Ka Nupepa Kuokoa, Volume LVII, Number 5, 31 January 1919 — HE HOOMAIKAI NUI. [ARTICLE]

HE HOOMAIKAI NUI.

O makou pakahi, o makou huiia ka ohana o Mr. Aberahama Ku Keaka Kapule, ka wahine kanemake, Mr. Haalou Kapule, na keiki makua ole, Mrs. Kalei Montgomery, Naia Kapule, (k) Kaonohi Kapule (k) Iosua Kalani Kapule, (k) Miss Cecilia Kapule (w) ame Kapule Liilii (k) Kuloli Kapule (k) ame na kaikuahine, Mrs. Loika Pakaka Kaiwi (w) Mrs. Kapeka Hose Castro (w) ame Mrs. James von Ekekela (w) ame na kaikoeke aloha James, H. K. Kaiwi, Mr. Hose Castro, ame Mr. James, von Ekekela, ame na moopuna, aloha George Montgamery Kapule, Cecilia Montgomery Kapule, ame Victoria Naia Kapule, ame ka lehulehu o na moopuna, na makamaka na hoaloha ame ka ohana apau loa, ke haawi aku nei makou i na hoomaikai he nui palena ole, i na makamaka ame na hoaloha, ame na ohana i haawi manawalea mai i na boke pua, ame na pua e hoonani ana i ka he kupapau o ka'u kane aloha, kuu hoapili, kuu mea aloha poina ole, i haalele mai ia'u, e noho u aku nona mahope nei, ka makua aloha o kuu mau lei aloha na keiki a maua, ame na lei moopuna a maua he nui e uwe nei, me ke kahea ana, Tutu! Tutu! ame kuu mau kaikuaana ame na pokii aloha o maua, ame na kane a'u i hui pu mai, i ka la i make ai kuu mea aloha, kuu makua hoapili, kuu aloha i hoomanawanui i na inea o keia ola honua ana, a hoi aku la me ko kakou Makua lani, e hoomaha ana i na ehaeha ame na luuluu o keia ola ana, a e hoonani ana i ka inoa o ke Keikihipa aloha a ke Akua, kuu kane aloha hoi, i koho ia Kristo i alakai nona, me ka naau me ka uhane, me ka poina ole nona a haalele wale mai la ia'u, na keiki a maua, na kaikuahine aloha, o maua, ame na moopuna he nui a lehulehu a maua e uwe aku nei mahope, no kuu mea-aloha poina ole. Ua hala kuu mea aloha, ua hoi ma ka poli o ka Makua Lani, e hosana ana me na anela imua o ke alo o ka Haku o na Haku, a o ke Akua kiekie loa. Ua piha i kuu mea aloha na makahiki he 62 o keia ola honua ana. Ua hanauia mai kuu mea aloha, mai ka puhaka mai o Oliva Kapule, ame Kaia Manene Mahoe, ua hanau mai na laua he 17 mau keiki, he 11 mau keikikane, a he 6 mau kaikamahine, ua pau loa aku la na kane, a koe kuu kaikuaana aloha, ame na pokii aloha o maua, ame na hunona a maua e uwe aku nei mahope, o kuu makua, kuu kane, kuu aloha poina ole nona. Ua hoomaikai mai no ka makua lani i ko maua ola ana i na keiki he 8, he 7 e ola nei, a hookahi i make, o ia hoi he 2 mau wahine e ola nei, ame na kane he 5 ka nui e ola nei. He mau keiki i nele i ka papa, e uwe aku nei mahope me ka hoomanao aloha ana nona, Ua hoomaka mai keia ma'i iaia ma ka Poaha, ma ka ike a ke Kauka H. Kuhn's, he ma'i puuwai, he ano hano kau mau no nae iaia, a ma ka Poaono pau ka lohe me ka ike, a ma ke ahiahi Poaono hora 6, haalele loa mai i keia ola ana, a ma ke Sabati, ua hoolewaia i ka luakini Poni Moi, a kanuia malaila, ma ka lokomaikai o na makamaka, na hoaloha ame ka ohana, me ka lokomaikai a piha aloha o ka Lunakanawai Huddy ame ka moopuna Joe Huddy, na ke Akua e hoopiha mai i ka oukou mau waihona a hu me ka malu : mai ke Akua mai. O makou iho no ka wahine kanemake, na keiki makua ole, na kaikuahine, na kaikoeke ame na keiki hunona ame na ohana he nui. JAS. K. KAIWI. Moloaa, Koolau, Kauai, Jan. 14,1919.