Ka Nupepa Kuokoa, Volume LVII, Number 14, 4 April 1919 — NA MEAHOU O MAKUA. [ARTICLE]

NA MEAHOU O MAKUA.

Ma ke Sabati, Maraki 16, 1919, ma ka luakini o Makua, Oahu, ua akoakoa ae na kamaaina o kela kaha aloha ma ko lakou luakini me ka huina kanahakumamalima mai na makua ame na keiki. O ka mahele hana mua i lawelaweia ai, o ia no ka mareia ana o Mr. David Paiaina me Mrs. Lahela Hao e ka Rev. Wm. Kamau, ke Kahu Ekalesia o ka Ekalesia o ka I'a Hamau Leo o Ewa, a kahunapule hoi o ka hale o na hoa hanohano o ka hale lunamakaaina na, kau o 1919. E mahaloia ka mare no na mea apau. Pau ka mare, ua hapaiia ka oihana laa, ka bapetizo ana i ka moopuna a Rev. ame Mrs. Kamaiopili, a i ka papetizo ana, ua puana ae la ke kahu i ka inoa o ke kama o Miss Agnes Luisa Huawaiokaula Naiwi, e bapetizo ana iloko o ka inoa o ke Kahi-Kolu. Pau ka hana bapetizo, ua weheia ka haiolelo e Frank Keliinohopono, ma ka olelo a Iesu, "Owau mai no ke ala, ka oiaio ame ke ola, aole kekahi e hiki i Ko'u makua, ke hele ole oia ma O'u nei.'' Pau ka haiolelo, ua hapaiia ka hana hookomo i ka poe hoike manaoio eono, ame elua komo ma ka palapala mai Kaumakapili ae, huina ewalu. Maikai ka hana a ke Akua ma kela kaha. Pau no hoi keia hana ua malamaia ka ahaaina a ka Haku e ke kahu, na hoahanau mua me ka poe hou, ame na malihini i kipa mai. He ilihia na hana mai ka mua a ka hope, a o ka hana hope loa he hoi e hoopiha i ka lua o ka inaina, a i ka piha ana no hoi, mohala ae la na maka ke nana aku. Mahalo i na kupa o ka aina. Aloha e ka Lunahooponopono me na keiki hooni i na mikini. ANNA M. KAMAU. Pearl City, Mar. 20, 1919.