Ka Nupepa Kuokoa, Volume LVII, Number 25, 20 June 1919 — Page 3

NUPEPA KUOKOA, HONOLULU, T. H., POALIMA, IUNE 20, 1919

NA KEIKIKANE!

E HOOMAKA A E HANA!

Hoomaka Koke i Keia Kau Wela

no Kou Pono.

E Weheia Ana na Haawina no ka Hale HAna ma na

Kula Kamehameha

IUNE 30, NO NA KEIKIKANE O NA LAHUI LIKE OLE.

            Ma ka loaa ana o ka ike hanalima e hoomahuahuaia ana kou uku ma ka palua, a pakolu paha. O na hana maloko o na halehana o ke Kula Kamehameha, aole wale no ia he oluolu, aka he mea hialaai loa no kekahi kanaka opio, i loaa ka makemake no ka hana mikanika; he pohaku paepae e pii aku ai a loaa ka ukuhana maikai o ka mikanika akamai, ke kamana, ka enekinia, hana uwila a mau hana e ae o ka ano like.

            Na Haawina: Na hana kamana. amala ku'i hao, hana uwila ame ka hale hana mikini. Koomaka ma ka Poakahi. Iune 30, me ka hoomauia aku no 5 pule, ahiki i Augate 1. Na hora, 9 a.m. a 12 awakea, 5 la o ka pule. Na hora hana o ka hale mikini, 8 a.m. a 12 awakea. He a'o pakahi ia kela ame keia keiki. Huina uku kula $5.

Ina i makemake oe e loaa nui ke dala, o keia wale no ka manawa nou e a'o ai i ke alahele!

HOOPAA KOKE I KA INOA ANO.

Oki a hoopiha me ka hoouna mai i keia palapala noi pa'ihakahaka ANO, mamua o kou poina ana.

Kipa mai, a i ole, kakau mai ia E. C. Webster, Persidena, na Kula Kamehameha, no kekahi pepa hoakaka, e hoakaka ana ma ke ano neepapa i na Haawina no ke Kau Wela.

Palapala Noi no ke Komo Ana.

Ia E. C. Webster,

Peresidena o na Kula Kamehameha, Honolulu: E oluolu e hoopaa aku ia'u no na Haawina o ke Kula A'o Hana o ke Kau Wela, June 30 a i Augate 1, 1919.

Inoa. . . . . . . . . . . . . . . . . . . . . . . . . .     Makahiki. . . . . . .

            Wahi noho . . . . . . . . . . . . . . . . . . . .

            Haawina i makemakeia. . . . . . . . . . .

 

 

 

KE ANAINA HAIPULE HOOMANAO

A NA AHAHUI HAWAII NO

KA LA O KAMEHAMEHA

(Mai ka aoao 2 mai)

 

ia iloko o na Hawaii o ke au i hala, a oia mau no ahiki mai la kelia. O ka ihiihi o ka oihana hoomana a na Hawaii e makee nei i keia la, ua kanu hohonu ia ia mea iloko o lakou e na kupuna o ka wa i hala. O ke kapu, @ mea nui i na Hawaii, no ka mea, ua a 'oia lakou i ke ano oia mea i ka wa i hala. Nolaila, i ka hiki ana mai o ka pono Kristiano, ua ku mua keia mau ano iloko o na Hawaii, a maluna o keia mau ano ihoomaka iho ai ka pono hou e hoohanau iaia ma o ka lalau ana iho i keia mau mean ano nui o ke ola hoomana ana a hoonui ae i ko lakou waiwai maoli ma o ka hapai ana ae ia lakou iluna iloko o ke ano maemae. Ma kekahi olelo ana o ka hoomanakii ka halejula mua loa i a'oia ai na Hawaii i ke ano o keia mea he hoomana, a na ka hoomanakii i kukulumua ae i na mea ano nui o ke ola hoomana ana, penei: Na ka hoomanakii i a'o mua i na Hawaii i keia mea o ka wiwo ame ka hoolohe; na ka hoomana Kristiano hoi i hapai ae ia ano o ka hoolohe iluna ma ke hulana o ke kupono loa. Na ka hoomanakii i a'o i na Hawaii i ka maka'u i ke Akua; na ka pono Kristiano i hapai ae i keia ano iluna a a'o mai i ke ano o ka maka'u ana i ke Akua elike me ka kakou e hoomaopopo nei i keia la. Na ka hoomanakii i a'o i na Hawaii i keia mea o ka haawi ana i ke ola no ha'i aku; na ka pono Kristiano hoi i hoakea ae i ka manao o keia mea a i a'o mai i ke ano maoli o keia mea o ka haawi ana i ke ola no ha'i aku,--aole hoi ma ke ano lawe i ke ola ame ka hookahe koko. Na ka hoomanakii i a'o i na Hawaii i keia mea o kap pule;na ka pono Kristiano hoi hoomaemae ae i ka uhane o keia hana me ka kakoo pu ana mai no nae i ka mea a na Hawaii i maa oia hui ka pule hooki ole. Na ka hoomanakii i a'o mua i na Hawaii he mana ka pule: na ka pono Kristiano hoi i hooponopono ae i ke ala kupono e lilo ai ka pule i mea hoopomaikai aole hoi i mea pepehikanaka. Na ka hoomanakii i a'o mua i na Hawaii i keia mea o ka mohai ana; na ka pono Kristiano hoi i hoomaemae ae i ua mohai la, a i a'o mai i ka manao ame ka uhane maoli o ia mea o ka mohai. A pela aku no na mea a ae a ka hoomanakii i kukulu ai. a. a ka hoomana Kristiano hoi i hoomaemae ae ai a i hoonui ae ai i kolakou waiwai. Nolaila, he hana nui maoli no ka ka hoomanakii i hana ai, aka i hoomaopopo ole ia, i ke kukulu ana i ke kahua no na mea i hoea mai ma ka la mahope. O keia hana la, oia ka kakou e hoomaikai ae, a mai hailuku ino loa hoi kakou i na hana a na kupuna o ka wa i hala. O na mea hoopoino no ka kakou e hookaawale ae. O ka maikai oia ke malama.

            2. O keia mau ano a la la, oia kai @ iloko o Kamehameha. A mamuli o keia kuoo ana o keia mau mea iloko o kela kanaka i lilo ai oia i mea na ke Akua mana loa e koho ai i limahana Nona no ka waele ana ae i ke alahele no ka Euanelio e hiki mai ai. O ke @ iloko o Kamehameha, oia ke ano i hiki ke hilinaiia no na hana ano nui ana i lawelawe ai mamua ae o ka poha ana mai o ko ke Akua malamalama iloko o Hawaii nei. He kolohe o Iakobo, aia no nae, aia kela ano iloko on a i hiki ke hooko aku i ko ke Akua makemake: nolaila, i ka wa i paa mai ai kela ano i ko ke Akua lima a hoomaemaeia. ua lilo ia i mea waiwai nui loa. Pela no o Kamehameha. Iloko o ka malamalama i loaa iaia, ua wae ae ke Akua iaia i mea hooko aku i kona makemake. no ka mea ua kupono oia no na hana ano nui o ia wa.

            3. Mamuli o kela ano makee akua o Kamehameha, e kupaa ana maluna o na mea ana i ike ai he pono, a e hele ana imua me ka manao wiwoole a hoihope ole a mamuli hoi o kona lilo ana i limahana no ke Akua mamuli o keia mau ano. ua hoihoi mai ke Akua i na kokua @ ana iaia. (a) Ua hoonuiia mai kona naauao ame kona ike hookele aupuni: (e) ua haawiia mai nona o John Young ame Isaac Davis i mau kokua @ a i mau kumu a'o i na mea ano @ o ko na aina haole: (i) ua hoolakoia oia me na makaukau kaua like ole @ me ka @ poka, ame ka pu), e hoomalu ai a e lawe pio ai i na enemi: (o) ua loaa iaia ka ike e hookuikahi ana i kona poe enemi i pio iaia, a. i mihi mai iaia, e hooulu ana i ka makemake ame ke aloha iloko o lakou nona: nolaila, i ke pio ana o Hawaii nei, ua lilo koke mai lakou i @ kokua nona ma ke ano maikai; (u) mao na hana kaulike la ame na hooponopono kupono ana la a Kamehameha i na kanaka o na aina e, ua lilo mai lakou i mau hoaloha nona a i mau kokua pookela nona iloko o kona mau la pilikia: a, ua hoouluia mai ka lako ame ka pomaikai iloko o ka aina mamuli o keia mau ano o Kamehameha. I'a hoihoiia ae na mea apau e pono ai wa hana hookele aupuni ana, ame ka hoomaluu pu ana aku i na enemi malalo @ Kamehameha.

            O kekai o na moolelo maikai loa e hoike ae ana i keia mau hana a ke Akua no Kamehameha, oia no ke kipi ana ai o Kalanikupule i ua alii nei. I Maui o Kaeo, a i ka ulu ana ae o ka manao e hoi i Kauai, holo mai la ia i Oahu nei a holo loa aku la no Waianae me ka manao malaila no e kau aku ai ma ka waa a hoi aku no Kauai. I ka hiki ana no nae i Waianae, lohe aku nei oia aia o Kalanikupule e hoomakaukau ana i wahi nona e make ai. Ka puka no ia o keia manao mai ia Kaeo:  "Ina hoi ha he make kana, aole au e make hookahi ana." O ka huli hope mai nei no ia ua Kaeo nei no ke kaua ana aku ia Kalanikupule. I ke kaua mua, na aneane no o Kalanikupule e pilikia. Aka. i ke kaua hope ma Kalauao, kaa ae la ka make ia Kaeo a lanakila o Kalanikupule. Mamuli no nae keia o ke komo ana mai o Kapena Brown me @ mau malamaoku a kokua ia Kalauikupule me na pu. I keia lanakila ana o Kalanikupule, lilo mai nei o Brown i mea nui loa iaia. Nui hou mai no hoi na pu i loaa mai iaia mai a Brown mai. Aka, mahope mai o kekahi manawa, a mahope o ka ike ana o na koa Kalanikupule ua ikaika palena ole lakou me na pu, hooholo iho la lakou e holo aku i Hawaii e kaua ia Kamehameha. Mamua nae o ko lakou hana ana i keia hana, aia hoi, kipi mua iho la lakou ia Brown me ka i ana e make oia i loaa ai ka moku nui e holo ai i Hawaii--ka moku o Brown. Hoole o Kalanikupule i keia manao. Aka, mahope o ke koi nui ana a keia poe koa, ua haawi mai la oia i kona ae. Nolaila, i kekahi la, hoowalewaleia o Brown e hele i ka hoohikihiki paakai no ka moku ona.Iaia e hapai ana i kana eke paakai, alu ia iho la ia e na kanaka a pepehiia a make. Holo aku la lakou a hopu pio i ka moku me na malamamoku. I ka lilo ana mai o ka moku, hooholo koke iho la na koa a Kalanikupule e holo i Hawaii me ka hakalia ole. Hoopihaia ua moku nei me na pu, na poka ame ka pauda apa'i haole e hookele ua moku nei no Hawaii. I ka ike ana o na haole i keia hana a ke alii, aloha iho la lakou ia Kamehameha, a ike koke iho la no hoi lakou i ko lakou wahi e pakele mai ai mai ka paa pio ana malalo o Kalanikupule. Aole i moe ka maka o ka haole. E noonoo mau ana oia i kona wahi e pakele ai. Nolaila, kukakuka malu iho la ua poe haole nei, a hooholo iho la e hoopakele ia Kamehameha a ia lakou no hoi. (Nana mai kakou i na hana a ka Mea Mana Loa no Kamehameha).I ka wa i pau ai na pu, no poka ame ka pauda maluna o ka moku, a i ka wa i pau ai na koa me ke alii i ka makaukau, haalele iho la ua moku nei ia Honolulu a holo aku la no Hawaii. I ke kaa ana no nae mawaho pono o Kaimanahila, hele aku la ua poe haole nei a hapala iho la i na kaula likini o ka moku ame na oneki me ka aila pena hohono. I ka wa o ka hohono i puka ae ai, pau loa iho la na koa o Kalanikupule me ia no hoi i ka ma'i a hoomaka aku la e lua'i naaupo.Aole i liuliu, kauoha koke mai la ke alii i ua poe haole nei e hoi hou i Honolulu, no ka mea ua oi aku ka pilikia mamua o ke kupono. Hoi hou mai la ua wahi moku nei i Honolulu. I ka pae ana, hookauia aku la na @ o Kalanikupule maluna o na waa kaulua a hoounaia aku la i Hawaii mamua o ka holo ana aku o ke alii. Hoolohe iho la no o Kalanikupule maluna o ka moku oia e holo aku ai me na pu a lakou ame na haole no hoi. Pono kela. Eia hoi ka hana akamai a ka haole: Hooholo aku la lakou i ka moku a kaa pono no mawaho o Kaimanahila, alaila, kauoha aku la lakou ia Kalanikupule ame na koa me ia e komo iloko o ka waapa a hoi aku no ka aina. Hoole ua Kalanikupule nei. Aka, aole on a ikaika i @, no ka mea, ua pau loa na koa i ka holo mamua on a maluna o na waa. Nolaila, hiki ole iaia ke paio aku me na haole. O ka hoolohe wale no kona mea e pono ai a e ola ai. Nolaila kau iho la ua alii nei maluna o ka waapa a hoi aku la i ka aina me na ukali on a. I ke kaawale ana no mai ka moku aku, ka huli aku la no ia ua poe haole nei a holo loa no Hawaii. Mamuli o ka holo o ka moku, ua hiki e aku la lakou i Hawaii mamua o na koa o Kalanikupule. I ka hiki ana, haawiia na pu, ka poka, ka pauda ame na lako kaua apau oluna o ua moku nei ia Kamehameha, a haalele loa mai la ua poe hole nei ia Hawaii a holo aku la no ko lakou aina hanau. I ka loaa ana o keia mau pono kaua hou ia Kamehameha, ua hoonui hou ia iho kona ikaika ame kona mana kaua; a me keia mau lako kaua oia i na'i hou aku ai i kona poe enemi ahiki i ko lakou pio loa ana. Mamuli o ka Kamehameha mau hana maikai i na malihini, ua lilo mai la na malihini i poe kokua iaia a i poe uao iaia; a ma keia no hoi oia i hooko aku ai i ka papahana a ke Akua ma on a la no ka pono ame ke ola o na oiwi o ka aina." Nolaila, e ike mai kakou i ka waiwai nui o keia ano o Kamehameha no kakou i keia la. O ka makee Akua, oia kekahi kahua nui loa o ko Kamehameha lanakila; ka mana nui nana i hoihoi mai i na pomaikai a kakou i ike ae la. Peia no na HAwaii i kei la. O ka makua aku (aole hoi o ke akua-kii, aka, o ke Akua mana loa o Kristo i hoike mai ai) oia iho la no ke kahua e lanakila mau ai ka lahui; oia ka makia paa lea o keia mea o ke ola haui ana. O na kahua e ae e pau ana, aka, o ke kahua e ku ana maluna o ka maka'u ame ka makee i ke Akua, aole loa ia e pau. No ka mau loa oia. Na ke Aliiwahine Victoria keia ole lo kaulana i hoopuka ae: "O ka Baibala ka makia paa o kuu aupuni." Pela i'o no. Ke mau nei o Enelani ahiki no i keia la mauli no o ka makee i ke Akua. Ke lula nei oia i ka aina; ke lula pu nei i ka moana, a ke lilo nei oia i kumuhoohalike nui no ko keia ao e uhai aku ai i na wa apau. I ka wa o Robert Louis Stevenson i ke kula, kakau aku la oia i kona mau makua i kekahi leka nona keia mau olelo kaulana: "Ke pii nei au ma ke alahaka olohelohe o ka hana i kela ame keia la; ke ike nei au i ka oiaio i kela iniha ame keia iniha, a ke paa nei au iaia." A ma kekahi leka, kakau hou aku la oia: "Aole e hiki i kekahi kanaka ke olelo iho ua holomua kona ola ana aia wale no a hiki iaia ke kaku iho ma ka buke hoomanao o kona ola ana, ua komo ke Akua." Pela no kakou e ka Lahui Hawaii. Ke pii nei kakou ma ka alahaka oloheolhe o ka hooikaika ana i kela ame keia la. Ke ike nei kakou i ka oiaio ma ka iniha, a ke hoao nei e paa aku iaia. Aka, aole loa e hiki ia kakou ke hoopuka ae ua holomua kakou aia wale no ahiki ia kakou ke kakaou iho ma ka buke hoomanao o ko kakou ola ana, ua uho mai ke Akua. Iloko o ka Kamehameha ola ana malalo o kahi malamalama i loaa iaia, ua hoolohe aku oia i ke a'o a kona mau kahuna; i ke kuhikuhi a kona lunaikehala; i na olelo hoonaauao a kona mau hoa haole; i na leo hoopakele a kona poe kiu; a i na kanawai o kona Akua. Nolaila, ua pili mai ka malamalama me ia; ua pili mai ka lanakila. Pomaikai wale ka lahui HAwaii in a e lawe ana a hooko aku i na kanawai nui, a me na haawina koikoi o ko Kamehameha ola honua ana: Ka waiho ana i ka noonoo ame ka uhane me ka laula; ke ku ana mahope o na hana ano nui me ke kaniuhu ole ame ka hoi hope ole; ka malama pono ana i na kanawai hoomakaulii i mau ai ka ikaika nee mua ma keia ola naa, a i lilo ole ai ka lahui i mea uhauha wale aku; ka makee ana i ke Akua ka mana nui nana e hoomau mai i ke ku ana o na kanaka Hawaii ma ke ano he lahui kuokoa nona iho; a me ka nana mau ana aku ima me ka manaolana mau no ka lanakila. Ua lanakila o Kamehameha ma o keia mau haawina la; e lanakila aku ana no na Hawaii ma o keia mau mea hookahi la. Ma ka noho ana ae o ka halawai a ka papa @ ma ka po o ka Poalua nei i hooholo ae ai na hoa Repubalika oloko o ka papa, no ka uku ana aku i na bila aie apau o ke kulanakauhale i malaelae ai ke alahele no na hoa hou o ka papa e noho mai ai.

E HOONOHO AE ANA I POE HOU MA KONA KEENA

            I kulike ai me na hoolala ana a ka Lunakanawai Heen, ma kona manawa e lawe ae ai i ke kulana loio kalana, e hului pau ae ana oia i ka poe apau e noho hana nei maloko o kela keena, a hoopiha aku i ko lakou mau makalua me kana poe e hookohu aku ai.

            No kana mau kakauolelo a kakaupokole, e lawe mai ana oia ia Claus L. Roberts ame Mrs. Eva R. Hart, kana mau kakauolelo no oloko o ka aha kaapuni no ka noho hana ana maloko o kona keena.

            Oiai ua wae ae oia i kona mau kokua ekahi ame elua, he hookahi kulana i koe i hoopiha ole ia, o ia ke kokua loio kalana ekolu, noloko o ka aha hoomalu. He nui ka poe i hoike ae i ko lakou mau manao, no ka hookohu aku o ka Lunakanawai Heen ia Noa Aluli ma kela kulana, aka nae ma ka olelo a Mr. Aluli, aole oia he mea noi no kela kulana, ua nui no kana mau hana o kona keena loio, e alualu ole aku ai oia i kekahi oihana aupuni.

            O ka Loio W. J. Sheldon kekahi mea kupono i manaoia ma kela kulana, eia nae ua kanalua kekahi poe no kona kupono, no ka mea in a e hookohu mai ana ka Lunakanawai Heen iaia i kokua nona, maloko o ka aha hoomalu, a hoopuka mai hoi ka aha kiekie i kana olelo hooholo, no kona kohoia ana i hoa no ka papa lunakiai, alaila a ke komo hou ana aku ia, iloko o na hoohauhili ana, e lilo ai i mea hana nui mauhope aku.

            Ma na ano apau ke nana aku iloko o keia mau la, e hului pau aku ana ka Lunakanawai Heen i ka poe e noho hana nei maloko o ke keena o ka loio kalana i keia manawa, me ka wae ana ae i kana poe ponoi i manaoio ai, ma o lakou la, e hoea mai ai i ka wa e hookoia aku ai na hana apau o kona keena me ka pololei.

            Mahope koke iho o ke kohoia ana o ka Lunakanawai Heen i loio kalana, ua hoouna aku oia he kelekalapa i Wainekona, no kona waiho ana i ka noho lunakanawai, aole nae i loaa iki mai ka pane ahiki i keia manawa, a in a pela iho la ka loaa ole mai o ka pane ahiki i ka la 1 o Iulai ae nei, alaila aole e hiki ana iaia ke lawe ae i ka hoohiki oihana no kona kulana hou i kohoia ai, ma ia ano i kulike ai me ke kanawai, e hoomau aku ana no o A. M. Brown i ka paa ana i ka oihana ahiki i ka hookupono ia ana o ka Lunakanawai Heen, koe wale no, a haalele maoli aku oia i ka noho lunahanawai, me ka kauka'i ole aku a loaa mai ka aponoia.

HE MELE KO'IHONUA

            O keia mele malalo iho he "ko'ihonua" ia mamuli o ka hakuia ana e Kapihe ma ka ano pule, i kona wa i pule ai no ke ola mai o ke Alii Kauikeaouli, oiai hanau mai no ua make, a i ahona iki wale no i ka mau o ke ano pumehana o ke kino alii o ke keiki i kapaia mahope mai o Kauikeaouli oiai ma ka ike a Kapihe i olelo ae ai i na alii, aohe alii a kakou aia la ke ike nei au ua lele ka hanu alii, aia na ike aouli ia e kau mai la, a e pule ae no hoi au ke kahuna a i ola mai ke alii, pomaikai kakou, a aole no hoi i hake muaia keia pule, aka i ka wa no a Kapihe i pule ai me ka olani pu ana o Kapihe i kaiawe alii iluna o ke ahi.

            Eia iho ua mele pule ko'ihonua nei:

            Kalani o ka hoano kapu,

            O ke kaupu ehi kanaka alii;

            Ke ahí likoliko o ka wela,

            Ke ahí ana nopu hoae;

            He uwila olepe lua,

            He uwila ka kua kaa alo;

            Kaoo mai ana he uwila nui,

            Ka maka o ka uwila anapu kai haoa.

            Owe ka lani wela ka malama,

            Kunia aku la wela kahiki;

            Koowa ke kapu ka wela ka moe,

            Ke ahí kaoko o na alii;

            Loaa i ka pili haohaoa,

            Ku i Maui o Piilani;

            Kapu Hawaii no Liloa,

            Holokaieku he inoa.

                                    -Na Kapihe

            Ua lilo nae keia mele pule mahope mai i kumu lewa no kela mele kaulana kahiko i ikeia ma ka inoa o (Kahaku ka'iuli ka lani, etc.

            Nohoalii ka nani me ka wahine noho pono, He uluna ka haaheo no ka hookiekie; O ka lanakila ka hope o ka hoomanawanui, O ka hooikaika ka aahu o ka noho lako ana. O ka nele ke kiahoomanao o ka uhaai, He lunakanawai ke aloha, o ka hiapo ia o ka lokomaikai.

HE MELE HOOAEAE HOONI I KA

MAKEMAKE

Makemake au e ike ia Kaleponi, I kela aina a ka nani me ka maikai i noho ai, Maikai aku ke kaikuono o Hukekona, O ka nani ae no o Papine me Kaliana; O ka oi aku no o Laehao me Aukaki, He home aloha ia na ka holokahiki; I aloha au i ka holehole a ka Hulipahu, I na olelo ku i ke aloha a ke kolomeki, Akipolo ka make ua ikea ka ia, Piha i ka olioli na alii me na kela; Aka iki ke kilinahana ua piha ka moku,La pau na pe'a lulu ka moana, Hooiho ka moku i ka peuwini o Oahu ka ihu, Ku ka lu-kau nana ma ka puka makani; Ikea aku la ka mea kupaianaha o ka aina Ka uka o Nuuanu ke hanaia mai la'e ka ua; Ahonui ka pua kamakahala e hana ia mai la, E maiau ia mai la e ke kawelu o na pali; A ka la ohi o ke kaki ikea ka nele, E aho iho no kahi poola o Honolulu, He ola no i kahi lehelehe pipi, He wahi aloha no ka ua liilii la o Manoa.         

            O ke kii mabala keia i weheia ae ka uhi ma ka poalua nei make ano he kiahoomanao na ko honolulu nei poe i kukulu ae, no ka hoomanao ana no na hana kilakila a pookela loa i lawelaweia e Mrs. Cherilla A. Lowrey, ma ka hooikaika ana e hoo@ae ika nan@ame ka @@o honolulu nei. He makana keia ma ka aoao o ka outdoor chircle, ka ahahui i noho peresidena ai o Mrs. Cherilla A. Lowery no kekahi mau makahiki loihi.

HOOMANAOIA IA WAHINE MAIKAI O HONOLULU NEI

            Mamuli o kana mau hana maikai he nui, na hana e hiki ole ai ke hoopoinaia e kekahi mahele nui o na makaainana o keia kulanakauhale, i kukuluia ae ai he kiahoomanao no Mrs. Cherilla A. Lowrey, e ka Ahahui Outdorr Circle o Honolulu nei, ame na hoaloha, a ma ka Poalua aku la i hala, i weheia ae ai ke kiahoomanao, imua o kekahi heluna nui o ka poe makaikai i hoea ae, mamua ae o ka Hale Mission Memorial Hall.

            Aole he mau hana hoohiwahiwa a hoohanohano o ke ano hihimanu i lawelaweia ma kela la, aka me ka malie wale no, a o na olelo apau i kamailioia, ma ke ano hoomanao no Mrs. C. A. Lowrey, he mau olelo ia i oili ae mailoko mai o ka puuwai o ka poe i ike a i kamaaina i na hana a keia wahine maikai, no ka nani o keia kulanakauhale, oiai kona mau la e ola ana.

            I ka manawa i weheia ae ai ka pohaku mabala i hanaia, ma ke ano he kiahoomanao, a no ke ku i ka nani ame ka u'i maoli no, ua noke ka poe i hoea aku malaila i ka pa'ipa'i, e hoike ana i ka nui o ko lakou mahalo no kela kiahoomanao.

            He mau haiolelo pokopoko ka i haawiia ae e kekahi mau lunanui o ka Ahahui Outdoor Circle, no na hana a Mrs. C. A. Lowrey i kona wa e ola ana, e hoikeike ana i kona mau ano maikai, me kana mau hana i lawelawe ai, aole wale no ka hooi ana ae i ka u'i ame ka nani o ke kulanakauhale o Honolulu nei, aka no ka imi pu ana aku kekahi i na mea e loaa ai ka noho oluolu ana i kekahi mahele o na makaainana.

HE HOALOHALOHA NO MRS. ANA KAPUNIAI

            Ma ka wanaao Poaono, Iune 14, 1919, ua kii mai la ka anela o ka make i ka hanu ola hope loa o Mrs. Ana Kapuniai ma ko laua home ma Waimea, Kauai, a lawe aku la.

            O Mrs. Kapuniai, he makuahine no ka lehulehu. He wahine heahea, he puuwai hamama. He hoopono, he akahai, he imi i na mea e hauoli ai o ha'i. He makuahine aloha kane, aloha keiki a wahine Kristiano no hoi.

            Ma ko laua home no i hookipaia ai ka lehulehu o na malihini mai Hawaii a Niihau a ua pumehana o ohohia no ka hookipa ana a keia makuahine.

            O kana hana maikai ole loa ia e nalo a e lilo no hoi i kiahoomanao mau nona.

            Ua haalele iho oia i kana kane i aloha nui ia, Mr. J. K. Kapuniai, ame na keiki hanai e auamo ana i ka ukana nui he aloha.

            O makou o na hoahanau o ka Ekalesia o Waimea, na haumana Kula Sabati ame na lala C. E., ke komo pu aku nei iloko o ke kaumaha me ka kane i hooneleia i ka wahine ole. Ke pule nei makou i ka Haku mana loa e hoomama mai i ka puuwai o ka mea i hooneleia i ko hoa. O makou no,

                        MRS. LUCY WRIGHT,

                        MRS. MEEAWA,

                        B. KAIWA,

                        F. WAIPA AKANA,

                                                            Komite.

He mea na ole ke aloha ke hoonana ia. Eia nae, o ka aloha mea oi ae o ka maikai.

            SALT LAKE CITY, June 19-O.J. Eflinger o Honolulu, ka mea nana i haawi ae i ka haiolelo imua o ka ahaelele a na Kalapu Rotary maanei nei i nehinei. O kana kumuhana, o ia no ka hana a ke Kalapu Rotary ma HAwaii Nui ke ohohiaia, ma ka manawa i puunauweia ae ai na lei HAwaii, ma ke a@o he mea hoomanao.

OAHU RAILWAY & LAND COMPANY.

Hoolaha no ka Manao e Noi i ka Lunakanawai o ka Aha Kiekie no ka Hookohu Ana Mai i Poe na Lakou e Kau i ka Waiwaiio

 

La Y. AHIN, H. TSUNODA, S. MIYAMOTO, K. OYAMA, C. ARAKI, JOHN JOE, RICHARD ROW, SUSAN DOE ame ka POE APAU I KULEANA I KEIA:

            MA KEIA KE HOIKEIA AKU NEI KA LOHE IA OUKOU, oiai nole okou i apono i ka mea i waihoia aku ai e ka Oahu Railway & Land Company e kuai i ka aina, i hoakakaia maloko nei, i kulike ai me kana i waiho aku ai ma ka la 1 o Mei, 1919, e noi aku ana ka Oahu Railway & Land Company i oleloia. ma ka Poakahi, ka la 21 o Iulai, A. P. 1919, ma ka hora 10 a. m. o ka la i oleloia, i ka Mea Hanohano James L. Coke. ka Lunakanawai Kiekie o ka Aha Kiekie o ke Teritore o Hawaii, ma kona mau keena, maloko o ka Hale Hookolokolo, Honolulu, no ka hookohu ana mai i poe na lakou e kau i ka waiwaiio, no ke kau ana i ka huina o na @ala e ukuia aku i ka on a ame kekahi poe a e he kuleana kekahi iloko olaila no ka waiwai e laweia ae ana no na hana alahao, o ua waiwai la e hoakakaia no elike me ia malalo iho nei penei:

            Hapa o ka R. P. 2704, L. C. A. 66 F. L. ia Kamaala; R. P. 268o, L. C. A. 9 F. L. ia Kewa, ame ka L. C. A. 7681, Ap. 5, ia N. Kekai; R. P. 3461 maloko o Kaukahoku, Kapalama, Kona, Oahu, e komo pu ana maloko o ka apana aina loihi o 40 kapuai ke akea, o ka laina i waenakonu o ia mea ua hoakakaia malalo iho nei penei:

            E hoomaka ana ma kekahi wahi, ma ka palena akau loa o ka L. C. A. 153 ia Wm. Suniner, nona ka huina hi-o mai ka lepa mai ma ka Puu o Puowaina ma ka Akau he 2326 kapuai a ma ke Komohana he 6694.7 kapuai, a e holo ana:

            1. Ma ka akau loa a e pi'o ana i ka hema ma ke kaha poai o 382.0 kapuai, ma o kekahi huina hi-o 55@57', o ka laina pololei, ame ka mamao, he 191˚ 24 1/2 oiaio, 358.4 kapuai, i ka palena komohana loa o ka pono alanui o ka Laina Alahao o Kalihi o ka Hui Alahao Oahu.

            Malako olaila, he iliaina o 0.33 Eka, oi liilii aku, a emi mai pahe.

            Hanaia ma Honolulu, Iune 13, 1919.

            OAHU RAILWAY & LAND COMPANY,

            Ma o A. W. VAN VALKENBURG,

            (Sila)                            Kona Kakauolelo;

                        Ma o H. G. DILLINGHAM,

                                                            KONA PUUKU,

6353--Iune 20, 27; Iulai 4, 11.