Ka Nupepa Kuokoa, Volume LVII, Number 6, 7 February 1919 — KUU POKII ALOHA MISS HATTIE KAPAKU, UA HALA. [ARTICLE]

KUU POKII ALOHA MISS HATTIE KAPAKU, UA HALA.

Mr. Lunahooponopono o ka Nupepa Kuokoa, ke Kilohana Pookela o ka Lahui; aloha oe: - E ae oluolu mai hoi oe noʻu kekahi kolamu kaawale o ka nupepa Kuokoa; no kaʻu puolo waimaka e kau ae la maluna, i ike mai ai na kini makamaka ame na hoaloha e noho ana mai ka puka ana o ka la ma Kumukahi, a ka napoo ana a ka la i Lehua, oia hoi, o kuu pooki aloha Miss Hattie Kapahu, ua hala; ua nalo na maka i ke aouli.

Oiai au e noho ana ma ko'u wahi hana ma Honolua Ranch, Maui, ua lohe mai la au, ua hala oia i Honolulu, aka, aole au i manao o kona hele ana no keia waiho na iwi i ka aina malihini, aloha wale au i ko'u ike ole i kou hanu hope. Ma ke kakahiaka o ka Poakolu la 22, iho la i oili mai ai ka nuhou kaumaha mai ko'u Aunty aloha Mrs. Lum Lung mai e hai mai ana ia'u o kuahine Keahi, ua hala, alawa ae la au o ka uhi mai o ka ohu iluna o ke kuahiwi o Honokohau, alawa aku la o ke kau mai o ke ao i ka ilikai, hu ae la ke aloha no ka pokii, me ka hiki ole ia'u ke hoomanawanui, ua helelei koke iho la ko'u mau waimaka. Hoomanao ae la i na la e noho an me ka makua. Ua pili ia e a'u me ko'u pokii me ke aloha, i kona wa uuku, ahiki i kona nui ana, ahiki i ko'u wa i haalele aku ai ia laua me ko makou luaui makuakane. He ekolu wale iho no makou e ola nei, he elua kaikamahine, a owau no hoi ko laua kaikunane, aka, ua lawe aku la ka Makua lani he hookahi, a koe iho la au me ia pokii o'u, Ella Kapaku. O kuu pokii i hala aku la, o Honokohau kona onehanau, a malaila no oia kahi i hanaiia ai a nui, a hala wale aku la. Aloha ka ohana o ka aina, i ka ike ole i kou hanu hope, aloha ka luakini o Honokohau, kahi au e maalo mau ai. Aloha na kuauna lo'i o Honokohau, kahi a kuu pokii e holoholo ai. Aloha ka owe mai a ka wai i ke kahawai, kahi a olua me kuaana Ella e hele ai. Auwe kuu pokii hele loa e!

E ka ehukai o Punaluu e, ua pau kou hoopulu hou ana i kou mau hunakai ma kona ili. Na lae kahakai o ka aina ua pau kona maalo hou ana maluna o oukou. E Kahauiki i ka ehukai, ua pau kona maalo hou ana, ma kou mau Camp, e Honokohau, i ka uluwehi a ke paina, ua pau kou hoonipo hou ana me kuu pokii aloha. E Kaanapali e, aole oe e ike hou ana ia Hattie maloko o kou luakini nani. E Kekaa e, ua pau ka hiki hou ana aku o Hattie ilaila, ua hala oia i ke ao polohiwa a Kane E Lahaina, i ka Maluulu o Lele, aia o Hattie la, ua hala, aloha kahi a kuu pokii e hele ai; hele ana i ka holoholo hele ana i ka hana a kona Haku aloha. E ka luakini nani o Wainee, eia ko kauwa la ua hala; pau kona hehihehi hou ana maluna o kou mau papahele nani. Auwe kuu pokii hele loa e, ua hele i ke ala hoi ole mai. E papa e, aohe no paha ou aloha ia maua i ha'i ole mai ai oe i keia pilikia. Ma ka la 18 o keia mahina i haule ai oia hoi ka Poaono, Lapule ae lawe ia kona kino wailua iuka o Nuuanu. Aloha oe, e ka pokii i ka waiho mai i ka aina malihini! Ke haawi aku nei au i ko'u aloha a nui ia oukou, ka ohana apau i ike i kona hanu hope; a nou e Aunty Kiliko, ko'u aloha piha no kou ha'i ana mai ia maua i keia pilikia.

I ko'u hoopau ana i keia, ke haawi pu aku nei au i ka'u hoomaikai nui ia oe e ka Lunahooponopono no kou ahonui ana mai i ka'u wahi puolo o ke aloha. O maua iho no kona mau hanaumua, me ka naau i piha i ke aloha. MR. & MRS. J. KAPAKU JR. Kahauiki, Maui, Jan. 23, 1919.