Ka Nupepa Kuokoa, Volume LVII, Number 12, 21 March 1919 — PAA KEKAHI I'A MALIHINI LOA I NA KEPANI LAWAI'A. [ARTICLE]

PAA KEKAHI I'A MALIHINI LOA I NA KEPANI LAWAI'A.

He i'a nui eleele ka unahi a i ano like me ka Hapuu, nona ka loa he eono kapuai, elua ame hapa kapuai ka laula o ke kino ma kahi manoanoa loa, a he 350 paona kona kaumaha, ka i lou i ka makau a na Kepani a laweia ae i ka makeke kuai i'a ma ka po Poaha aku la o ka pule i hala, a malamaia ahiki i ke kakahiaka Poalima mai a ma ia manawa i pa'iia ai kona kii, no ka hoopukaia aku maloko o ka Advertiser. O ke kolu keia o ka paa ana o keia ano i'a mawaho aku o Oahu a laweia mai iuka nei o ka aina, elike me ka mea i hoakakaia ma ka moolelo.

He i'a ka i ano like loa me keia ka i laweia ae i kula ma ke kaikuono o Hilo aneane he 15 makahiki i hala aku nei. He moku o Martha Davis ka inoa, ka i a ia e ke ahi a ua piholo maloko o ke awa, a i lilo ole ai ia moku i mea alai i na moku e komo aku ana i ke awa ua hoopa-huia ia moku me ke kiana pauda, a mamuli paha o ka ikaika o ke pa-hu ana a ka pauda ua make kekahi heluna nui o na i'a a kakala no hoi kekahi, a mawaena o ia mau i'a i make ai, he i'a ano i like me keia ka i laweia ae i kula, a ma kona kaupaonaia ana he 500 paona kona kaumaha, hookahi haueri ame kanalima ka oi aku o kona kaumaha i ko keia.