Ka Nupepa Kuokoa, Volume LVII, Number 8, 21 February 1919 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

He Moolelo no

 MAGURETA

a i ole

Iloko o na Wiliau a ke Aloha. He Moolelo i Piha me na Haawina o ka Ehaeha

 

            Me he mea la. ua hiki loa ia Reginola ke ike aku me ka moakaka loa i ke kumu o ka pilikia ana o ka noonoo o Magureta, a o ke kumu hoi i hoowahawaha loa ai ia Kanani kona kaikuahine; aole he pohihihi i koe iloko ona, i ke kumu o ke auhee ana aku o ka minoaka mai kela kaikamahine aku, pela hoi ka li-o o kona mau maka, me kona hilimai i na kanaka, na ano nae i pohihihi loa iaia mamua aku. i kela manawa nae, ua ahuwale imua on a, elike me ke aniani kilohi.

            O ke kuaoao o Noela Kauwila, ma ka la i mareia ai kona kaikuahine me kanaka kane maloko o ka helepule, a niai ka paa mare e hemo ana mailoko aky o ka halepule, ua ike oia i kekahi kino wahine i ke ku ana ae iluna mahope loa o ka halepule, a e kiei mai ana i ka paa mare opio, oiai e nee malie aku ana nowaho o ka puka. Akahi no a hoopauia ae kona pohihihi, no kana wahi i ike mua ai ia Magureta, maloko no ia o ka halepule, no ka mea i ko Magureta kau ana aku maluna o ke kaa uwila, ua hoomaopopo aku o Reginola, i kana wahi i ike mua ai i kela helehelena. a mamuli nae o na hoakaka a Kauka Laika, ua hoalaila mai la kana mau hoomanao ana no kekahi mau mea lehulehu ana i ike ai o ka wa i hala, ame ke kumu o ke ala ana mai o ia mau mea.

             Oili koke mai la iloko o kona noonoo, ke kumu oiaio loa o ke ano e i loaa i Noela Kauwila, e laa ka mae o kona helehelena, ame ka haalulu hoi o kona ano, ma kela hoi ana aku a lakou mai ka halepule aku, mahope o ka pau ana o ka mare; aole i pau iki kela ano o Noela Kauwila, ahiki i ko lakou kau ana aku maluna o ke kaaahi no Nu loka, a i ka wa no i hoea ai ma kela kulanakauhale, e hoomaopopo ana oia i ka alaalawa mau o ka Noela Kauwila nana ana, ma kela ame keia wahi, me he mea la, ua hele a kau ka weli iaia no kona ike aku i kekahi mea ana i makemake ole ai e halawai pu me ia.

            Ua make pono io kela hakai a Reginola no ka home kahiko o Magureta i noho ai, ua loaa mai keia mau ike nui iaia, a o ia ka ua kauka opio nei i hoomaikai iho ai, i kona hooko ana aku, i kela noonoo o ka oili ana ae iloko on a e holo mai no ke kulanakauhale o Rosemona.

             Oiai ua hoohauoliia aku oia ma kekahi ano, o ka maopopo ana o ke kumu nui o ka pilikia i kau aku maluna o Magureta. eia nae ua hookahaha loa ia aku kona manao no na mea e piliana i kona kaikoeke, ke kanaka ana i nana aku ai mawaho, ma ke ano he kanaka maikai a maemae ma kona mau ano apau, eia ka auanei he mea oia i kahiko iaia iho me ka hulu hipa mawaho, a he kao maloko. Ina aole oia i hooko pono i kana hoohiki me ke kaikamahine mua ana i manao ai e lawe mai i wahine nana, alaila he mea kanalua loa kona hoolilo ana aku i kona kaikuahine, i wahine hauoli ma ko laua noho ana aku.

             Me ka hoikaika nae o Reginola i hoao ai e hoopoina ae i kona mau noonoo maikai ole apau e pili ana i kona kaikoeke. alaila hoomau hou aka la oia i ke kukakuka ana me Kauka Laika no na mea pono e hana aku ai no kana ma‘i, me ka waiho ana akui kekahi mau ninau imua o kela kauka kahiko, ma na mea i pohihihi loa i kona noonoo, no ka mea ma ka manaoio iloko o Reginola, he mea maikai, kona ninau ana mai i kekahi kauka kahiko loa elike me keia. he kanaka i kamaaina i ka oihana lapaau, pela e loaa hou aku ai iaia kekahi mau ike, mawaho ae o kana mau mea i maopopo ma kela oihana.

            Oiai ke hookokoke mai la i ka manawa o ke kaaahi e hoea mai ai a haalele iho ia Rosemona, no Nu loka, haawi aku la o Reginola, i kona mahalo me na hoomaika‘i he nui i ke kauka aoo. no kona ae ana mai e hoike i na mea apau e pili ana ia Magureta, o ka haawi ae la no ia o ko laua aloha hope, a huli hoi pololei aku la o Reginola no ka hale hoolulu no ke kakali ana i kona kaaahi.

            Ma kela huli hoi ana aku o Reginola no Nu Ioka, aole ia me ka hoomana ia o kona noonoo; he oiaio ua maopopo iaia ke kumu o ka pilikia i kau aku maluna o Magureta, aka nae no na mea i pili i kona kaikuahine, ua kaumaha maoli oia, me ka hoala ana mai i kekahi ninau iloko on a in a paha ua maopopo ia Kanani, ua kamaaina mua o Noela ia Magureta, a ua hanaia hoi he hoopalau mawaena o laua a haaleleia e Noela.

            Oiai nae ua ike oia i ka mea o ka helehelena o Kanani, ma kela kamakamailio pu ana a laua mamua o ka paina awakea. noonoo wale iho la no ua o Reginola, malia paha ua maopopo iaia, a hooho wale ae la no ua kauka opio nei i keia mau olelo: "He ku maoli i ke aloha ka moolelo o keia kaimahine!" alaila nui iho la kona hanu. "E hoopoinoia anei ke ola maemae ana o keia wahine opio, mamuli o ka hana pauaka a aloha ole a kela kanaka? Ina o ko Noela ano oiaio maoli iho la ia, alaila ua makehewa loa ka mare ana aku o kuu kaikuahine me ia. Pehea nae i kou ole aku ai ka huhu ame ka inaina o Magureta maluna o ke kanaka nana i hana hewa mai iaia, aole hoi maluna o Kanani? Malia he ano okoa no keia pilikia, mai na pilikia maamau mai o keia ano.

            "Aole keia he ma‘i uuku, aka he ma‘i nui a ko‘iko‘i e konoia mai ai ka mea e lapaau ana ia Magureta. e hoohana aku i kona ike me ke akamai me ka hoomanawanui pu a ua konoia mai au, e makaala loa mai kona halawai pu ana aku me kuu kaikuahine: a e makaala loa aku ana no hoi au ma na ano apau, i wahi e loaa ole aku ai ka ike iaia owau ke kaikunane o ke kaikamahine ana i hoowahawaha loa ai, o lilo auanei ia i kumu nona e hoowahawaha pu mai ai ia‘u. Ua pomaikai maoli au o ka hoike piha ole ana aku i ko‘u inoa iaia i keia kakahiaka, no ka mea ke ike nei au pela wale no e holopono ai ka‘u mau lawelawe lapaau ana aku iaia."

            Ua nui maoli ka Reginola hana ma kela la a i ka hoea ana aku no ke kulanakauhale o Nu Ioka, ua huli maoli oia. me ka hoi pololei ana aku no kona mau rumi me ka manao e hiamoe o ka mea apiki nae iloko o kona luhi aole e hiki iaia ke hiamoe: o ke kumu, e kau mau mai ana kana mau hoomanao ana, no ka helehelena u‘i o Magureta.

            Hooholo iho la oia, e hoao ana oia ma na ano apau e hoonakele i kela kaikamahine mai kona lilo ana aku i mea opulepule: no ka mea aia maluna o na maka o Magureta ka hohoi he helehelena wahine u‘i hoi kona, a in a aole e loaa aku ana na lapaau akahele ana iaia, e lilo ana kela mau nani a ke Akua i kau mai ai maluna on a, i mea ole loa, oloko o ka hale pupule kona wahi e noho ai, me ka pau o kona hui launa ana mai me ka poe maikai o ko lakou noonoo.

            Ua hala okoa he mau hora nui o kela po, mamua o ka lulumi ana mai o ka makehiamoe maluna o ke kauka opio, a i kona puoho ana ae ma ke kakahiaka o kekahi la mai. ua ano maikai maoli oia, a mahope o kona komo aua iho i kona mau lole me ka ai ana hoi i kona aina kakahiaka, hele aku la e nana i kana poe ma‘i a o ka hope loa no hai, hoea aku la oia no ka home o Magureta.

            E noho ana no o Magureta maloko o kona keena hookipa ma ka manawa a Reginola i hoea aku ai ua komo mai o Magureta i kekahi lole kakimea keokeo a iloko o ka hele o kona helehelena a haikea pu, he keu no nae kona u‘i e noho mai la, me he mea la aole oia he wahine ma‘i.

            Aole no nae i hoohewahewa aku ke kauka opio i ka huaku ai iloko, me he mea la aia na hoohuoi iloko o kela kaikamahina nona nolaila hooholo iho la oia, he mea pono mai ai na manao kue o kela kaikamahine iaia; uolaila hele aku la o Reginola a imua o Magureta, haawi aku la i kona lima no ke aloha ana ma ke ano paa rula o ke kanaka keonimana.

            E heluhelu ana o Magureta i kekahi buke, aka i ka wa i ike mai ai i ke komo ana aku o ke kauka opio, pani awiwi iho la i ua buke nei a hookomo ae la malalo o kekahi mau hana ma ka aoao o Magureta i loaa aku ai ka ike i ke kauka opio aia kekahi mau mea maloko o kela buke a kana ma‘i i makemake ole ai iaia nei e ike aku nolaila hooholo iho la ua kauka nei, he mea pono e maopopo oia i ke ano o kela buke mamua o kona haalele ana iho i kela hale.

            " Ke lana nei ko‘u manao, ua loaa mai la oe e Miiss Anolaia‘u i keia kakahiaka me ka ola kino maikai," wahi a Reginola i hoomaka mua aku ai i kana kamailio ana iaia i lalau aku ai i ka noho a ke kauwa, o ka panee ana mai nona, a uwai aku la a kokoke imua o Magureta.

            "Ae, ua loaa ia‘u ka oluolu i keia manawa, a hoea wale mai la no oe," i pane mai ai no hoi o Magureta. oiai nae o ka mea oiaio loa, aole i loaa ka moe maikai ana iaia ma kela po, mamuli o ka nui o ka eha ame ka hu‘i o kona lima.

             "O kena eha o ko lima, he eha ia, e kono mai ana ia oe e hoomanawanui, a pehea ua maikai no anei kou hiamoe ana ma ka no nei?"

            No kela ninau ua lio koke mai la na maka o Magureta, me na mano hoohuoi iloko on a no ka manao maoli o ka ninau i waihoia aku ai imua on a, a oiai nae, ua nana aku la ke kauka opio ma kekahi kii nui, e waiho mai ana ma ke kihi o ka rumi, mahope aku o Magureta, ua hoi hou mai la ka manao maikai iloko o ua kaikamahine nei, a pane mai la me ka leo oluolu:

             "Aole i loaa ka moe maikai ana ia‘u ma ka po i hala aka ua hiaa wale no au no kekahi mau hora loihi mamua o ka lulumi ana mai o ka makehiamoe i ko‘u mau maka.

            "Alaila he mea pono paha ia‘u ke nana pono aku no ke kumu nana i hoohiaa ia oe i ka po. Ua loaa ka ike ia‘u ma nehinei i kou wa e nana ana i ka pana o kou lima aole he maikai o na meapaahana o kou kino, a ua konoia mai a no ka haawi ana hoi i ka hiamoe oluolu ana i na manawa apau. E hiki ana anei ia oe ke hoakaka mai ia‘u i ke kumu nui o ka hiki ole ana ia oe ke hiamoe?"

            "Ma ke ano hea la kau i hoohuoi ai pela i loaa ai ia‘u keia haawina?" i pahu pono mai ai o Magureta i ka ninau imua o ke kauka opio.

            "I kekahi manawa, mamuli o ke ala nui i ka po ame ke ao ma ka makaala ana i ka poe ma‘i he kumu ia e loaa ai ka hiaa i kekahi mea no kekahi manawa loihi" i hoomaoe wale aku ai no o Reginola mamuli o kana mau mea i lohe ai no ka malama ana o Magureta i kona mau makua. iloko o ko laua wa ma‘i aia nae iloko on a ka iini nui ame ka makemake in a e hiki ana ia Magureta ke hoike maoli aku imua on a, i ke kumu oiaio nana i hoopilikia i kona noonoo alaila he mea maalahi uaua, ka haawi ana mai i na kuhikuhi ana i wahi e hoopauia ai @ piliki i kau aku ma luna ona.

            Mamuli nae o kela mau olelo ana i hoomaoe wale aku a no imua o Magureta ua auhee aku la kekahi ano maikai ole mai na maka aku o ua kaikamahine nei a pane mai la:

            "He oiaio, ua nui ko‘u ala ana i ka po ame ke ao, i ka manawa i ma‘i ai ko‘u mau makua a ia laua hoi i make aku ai ua kiai hou aku la au i ko‘u makuakane hanauna a mahope mai o kela manawa aole loa i loaa ia‘u he hia moe maikai ana ahiki wale no i keia manawa."

             "Ina o ka mea oiaio kena au e kamailio mai nei ea alaila he manaoio ko‘u e hiki ana ia kaua ke hoauhee aku i kena pilikia i loaa ia oe. Ua maopopo no ia oe e Miss Anola he mea maa i na kauka apau ka noii pono ana i na mea oiaio mamua o ko lakou kalele ana maluna o kekahi ano laau kupono loa e haawi aku ai i ka lakou poe ma‘i" me ka hoao ana aku o Kauka Noka e minoaka. "Pehea ka loihi o ka loaa ana o ka haawina hiiaa ia oe ke hoi e hiamoe i ka po?"

            "Ke hoomanao nei au he makahiki keia a oi, mahope o ka haule ana aku o ko‘u mau makua" wahi a Magureta me ka nui ana iho o kona hanu, eia nae aohe wahi hoailona o ke kaumaha ma kona helehelena, a i ole halo‘ilo‘i ma hoi na kulu waimaka o ke aloha no kona mau makua i hala "He ekolu mahina mahope iho o ka make ana aku o ko‘u mau makua, ukali aku la kuu makuakane hanauna mahope o laua."

            "He keu maoli a ka mea kaumaha, a nawai no e ole ka ili ana mai o kekahi haawina ko‘iko‘i maluna ou." wahi a Reginola, me ka leo o ka mea i komohia ka manao aloha no kela kaikamahine. "O ka‘u mea e hoike aku nei ia oe aia wale no ka loaa o ke ola kino maikai ia oe, a kaawale aku keia haawina hiaa mai ia oe aku, aka nae ma ko‘u manaoio in a no ka loaa o ka hiamoe oluolu ia oe i na manawa apau ma keia hope aku aole ana no e nele kou olioli aole anei pela e Miss Anola?"

             No kela mau hoakaka ma ka aoao o Kauka Noka, ua pupuku ae la na maka o Magureta, o ke ano kaumaha pahola aku la oia i kona mau lima imua a puili ae la mamua pono o kona umauma a noke okoa iho la i ka eha me ka hookomo maoli ia mai o ka manao ehaeha iloko o ke kanaka opio a i ka hala aua o kekahi mau sekona pane okoa mai la ua o Magureta i ke kamailio ana mai:

             "O! in a e hiki hou ana ia‘u ke hiamoe me ka oluolu ua like ia me ke ola hou iloko o‘u. Ke hoomanao ae i keia makahiki holookoa a oi he keu a ka mea ku i ka weliweli no ka mea he hiaa mau ana au i kekahi mau hora loloa o ka po me ka makehiamoe ole, e oili mau mau mai ana no na noonoo ana no kekahi mau manao. no kekahi mau hiona a i ka‘u ike maoli iho no ua like pu ko‘u poo me kekahi uwaki nui a kona mau meapaahana e kikoni mau ana i kela ame keia sekona me ka hoomaha ole.

            "I kekahi manawa no ka hiki ole ke hiamoe a no ka ulu-ku mai la o ka noonoo i na manao uluahewa ua kono okoa ia mai lau au e hele i ka holoholo me ka nana ole ae i ka aaki pouli o ka po aole no nae ia he mea e loaa mai ai ka maha me ko‘u kono oka ia ana mai e noke ae i ke kahea ma ka leo nui me he mea la. he mau uhane lapu he nui ke alualu mai ana no ka hoopoino ana i kou ola."

            "Ina oe e oluolu mai ana e Miss Anola alaila ke kauoha aku nei au ia oe e noho malia!" wahi a Kauka Noka me ka leo kuoo, e hoike aku ana i kona mana, ma ke ano he kauka, aka aia nae iloko on a, na manao aloha no kela kaikamahine opio no ka uluahewa o kona noonoo e aneane loa aku ai oia e lilo i wahine pupule.

             Ua hoao mau o Magureta e kuoo ma kana mau mea apau e kamailio mai ai a e hana ai paha me ka loaa ole i ke kauka opio na manao hoohuoi uo ka nui o ka pilikia i loaa i ka noonoo o kela kaikamahine alaila e ku a pupule maoli ana oia.

            Ma kela manawa nae i loaa aku ai ke kauoha mai ia Kauka Noka aku e noho malie oia ua noho malie i‘o iho la o Magureta, me ka nana ana mai ma na maka o ke kauka opio me ke kahaha a iaia i ike mai ai aia ke aloha ame ke kaumaha maluna o ka helehelena o keia kanaka, ua mahie koke ae la kela ano leleiona mai kona mau maka aku ma kahi hoi o kona mau papalina haikea, puapua‘i mai la ka ula ohelohelo me ke auhee loa ana aku o kela nanaina kunahiki mai iaia aku alaila kulou iho la kona poo ilalo no ka hiki ole iaia ke nana mau mai ma ua maka o ke kauka opio, e haka pono aku ana maluna ona.

            Ua hoopiha loa ia mai o Kauka Noka, me ke kahaha no ka lilo ana o kona kuoo i mea e wiwo ai kela kaikamahine iaia a hoomanao ae la ua kauka nei e hoea mai ana i ka wa e nohoalii ai kona mana maluna o kela pilikia i kau aku maluna o ka noonoo o Magureta, alaila, kahea hou aku la oia me ka pane ana aku:

            "E Miss Anola," ia wa koke no hoi i alawa mai ai ka Magureta nana ana i ke kauka a hoao aku la ke kanaka opio. e minoaka, me ka hoomau ana aku i kana kamailio ana:

            "He mea pono anei ia‘u ke mihi aku no ko‘u hoohana ana i ko‘u mana maluna ou i keia la? Ua hoea mai nei au no ka ike ana ia oe maluna o ka pilikia wale no i loaa i kou lima i ma-ui ai. No na mea wale no anei i pili i ka pilikia i kau aku maluna o kou lima ko‘u kuleana e lapaau aku ai ia oe, a i ole no ka lapaau pu ana aku paha ia i ka pilikia i loaa i kou noonoo? E hilinai mai ana anei oe maluna o‘u no ka‘u mau mea apau e kauoha aku ai ia oe e hana?"

            No ka minuke holookoa, aole o Magureta i pane mai, aka ke hakilo pono mai la i ka helehelena o Kauka Noka e noonoo ana paha i ke ano o keia kanaka, no ka hiki iaia ke hilinai mai ame ka olelo, a o ia kana i pane mai ai:

            "E hilinai aku anein ia oe? Heaha kou manao ma ia mea Pehea ka nui o ka hilinai au i makemake mai ai ia‘u e hana aku?"

            "E hilinai mai oe ia‘u, ma ka hoakaka piha ana mai i ke ano maoli o kou pilikia a e hilinai pu mai hoi oe, ma ka hooko ana i ka‘u mau kauoha apau e haawi aku ana ia oe, no kou pono."

            "Ua ike au i kou hoohakalia loa i kau pane, o kou kuleana no nae ia o ka‘u mea wale no e makemake nei e ike, o ia ka loaa o ke ola kino maikai ia oe. He mea makehewa wale no paha na‘u ka hoike aku ia oe, o kekahi o na kumu e loaa mai ai na pilikia o ka noonoo, o ia no ka hiaa mau i ka po. mamuli o kekahi mau kumu."

            "Aole au hoakaka ana mai ia mea ia‘u no ka mea ua loaa no ka ike ia‘u" wahi a Magureta, me ka awihi ana aku o kana nana ana malalo o na pepa e ahu ana maluna o ke pakaukau, kahi ana i hookomo aku i i k buke ana i heluhelu ai ma ka manawa a Kauka Noka, o ke komo ana aku iloko @.

           No kela alawa ana aku o ka Magureta nana ana, in a kahi o ka buke ana i waiho aku ai, i loaa mai ai ka ike iaia, he buke kela i pili i na kumu o ke ano-e ana o ka noonoo o ke kanaka he buke hoi i pili i ka poe pupule.

            "Pehea maoli kou manao e Miss Anola, ua makemake anei oe e kaawale loa aku ka hiaa mai ia oe mai. Ua makamake anei oe, e loaa ka lanakila, mai kou lilo ana i mea opulepule?"

            "O ka‘u maoli ia i iini mau ai i ke ao ame ka po! O, e hoopakele mai ia‘u mai keia pilikia ae" me ka palulu ana ae o Magureta i na lima ma kona mau maka, alaila nana pono mai la maluna o ke kauka opio, me ka aa o na maka naka ae la hoi kona kino me ka haalulu, a ninau mai la: "E hiki ana anei ia oe ke hoopakele ae ia‘u mai keia pilikia mai?"

            "Manao au he hana hiki no ia ia‘u ke hooko aku in a e hilinai mai ana oe maluna o‘u" wahi a Kauka Noka me ka nui maoli o kona makee e hoopakele i kela kaikamahine mai kona lilo ana aku i wahine pupule. "Ina e hiki ana ia oe ke lawe aku i ka‘u mau a‘o ana apau a hooko hoi i ka‘u mau kuhikuhi ame na a‘o ana, ke paa loa nei kuu manao e kaawale ana kena mau haawina apau mai ia oe @ku"

            Hakalia no a pau ke kamailio ana aku a ke kauka opio @ koke ae la o Magureta iluna, a hoomaka aku la e holoholo o ia no oe o kekahi liona e paa ana maloko o kona hale a i hoopaa ia aku hoi e kekahi mea kolohe, me ka hooho ana ae i keia mau olelo: "E haawi aku anei au i a‘u mau hilinai ana maluna on a? E hiki ana anei ia‘u ke hoike aku iaia i na mea apau- E hoike aku anei au iaia a, ua palaka loa kona noonoo, no ka noho pu aku o Reginola Alika maloko o kela keena hookahi.

            Ua lohe pono loa aku o Kauka Noka i na huaolelo apau i kamailioia ae e Magureta, aia hoi iloko o ua kana opio nei ke kaumaha, ame ke aloha no keia kaikamahine, me ka paa pu o kona manao e hoao oia ma na ano apau e hoauhee aku i kela haawina uluahewa mai kona noonoo aku.

            Me he mea la, i kana mau ma‘i apau i lawelawe lapaau ai, o keia wale no ka wahine opio hookahi i komohia iloko on a, na manao makee, e hana aku no kona pono, o kekahi paha hoi no ka huapala ame ka u‘i maoli no o Magureta a o kekahi no hoi no ka piha o kona moolelo me ke kau maha ame ka walohia nolaila hooholo iho la ua kau nei he mea pono e loaa ka hiliniai piha ana aku a keia kaika mahine iaia; pela wale no e holopno ai, kela manao iloko on a e hoopake ai iaia mai ka poino ae.

            "E oluolu oe e Miss Anola e noho iho ilalo," i kauoha hou aku ai o Kauka Noka, me kela leo mana no ona i hoolohe mai ai o Magureta iaia, a he oiaio i ka wa no a Magureta lohe mai ai i kona leo, haalele aku la i kana wahi e ku ana a hoi mai la no kana wahi i noho mua ai, me ka lalau koke ana aku o Kauka Noka, i ka lima i ma-ui o Magureta a hoomaka iho la e nana me ka hoakaka pu ana aku no na mea e hanaia ai malun o kela lima, a hiki i kona hele hou ana ma e nana a kakau iho la oia i na kuhikuhi, no ka hana ana i ka laau a kapili aku i kela ame keia hora.

            I ka pau ana o ka Kauka Noka kakau ana, hoohele aku la oia i kana kamailio ana ma kekahi mau kumuhana okoa loa me ka hoala hou ole mai i na olelo i pili aku i kahi o ka pilikia o ka noonoo o ke kaikamahine opio a i kona ike ana ua hoi hou mai ka hoihoi ma na maka o Magureta, o kona noi aku la no ia e hookuu mai iaia me ka hooia ana aku @awa paha apau e makemakeia ai oia e hoea mai.

            "Aia kekahi buke maikai loa nau e heluhelu ai, maloko o ko‘u keena e Miss Anola, a manao au aole no e nele ana kou makemake i na mea maloko o kela buke. E hoouna mai anei au i ua buke nei ia oe?" me ka hoomakaukau ana iho o ua kauka nei no ka haalele ana i kana ma‘i.

            "Ina oe e oluolu ana, alaila e hoouna i‘o mai oe i kela buke. malia o loaa ia‘u kekahi mau mea maikai maloko olaila," wahi a Magureta me ka piha hoihoi.

            "O kau wale no e kauoha aku nei ia oe, i ka wa e hoea mai ai o kela buke o kau mea wale no ia e heluhelu ai aole i kekahi mau buke e ae ahiki i kuu hoea hou ana mai a inoa e molowa oe i ka heluhelu ana alaila e hele aku i ka holokaa. me na wahi e pili kokoke ana i ka paka he me kokua mai ka hele holoholo ia oe."

            O kela ka‘u hana molowa loa o ka hele e holokaa o ka‘u hana mau ia a ua pakuwa maoli. Ua hele ka paka a kamaaina ia‘u a o ka hele ana hoi i ka holokaa me kakahi hana maopopo ole, koe wale no ka hoohala ana i ka manawa o kekahi ia o na hana uluhua."

            "Ke ike aku la au ua pololei oe e Miss Anola i ku no ka hoihoi i ka hele ana i ka holokaa, i ka loaa o kekahi hana nui maopopo loa," aka nae iloko o kela manawa i oili koke ae ai kekahi noonoo iloko on a a pane hou mai la

            "E lilo anei owau ke mea nana e haawi aku ia oe i kekahi hana e lilo ai ka hele ana i ka holokaa i mea waiwai?"

            "Manao au, ua ike oe i ka hana kupono loa na‘u nolaila e hoike koke mai i keia manawa, i ka hana au i makemake ai na‘u e hooko ai i lilo ai keia olelo ana i mea waiwai."

            "Aole he kanalua iki, no kou lilo i mea kokua nui no kekahi hana, a e loaa ana no hoi ka hauoli ia oe ma ia mea o ia keia: 'He ma‘i ka‘u e lapaau nei, he kaikamahine oopa ma ka Helu 20 o ke alanui Akea. O ka pilikia nui o kela ma‘i o ia no kona nohopaa loa maloko o ka hale, aole he hanu aku i na ea oluolu a i ole hooholoholoia paha ma kekahi wahi. E hoi aku auanei au a hoike aku iaia, e hoea ae ana oe no ka lawe ana iaia e holoholo maloko o ka paka ma ka hora elua o keia auwina la?"

            "Ae e hoike i‘o aku oe iaia pela, a ke mahalo aku nei au ia oe e Kauka Noka no ka waiho ana mai la i ka malu o kela kaikamahine poino malalo o‘u," me ka haawi koke ana mai o ua o Magureta i kona lima, no ke aloha ana ia Kauka Noka mamuli o ka hauoli maoli no kona lawe aku e hooholoholo i kela kaikamahine oopa ma kela la.

            Lalau aku la no hoi o Kauka Noka i ka lima o Magureta me ka pane ana aku aia hoi ka minoaka ma kona mau papalina: "Owalu ke kupono loa, e hawi aku i na mahalo ana ia oe, no ka hapaiia ana ae o kekahi haawe kaumaha mailuna ae o ko‘u poohiwi." me ka nana pono ana aku o ua kauka nei maluna o ka helehelena huapala o Magureta me ka hoihoi. "Ke manaoio nei au, aole ana e nele ke komohia aku o ka hauoli iloko o ke kaikamahine poino, no keia nuhou kamaha‘o a‘u e lawe aku ana e hoike iaia. O Ame Buruka ka inoa o keia kaikamahine.

            "Ua lawa paha keia mau kamailio ana a kaua e hookuu mai oe ia‘u no ka mea, ua loihi loa ka‘u hoouluhua wale ana aku ia oe e Miss Anola."

            "Aole oe i hoouluhua iki mai ia‘u e Kauka Noka, ma kekahi ano," wahi a Magureta, me ka aneane loa e haawi mai i ka minoaka maluna o ke kauka opio, ka mea ike ole ia maluna on a, no kekahi manawa loihi. "Ke manaoio nei au ua hana mai oe i keia la i na mea maikai wale no e pono ai au" ma kela wahi i hookuu ae ai laua a oili aku la o Reginola Alika iwaho, a noho iho la no hoi o Magureta me ka hele ana aku nae no kahi o ka puka aniani a nana aku la i ka hoi o ke kauka nowaho o ke alanui.

           

MOKUNA XII.

 

            la Reginola e huli hoi la, no ka hele pololei ana aku no ka home i noho ai ke kaikamahine lolo, hoopuka ae la oia i keia mau olelo "Ua pau loa ko‘u pohihihi no ka pilikia o Miss Anola o ia hoi ua aneane e uluahewa kona noonoo.

            "O ka haulehia ana o kela kaikamahine i ke aloha, no kekahi kanaka lapuwale, hui pu me kona piha i ka lili ame ka hoowahawaha no kekahi wahine i pani ae ma kona wahi ua aneane loa e hooliloia kekahi wahine maikai hookahi ma ka honua nei i mea ole, eia nae o ka mea kupaianaha, he maikai loa kona noonoo a oia kekahi o na wahine opio naauao loa a‘u i halawai pu ai. Pehea la ua e hana aku ai iaia? Pehea la e holopono ai ka‘u lawelawe lapaau ana iaia, oiai eia oia iwaenakonu o kahi o ke kumu i ala mai ai ka pilikia i kona noonoo ame kona ola ana?

            "O keia na ninau ano nui loa nana i hoopuhili mai i ko‘u noonoo; no ka mea ua konoia mai au e makaala loa, mai ka loaa ana aku o ka hoohuoi iloko o Miss Anola he kaikunane au no Kanani, ka wahine hookahi ana i lili loa ai, no ka mea in a e loaa lihi aku ana iaia k ike, no ko‘u pili ia Kanani, o ka pau loa ana ia o kona hilinai hou ana mai maluna o‘u a he makehewa na hoao ana e hoopakele ae iaia oiai aole kela e hoolohe mai ana i ka‘u mau kauoha no kona pono.

            "No‘u iho eia au ma kekahi kulana maikai ole loa me he mea la nae ua konoia mai au e hele e ike ia Miss Rinafoda. kela hoaloha o Miss Anola, a hoa kula no hoi o ko laua hele like ana maloko o ke kula hookahi a noi aku iaia e kokua mai ia‘u.

            "I wahi nae e hooko mai ai o Miss Rinafoda i ka‘u mau mea apau e makemake ai iaia e hana, he mea pono ke hoike aku au iaia i ka pilikia maoli i loaa i kona hoaloha, ame ke alahele hoi e palekana ai, mai kela pilikia mai. a o ko‘u makemake maoli o ia no ka ae mai o Miss Anola e haalele iho i ka noho ana maloko nei o keia kulanakauhale."

            I ka hoea ana aku no ka home o ke kaikamahine lolo, hoakaka aku la oia i na mea apau a laua o Magureta i hooholo ai i ka wa i lohe aku ai o kela kaikamahine, e laweia aku ana oia i ka hooholoholo maloko o ka paka, ua nui kona hauoli, a i aku la kana hele ana no ka home o Miss Rinafoda.

            I ka hoea ana aku o Reginola ma ka puka o ka home o Miss Rinafoda, haawi aku la oia i kona pepa inoa i kekahi o na kauwa lawelawe o ka hele ana mai e hui pu me ia, me ke kakau ana iho nae o ua kauka nei i kekahi mau huaolelo pokole me ke penikala e hoike aku ana ia Miss Rinafoda, no kona makemake e loaa he kamailio pu ana mawaena wale iho no o laua aole hoi iwaena o kekahi poe lehulehu o kela home.

            He manawa pokole wale no kela kakali ana a Reginola, oili mai la o Miss Rinafoda iwaho a mahope o ka haawi ana o ke aloha me na kamailio mua o ka halawai ana, hoomaka koke aku la no o Reginola e hoakaka i ka manao o kana huakai i hoea aku ai.

            Kamailio aku la oia ia Miss Rinafoda, no ka ulia kaa uwila i loaa ia Miss Anola, pela me ke kaa ana mai o ka lapaau ana i kela kaikamahine malalo o kona malu; alaila i aku la:

            "He mea na‘u e kaumaha loa nei ka hoike ana aku ia oe e Miss Rinafoda, iloko o keia mau la a‘u e hele nei e ike i ko hoaloha ua loaa mai kekahi hoomaopopo ana ia‘u aia kekahi mea ano nui iloko o ka noonoo o kela kaikamahine a in a aole e loaa koke ana na lapaau akahele ana iaia iloko o keia manawa alaila aole he manaolana i koe no kona pono, aka e lilo oku ana oia i wahine pupule.

            "No kela pilikia a‘u i ike ai maluna o keia hoaloha ou pela @u i hoea mai la ua ka hui pu ana me oe, a noi aku i kou oluolu e lilo oe i mea kokua mai ia‘u ma kekahi mau mea ano nui e pono ai."

            "O kena pilikia au e hoakaka mai nei e Reginola ua loaa pu no ia‘u ka hoomaopopo ana," i pane aku ai o Miss Rinafoda. me ke kaumaha maoli o kona helehelena. "I ko maua wa e noho like ana maloko o ke kula hookahi oia kekahi o na kaikamahine piha hoihoi a laiwa-le no hoi aka i ko‘u ike hou ana aku iaia ua loli loa ae kona mau ano apau. Ma ka‘u koho wale iho no. malia paha ua loaa kela ano iaia mamuli o ka make ana aku o kona mau makua, aka nae ke nana ae ma kekahi ano, he mea pau wale a‘e no ke kaumaha no na makua o keia nae hoi ke oi mua aku la ka hoopilikia maluna on a. he oiaio kau i olelo mai nei ioa aole e loaa ana na lapaau akahele ana iloko o keia manawa e pupule maoli ana oia."

            "Pehea, aole anei oe i ike i kekahi mau mea e ae e hoopili kiaia aku ai kona noonoo?"

(Aole i pau.)