Ka Nupepa Kuokoa, Volume LVII, Number 5, 31 January 1919 — HE PUOLO WAIMAKA ALOHA NO KUU POKII UA HALA. [ARTICLE]

HE PUOLO WAIMAKA ALOHA NO KUU POKII UA HALA.

Mr. Sol. Hanohano, Welina pu kaua: —E oluolu hoi oe, no'u kahi rumi kaawale o ka kaua wahaolelo, ke kukui malamalama nana e uwila aku apuni na moku, i ike mai ai o'u mau kini makamaka ame ka ohana pu no, i ke poomanao e kau ae la maluna. Ua haalele mai i keia ola ana kuu pokii, oia hoi o H. Mana Kaaikuoha, i ka la 26 o keia mahina, maloko o ka pa hoomalu o Kalihi. Ua hanauia kuu pokii kaikunane mai ka puhaka mai o Malina (w) ame D. W. Kaaikuoha, ma Puuhane, Kohala Akau, Hawaii i ka makahiki 1871, Maraki 14, ua piha iaia na makahiki he 47 me 10 mahina. Ua hoonaauaoia kuu pokii ma ke kula apana o Honomakau, malalo o J. Kaimana ame kana ewa, Kaupena Kapaona, a nolaila, ua waiho iho oia mahope nei he wahine kanemake ame na kaikuahine ekolu, e paiauma ana iaia ma keia aoao o ka muliwai eleele o ka make. Ua paa aku kuu pokii ma ka pa hoomalu o Kalihi i ka la 16 o Novemaba, 1917, nolaila ua piha iaia hookahi makahiki a oi o kona noho ana ame ka hanu ana i na ea oluolu o ia wahi. Ua hoohuiia kuu pokii me Malaea Moluhi, i ka la 14 o Augate, 1911, nolaila ua piha ia laua he 7 makahiki a oi o ko laua noho oluolu ana me ke aloha.

He kanaka puuwai hamama, heahea i ka poe apau e kipa aku ana ma ko laua home, he kaikunane aloha kaikuahine, he aloha i ka lehulehu apau, nolaila ua pau kana hana maanei, ua kuu ka luhi. He 17 ko makou nui, ua ohi aku la no hoi ka po he 14, koe makou ekolu kaikuahine, Mrs. A. F. K, Kalama, Mrs. D. E. Kanaina, e noho mai la i ka ainahanau ame na ohana apau; aloha oukou apau loa. Kuu pokii i ka makani apaapaa o ka aina, mai ka ihu o ka lio la, e kikaha ka iwa, ua iwa aku la kuu pokii, kau i ka lewa. E Puehuehu i ka lau o ke ko ame ke Aeloa o Kapaau, aole kuu pokii e hehi hou i kou mau huna lepo, kuu kaikunane, mai ka ai haaheo o ka aina, mai na i'a mililima o Kaiopihi, aloha ino no hoi kuu pokii, kuu kaikunane, mai ka ohu hali ma ke kuahiwi, nolaila mawaho ae o na mea apau, ke haawi nei au i ka'u mau hoomaikai palena ole i na makua hookama o kuu pokii o ka home inea o Puuhale, no na mea maikai a olua i hana ai ame na hoaloha o kuu pokii o ia home ehukai. Ia oe e ka mama maikai, ka makua hou o ia wahi ame oe e D. Alapai, aloha oukou apau. Ua wehe mai olua i ko olua puuwai hamama e hooluolu mai ana i ka mea luuluu elike me a'u nei, a ke pule nei au i ke Akua, Nana no e kau mai i na hoopomaikai maluna o olua, a pela no hoi me ka wahine kane make o ka Haku ka mea nana e hoomama mai i na kaumaha ame oe e ka Lunahooponopono o ka Nupepa Kuokoa ko'u aloha ame na keiki hoonohohua ko'u anoai. Owau iho no me ka oiaio, MRS. E. K. MoGIFFIN. 1951 Colburn St., Kalihi, Honolulu.