Ka Nupepa Kuokoa, Volume LVII, Number 13, 28 March 1919 — Page 3

Ka Nupepa Kuokoa

 

NUPEPA KUOKOA, HONOLULU, T. H., POALIMA, MARAKI 28, 1919.

 

He Moolelo no

 

Oliva Esekota

 

Mai ke Kulana Haahaa mai Ahiki i ke Kulana Kiekie—He Moolelo i Owili Pu Ia Iloko o ka Ehaeha ame ka Hauoli.

 

No kekahi mau sekona, aole e hiki ia Oliva ke nee aku imua, no ka mea o ka hione maloko o kela rumi ana i ike aku ai, he hiona ia i malihini loa i kona mau maka, he hionao ka nani ame ka maiau o na mea e waiho mai ana imua o kona mau maka.

Oiai no nae o Oliva e ku malie ana, lohe aku la oia i ka lea o kekahi mea e kamailio ana, ma kana hoomaopopo iho, o kela leo ana o ka lohe ana aku:

“He keu aku ka pienaena o ko’u mau lio i keia po aohe wa a kahuli ke kaa, o ka piha makaala maoli no o Keoki, pela maua i pakele ai. O ko maua holo mai nei no hoi ia a kokoke ma kahi o ka puka-pa ua puiwa ae la na lio, eia ka auanei, he wahine opio, e ku ana ma ka aoao o ke alanui, a ia komo pono ana mai nei hoi iloko o ka ululaau, oili hou ae ana ua mea hoopaha’oha’o, aohe no he wa a kahuli ke kaa o maua.”

Na kela Mu olelo a Oliva e lohe aku nei, i kono mai iaia e nana aku ialoko o ka rumi, a ike aku la oia i kekahi wahine aoo, i kahikoia me kona lole silica, e noho ana maluna o kekahi noho paipai i hele a nelunelu i ka pulu, a mamua pono aku hoi i kona alo, e noho mai ana he kanaka opio, nona kekahi helehelena u’i, a huapala ana e hiki ole ae ai ke hoohalike, i kona lua ma kela aina.

Ua akoia kona lauoho a pokopoko, elike no me kea no o na lauoho o na kane, iloko o ia au kahiko, ua hele iho na lauoho mamua o kona poo, a uhi iluna o kalae, he hiona e hoike mai ana i ka hiehie am eke kilakila o kona kulana.

“Ke ole au e kuhihewa, o na mea a maua o Keoko i ike mai ai ma ke alanui, o kou poe kanaka no ia e huli hoi ana no ko lakou mau wahi,” alaila alawa ino mai la ka nana ana a ua kanaka opio nei ma kahi o ka puka, a no ka Manawa mua loa, akahi no oia a maopopo, eia ka he mea e  ae kekahi mawaho o laua maloko o kela rumi.

I ke kau pono ana aku o na maka o ua kanaka opio nei maluna o ka helehelena o Oliva, ua puapua’i koke mai la ka ula ohelohelo, lamalama ae la no hoi kona mau maka, ke hoomopopo aku la ka Lede Riva, i kela ano maluna o ke kanaka opio, a hui pu mai la kaua nana ana ma kahi o ka puka, me ke kahea ana mai:

“O oe ka ia e Miss Esekota, komo mai iloko nei,” me kona nana ana aku i ke kanaka opio, a i aku la: “Mai hele oe he kaikamahine humuhumu kela, i hoihoi mai nei paha i kuu lole o ka haawi ana aku iaia hana ikela mau la aku nei.”

“Aole paha i kupono ko’u lole e komo mei, no ka noho ana iho me olua e na lede, aka hoi, e kalaia mai no au, a oiai owau hookahi wale no ke keonimana maloko nei i keia keena , e ae mai e lilo au i mea hookipa mai i kau malihini,” o kona ku ae la no ia iluna, a lalau mai la i ka pahu e paa ana ma kekahi lima o Oliva, me ka pane pu ana mai:

“E haawi mai kena pahu pepa ia’u,” alaila lalau aku la oia i kekahi noho a uwai mai la imua, me ka i hou ana ae: “E oluolu oe e Miss Esekota, e noho iho ilalo,” eahi ana ma ke ano paa rula, me he mea la o kekahi o na wahine o ke kulana kiekie kana o ka hookipa ana aku la, a i ole, o ka Lede Riva no paha.

Haka pono aku la ka Oliva nana ana maluna o na maka o ke kanaka opio, me kona hoopuka ole aku he hookahi huaolelo, ke wale no kona kunou ana aku, e hoike aku ana i kona mahalo, no ka paneeia ana mai o ka noho nona, aka ke ike mai la nae ka Lede Riva i ka hoohihi ame ka hoohie ma na maka o ke kanaka opio, a o ia kana o ke kamailio ana mai:

“Mai hoopilikia i kou noonoo e Kale,” me ka nana kee ana aku ia Oliva, me ka piha hoowahawaha a hookae.

“Heaha auanei ka hoopilikia o keia hana i ko’u noonoo, ke hauolli loa nei au, no ke kaa ana ma ko’u aoao, ka hookipa ana mai i kau malihini e ka Lede Riva. Aia anei kekahi mea maikai maloko o keia pahu pepa,” me ke kau ana iho o kekahi lima ona maluna o ka pahu, a nana aku la no hoi ma ka helehelena o Oliva, me kela hoihoi mau no maluna o kona mau maka.

“O ka waiwai maloko o kena pahu, he mea ia i pili i na wahine e makehewa ai kou nana ana iho,” i pane mai ai ka Lede Riva, me ka hoao ana mai e minoaka. “E pono oe e hoi noloko o kou rumi e Kale!” alaila hookani aku la ua wahine nei i ka bele kahea i ke kauwa, a i ka hoea ana mai o ka Paele, nana i hookipa aku ia Oliva, i mai la: “E hoikeike mai i ka rumi o kou haku, i hoi aku ai oia no ka wekewehe ana i kona maul ole o ka hele ana aku nei i ka holokaa.”

 

MOKUNA EKOLU

 

O keia kanaka opio e ka makamaka heluhelu o Kale Vikona Heaka kona inoa, ua hoopomaikai mai ke Akua i keia opio, aole wale i ka helehelena u’i a huapala, aka i ka waiwai pu kekahi. Elike no me ka u’i o kona helehelena, pela no i ukali pu aku ai ka oluolu, ka lokomaikai ame ka waipahe, a e kona ano, he hauoli mau na kona helehelena i na wa apau aia hoi ka oiaio iloko ona, a oia no hoi kekahi o na kanaka koa a maka’u ole.

O kela mau haawina maemae loa a ke Akua i hookau mai ai maluna ona, aole ia i lilo i mau mea makehewa, aka ua hoohanaia aku ia e keia kanaka opio me ka waiwai loa Iwaena o na kanaka apau o ka pohai elike me ko keia keiki opio, oia hookahi ka mea makemake loa ia, i kau a mea o ka oluolu, ka waipa-he, ame ka piha hauoli mau. I ka wa e hoalaia mai ai he mau kumuhana, e lilo ai i mea na kekahi poe kanaka opio e huhu a e kuaki ai, aole loa ia ano maluna o keia kanaka, a ke haule iho no ma na hana kokua, o keia no ke kiekie ma ia mahele, e haawi ana oia me ka minamina ole, me ka nana ole i ka nui o na noi e hoea aku ana imua o kona alo.

E ikeia ana oia e hele ana i ka holoholo maluna o kona lio ulaula i kekahi Manawa, a i kekahi Manawa, e loaa ana oia me kona mau hoa maloko o ka hale aina, a ina ma kona home kuaaina, e hoohalike ana oia iaia iho me na kanaka o kela wahi, he hookahi no ke kaka pu ana iluna o ka a mauu manienie a huli kea lo ilalo, me ke puhi ana i kona ipupaka nui.

Elike nae me ka rula i ike mau ia, no kanaka elike me kela kea no he hana paakiki no lakou ka noho ana, me ka mare koke ole i ka wahine, no keia kanaka opio nae, ua kaokoa loa oia mai ka nui mai o na kanaka i like ko lakou ano me ko ia nei.

Iloko o ka makahiki mua o ko Kale Vikona komo ana mai iloko o ka puulu o ka poe lalawai, e huikau pu ana hoi me na kaikamahine opio huapala, a na makua waiwai, ua hoohiki okoa ae kekahi poe, aole e loihi na la a lokou e hana mai ai, o ka haulehia no ia o keia kanaka opio iloko o ke aloha, a mare aku oia me kekahi kaikamahine opio.

Ua lilo nae ia mau wanana ana a lakou i mea pololei ole, no ka mea iloko o na makahiki ekolu o ke komo ana aku o keia kanaka opio, iloko o na anaina o kela ame keia ano, aole loa he wahi noonoo iloko ona, no ia mea he wahine. Iloko o keia mau makahiki ekolu, aole loa he wahi loli ae o kana mau hana, ame kona mau ano he ia mau ia i na wa apau. I ka Manawa e halawai ai me na kaikamahine opio, e hoike mau aku ana oia i kona mau ano oluolu, aole he koakoa o kekahi ma ikekahi mai, iloko o kona noonoo, aka nae ma ka aoao o na kaikamahine opio, aia ka hoohie ame ka hoohihi iloko olakou kahi i noho ai, e kakali wale mai ana no o ke noiia aku e lilo mai i wahine na ia nei, he ole nae ka puai aku he hookahi hualelo o kela ano, a ua lilo hoi na manaolana o na makuahine i mea ole.

Mamuli o keia mau ano o ua kanaka opio nei, ua kappa okoa mai kekahi poe he kanaka oia i nele ia mea he puuwai, o kana mau hana maikai, o kona mau ano alooalu, he mau hana wale no ia mawaho, aka maloko aku nae o kona puuwai, aia malaila ka uahoa kahi i noho ai. Ma ka manao koho wale hoi o kekahi poe, o ke kumu o ka punihei ole aku o ka noonoo o keia opio o na kaikamahine u’i, ua paa mua oia i ka hoopalauia me kakahi kaikamahine nona ka inoa o Polena Riva, iloko o ko laua wa liilii loa, ka moopuna wahine a ka Ela Riva, o ka mea oiaio nae, he mau kohokoho pololei ole ia.

O ka mea oiaio loa, aole he hookahi kaikamahine i hiki ke kaili aku i na manao hoohihi o keia kanaka. O ka hapanui o kona Manawa, e hele mau ana no oia me ka Lede Riva mana wahi apau, e hele pu ana ma na halekeaka, pela hoi i ka holoholo maloko o nap aka, e paani pu ana ma na hana hoohauoli apau, aka nae, ua mamao loa kona noonoo, main a wahine mai i like ole ka hapanui o na kanaka opio.

O ka makuakane kekahi o keia kanaka opio, o ka Makaikiu o Livamoa, i hele a piha i ka hoonaukiuki, no ka uahoa o kana keiki o kona makemake loa, o ia no ka ike aku i kana hunona wahine a e hii moopuna hoi oia, mamua o kona moe ana aku ilalo o ka honua, a no ka hiki ole no iaia ke uumi iho i kona huhu i kekahi Manawa, kamailio okoa mai la i kana keiki, no ke koho koke ole i kekahi wahine nana.

“I ko’u wa he kanaka opio aole au i hoohakalia iho i ka mare ana i ka’u wahine, he oi ae ko’u opiopio imua ona, mamua o kuu mare ana, a o ka mea oiaio, he mare ka ohana Livamoa i ko lakou wa opiopio. Ina ke kau nei kona noonoo maluna o Polena Riva, alaila o keaha kana e kakali wale nei a hala keia mau makahiki loihi. He mea pono paha ia’u ke kauoha aku iaia e holo mai ianei, a kamailio no keia mea!”

Ua hoea i’o aku no o Kale Vikona e  ike i kona makuakane o ka mea apiki nae, o kela manao uilani iloko o ka makuakane, no ka mare o kana keiki i ka wahine , aole loa he hiki iaia ke hoopuka mai, aka nae he mau la mahope mai, a no kona noonoo nui ole paha no kela kumuhana, ninau wale mai la no oia i kana keiki, i ka i ana mai:

“E Kale, kuu keiki, heaha ke kumu o kou mare ole ana i ka wahine? Ua kanaka makua maoli oe, ina no ka loaa o kau wahine, o ka pau no ia o kou auwana hele ana i o a ia nei, a noho iho i kahi hookahi me kou ohana.”

“He ninau maikai kena au e kuu makuakane i waiho mai la imua o’u, a o ka pane, o ia no ka loaa ale ana o kekahi mea kupono a’u i manao ai e lawe mai iaia i wahine mare na’u.”

“He keu aku maoli no kou ano e, e kuu keiki!” i pane mai ai ka makuakane me ka luliluli ana ae o kona poo. “O na kanaka opio elike na makahiki me kou e kuu keiki, aole loa lakou e kiola wale ana i na Manawa maikai no ka lawe koke ana mai i wahine na lakou e kiola wale ana i na Manawa maikai no ka lawe koke ana mai i wahine na lakou; ia oe ka auanei keia, he piikoi maoli no kou a kau wahine e makemake a!”

“He mea makehewa wale no nae, na ka makuakane, ka hookikina mai ia Kale, e mare i ka wahine, no ka mea, ua hanauia mai o Kale me ka laki, oiasi, he makuahine waiwai kona, a ua holo aku na waiwai apau o kona makuahine, maluna ona, me ke kauka’i ole aku i na waiwai o kona makuakane, e loaa ana iaia he loaa makahiki maikai, a o kekahi kumu hiki ole ia i ka makuakane ke hana mai ikekahi mea e ku-e ana i ka inanao o kana keiki.

O ke ano o ke ola ana o keia keiki opio, e hauoli mau ana oia, o kekahi kumu nui o kona hauoli, o ia no ka nui o kona waiwai, ke kiekie o kona kulana, ame ka hanohano, nolaili, ma kana mau mea apau e makemake ai, e loaa ana ia i ka namawa pokole loa, eia nae aole oia i like me na kanaka e ae ka piha uhauha.

Ma kana mau wahi apau e hoea aku ai, e apoia mai ana oia me ke ohaoha, e hopu mai ana kela ame kanaka opio i kona mau lima, me ka makemake loa e lawe aku iaia i hoaloha; ke halawai aku hoi me na wahine opio, e hoohie mai ana lakou iaia, me na minoaka ma na papalina nohea; e kakali mai ana o ka ia nei hoopipili aku ma ka aoao o ke kahi o lakou.

Ma na anaina hauoli apau, me he mea la, e kau nui ia mai ana ka noonoo maluna o keia kanaka opio, ma kea no, aia a oia pu kekahi alaila lilo la ia anaina hauoli i mea mui a i mea holopono hoi. Ma ka hapanui o na aha hoohauoli, e hoea mau aku ana no oia, aka nae, iloko o ia mau aha apau aole loa ana wahi oi aku o ka hauoli, e hoea mau malaila, ma kahi no ia o ka Lede Polena Riva.

Maloko o ka home o ka Lede Polena Riva, e hoomakaukau mau ia ana kona mau rumi, ua like kana mau huaolelo me ke kanawai, i ka hoolehe o na mea apau iaia, a o kona mau makemake apau, e hookoia ana ia me ka hakalia ole.

Ma ko kakou Manawa i hookamaainaia aku ai me keia kanaka opio o kona holo ana mai no ia, no ka hoomaha ana mai Ladana mai, maluna o kona kaa, me kona mau lio pienaena, no ka mea aole no he loihi loa o Ladana, mai keia kulanakauhale aku. E noho ana no kela kanaka opio ma Ladana a uluhua i na aha hulahula, na hana keaka, na paina me na aha hauoli, o kona Manawa iho la e holo mai ai no keia wahi, no ka hookaawale ana iaia iho, mai kela mau hana mai.

Mamua nae o kona makaukau ana, ma kana huakai haalele aku ia Ladana, hoouna mua mai la oia he kelekalapa i ka Lede Polena, e hoea mai ana oia, nolaila, he Manawa pokole, aia na kauwa ke hoomaemae la i kona mau rumi, malalo o ke alakai ana a ka Lede Fanako, he makuahine hanauna no ka Lede Polena Riva, a o ka mea no hoi nana e kiai i kela wahine opio.

Aole no he hana ano nui o ka noonoo ana aku, e hoi mai a hoohala i kekahi mau la ma kela wahi, koe wale no, ka hele ana i ka lokowai e lawai’a ai, ma kea no hoohala Manawa, a i ole, ka hele ana paha i ka hololio o keia mau hana nae a elua e hooko mau ana o Kale me ka oi aku o kona hauoli, mamua o na anaina hoohauoli a hoolealea oloko o ke kulanakauhale o Ladana.

“Ina aole he poe e kipa mai ma ko olua home nei e Polena, heaha la ko olua hopena,” i pane hoomakeaka wale aku ai no o Kale i ka Lede Polena Riva, ia lakou e ai ana maluna o ke pakaukau ma kekahi ahiahi, He elua wale iho no olua mau wahine, me na kauwa o kwia wahi, a iloko o ka pule holookoa, aole he maopopo iki ia’u o ka hana, nana e hoohauoli mai i ko olua noonoo.”

“Minoaka mai la ka Lede Polena Riva, me ka awihi ana aku ma kahi o kona makuahine hanauna e noho mai ana ma kekahi aoao mai o ke pakaukau, a i hou mai la: “E manao ana anei oe ua lilo kou hoea ana mai nei i mea no maua e hauoli ai?”

“Ina no paha aole i lilo ko’u hoea ana mai nei i mea hoohauoli aku ia olua e na lede, no olua no ia kuleana, aka no’u nei la, he keu aku a ko’u hauoli ma keia wahi, mamua o na wahi e ae ma ka honua nei.”

“Malia paha no kahi Manawa uuku wale no, i lilo ai keia i wahi hauoli, o ka hapanui o ka Manawa, ua like pu me kahi i noho ole ia e na kanaka,” i pane mai ai no hoi ka Lede Polena Riva.

“O keia kahi helu ekahi loa o ka maikai, ame ka u’i ma ka honua holookoa,” i pane hou aku ai o Kale, me ke kikoo ana o kona mau wawae i o a ia nei, aia no hoi kona mau maka ke nana la i na mea nami like ole maloko o ka rumi.

“E kala mai ka hoi oe ia’u e ka Lede Polena, no ko’u poina loa, i ka haawi ana aku i na hoomaikai amen a mahalo ana no ka u’i o kena lole au e komo mai nei. O kekahi nae paha kena o na lole mai ka halehuai mai o Woka, ea?”

Minoaka malie iho la ka Lede Polena, no ka mahalo ana aku o Kale i ka u’i o kona lole, me ka pane ana mai: “Pehea la kou manao, ina e olelo aku ana au ia oe, o keia kekahi o na hoike maopopo loa, no ke kiekie o na kalena i ka poe humuhumu o keia wahi? Aole keia lole i hanaia maloko o ka halekuai o Woka, aka maloko ponoi nei no o Hakopa keia lole kahi i humuhumuia ai me ka maiau loa,” alaila hilinai mai la oia iluna o ke pakaukau, me ka peapeahi malie ana, aia hoi ka haaheo ke nohoalii la maluna ona.

“Ina maanei nei i hanaia ai kena lole ea, alaila o ka mea nana i humuhumu me ka maiau loa, oia kekahi o na meai loaa he kalena kiekie, iwaena o na tela humuhumu apau, Pehea, o kena anei ka lole a kela kaikamahine opio i hoihoi mai ai ma ka po aku la i hala, ia’u maloko o kou rumi? Ke poina loa nei au i kona inoa.”

“O ua lole nei no keia,” wahi a ka Lede Polena, me kona kamailio ole mai i ka inoa o ke kaikamahine nana i hana, “Ke hauoli loa nei au i ka lilo ana o keia lole i mea nau e makemake ai e Kale.”

“He oiaio, he keu aku a ka u’i ame noeau o ka hanaia ana o kena lole ou. Ma ka’u hoomaopopo aku nae i kela kaikamahine opio, nana i humuhumu i kena lole, aole oia i like me na kaikamahine e ae, aia ma kona helehelena kekahi hiona e hoike mai ana i kona kaokoa mai ia lakou mai apau.”

No ka hoike okoa ana aku o Kale i ka nui o kona mahalo no Oliva, oiai no ua kaikamahine nei, ka laua mau mea e kamailio la, ua awiwi ae la kana, peapeahi ana, elike me kea no o ka poe i loaa na manao pihoihoi, a pane mai la nae:

“O Oliva Esekota ka inoa o kela kaikamahine opio, aka aole nae o’u ike aku i kekahi hiona ano e maluna ona, elike me kau e kamailio mai nei, koe wale no ka like o kona mau ano apau, me na kaikamahine e ae. O kela kekahi o na kaikamahine lolo, aole anei pela kou manao e mama,” me ka hul\i ana ae o ka Lede Polena imua o kona makuahine hanauna.

“Ua kulike loa ko’u manao me kou e kuu kaikamahine,” i pane mai ai no hoi kona makuahine, me ka hoolalau ana mai i kana kamailio ana” “E pane aku anei au i ke pa meaono i hanaia me ke jele?”

Hoole aku la o Kale, aole ona makemake meaono, ia wa i ku ae ai na wahine iluna, a o ia ka ua o Kale o ka ninau ana’aku: “E haalele hookahi iho ana anei olua ia’u?” me ke ku pu ana ae no hoi o ua haku opio nei, no ka wehe ana i ka puka no na lede. “Iloko o na minuke he umi, e hui pu aku ai au me olua, no ka inu kope ana,” alaila kahea aku la oia i ke kauwa e hele mai oiai he makemakekona e kamau wahi kiaha waina. “E kii aku oe a lawe mai i hookahi omole waina maikai loa no’u!” wahi ana, i ka wa i hoea mai ai ke kauwa, me kona hoi ana ae a noho maluna o kekahi noho paipai, me ka noke ana i ka akaaka:

“He keu aku no paha kea no e na wahine ina aole he hoihoi iloko o kekahi wahine no kekahi, e hoike okoa mai ana no oia, ma kona mau ano ame kana mau olelo i ka hoihoi ole, me ka piha i ka hoowahawaha, O keia mau wahine a elua, ma ko’u koho aku, he hookahi wale no mea ano nui iloko o ko laua noonoo no kela kaikamahine opio, o ia ka lolo, oiai nae, o ka mea oiaio loa, he kaikamahine oia, me na kalena kiekie loa, e hiki ole ai i kekahi poe wahine o ke kulana kiekie ke ukali aku mahope ona.

“He keu aku a ka mea kupaianaha loa, ma ka Manawa mua no a’u i ike ai i ka helehelena o keia kaikamahine, ua komo koke ka hoohiki iloko o’u nona, ka mea i loaa ole ia’u no na kaikamahine e ae; a malia paha no ko’u kane ana, aole hoi he wahine, pela paha au i mahalo aku ai iaia, a ina no he wahine hou aku kekahi e hoea mai ana, a ike i keia kaikamahine, e like ana no ko lakou ano apau, ka piha hoowahawaha i ka poe malalo iho o lakou, aia no a o lakou ka lokou e noke ai i ka pai, alaila hoihoi.

“Aia kekahi mau ano iloko o kela kaikamahine, e umeia ai ka manao hoohihi o kekahi kanaka, mawaho ae o kona helehelena u’i a huapala; owau no ka’u e ike maoli nei i ka hiki ole ia’u ke hoopoina i kela helehelena.”

I kela wa i hoea mai ai ke kauwa, me ka omole waina, o ka ninini iho la no ia o Kale a piha ke kiaha, inu ae la me ka noke p uana ae i ka akaaka a hooho ae la: “Ina e hele mau mai ana au i ka holoholo i keia wahi, aole ana e nele ko’u kamaaina pono me kela kaikamahine, a malia ia Manawa aku e loaa ai he wa e papaleo pu ai me ia.”

O ka inu hoi ia o ua o Kale a pau elua kiaha, ku ae la iluna, me ka hele holoholo ana aku, mamua o ka hoi ana mai e inu kope me na lede.

Ia komo ana aku a Kale maloko oke keena hookipa, e noho mai ana ka Lede Polena ma kahi o ka piano a i ka ike ana mai i ke komo ana aku o ke kanaka opio kaomi malie iho la kona mau manamanalima i ke ki, a huli mai la nana ia Kale, aohe he hoomau aku i kana hookani ana, nolaila hele pololei loa aku la o Kale a ku iho la ma ka aoao o ka piano, me ka pane ana aku:

“Manao mai nei ka hoi au, ua hiamoe la olua,” me kona noke okoa ana ae i ka akaaka.”

“Me kou ike mai no ka hoi i ko maua ala aku, o kou olelo koke mai mei no ia, i ko maua hiamoe!” wahi no hoi a ka Lede Polena. “E hoi aku noluna o kou noho, Ahiki i ka laweia ana mai o kou pola kope e ke kauwa a malia ua makemake paha oe e hele holoholo iwaho o ka lanai e puhipaka ai aka ua hiki no ia o eke puhi mai i kou ciga maloko nei o ka hale, aole he pilikia o mama i ka paka.”

“Ua hiki no ia’u ke hoomanawanui me ke puhipaka ole, aka e noho ana au maloko nei e nanea pu ai me olua. I ka Manawa hea oe e holo ae ai i ka holoholo make kulanakauhale o Ladana?”

Hilinai aku la ka Lede Polena ihope o kona noho haka pono mai la hoi kana nana ana maluna o Kale a i mai la: Manao au, aole he loihi loa o ka Manawa i koe o ko maua hele aku no ia i ka hoomaha ma Ladana, no ka mea ua ano molowa o mama, i ka noho ma keia wahi, a o ka mea oiaio no, ua like pu maaua me kekahi mau mea, i maa ole i ka noho ana iwaena o na kanaka.”

“O ka pono no hoi paha ia, o ka hoopilipili aku ma kahi mui o na kanaka, aole o ka noho malie wale iho no i kahi hookahi, ua like maoli no olua me na luahine. Heaha ka mea hoohakalia i ka hele ana ae i ko makou wahi? Ua manao au e holo aku no Brikona i ka holoholo i keia mahina ae, aka ina no ko kakou hele like i Ladana, alaila e hoopau ana au i ko’u manao hele holoholo, a no kekahi manawa okoa aku; a e lilo olua i mau malihini hanohano loa na’u, me ka lawe hoomakaikai aku ia olua ma na wahi apau.”

“Ke lohe mai la no oe e mama i ko Kale manao, pehea, e hele anei kaua no Ladana?” me ka leha ana aku o ka nana ana a ka Lede Polena, ma kahi a kona makuahine e noho hoola’i mai ana maluna o kona noho.

“Aohe wahi mea a pane iki mai o ka makuahine hanauna o ka Lede Polena, noaila noke okoa ae la o Kale i ka akaaka, me ka pane ana ae: “Ua oleloia , o ka noho mumule wale ana mai o kekahi mea, ua like pu no ia me kona ae ana.”

I kela Manawa nae i komo koke mai ai kekahi kauwa, a haawi mai la he kelekalapa ia Kale: “Nawai mai nei la hoi keia kelekalapa, aole au i manao, he mea kekahi i ike i ko’u hele ana mai nei no keia wahi. O kuu makuakane wale no ka mea i maopopo, aka aole nae keia o ka manawa hoea mai o kona ma’i kau, ke kanalua loa nei au i ka mea nana keia kelekalapa o ka hoouna ana mai nei,” me ka paa malie no o Kale i ka wa-hi leka, aole he uhae ae, i ike iho ai oia i na manao maloko.

“Akahi ka hoi kou maopopo ole i ka mea nana i hoouna mai nei i kena kelekalapa ia oe, e oluolu ana anei oe, e haawi mai na’u e wehe aku i ka wa-hi?”

“Me ka mahalo a nui ia oe e ka Lede Polena , e wehe i’o mai oe i ka wa-hi a Kale , me ka akaaka  pu ana ae, o ka mea i nohoalii mau ka hauoli maluna ona, i na nanawa apau.

Me ka lima palanehe lalau mai laoia i ka wa-hi leka, a wehe ae la no hoi i kekahi palapala mailoko ae, a heluhelu mai la me ka leo nui:

“E kuu Haku Kale Vikona heaka, ua noke au i ka huli ia oe, aole he loaa iki, a ma ka ulia pomaikai wale no, i halawai ai au me kakahi o kou mau hoaloha, a nana i hoike mai ia’u, ua hala aku ae i ka holoholo ma Hakopa. I wahi e lele ole ai kou oili, ua konoia mai au e hoouna aku i keia kelekalapa ia oe, no ka hoike pu ana aku e hoea aku ana au ilaila, mamuli o kekahi hana ano nui; nolail e makaala mai oe no ko’u hoea aku i ka wa pono.—Haka Derika.”

I ka maopopo pono ana aku ia Kale o ka manao maloko o ke kelekalapa, ua noke ae la oia i ka akaaka, a o ia ka ka Lede Polena o ke kamailio ana mai:

“He keu aku maoli kea no e o keia kelekalapa,” me ka alawa hou ana iho nana i ke kelekalapa. “Owai keia mea o Haka Derika?”

“O kou hoohewahewa koke iho la no ka ia e Polenta! Aole anei ou hoomanao no kela keonimana pilalahi, ma ka aha hoolauna a hoohauoli, i malamaia ai maloko o ke Kakela?”

“O kela kanaka loihi anei, me ka lauoho apiipii, e noke ana i ka hana keaka, me ka noke o na kanaka i ka akaaka, i kana mau hana?”

Aole e hiki ia Kale ke uumi iho i kona aka, a o ia kana i pane aku ai. “O kena keonimana au e hoakaka mai nei, o ua kanaka nei ia, o Haka Derika, a i hoike aku au i oe ea, o kela kekahi o na kanaka eleu. Aole anei ou hoomanao i ke kamailio ana mai o ke kiaaina, o Derika hookahi wale no kana kanaka makemake loa, e kokoke aku ma kona aoao, i ka wa e hoea mai ai o kona ma’i huki?”

“Ae, akahi no au a hoomanao mai la, oia ka kela kanaka maikai o kana mau olelo ke kamailio mai! Ina o Haka Derika ia, alaila he keu aku maoli ka poina o kona inoa ia’u.”

“Ae, o ua kanaka la ia, a ke hauoli loa nei au no kona noea mai a he hookahi hoi ko kakou hoohala like ana i kekahi mau la maanei, e mehameha o ka Lede Polena, aka no ka nui o ka leo o Kale e kamailio ana, puohomai la oia, a haawi mai la i kona hoomaikai no ka kipa mai o kekahi malihini hou, a o ia kana o ka pane ana mai:

“Ina he, hoaloha kela nou e Kale ea, alaila ua hamama mau na ipuka o keia home, no ka hookipa ana mai i kou mau hoaloha.”

“Ma ke kaaahi hea oia e hoea mai ai, e nana pono hou iho ana oe i ke kelekalapa e Polena?” i ninau aku ai o Kale, me ka hoopa malie ana aku i ka lima o ua lede nei.

“Aohe mea moloko nei o ke kelekalapa e hoakaka mai ana, no kona kaaahi e hoea mai ai, o kana wale no i hoike mai nei, he hana ano nui kana i makemake ai e ike ia oe.”

“O ka hora ehia ka Manawa ku mai o ke kaaahi mai Ladana mai, no ko oukou wahi nei?”

“He elua wale no Manawa ku mai o ke kaaahi i kapo, o ke kaaahi mua loa, ma ka hapalua o ka hora eono, a o ka lua o ke kaaahi, ma ka hora eiwa.”

“Ina pela, aole he Manawa no ka hoomakaukau ana i ke kaalio, he manawa hoea wale mai no no ke kaa, oiai ke nee nei i ka hora eiwa. Owau no ke hele wawae aku a hoea i ka hale hoolulu, he umi-kumamalima wale no minuke e hele ai, a ? nohono olua i ka hale nei, ahiki i ko maua hoea ana mai, ina hoi no kona kau mai ma kela kaaahi.”

Haawi like aku la na lede i ko laua ae, no kona hele ana e hui pu me kona hoaloha, o ka lalau ae la no ia i kona kuka koloka loihi, kau ke ciga i ka waha, o ka papale ma kona poo, o ka oili aku la no ia iwaho, a kamoe pololei aku la no ke alanui, e hoea aku ai i kahi i ku ai o ka hale hoolulu kaaahi.

Ke hakilo pono loa la ka Lede Polena ia Kale i ka hele, me ka nui o kona mahalo i ka haku opio, a o ia kana o ka huli ana mai ihope, a kamkailio mai la i kona makuahine:

“Me he mea la ka ho’i, aole he wahi ano kaumaha iki iloko o ka Haku Kale, he hoihoi mau kona ano i na Manawa apau, a ma kana mau wahi noa apau e hele ai, he like wale no kela ame keia mea iaia,” alaila nui iho la ka hanu o ua wahine opio nei.

“Auhea oe e kuu kaikamahine,” wahi a ka Lede Panako, ua kulike ko kaua manao, no na ano apau o ka Haku Kale. Ua kaokoa loa keia kanaka opio mai ka nui mai o na kanaka e ae i like aku na makahiki me kona, a me he mea la ma ka’u koho wale aku, ua paa mua no kona manao, no kana, mea i makemake ai, o ke kumu iho la ia o ka hiki ole ana i na wahine opio, ke pahele i kona noonoo.”

“Ke mhalo aku nei au no kena mau hoakaka au e kuu makuahine,” i namunamu liilii iho ai ka Lede Polena. “Ke hopohopo loa nei au, no ka hoea mai o kekahi Manawa, e ike al@ ai oia i kekahi mea i oi ae ka u’i o kona helehelena, o ka nele o ia o ka iini a kuju puuwai,n Ke hoomanao nei no oe e kuu makuahine, no kela kaikamahine humuhumu lole, no Oliva Esekota, ma ka’u nana aku, aia ka hoohihi iloko o ka Haku Kale nona no ka mea he mau olelo wale no kana e mahalo ana i kela kaikamahine.”

“Mai hoopihoihoi ia kou manao e kuu kaikamahine no ia mea, oia ma ka ulia laki wale no i loaa ai ka ike i ka Haku Kale no Oliva, a oiai he kaikamahine oia o ke kulana haahaa, poe ona Manawa e huikau pu mai ai iwaena o na pohai o ka poe kiekie a hanohano elike me kakou nei; a malia aole no ka Haku Kale e halawai hou aku ana me ia, nolaila e hoopalaka loa ia ana ka noonoo o kela kanaka opio, a o ka mea e maaloalo mau aku ana imua o kona mau maka malaila auanei ka pipili paa o kona noonoo.”

Pa’ipa’i iho la ka Lede Polena i kekahi aoao o kona noho, a pane mai la: “Ke manao nei au, ua oi loa aku ko’u ike i kea no o na kanaka mamua ou, o ia hoi, ina e komohia ana ka hoohihi iloko o kekahi kanaka, no kana mea i manao ai, aole ‘oa e hiki i kekahi mana ke hoololi ae iaia, Ahiki i ka hookoia ana o kana mea i makemake ai.”

“E hoopau ko kaua kamailio ana no keia mea e kuu kaikamahine, aka e hele ae au e hoomakaukau i kekahi rumi, no keia malihini a ka Haku Kale o ke kii ana aku nei. E hana aku kaua i na mea apau e hoohauoliia ai kona noho ana maanei nei Ahiki i ko laua huli hoi hou ana aku no Enelani.”