Ka Nupepa Kuokoa, Volume LVII, Number 31, 1 August 1919 — Page 7
| This text was transcribed by: | Tenille Afemata-Marasco |
| This work is dedicated to: | Ka mana o Hula! |
Ka Nupepa Kuokoa
KE KILOHANA POOKELA NO KA LAHUI HAWAII.
NUPEPA KUOKOA, HONOLULU, T. H., POALIMA, AUGATE 1, 1919.
E PANE AKU ANA IA HOAHANAU O KIPAHULU, MAUI
Mr. Solomon Hanohano, ka Lunahooponopono o ke kuokoa, Aloha oe:--E ae oluolu hou mai oe ia’u no ka lua o ka manawa, a ‘u no e hoike aku nei i na haina a’u o na ninau a Kiu Meahou o ka Baibala, aole hoi o kona inoa ponoi a’u e powehiwehi nei i kekahi inoa kapakapa elike me keia i hoopukaia mai ai e ke Aloha Aina o Iulai 4 i hala; nolaila auhea oe e ua hoahanau nei o ka aina o na kupuna o kaua i noho ai, he poi kau i keia uhane a i na uhane i loaa ka manolana no kau e kuailo aku i na haina o na ninau elike me ia i hoakakaia iloko o kau o Iulai 4, e ninau aua penei:
Ninau 1. Ke hana mau nei no anei o Iehova ke Akua? O ka’u haina no i hoike aku ai, elike me ka’u o Iulai 11, aole no ko’u ku e i kau haina, o kou manaoio no ia; a o ka pilikia ma keia a kakou e alualu nei e loaa ka haina pololei, aole he hoomaopopo pono i ka ninau e ku nei, o ia hoi: Ke hana mau nei no anei o Iehova ke Akua, Aole i komo ma keia ninau ke hana mau nei ao anei o Iesu Kristo ke Akua? Alaila ia pololei na haina i hoikeia mai e oe ame D. Hoolapa o ka la 18 nei, a pela me a’u ina ua puka aku no ia’u o ia hana like, a no ka mea, o Iesu Kristo oia io ka Haku o ke Sabati pau loa na la ka hanaia elike me kau i hoike mai ai.
Ke nonoi nei au ia oe e kuu hoahahao aloha, maluna o keia ninau, e hoouluia ai ka noonoo ame ka hoomaopopo pono ana i ka ninau e ku nei, pela au i hoike aku ai i ka’u haina i like ole me kou manao, au i koho iho ai o ia ka pololei; o ka ninau no Iehova ke Akua, o ka haina no Iesu Kristo aole no Iehova ke Akua, o keia ka pilikia.
Ma ioane 5:17, e olelo ana penei: Olelo mai la o Iesu ia lakou, ke hana mau nei Ko’u Makua, a ke hana nei no hoi Au.
Ua like ole ko’u manao me kekahi mau naau e hoakaka nei. Eia ka ka Haku i kana mau haumana. Mat 6:6:15.
Pauku 6, ke hoike nei penei: Aka, i kau pule ana, e komo ae oe i kou keena mehameha, a papani oe i kou puka, e ul aku i kou Makua ina no ma kahi nalo, a o kou Makua e ike ana iloko o kahi malo, Oia ke uku mai ia oe ma ke akea.
Ma keia pauku, o Iesu Kristo no keia e a’o aku nei i kana mau haumana, e pule aku i kou makua ina no mana, e pule aku i kou makua ina no ma kahi nalo, a o kou Makua e ike ana iloko o kahi nalo; me he la o Iesu Kristo. Oia no ka Makua, elike me ia i huikeia ma ioane 5:17.
Ma keia mau pauku i hoakakaia e ko kakou Haku aloha e hoomaka ana mai Mataio ame Ioane, me he la elua mea kino i ka’u hoomaopopo ilio ma keia mau olelo a’o a Iesu Kristo e hoike nei imua o Kana mau haumana.
Ioane 14:9: o Iesu, Oia no ka Makua. mataio 6:9, penei oukou e pule ai: E ko makou Makua iloko o ka lani, e hoaho ia Kou Inoa, e hiki mai Kou aupuni: e malamaia Kou makemake ma ka honua nei, elike me ia i malamaia ma ka lani la.
Ma keia panku a ka Haku e a’o nei imua o Kana mau haumaua e ike a hoomaopopo pono iho i ka manao o keia pauku e olelo nei, ano e haalele iho ana ka Haku i Kana mau haumana a e hoi aku ana Oia me Kona Makua ke Akua mau loa a e noho pu me ia a o Kana mau haumana hoi e noho iho ana lakou i keia ao (honua) a ma keia i lilo ai kana mau haumana i mau keiki Nana, o Oia no ka Makua o Iesu Kristo, a Nana e hoike nei imua o kana mau haumana eiai Oia i ke ao nei; a Oia no ke aupuni i hiki mai i ke ao nei aole aupuni okoa e ae Oia wale no; he aupuni loli ole he o ia mau.
Ina paha o Iehova ke Akua o Iesu Kristo ia, oluolu oe e hoike mai i kau heahanau nei i kahi i kau ai iloko o ka Paiapala Hemolele, keia ka lua o ka manawa o ka’u ninau ia oe e ka hoahanau inoa ole no keia ninau.
Eia kekahi wahi au he enemi au nou, aole ela, aole au i hoolilo ia oe i enemi oe no’u, aka, nau ka hoike o kou ekalesia oia ka hoomana oiaio i kukuluia maluna o keia ili honua, aole e ae. Pehea, ke noho hemolele mai nei no anei kou mau hoahanau iloko o na ekalesia aole kipikipi, aole wahahee, aole moekolohe, aole uhauha, a pela wale aku: a o ia ka ekalesia i loaa ia oe e ka hoahanau e ku nei, ua pololei oe elike me kuu hoike o ka ekalesia o Iesu Kristo o na la hope nei.
Owai iloko o ko ke ao nei i like aku me Iesu Kristo, ka haahaa, ke akahai, ka oluolu, ke ahonui, komo iloko o na pilikia he nui. Owai, o kou ekalesia anei, o ko’u ekalesia paha? Ke hoole nei au aole, aole ekalesia i noho hemelele iloko o ko ke ao nei: pau loa i ka hele hewa: o ka puni le’ale’a mai ke kamu: au kakou i ka haukae.
ROBERT KAIWI.
NO KA OPU NAWALIWALI
Elike me ka rula maamau, he mea pono ia oe ke koho i ke ano o kau meaai, i kupono i kou kahiko ame ke ano o kau hana no ka malama ana i kou opu me ke kupono. Ina oe e ike iho ana, ua nui loa kau mea i ai ai, a ke paa mai paha ka lepo, e lawe i kekahi o na Huaale a Chamberlaia. Eia ke kuaiia nei e ka poe kuai laau apau o Benson Smith & Ca., na akena no Hawaii- Hoolaha.
UA HOI MAI NEI KKAHI MAU OPIO O HONOLULU NEI.
Mawaena o na haumana he 81 ka nui i puka pono mai nei mai ke kula a’o Baibala mai o Los Angeles, he mau kanaka opio a he mau wahine opio, no Honolulu nei, kekahi mau opio, a ma ka la 24 o Iune i hala aku la ko lakou hookuuia ana mai me ka loaa o na hoomaikai ia lakou. O na opio e Honolulu nei i puka pono mai la oia o Ernest H. Chung Hoon ame kona kaikuahine Violet K. Chung Hoon, na keika a Mr. ame Mrs. William Chung Hoon, Sr, o ke alanui Waialae, kekahi o na paahana ikaika o ka Ekalesia o Kaumakapili maloko o keia kulana kauhale. E haaheo kakou e na Hawaii no keia mau opio i hooikaika e loaa mai ia laua keia ike nui a hoi mai la e lilo i mau alakai no ko kakou lahui Mawaho ae o keia mau opio o Honolulu nei i puka pono mai la o Theodore B. Engle kekahi. Ma ka la 15 o Iulai nei ka hoi ana mai o keia mau opio a ma ke anaina haipule o ke awakea Sabati o ka pule aku la i haawi mai ai o Chung Hoon Jr. i kekahi haiolelo kuliu maloko o ka halepule o Kaumakapili. O Miss Chung hoon kekahi o na wahine opio makaukau loa i ka hookani piano ame okana a ua lohe mua ia kana paani ana e kekahi poe lehulehu o keia kulanakauhale. Ma ke Sabati nei i lawe ae ai laua i ke kula a’o baibala o ka ekalesia o Kaumakapili malalo o ka laua hookele ana. Owai hou ae ia mau opio e hooikaika ana e lilo i mau alakai?
MAKE KAUOHA
Na Kanawai Ahaolelo Kau o 1919
KANAWAI 223.
(B. H. Helu 238.)
HE KANAWAI E HOOLOLI ANA I KA PAUKU 168 O NA KANAWAI I HOOPONOPONOIA O HAWAII, 1915, E PILI ANA I NA HANA AELIKE O KA LEHULEHU.
E Hooholoia e ka Ahaolelo o ke Teritore o Hawaii:
PAUKU 1. O ka Pauku 168 o na Kanawai i Hooponoponoia o Hawaii, 1915, ma keia ke hoololiia nei i heluhelu ai penei:
“Pauku 168. Aole kekahi luna, a i ole, poo o kekahi keena o ke Teritore, a i ole, o kekahi mahele kalaiaina, a i ole, kulanakauhale ona i loaa ka mana e hana, a i ole, e haawi i kekahi aelike hana ma ka aoao o ia aupuni, ma ka aoao o ke Teritore, a i ole, oia mahele kalaiaina, a i ole, kulanakauhale ona malalo olaila oia i kohoia ai, a i ole, i hookohuia ai elike me a i hana ia, e hana, a i ole, e hawi, a i ole, e komopu iloko o ka haawi ana i kekahi aelike hana iaia iho, a i ole, i kekahi hoahui, a i ole, ahahui i hoohuiia iloko olaila he lala oia, a i ole, he mea paa mahele waiwai ina o ia aelike hana e komo aku ana iloko o na hoolilo o na waihona aupuni i oi aku maluna o kanalima dala ($50.00).
“Aole no hoi kekahi luna, a i ole, poo o kekahi keena o ke Teritore, a i ole mahele kalaiaina, a i ole kulanakauhale ona mamua, a i ole, mahope o ka haawiia ana o na aelike hana, e loaa kekahi pomaikai mamuli o kekahi mea koho aku malalo, a i ole, ma kekahi ano e ae mamuli olaila e loaa ai iaia kekahi uku i oi aku mamua o kanalima dala ($50.00) iloko o kekahi aelike hana ana i hana ai, a i ole, i haawiia ai, a i ole, i komopu ai loko o ka hana ana, a i ole, i ka haawiia ana, ma ka aoao o ke Teritore, a i ole, ma ka aoao o kekahi mahele kalaiaina, a i ole, kulanakauhle ona malalo o ia i kohoia ai, elike me ka mea e hana ia ana.”
“Aka nae, aole keia pauku e pili i na hana aelike i hanaia me kekahi ahahui i hoohuiia iloko olaila ka luna o ke Tertore, a i ole, mahele kalaiaina, a i ole, kulanakauhale ona i loaa iaia ma ke ano ona o kekahi mau mahele aole i oi aku mamua o elim pakeneka (5%) o ka mahele waiwai ina he ahahui i hoohuiia, a i ole, hui me na mahele waiwai.
“Aka hou nae, aole keia pauku e pili ana i na aelike hana i hanaia e ke Teritore, a i ole, mahele kalaiaina, a i ole, kulanakauhale ona i haawiia i ka mea koho kupono haahaa loa mahope o ka hoolahaia ana no kekahi koho ana elike me ke kauoha a ke kanawai ma na hana i hiki aku ka huina e hooliloia ana i ka hookahi tausani dala ($1,000.00) a i ole, oi aku paha; a i ole, ina paha o ka heluna e hooliloia aku ana e emi iho ana malalo o hookahi haneri dala ($100.00), a i ole, oi aku paha maluna o kanalima dala ($50.00) aole keia pauku e pili ana ma na mea ua haawiia kekahi aelike hana i ka mea koho haahaa loa kupono ina o na koi oia ano ua waihoia aku i na poe oihana poo, na poe koho hana, na poe, na hoahui, a i ole, ahahui i hoohuiia e hana ana ia ano hana, a i ole. e kuai na ia mau pono hana mamuli o kekahi koho i silaia no ia mea.”
PAUKU 2. E mana keia Kanawai i kona aponoia ana.
Aponoia i keia la 30 o Aperila. A. D. 1919
C. J. McCARTHY,
Kiaaina o ke Teritore o Hawaii
KANAWAI 224.
(B. S. Hela 115)
HE KANAWAI E HOOLOLI ANA I NA PAUKU 1 AME 2 O KE KANAWAI 215 O NA KANAWAI O KE KAU O 1917, E HOOMAOPOPO ANA I NA HANA HOU O KA LEHULEHU, ELIKE ME IA I HOOLOLIIA AI E KE KANAWAI 11 O NA KANAWAI O KE KAU O 1918.
E Hooholoia e ka Ahaolelo o ke Teritore o Hawaii:
PAUKU 1. O ka Pauku 1 o ke Kanawai 215 o na Kanawai o ke kau o 1917, e hoomaopopo ana no na hana hou o ka lehulehu. elike me ia i hoololiia ai e ke Kanawai 11 o na Kanawai o ke Kau o 1918, ma keia ke hoololiia nei i heluhelu ai penei:
“Pauku 1. O na heluna malalo iho nei ma keia k hookaawaleia nei no keia mau mea, mailoko ae o na dala e loaa ana i keia manawa iloko o ka waihona puuku, a i ole, e loaa mai ana ma keia hope aku i ka uuku no, a i ole, mamuli o ka waihona hoaie, a e hoopukaia no na bona elike me ia i hoomaopopoia e ke kanawai e loaa ai na heluna i manaoia he kupono no ka haawina maloko nei:
NA HANA HOU O KE TERITORE:
Uwapo ame na Hana Hou o ke Awa:
(E hooliloia malalo o ke kuhikuhi a ke Komisina Awa.)
1. Oahu.........................................................$380,000.00
(Aka nae, aole kekahi dala no keia ikamu e hooliloia
no na hana alahele wawae ma kahakai o Waikiki.)
2. Hawaii......................................................... 15,078.35
2a. Uwapo Hou, Kaikuono Kuhio................. 3,714.95
(Aka nae, aole kekahi hapa o keia ikamu
e hooliloia koe wale no a loaa mua mai i
ke komisina awa mai ka Inter-Island Steam
Navigation Company, kekahi aelike ma ke
kakau e hoohana lakou i ka uwapo i oleloia
no kekahi manawa aole e emi malalo o elima
(5) makahiki elike me na ana auhau uwapo e
e hookauia aku ana e ka papa komisina awa i
oleloia.)
3. Maui.......................................................................... 95,000.00
4. Kauai......................................................................... 3,965.31 $497,758.65
Na Hale Hou, na Paku’i, na Lako ame na Hana Hou, elike me keia malalo iho nei
(E hooliloia malalo o ke kuhikuhi a ka Lunanui o na Hana Aupuni.)
5. Na hale hou ame na hoolako ana Hale Pupule....................... 903.97
6. Ekolu , Ekolu mau hale noho ame keena aina, Hale Pupule, (halema’i)....... :................ 11,132.78
12. Na Hale Koa
(Aka nae aole haawina malalo o keia poo e hooliloia koe wale no a o na kahua no ia mau hale koa e kuai mua ia e ke Teritore ina paha ma ka hookuleana ana, a i ole, ma ka hoolimalima loihi ma kekahi uku haahaa loa.)
OAHU.
Pakau’i i na Hale Koa, Honolulu. 10,921.10
13. Kula A’o hana na Keikikane, na hale, kukulu hou ana ame hale hooikaika kino..............................16,373.78
14. Paku’i keena auhau, Hilo......................14,972.11
16. Kula A’o hana na Kaikamahine....................9,410.37 63,714.11
PAUKU 2. O ka Pauku 2 o ke Kanawai 215 o na Kanawai o ke Kau o 1917, no ka hoomaopopo ana no na hana hou elike me ia i hoololiia ai e ke Kanawai 11 o na Kanawai o ke Kau o 1918, ma keia ke hoololiia nei i heluhelu ai penei:
“Pauku 2. O na huina malalo nei me keia ke hookaawale pu ia nei no na hana mai na dala e loaa ana i keia manawa iloko o ka waihona puuku a i ole, e loaa mai ana ma keia hope aku i ka puuku no a i ole, mamuli o na heluna waihona hoaie, a ua hiki no e hoopukaia na bona elike me ia i hoakakaia e ke kanawai elike ka nui me ka heluna i hookaawaleia maloko nei; aka nae, o na heluna i hoikeia maloko o na ikamu 18 ahiki i ka 25 o keia Kanawai, e hui pu ana, e hooliloia no e na papa o na lunakiai o na kalana like ole, a i ole, e ke kulana kauhale ame kalana elike me na mea i makemakeia ame na kii ame na hoakaka i hoomakaukauia e ka enekinia oia kalana, a i ole, kulanakauhale ame kalana, koe nae a ku like me na hoakaka a ka Pauku 4 o keia Kanawai, a e hoakaka hou ia no hoi o na heluna i hoakakaia maloko o na ikamu 26 ahiki i ka 28 o keia Kanawai e hooliloia no e ke komisina waihona hoaie o Maui.
Kukulu ana, hoonee ana ame ke kukulu hou ana i na alanui holopuni ame na alahaka; hooloihi ana i na laina-paipu ame ka hoopau ana i na lua-wai; kuai ana o na paka ame na kahua paani ame ka hookomo ana i na hana wai.
KALANA O HAWAII.
17. Alanui holopuni. Keaumoku...................$70,000.00
(E hooliloia malalo o ka hoomalu a ke komisina waihona hoaie o ke Kalana o Hawaii, a ma keia ke hoomanaia nei lakou e hoohana i na poe paahao.)
18. Alanui holopuni, Kona Akau............50,000.00
19. Alanui holopuni, Kau, Kona Henia...................50,000.00
(E hoomaka ana mai ka au ana o kela hapa o ke alanui aila he ekolu mile mai ka palena o Kona-Kau, a e holo ana i Kona).
19a. Na alahaka ame na ala, Kalana o Hawaii.......................100,000.00
20. Alanui Luaopele.......................................165,000.00
(I alanui konokilika e hoomaka ana i ke alahaka konokilika hou ma kahi o 4 mile mai Hilo mai a e holo ana i Kilauea Paka.)
21. Alanui holopuni, Oahu, Koolaupoko, e hoomaka ana i ka pau ana o ke alanui e hanaia nei o ke Alanui Pali a e holo ana i Koolauloa..........5000,000.00
(O ke alanui e kukuluia me ke konokilika maluna o na kii ame na hoakaka i hanaia a aneane like me ka hiki no na mea i makemakeia e ka oihana koa.)
21c. Kuai ana ia Kaimuki Paka..........................12,000.00
26. Ka uhi ana i ka Luawaihookio o Olinda.....................5,000.00
28. Hoopau ana i ka Luawaihookio o Olinda................30,000.00 $1,546,312.83
Ina o na huina i hoikeia iloko o kekahi ikamu o keia pauku no ke kukulu ana, a i ole, no ke kukulu hou ana o ke alanui i kapaia maloko o ka ikamu i oleloia ua koe mai no kekahi koena mai ia alanui mai, o ke koena, a i ole, o ka mea i makemake ole ia ua hiki no e hooliloia no ka hana alanui i hoakakaia maloko o kekahi ikamu no ia kalana, a i ole, kulanakauhale ame kalana.”
PAUKU 3. E mana keia Kanawai i kona aonoia ana.
Aponoia i keia la 30 o Aperila, A. D. 1919.
C. J. McCARTHY.
Kiaaina o ke Teritore o Hawaii
KANAWAI 225.
(B. S. Helu 36)
HE KANAWAI E HOOHOOHOU ANA I KA HOONUI ANA I NA MANAWA HOI ILUNA O NA AINA MA O KA HOOMAOPOPO ANA I MAU HOAIE ANA NO KE KOKUA ANA E HOOULU I KA OIHANA MAHIAI.
E Hooholoia e ka Ahaolelo o ke Teritore o Hawaii:
PAUKU 1. O ka inoa pokole o keia kanawai oia no Ke Kanawai Hoaie i na Poe Mahi.” O kona lawelaweia ana malalo no o ke kuhikuhi ame ka hoomalu ana a Ka Papa Hoaie i na Poe Mahi o Hawaii e kukuluia aku ana ma keia hope aku.
PAUKU 2. Na wehewehe. ma kahi e hoohanaia ai na olelo “moraki ekahi” maloko o keia Kanawai e manaoia no e hui pu ana i na papa hoopaa ekahi ana i na aina mahi elike me ka mea e aponoia ana e ka Papa Hoaie i na Poe Mihi o Hawaii, ame na palapala aie e hoopaaia ana malaila.
Ma kahi e hoohanaia ana na olelo “mea mahi oiaio” e manao ia o kela ame keia mea e imi ana i kona ola mamuli o ka hoomalu maoli ana i kana hana, a i ole, hoohana ana nona iho, ma ka mahiai ana ma ke ano akea, e komo pu ana malalo o keia ka mahi laula ana, kanu ko ana, hooulu ana i na hua ai ka malama ana i na holoholona ame na moa, ame na hana mahi e ae no ka hooalu ana i na mea kanu.
Ma kahi o na olelo “aina mahi” e hoohanaia ana, e manaoia o na aina i hoohanaia no kekahi hana ano mahiai, e huiia ana ka mahiai ana, hooulu ko ana, hooulu hua ai ana, hanai holoholona ana, malama ana i na bibi waiu, ka malama ana i na ano holoholona apau, a i ole, na moa, ame na ano e ae o ka mahiai ana.
PAUKU 3. Ka papa hoaie i na poe mahiai o Hawaii. Eia ma keia ke kukuluia nei a ke hookuia nei ma kahi noho o ke aupuni. he papa e hooko ana i na manao o keia Kanawai, ame na kanawai apau e hoololi ana ia mea, e ikeia ma ke ano “Ka Papa Hoaie i na Poe Mahi o Hawaii”
O ka papa hoaie i na poe mahi o Hawaii ekolu ona mau lala e hookohuia e ke Kiaaina o ke teritore elike me ke koi a ke kanawai Kumu.
E loaa i na lala o ka papa i oleloia he hookahi haneri dala o ka mahina akahi ma ke ano o ko lakou uku ia no ka lakou mau hana ma ke ano lala a o ka loio kuhina, ke komisina o na aina aupuni ame ka puuku o ke Teritore o Hawaii e loaa ia lakou ke kuleana e waeia i mau lala no ka papa i oleloia. I ka manawa o na luna aupuni i hoikeia maluna ae e hookohuia ai i mau lala no ka papa i oleloia, e loaa no ia lakou mawaho ae o ko lakou mau uku ma ke ano he mau luna aupuni no ke aupuni, ma ke ano he mau lala no ka papa ka uku paku’i hou iho elike me na mea i hoomaopopoia maloko nei. E loaa pu no’hoi i na lala o ka papa i oleloia, i na manawa a lakou e lawelawe ana i ka hana a ka papa, ko lakou mau hoolilo kaahele.
O na hoolilo o ka papa hoaie o na poe mahi o Hawaii e ukuia aku no mailoko ae o na waihona e hoikeia aku ana mahope nei ma o keia kanawai.
O ka papa hoaie o na poe mahi o hawaii ua hoomanaia a ua hookuleanaia e hoohana i kakanolelo e haawi ana i kona manawa apau no na hana a ka papa. O ka uku o ke kakauolelo he ekolu haneri dala o ka mahina hookahi, a oia uku me kona lilo kaahele e ukuia aku no mailoko ae o na waihona e hoomaopopoia aku ana e keia Kanawai.
E hana ka papa hoaie o na poe mahi o Hawaii iloko o Feberuari o kela ame keia makahiki, i hoike piha o na hana i hanaia e ia no ka makahiki i hala, i ke kiaaina, a nana e kauoha e pa’iia no ka hoike ana aku i ka ahaolelo ame ka lehulehu.
Ma keia ke hoomanaia aku nei ka papa hoaie o na poe mahi; Hawaii e hoomakaukau i kela ame keia manawa i mau papa kuhikuhi e hoike ana i na mea ano nui o keia Kanawai, ka pomaikai e loaa ana i na mea ano nui o keia Kanawai, ka pomaikai e loaa ana i na hooaie ana i na poe mahi, ame na hoopakele ana malalo o keia Kanawai; a e haawi aku ia mea. Ke hoomana ia aku nei no hoi ka papa i oleloia e hoohana i kekahi hapa kupono o kona waihona no ma mea i hoikeia maloko o keia poohou. O na lunahelu like ole, na hope lunahelu, ame na hope akena aina apuni ke Teritore o Hawaii ma keia ke hooliloia nei i mau akena no ka papa hoaie no ka hoomaopopo ana i ka waiwaiio ame ka hoike ana lamuna o ka waiwaiio o kela ame keia waiwai e lilo ana i kumu no ka hoaieia ana aku malalo o keia Kanawai, ame ke kokua ana ame ka hoike ana maluna o na mea e ae e kuhikuhiia aku ana e ka papa, a i ole, e ka kakauolelo o ka papa. E hoohana aku na akena i oleloia pela me ka paku’i ole ia aku o ko lakou mau uku e loaa nei i keia manawa, aka o na hoolilo kupono i ulu ae mamuli o ka lakou mau hana ma ke ano he mau akena e aponoia ana e ka papa, e ukuia aku no mailoko ae o ka wailona kukaawale o ka waihona hoaie o na poe mahi e kukuluia aku ana maloko nei ma keia hope aku.
PAUKU 4. Na mana o ka Papa Hoaie o na Poe Mahi o Hawaii. O ke ko’iko’i o ka hooko ia ana o na manao o keia Kanawai e kau aku no maluna holookoa o ka papa hoaie o na poe mahi o Hawaii a e loaa ia lakou ka mana:
1. E hana i na hoaie, i hoopaaia mamuli o na moraki ekahi, no na hana a i kulike me na hoakaka a keia Kanawai:
2. Ka hoole ana i kela ame keia noi no kekahi hoaie ana;