Ka Nupepa Kuokoa, Volume LVI, Number 38, 20 September 1918 — KA HOME O KA MOIWAHINE LILIU [ARTICLE]

KA HOME O KA MOIWAHINE LILIU

Ma ka la 1 o ka mahina ae nei o Okatoba, e hoi ae ai ke Kiaaina McCarthy ame kona ohana maloko o Wakinekona Hale, ka home o ka Moiwahine Liliuokalani i make, e noho ai; nolaila e lilo aku ana kela home i wahi no na malihini ko'iko'i o na aupuni e, e hookipaia aku ai e ko kakou kiaaina, a e lilo pu ana no hoi ia i wahi no kekahi mau aha ike pili oihana e haawiia ae ana e na luna oihana kiekie o ko kakou Teritore.

I ka wae ana ae o Kiaāina McC£rthy i ka home o ka Moiwahine Liliu, i wahi nona e noho ai, raalalo o ka hoolimalima, ua koho oia i kekahi wahi kupono loa, a ua hoohanohano pu aku hoi oia i kela home kahiko, e mau aku ai ke o ana o Wakinekona Hale*elike me ka malania pono ia o kona kulana maikai a maemae.

I ka nana aku, o ka hoi āna ae o Kiaaina McCarthy, a noho maloko o kela home, he keehina hikimua ia, no ka hoea mai i ka hookoia ana 6 kekahi manao, e lilo mai o Wakinekona Hale i waiwai no ke Teritore, a e lilo hoi ia i home no na kiaaina apau o Hawaii nei.

He hana hoonui lilo iloko o ka noonoo o kekahi poe, ke kuai ana aku o ke aupuni i kela home a lilo mai i waiwai ponoi no keia Teritore, pela i'o no, aka nae o ka lilo ana mai o kela home, i waiwai no ke aupuni, ua hookau ae o Hawaii uuku iaia iho a like me ke aupuni o Amerika, ma ka hoomakaukau e ana he' home no ke Kiaaina o Hawaii nei, elike me ka Hale Keokeo i home no ka Peresidena Wilson.