Ka Nupepa Kuokoa, Volume LVII, Number 5, 31 January 1919 — Page 7

Ka Nupepa Kuokoa

KE KILOHANA POOKELA NO KA LAHUI HAWAII.

 

HE MOOLELO WALOHIA

No ka Imi Ana i ka Moku

"Ka Manaolana Poho"

Ka Huli Ana a ka

MAKAIKIU KA-TA

 

            Oia! kekahi lima ona e paa aku ana i ka poohiwi o Hale i nalowaie malalo o ka ilikai ia manawa ua noke aku la oia i ka okioki i ke kaula i hauhoaia ai o Hale me kekahi lima on a e paa ana i ka pahi pelu.

            Ia manawa hookahi ua holo malie loa mai la ke Swift a kokoke loa ma kahi a na opio e lana ana, a ke noke la no hoi o Kita i ka luu me ka okioki ana i na kaula i hoopaaia ai o Hale i ka pou, a no elua a ekolu manawa kona luu ana mamua o ka hemo loa ana ae o Hale mai ka pou mai.

            I ka ike ana o Akeneki ua hoea aku la ke kokua i ka manawa kupono loa no ka hoopakele ana ae ia laua, a i kona ike ana no hoi aohe ana hana e noho hou iho ai malaila, a ua aneane loa kana aloha e hemo ae mai kahi ae ana i hoopaaia ai, hoomaka aku la oia e au no kahi o ka moku e lana mai ana.

            Mamuli o kona mau manao pihoihoi no kana mea i ike ai, a no ka loihi no hoi o kela ku ana a laua iloko o ke kai. ua nawaliwali maoli oia a mamua o kona hiki ana aku i ka hapalua like o ke kowa ua maule iho la.

            I ka ike ana mai o Kata i ke piholo ana iho o Akeneki o kona lele mai la no ia iloko o ke kai no ka hoopakele ana ia Akeneki.

            Oiai o Ka-ta e hoolana mau ae ana ia Akeneki iluna i ole e pihopiho ua moku ae la ke kaula hope loa i hoopaaia ai o Hale i ka pou. Ia manawa i hoomaka mai ai laua e au no kahi o ka moku e ku ana me ka Kita kokua aku i ua o Hale, a ua hala he manawa ia laua o ia au ana mai a pili mai la ma ka aoao o ka moke, oiai nae ua hele kona mau lima ame na wawae a opili me ka maeele no ka loihi loa o ka paa ana i ke kaula, a no ka loihi loa no hoi kekahi o ka manawa o ke ku ana iloko o ke kai.

            Ia laua i au mai ai aohe o Kita i hoao aku e opaopa i ua o Hale, aohe no ia he wahi kupono e hana ai ia hana, nolaila, hakalia no ia laua a pili i ka moku o kona kahea ae la no ia i ka poe iluna o ka molu e haawi aku i ke kokua no ka hapai ana ae ia Hale iluna o ka moku.

            E ku ana ka elemakule Toda ma ka aoao o ka moke me ka makaukau e hapai aku i kana keiki hookama ana i aloha nui ai, a me na lima e lahalaha mai ana a me na huaolelo hoi o ke aloha kuio, a e hiolo ana na waimaka me ka hauoli i lalau mai ai oia. a pela hoi me na makai Anaru ame Fita kau aku la o Hale iluna o ka oneki o ka moku.

            Ua huki mua ia mai o Akeneki a kau iluna o ka moku a na Kata no oia i pii mai a kau iluna, a i ke kau ana mai o keia mau opio iluna o ka oneki, hoomoeia iho la laua iluna o ka oneki, kekahi ma ka aoao o kekahi, no kekahi manawa me ka aneane e pau ka ike ame ke aho, e aho no nae o Hale. o Akeneki ka mea o laua i ano nawaliwali maoli i ka nana iho.

            Aohe manzo hou ana no ko laua pilikia. ua komo mai la iloko o na lima aloha e malamaia aku ai laua me ka maikai. Ua hoopakeleia laua iloko o ka manawa kupono loa. no ka mea, ma ka manawa i loaa aku ai o Hale, ua pii ae ke kai a kokoke loa i kona waha, a no Akeneki hoi in a he hapaha hora aku koe o ka pau no ia o ko Akeneki wahi ikaika a hookahi paha ko laua make like ana ma kela wahi eia nae. aole pela ka manao o ke Akua.

 

MOKUNA XXIX

 

Ka Hooku'i Ana o na Moku.

 

            Ua haawiia kekahi mau kiaha waiona i na opio. ua hoopumehanaia laua me ka waiwela. a i ka loaa ana ae o kahi ikaika iki ia laua, alaila hoakaka ae la o Hale i na mea apau i hanaia maluna ona, elike me ia au e ka makamaka heluhelu e hoomaopopo la ma kau mau mea i ike ae nei ma na mokuna i hala.

            Wahi a Akeneki o ka hoike ana ae i kona moolelo ua pulu mua no oia i ke kilihune ua liilii iloko o ka manawa e halii ana ka noe, a ua hoomahuahua loaia iho nae hoi kona pulu ana mamuli o kona haule ana iloko o ke kai i ka manawa i kahuli ai o kana wahi waapa.

            Ia manawa ua laweia aku al oia i ka rumi malalo a kauohaia aku la e wehewehe ae i kona mau lole pulu, a e kaula'i ae i maloo mamua o kahi kapuahi, oiai no ke ahi e aa ana ia manawa. a me na huluhulu o ia haawiia ana aku iaia i owili ae ai oia iaia iho a paa a haule ake la hooluolu iloko o kekahi o na rumi o ke Swift.

            No Hale hoi ua hoihoiia aku oia no ka rumi mamua o ka moku. a malaila i weheweheia ae ai kona mau aahu pulu apau, e hookomoia iho la kekahi mau aahu maloo maluna on a e na Makaikiu Aa-ta ame Kita, he mau lole no e lawe mau ia ai malua o ka moku, i hiki mai no ia i ka manawa o ka pilikia elike me keia ua makaukau mua, o ka aahu wale iho no. a i ka pau ana o ko Hale mau aahu i ke komo, ua haawiia aku la kekahi kiaha waina maikai loa iaia no ka hooikaika ana aku i kona kino i hele a nawaliwali ia manawa. a i loaa pu ae ai hoi iaia ka pume hana mahope o ke ku ana iloko o ke kai no kekahi manawa loihi.

            I keia manawa ua pakele kana keiki, o ka hoi hou ae la no ia o ka Elemakule Toda ma kahi o ka huila a kakali ma la no ka loaa aku o ke kauoha mai ka Makaikiu Ka-ta aku.

            Ua hoea koke aku la no o Ka-ta imua on a mahope o kona wehe ana i kona mau lole pulu a komo hou iho la i kekahi mau aahu maloo ame kona hele ana aku e nana ia Akeneki ame Hale no ko laua lako i na mea e oluolu pono ai laua.

            He helehelena kona o ia hoea ana aku me ka piha i ka inaina no kekahi mea, a i aku la ia Mr. Toda :

            "Mai hoopau i ka hahai ana mahope o kela poe. Ua pa lekana o Hale ame Akeneki i keia manawa, nolaila o kela poe na lakou i hana iho nei i kela hana ino maluna o Hale e pono lakou apau loa e paa ia kakou, o ko kakou houloloh@ wale ana iho maanei malia he hana ia e haawi aku ai manawa no kela poe e nalowale ai mai a kakou aku, ina lakou e kau aku ana iuka o ka aina, o ko lakou nalowalo no ia ahiki ole e paa aku ia kakou.

            "Aole o'u kanalua i keia manawa o ka manao o kela poo o ka hoolele koke aku ia Kaila Esekina iuka o ka aina ma kekahi wahi kokoke aku i ke Seletanuka. a na Betimana ame na kanaka iho elua e hoihoi loa aku i ka moku mawaho ae o ka Lae Iesepa iloko o ka noe ame ka pouli e ike ole ia aku ai, a hekau iho ia moku maloko o kona awa mau ma ke Kaikuono Pekonika.

            "A i ole pela, o Kaila ame Betimana ke lele mua aku ana ma keia aoao o ka Lae Iesepa. O ka hana pono wale no ia kakou oia ka hoomau ana aku i ka hahai ana mahope o lakou e pili kokoke mau aku ai, a ina no ko lakou loaa aku e hopu aku ia lakou in a e hiki ana ia ke hana ia e kakou."

            Elike me ka Hale moolelo o ka hoike ana aku ia lakou, noonoo iho la lakou aole no i mamao loa kela poe mamua aku o lakou no ka mea, he hora wale no a oi iki ko lakou hala ana aku mamua o ko lakou hoea ana aku.

            "Ua pololei kau i olelo mai la." i pane mai ai ka Elemakule Toda, me ka piha hoihoi loa. "A oiai he mea oiaio ia he oi aku ka maikai e hoolele mua aku kakou ia Miss Agnes Wekafoda ma kekahi wahi maanei, no ka mea, o kahi kokoke loa keia nona e hoi aku ai no kona hale, mamua hoi o ka lawe loa iaia a hoea i ke awakumoku Sega, he loa okoa no hoi ia wahi nona e hoi ma iai i kona home.

            He hora a oi i hala ae, a iloko o ia manawa. ua maha loa ae la o Akeneki ame kana aloha mai kela haawina popilikia mai i loaa ai ia laua, o kekahi ua paa i ka wiliia iloko o na huluhulu a maloko o kekahi o na rumi oloko o ka moku kona wahi o ka hiamoe ana. a o kekahi hoi mamua o ke kapuahi e aa mau ana ke ahi kahi i okuu ai, me ka noonoo nui no na hana hoehaeha he nui i hanaia mai maluna ona ana no hoi e noonoo ana ina no ka loaa aku o kela poe he make wale no ko lakou hoopa'i.

            Iloko o keia manawa apau ke hoomau la ke Swift i ka holo ana me ka ike wahi moku ole ia aku mamua.

            Aka nae, i ka malu o ke ahiahi e hookokoke loa mai ana. ua hoomaikaika loa mai la ka pa ana a ka makani. Ua piha pono na pe'a i ka makani, ke loheia aku la ka uwi o na likini ame na palaka, a ke panee mau la ke Swift imua me ka holo maoli e hoopiha mau mai ana i ka hauoli i na mea apau maluna on a.

            "Ina e hoomau loa mai ana keia wahi makani e pa nei no kekahi manawa e pau koke ae ana keia noe e halii nei," i pane mai ai ka Maka'i Anaru ia Ka-ta.

            "Pela ka mea maopopo i ka nana aku aole nae mamua ae o ka hala ana o kekahi manawa loihi," i pane aku ai ka makaikiu. "Oia no ka'u e li'a nei, no ka mea, in a e mau loa. mai ana keia wahi makani , aole e hala ana kekahi manawa loihi mai nei manawa aku e ike koke aku ana no kakou i Ka Manaolana Poho, a i ole loaa koke aku no ia ia kakou."

            "Me he mea la elike no hoi paha me ko kakou makapo ia mua mamuli o ka paa i ka noe, pela aku la no hoi kela moku. Aole anei ou manao pela, e Ka-ta?" i pane hou mai ai ka Makai Anaru.

            "Aohe o'u manao pela, e Anaru, no keia kumu, e hoomopopo mai oe he poe kela i kamaaina loa i keia mau kapakai, a ua maopopo ia lakou ke alahele a lakou e holo aku ai. a pela hoi me ka lakou mea e hana aku ai. No kakou io, ke nana aku nei kakou no kekahi mea e maopopo ai ia kakou ua kokoke aku kakou i ke awa Noeaka, a laki loa in a e ike koke aku ana kakou i Ka Manaolana Poho mamua o ka uhi ana mai o na eheu o ka po."

            Ma keia manawa ke palau la ka Swift i ke kai me ka holo maoli a lakou i ike ole ai i kekahi holo elike me ia mamua aku, he kuakea wale no ohope o ka moku i ke kai i ka ua mea o ka holo maoli.

            I ka hala ana o kekahi manawa ma ia hope iho ua mahie loa ae la ka noe, a ke ike aku la lakou i ka waiho molaelae mai o mua aku e hiki ole ai i kekahi mea kino maluna o ke kai ke nalowale mai ka lakou ike aku.

            Elike me ka lakou i koho wale ai mamua aku e ike aku ana lakou i ka Manaolana Poho ua hookoia mai ia manao o lakou. Aia hoi he mau haneri i-a wale  no ka mamao mamua aku o lakou ua ike maopopo loaia aku la ka Manaolana Poho e hookolo malie ana.

            "O ka Manaolana Poho kela e holo la mamua aku o kakou!" i kuhea mai ai ka Makai Anaru oiai oia e ku ana mamua o ka ihu o ka moku a e nana aku ana imu. "O ia kela me ka maopopo loa, e Ka-ta, aohe hoohewahewa ana iho i koe."

            O ka Elemakule Toda kekahi i ike aku ia manawa. no ka mea, oia ka mea i oi aku ke kamaaina ia wahi moku. o kona haawi mai la no ia i ke kauoha ia Fita, hoopaa mai i ka bumi, o ka hele ia o ke Swift a waiho aoao iloko o ke kai.

            Mamuli o ka paaia ana mai la o ka pe'a ua kohu mahimahi ke Swift o ka holo ana aku, he manawa ole ua pili aku la ia mohopoe o Ka Manaolana Poho, a puka pu ka aoao.

            I ke Swift i hookaawaleia mai ai ua loheia aku la ke komo o ke kai iloko o Ka Manaolana Poho, a he manawa pokole loa ma ia hope iho ua waiho aoao iho la ia a hoomaka iho la ke emi liilii ana o ua moku la iloko o ke kai.

            "Heaha keia pilikia?" i kahea mai ai o Hale mailalo mai o ka moku i ka manawa ana i kiei mai ai iwaho mai ka rumi mai mamua o ka moku.

            "Aohe pilikia," wahi a Ka-ta o ka pane ana aku. "E iho aku oe ilalo a olelo aku ia Miss Wekafoda aohe make pihoihoi. Hoike aku iaia aohe pilikia o ko kakou moku, he oia mau no ia i ke alopali."

            Makela manawa i hooku'iia aku ai ka aoao o Ka Manaolana Poho, a ike iho la o Kaila Esekina ame Betimana ua puka ka aoao o ko lakou moku. he manawa ia o ka pihoihoi nui o lakou a pau, ke holoke wale la no lakou i o a ianei me ka maopopo ole o ka lakou mea e hana ai.

            Aia mau maluna o Kaila Esekina ko Ka-ta mau maka kahi i haka pono aku ai i ka manawa ana i ike aku ai i ka huki ana ae i kana pu panapana a paa i ka lima. a ke kukahalake wale mai la no hoi me ka hoopuka ana ae i na huaolelo hailiili lehulehu i ku-e loa i kona ano keonimana.

            "Kiola koke aku oe i kela pu panapana au e paa la i ko lima!" i poha aku ai ka leo okalakala o ka Makaikiu Ka-ta i ua o Kaila Esekina me he leo la o kekahi hekili pamalo ka nakolokolo.

            "No kou pono mai hoao mai oe e ku-e i kou hopuia aku. o ike auanei oe i ke koikoi loa o ka hoopa'i e kauia aku ana maluna ou. he pio oe ame ou mau hoa na'u i keia manawa."

            "Aole i'o paha kuu paa ia oe!" i kahea mai ai ka on a miliona opio ma ke ano hoonana. "E ki mua ia aku ana oe e a'u. e Ka-ta a make, a mahope aku ou mau hoa." Ia pau ana no o kana kamailio ana o ke kani koke mai la no ia o ka pu panapana.

            Ua hihio ae la ka poka ma na pepeiao o ka makaikiu. aohe no he wa a loaa pono mai kona poo i ka poke, me he aha la ia alo ana ae o Ka-ta kapalulu ana ka poka i ka lewa.

            I ka ike ana mai la a ua o Kaila Esekina ua hoohokaia aku oia i ka manawa mua ua hoao mai la oia e ki hou, o ka manawa no ia o kahi moku o lakou i kahuli iho ai a iho iho la ka moku i ka hohonu. a hoolana ana na auwae o lakou iloko o ke kai. oiai no lakou e pipili ana ma ka aoao o ka moku mamua iho.

            Ma ka wanawa o Ka Manaolana Poho i piholo iho ai o Asa ke kanaka o lakou i pili kokoke loa mai i ke Swift. Ua paa koke oia i ka hopuia a hukiia ae a kau iluna o ke Swift e na Makai Anaru ame Tita. aohe no hoi ana kupaka ana ne a ku-e mai hoi i na lima o ke aupuni i kona manawa hapaiia ae ai.

            Iloko o ia manawa ua nalowale iho la o Kaila Esekina a no kekahi manawa mahope iho kona poina loa ia ana. Aia maluna o Woka Betimana ame Kalauka ka noonoo nui a ka poe apau oluna o ke Swift a hoohemahemaia o Kaila.

            "E nana aku paha oukou i kela mau kanaka e au mai la Ua pau paha ko lakou mau noonoo maikai! Eia mai ka moku kahi o ko laua palekana ke au la nae i kahi e, i kahea mai ai ka Makaikiu Kita.

            Ma keia manawa ua ikeia aku la o Betimana ame Keoni Kalauka e au ana a mamao loa mai ke Swift aku. oiai nae o ka pololei loa e au mai laua i ke Swift. aka ua maopopo no ia Ka-ta ke kumu o ko laua hoomamao ana ua maka'u laua o paa aku i ka hopuia.

            "E piholo ana kela mau kanaka in a e hoopaakiki loa ana kela mau kanaka i ka au aku. koe wale no a hahai aku kakou mahope o laua me ka waapa." wahi a Anaru.

            "Aohe o'u manao e kali no kela." wahi a Ka-ta. "Mahope olua e holo ae ai ma ka waapa. e lele mua aku ana au iloko o ke kai mahope o kela mau kanaka."

            Oiai oia e kamailio ana ke wehe pu la oia i kona kuka. O kona mau kamaa ana o ke komo ana mamua a i lele pu ai iloko o ke kai. no ke kokua ana ia Akeneki. he hora a oi mamua aku, ua maloo. a ma kaia manawa he kamaa pale wawae no Toda kona e komo aua ia manawa.

            No ia kumu he hana maalahi loa nana ka wehe ana aku ia mau kamaa mai kona mau wawae aku, a ia hemo ana no o kona ku-ho aku la no ia iloko o ke kai me ka hoohaka ia-ole iho.

            Ia aea ana ae ana iluna o ka ilikai ua au aku la oia me ka awiwi loa, a he manawa pokole ua pili aku la oia mahope o Betimana e pihopiho iho ana a no kona maka'u o piholo iho a make. ua lele mai la oia ia Ka-ta i kona wa i paa aku ai.

            "Mai hana naaupo oe, e Betimana!" i pane aku ai o Ka-ta. "Aole anei ou ike mai eia au maanei no ka hoopakele ana ia oe?"

            "O, makemake oe e hoopakele ia'u no ka lawe ana aku no ka noho uwila ea? O, mai hookokoke mai oe ia'u! Ma hoopa mai oe ia'u!"

            Eia nae, me ia ike no o Ka-ta i ko ua o Betimana ku-e mai. ke nana la no o Ka-ta no kahi kupono iaia e lele aku ai e hopu i ua o Betimana no ka hoopakele ana iaia. ina no me ke kui oia e hana aku ai maluna on a i mea no ua o Betimana e haawipio mai ai.

            Aohe maopopo o ka Betimana mea e hana ai ia manawa ke kupaka mau wale la no oia iloko o ke kai me he pupule la, me ka hoao mau e pale mai i ka hopu aku a ka makaikiu.

            Me ia ikaika ku-e mai no o Betimana eia nae ua holopono ka Ka-ta hopu ana aku a paa ke kala o ke kuka o Betimana ua huli mai la oia me ka manao e hoopiholo pu ia Ka-ta ina e hiki ana iaia ke hana pela. Me ka manaolana poho loa oia i paa mai ai ia Ka-ta me ka hoao e hoopakele aku iaia mai ka paa aua aku a Ka-ta elike me kana i hana mai ai mamua aku.

            Iloko o keia manawa oiai o Keoni Kalauka he mau kamaa buki kaumaha kona e paa ana ma kona mau wawae ia manawa. a he mau lole huluhulu manoanoa no hoi kona e komo ana ia manawa, ua ike ia aku la oia e kau ae ana i kona mau lima me ka make loa o ka manaolana no kona ola hou ae, a piholo iho la i ka hohoun.

            Aole oia i aea hou ae iluna, a mai halawai like no paha o Ka-ta ame Betimana me ia hopena like, no ka mea, no hookahi a elua manawa kona hoao ana mai e huki iho ia Ka-ta malalo o ka ilikai, koe wale no ka hoea koke ana aku a Kita ma ia wahi a laua e aumeume ana i ka manawa kupono loa e hoopakeleia ae ai laua me kahi waapa uuku o ke Swift.

            Ua huki koke ia ae la laua a kau iluna i kahi o ka palekana, a hoomaka aku la o Kita e hoe hou i kahi waapa no kahi o ka moku me ka ikaika apau i loaa i kona mau lima.

            Ua piholo loa o Keoni Kalauka i ka hohonu, a oiai he hohonu loa ia wahi e hiki ole ai ke luu iho, a ke hele aku la no hoi ia manawa e poeleele loa. aohe a lakou noonoo hou ana aku nona, ua kanuia aku la iloko o ka luakupapa'u kai.

            Aohe i emo ia hoe ana mai a Kita ua pili mai la kahi waapa i ke Swift. Akahi no o Ka-ta a haupu ae ia manawa no Kaila Esekina.

            "Auhea o Kaila Esekina?" wahi ana.

            "Ea, ua poina loa maoli kakou i ka noonoo ana ae nona!" wahi a Kita. "Pehea la, he manao no anei ko oukou oia pu kekahi i piholo pu aku i ka hohonu?"

            "Aohe o'u manao pela," i pane aku ai ka Makai Fita. "He manawa pokole loa i hala aku nei ua ike aku nei au i kekahi mea e holo ana maluna o kahi waapa uuku o Ka Manaolana Poho, a me he mea la oia kela i holo aku la.

            "No ko'u piha loa i ke pihoihoi i haawi ole aku ai i ko'u noonoo nona ma kela manawa, no ka mea. ia Ka-ta ame Betimana e hakaka mai ana iloko o ke kai ko'u maka kahi i nana pono aku ai. a hoomaopopo ole aku la au no Esekina. Oia kela i holo aku nei maluna o kahi waapa, pela ko'u manao."

 

MOKUNA XXX.

 

Ka Pakele Ana o Kaila Esekina.

 

            "Mahea kela waapa au o ka ike ana aku nei e holo ana?" ininau mai ai o Ka-ta.

            "E holo pololei ana oia no ke kulana kauhale o Noeaka," wahi a ka pane a ka makai.

            "Uhu! a pehea la hoi oe ame Anaru i hookuu aku la ka hoi i ke alakai i nei poe e pakele mai a kakou aku, me ko olua hoao ole e uhai aku mahope ona?"

            "Ua paa hoi au i ka hana a pela no hoi me Kita, a o olua hoi i ke alakai o nei poe e pakele mai a kakou aku, me ko ka olua me ka hana ole aku i kahi hana e paa ai kela lapuwale i ka hopuia. E ike iho no olua no olua iho aole hiki ia maua ke hana i elua hana i ka manawa hookahi."

            "Oia hoi ka pilikia." i pane aku ai o Fita. "Hookahi wale no waapa, a i ka lilo ana aku ia Kita, ku iho la maua i kahi o ka hoaa, aohe mea hiki ia mau ke hahai aku ma hope o Esekina.

            "Ina nei no ko maua au aku, heaha ka mea hiki ia maua ke hana aku? He waapa ko Esekina e mamao mau aku ana oia mamua o ko maua mama au, nolaila, e ike mai oe, oia iho la ke kumu o ko maua hahai ole ana aku la.

            "Ke hopohopo nei au a pela ana no me oe e lilo ana kela hahai ana i hahai hua ole a laihi no hoi, he pomaikai kona loaa aku malalo iho la o kela ano."

            "O, mai hoolilo ae ia oe i kanaka hupo, e Fita," i pane aku ai o Ka-ta, ma ke ano hoopahenehene, no ka mea, ua ehaeha loa oia no ka pakele ana aku o ke kanaka i makaukau loa e kau aku kona lima maluna ona.

            "Aohe waiwai o ko olua au ana aku me ko olua ike no eia olua iluna o keia moku, o ka olua hana wale no o ke noi aku ia Mr. Toda e hooholo aku i ka moku no ke alualu ana mahope o Esekina.

            "He oiaio, ua lilo ae ia Kita ka waapa. aole nae ia o ka mea wale no e hiki ai ia olua ke kau a hahai aku mahope o kela kolohe i holo aku. Ua ike no hoi olua ua mahia loa ae ka halii ana a ka noe a ua malaelae loa omua e hiki ole ai ia Kaila ke nalowale ole mai ka oukou ike aku, ma ia ano aohe pilikia iki ka hopu ana iho iaia mahope o ko oukou pili ana aku mahope on a, a mahope oukou e huli mai ai ia makou.

            "A i ole. in a aole oukou e huli hou mai ia makou, na makou no hoi ia e hoi aku nouka a pae aku ma kekahi wahi me ka pilikia ole.

            "Ma kahi o ko olua ku wale iho no maluna nei o ka moku me na waha hamama o olua, me ka nana ae ia makou ua hiki loa ia olua ke kauoha aku ia Mr. Toda e hooholo aku i ka moku imua a hahai aku mahope o ka waapa a Esekina.

            "Ma ko'u manao e loaa koke aku ana no o Esekina ia oukou me ke kanalua ole iloko o na minuke kakaikahi loa.

            "Heahah ka olua hana o ka lawe pu ia ana mai ianei i ko olua manao? No ka nana wale ana aku no anei i na mea e hanaia ana. me ko olua noonoo ole i ke ko'iko'i o ka hana a olua i makemakeia aku ai? He mau kanaka waiwai ole maoli no olua o ka laweia ana mai nei," wahi a Ka-ta me ka piha huhu loa.

            Ua nui loa keia mau olelo a ka Makaikiu Ka-ta o ka nuku ana aku la i na maka'i, ua oi loa aku mamua o ka mea i maa iaia mamua aku, aka, o kona kuleana ia. a oiai o Ka-ta e nuku ana i na maka'i, ke uumi malie la o Kita i kona akaaka iloko wale iho no on a.

            Ua hoopau koke no ka Makaikiu Ka-ta i kona huhu elike no me ka hikiwawe o ia ulu ana ae. oia kona ano mau : i kona ike ana ua eha aku la na makai iaia. noi koke aku la e huikala mai iaia no ka hikiwawe loa o kana mau huaolelo.

            Ua hoopau koke ae la no hoi na makai i ko laua ehaeha no keia noi ana aku a Ka-ta e huikala mai iaia, alaila mihi like mai la laua i ko laua hemahema no ka hana ole ana i ka mea a Ka-ta o ka hoakaka ana aku ia laua.

            "Aole hiki ia maua ke hoohalike ia maua iho me Nike Ka-ta." i pane mai ai ka Makai Anaru, "o ke ano o ka hana i kii ia ae ai maua e hana maloko o ke awakumoku S@ga aole i hoakakaia ae he hana ki-pu hooweliweli ana kekahi.

            I ka maalili ana iho o ko Ka-ta inaina ua maopopo loa iaia e paa aku ana no o Esekina i kekahi manawa kokoke a loihi iki aku paha, oiai nae, he mau minuke mamao loa ko Esekina o ka hala ana aku.

            Eia hou, he kumu ua kana e hauoli iho ai no ka hana o ia la, ua loaa o Hale Toda ame Akeneki, a ua palekana laua ia manawa. me ka paa pu o elua paahao ia lakou, mawaho ae o ka nahaha ana o ka moku a holoai'a i ka hohonu.

            Ma keia manawa uluaoa ua pii mai o Hale a iluna e ka oneki, a ua lohe i kekahi mau olelo i kukaiia mawaena o Ka-ta ame na makai, no Akeneki hoi aia no oia malalo iloko o ke kino o ka unoku, a ua hoikeia aku nae iaia ke kumu o ke pioloke ana o ka poe maluna o ka moku.

            No ka mea e pili ana i Ka Manaolana Poho ua piholo loa ia ilalo. o na huini wale no o na kia ke ikeia aku ana. no ka mea. he mau kapuai wale no he iwakalua a oi kona emi ana iho malalo o ka ilikai, a pili koke no kona kila i ka papaku no ka papa'u no o ia wahi.

            Mahope o ka Ka-ta kauoha ana aku ia Mr. Toda e hoopololei i ka holo ana o ke Swift no ke kulanakauhale Noeika, a e makaala mau aku hoi ia Esekina. haawi ae la o Ka-ta kana noonoo ana maluna o na paahao.

            E noho ana laua maluua o kahi lana hauki haahaa o ke Swift ia manawa me ka paa o ko laua mau pulima i na kupeehao. a he mau helehelena wiwo a piha maka'u loa o laua ia manawa e hakilo mau mai ana ia Ka-ta ma na wahi a pau a Ka-ta e oni ae ai.

            Ua kukule loa o Asa me ke kulou mau o kona mau maka ilalo. a no Betimana hoi aia mau maluna o kona helehele na ka weliweli no ka hoopai e kau ia aku ana maluna on a. a he helehelena kona e hoike okoa mai ana no ua hewa oia, a me he mea la e noi mai ana e huikalaia aku oia. a he hiohiona kona e hoike okoa mai ana no ua kaumaha loa oia no kana mea i hana ai.

            "Ke manaolana nei au e huikala mai ana no oe ia'a."Aole au i maopopo i ke kumu o ko'u hana ana i nei mea. Ua hoowalewaleia mai au e Kaila Esekina a ua punihei wale aku no hoi au me ke ano naaupo loa.

            "I ka manawa ana i kamailio mai ai ia'u i ke ano o ka hana e pili ana ia Toda opio, a haawi makana mai la hoi ia'u he kanalima kaukani dala, in a e kokua aku ana wau iaia, ua loaa koke ia'u keia manao e kokua aku iaia. no ka mea, he mau dala nui maoli kela i haawiia mai la. O na kuapupule loa ko'u noonoo ke haupu ae no keia mea ae i hana ai me ka naaupo loa!"

            "I ka nana aku ua nui loa kau mau mea i hana ai i hookuapupuleia ai kou noonoo," i pane mai ai ka makau@in Kata.

            "Aole i nui loa aku ka'u mea i hana ai o ko'u hoolako wale ana aku no i kuu wahi moku. Aole i nui loa ka'u mea i hana ai e hauia mai ai na ahewa ana he nui maluna o'u, e Kata."

            "O, heaha ka waiwai o ka uwe ana mai i keia manawa e Betimana, ua like wale no ko oukou hewa a pau loa. oia hoi ko oukou manao ana e hoopaa ia Hale me ka manao e pepehi iaia a make. Mawaho ae o ia hana ua hoao oe ame Kaila Esekina e pakele mai ko olua hookolokoloia aku me ka manao kolohe a pepehikanaka maoli e hoohoka i ke kanawai ma o ko olua haehae ana i kela mau palapala e hooiaio mai ai i ka pono o ka Hale Toda mau koi no kona kuleana i ka waiwai o kona makuakane.

            "Eia hou, o oe ka mea nana i hana a nau i kii i kela mau palapala iloko o ke pakaukau kakau a ke Kiaaina Esekina. me ko hoao ana e komo ma ke ano aihue me Kaila Esekina.

            "O oe kekahi i huipu me Esekina, keia kanaka o Asa ame Kalauka e waiho mai la i keia manawa iloko o ke kai. ma ka hopu ana ia Hale a hoopaa iaia maloko o kela hale kahiko, me ko oukou manao e pepehi iaia a make.

            "Ina aole au manao e komo pu me kela hana a Ka@aka i hahau ma i ai ia'u me ka pauku hao ma ka po nei, eia nae, o oe pu no kekahi malaila, a aole oe i hoao mai e keakea @a Kalauka, aole no hoi oe i hoao e hoopakele ae ia'u mai kela hale kahiko kanaka ole ae.

            "Eia hou, i ka manawa i laweia ai o Hale e hoopaa i kela ou no ka haalele ana iaia e make maluila, aole oe i hoike iki aku i kou manao menemene a aloha nona ma o kou komo in a aku e keakea ia hana.

            "Ma ke ano oiaio, i hai aku au ia oe, mamuli o kou luawi ana aku i ko wahi moku i hiki ai keia mau hana a pau ke hanaia, a eia nae hoi oe ke i mai nei aole ka oe i komo kukonukonu loa aku iloko o keia hana, a ke mihi mai nei hoi no kou huikalaia aku. Aole io hoi kou huikalaia aku!"

            "Auhea oe, e Kata, he pio au na keia mau hana mamuli o ko'u naaupo me ka puuihei maoli i kela puu dala nui!" i noi mai ai o Betimana me na waimaka e hiolo ana. "Aole anei oe e hoao ana e kauia mai ka hoopai mama maluna o'u hole hoi o ka pepehiia maluna o kela noho uwila a'u e kaunui ka weli i nei manawa no ka ike aku ia hopena . in a au e hoike aku ana i na mea oiaio a pau imua o ka aha?"

            "Aohe o'u makemake i kou hoike mai ia'u i na mea a pau, ua ahuwale na mea apau imua o'u i nei manawa. Ua nui a lawa loa na ike oiaio ma ko'u aoao e hooiaio aku ai i ko oukou hewa, no ka mea, aole ko'u he lohe mai a hai ia mai, aka, he ikemaka ko'u i na mea apau i hanaia. a owau ponoi nei no hoi kekahi i lilo i pio na oukou. a mai make paha wau, koe wale no ka hoea ana ae o ke kokua i ka manawa kupono loa e hoopakeleia ae ai kuu ola."

            "Ke hoohiki aku nei au imua ou aole i like ko'u hewa me ka hapanui ae o makou, i uwalo mai ai o Betimana me ka ha'uha'u uwe ana.

            "Mai ka manawa mua mai o ka hoomaka ana o keia hana ua keakea aku au ia Kaila Esekina. oiai aole o'u makemake i ka hana pepehikanaka, ako nae ua paakiki loa mai no o Kaila Esekina me ka olelo mai he makemake oia e hookoia kona manao i mea no Hale e make ai a loaa ole kekahi mea nana e ku-e mai iaia, a no kuu ike he kamaka paakiki oia ma kona manao aia no a hookoia, a o kekahi no hoi he kanaka kiekie a waiwai oia, ua pilipu wale aku a no wau malalo o kana mau hookokono mai.

            "Aole ana anei oe e manaoio mai ana i ka'u e kamailio. aku nei no ko'u pono? O keia ka mea oiaio loa. i lohe mai oe, e Kata, nolaila la ea. e aloha mai oe ia'u. Na Asa nei e hoike ae ia oe aole au-."

            "O. e pono au e liia ina e ae aku ana au i kau mauoleo hoomalimali e uwalo mai nei. Aole au e hoike hoopunipuni aku ana nou, a mai noonoo iho oe e hana aku ana ua ia mea no kou pono.

            "He ninau keia e koiia mai ana e hoakaka kela ame keia mea o kakou nona iho. imi ae no ia i kona pono a imi ae no ia i kona. Aole au e hoike hoopunipuni aku ana i mea no'u e pilikia ai a o oe ke pakele mai ka amana likamaka mai.

            "Ua maopopo loa kou komo kukonukonu pu ana iloko o keia hewa, e like me ka poe e ae o kakou apau nolaila. heaha kau hoao ana iho e hoalo ae ia oe mai ka hoopai mai e kauia mai ana me ko ike no ua maopopo loa ko kakou hewa.

            "Ma ko'u manao ua oi loa aku kou hewa mamua o ko makou, no keia kum, nou ka moku i hiki ai keia hana ke hanaia, a o kekahi no hoi he hoaloha oe no Esekina i ua ike oe i na meahuna apau ana."

(Aole i pau.)