha ohana oiaio oia, a he mea nui hoi na lei a maua iaia; a na kona mau ano maikai he nui, e hoala mau mai i kaʻu mau hoomanao poina ole ana nona ma keia ao. Ua hoopomaikaiia mai no ko maua kihapai kino, me na hua {illegible} (keiki) no lakou ka nui he eha; oia o Miss Mabel K. Puaoi, Miss Emily P. Puaoi, Miss Abbie P. Puaoi, ame ka lei pua hanau hou a maua, Miss Hana H. Puaoi. O kana hiapo mua, oia o Miss Louisa Holi, o makou ia e noho ae nei, me na hoomanao kaumaha ana nona. Ua hala oia, ua pau kana hana ma keia ao, a ua pau kona hehi hou ana ma na alanui o Honolulu nei; ua pau kona {illegible} hou ana aku ma na kakaipali o na Koolaupoko; pau kona ike hou ana i na halakahiki o na kula palahalaha o Waipio, Waiawa, Kipapa, Wahiawa ame Pearl City. Ua puni o Oahu nei i ke kaaheleia e maua me kuu Abbie, oiai au e noho hana ana ma ke ano he poo wiliki no ka hui o Libby McNeill & Libby, no na kaa halihali ukana nunui ame na kaa palau. He makuahine Kristiano oiaio oia aole e poina iaia ka hoomanao mau ana i kona Haku aloha. Ua haalele iho oia mahope nei, mawaho ae oʻu me na lei a maua, he mau makua, mau kaikunane a he mau kaikaina iloko o ua haawina luuluu o ke kaumaha. I ka hooki ana ae i keia mau hoomanao pokole ana no kuu Abbie, ke haawi aku nei au i na hoomaikai palena ole i ka poe apau i komo pu mai {illegible} aʻu iloko o koʻu mau hora o ke kaumaha ame ka luuluu; ka poe hoi i haawi mai i na makana pua, no ka hoohiwahiwa ana iho maluna o ke kino wailua o kuu wahine, a pela me ka poe i ukali pu aku ma kana huakai heleloa; e oluolu oukou apau, e lawe aku i kaʻu mau hoomaikai palena ole ia oukou; a na ko kakou Makua ma ka lani, e haawi mai i na hoomaikai oi ae mailuna mai. Owau iho no iloko o ke kaumaha ka luuluu ame ka paumako. WILLIAM PUAOI, Honolulu, Iulai 5, 1918.