Ka Nupepa Kuokoa, Volume LVII, Number 32, 8 August 1919 — Page 3

Page PDF (1.68 MB)

This text was transcribed by:  Kamehameha Schools Gift To Dr. Chun
This work is dedicated to:  Dr. Michael J. Chun

Ka Nupepa Kuokoa

KE KILOHANA POOKELA NO KA LAHUI HAWAII.

            Ma keia noho pu ana o Magureta me kana kane, aole he wahi hoailona iki no ka hoi hou mai o kela ano opulepule ona, aia no nae oia malalo o na lapaau akahele ana a kekahi kauka akamai hoa, i na ma ʻ i o ke poo, aole loa he manawa ana i hoala hou mai ai i na noonoo o ka wa i hala.

            E hoohala nui ana o Magureta i kekahi manawa, ma ka hele makaikai ana maloko o na hale i hoahuia ai na meakahiko, pela ho@na hale i hoahuia ai na kii nani, i hanaia e ka poe kahakii kaulana o Palani, ua lilo kona hele mau ana e nana i kela mea, i hana hoihoi loa nana, o kekahi i kumu paha hoi, he makemake nui no nana ka ike ana i na kiikaha nani, ame na mea i kamaaina i ka ike a kona mau maka. Ua kuai no ua o Magureta he piano no ko laua home, a e hoohala nui ana no oia i kekahi o kona mau manawa kaawale, ma ka hookani ana i ka piano, me ka hoao ma na ano apau ana i ike ai he pono, no ka hoohauoli ana aku i kana kane.

Ma na manawa a reginola e huli hoi aku ai i ka hale, mahope iho o ka hooikaika ana i na hana o ka halema ʻ i, e hoikeike mau mai ana o Magureta i kona mau ano oluolu, a ohaoha no hoi no kana kane, aole nae ma ke ano oluolu, a ohaoha no hoi no kana kane, aole nae ma ke ano i maamau i na wahine no ka lakou mau kane, aka ma ke ano ʻ i loli loa ae, mai kona wa mai i kinohi o ko laua hoea ana aku no kela aina malihini.

            I kekahi manawa, e hoohalaia ana he mau hora e laua ma ke kamailio ana ma na kumuhana lehulehu, aole nae he manawa i hoalaia ae ai kekahi mau hoohele kamailio ana, ma na mea e pili ana i ko laua aloha, aka aia nae iloko o ka noonoo o ke kauka opio, e hoea mai ana i ka la, e pana ʻ i mai ai o Magureta i kona aloha, elike me ia i aloha aku ai i kela wahine opio.

            I kekahi manawa nae, ua lilo no i mea ehaeha no ka manao o Reginola ka hoole o Magureta i ka lawe ana mai i kakahi mau lole nani, i maa iaia i na manaw i hala, a ua hookaumaha pu ai mai no hoi kona manao, i ka hooikaika o kana wahine i ka hana, ma ka hoao ana e hoemi loa mai i ko laua mau hoolilo, he mau hoike oiaio loa nae kela a ua o Reginola e ike aku la, i ka hoao ana o Magureta, e komo pu iloko o na ano apau a kana kane e hoomanawanui nei, o keia mau ano o Magureta, ua lilo ia i kumu e hooiia aku ai ka mahalo ame ke aloha o Reginola iaia.

            Ma kela noho hana ana aku a Reginola maloko o ka halema ʻ i, ua hoohana ku oia elike me ke akamai i loaa iaia ma kana oihana, he manawa pokole wale no kela o kona noho hana ana, ua hiki loa ke ikeia mai, oia kekahi o na kauka makukau loa, ma kela oihana, a e haawi mau ia mai ana iaia, na ma ʻ i kupilikii, a oia no hoi kekahi o na kauka, e kokoia mai, no ke kukakuka pu ana, me na kauka poo o kela halema ʻ i, e pili ana i na hana e pono ai na ano ma ʻ i lehulehu, i hoopuhili ia ai ka ike ame ke akamai o na kauka kahiko.

            Ua mahelehele pono o Reginola i kona manawa no na hana, o ia hoi, ma na hora o ke kakahiaka, maloko o ka halema ʻ i wale no kana mau hana e lawelawe ai, a ma nahora o ka auwina la, e hoi ana oia e lapaau i kana mau ma ʻ i ponoi, a i ka po e a ʻ o ana oia i ka ike hou no ka oihana kauka nolaila ua paa mau maoli kona manawa i ka hana.

            Ma kekahi ahiahi nae ua lohi loa kona huli hoi ana aku i ka hale oiai ua nui maoli kana hana ma kela la, a ua hele uo hoi oia a maluhiluhi, elike me ke ano mau o ka poe hooikaika i ka hana. O kana hana ma kela kakahiaka, o ia no ke oki ana i kekahi mea ma ʻ i, me ka hoohaia ana i ka hapanui o kona manawa o ka auwina la, ma ka lapaau ana i kana poe ma ʻ i, a he hora mamua ae o ka aina ahiahi, ua loaa mai la iaia kekahi kauoha, no ka hele koke ana aku e nana i kekahi ma ʻ i kupiliki loa.

            He ahiahi ua liilii kela, me ka hu ʻ ihu ʻ i pu, no ka ike o Magureta i kela ano, ua hoomaukaukau mua oia i kapuahi hoopumehana maloko o ke keena hookipa, ua lawe ae hoi i na lole noho hale o kana kane a waiho maluna o ka noho, e waiho ana no hoi na kamaa palewawae maluna o ka moean veleveka.

            Ma kekahi noho paipai nui, ma ka aoao o kekahi pakaukau liilii, malaila o Magureta kahi i noho ai, aia he buke moolelo loko o kona lima, o kana hana, o ia no ke kakali malie ana, o ka huli hoi aku o Reginola mai kana hana aku, a i hookahi ko laua ai like ana i ka aina ahiahi.

            I ka wehe ana mai o Reginola i ka ouka o kona home, a ike mai la i ka maemae ame ka maiau o na mea a pau i hanaia, pahola ae la ka minoaka o ka mahalo ma kona mau papalina, a ia nana ana mai hoi a Magureta ma kahi o ka mai la oia, aole nae he holo mai e puili i kana, aka ke mau la no kona noho ilalo, a kamailio mai la:

            "Ua luhi maoli oe e Reginola," wahi ana me ka waiho ana aku i kana buke e keluhelu ana maluna o ke pakaukau, a ku mai la iluna. "Ea, ua pulu ko kuka i ka ua, pela me kou papale, e wehe mai i ko kuka, me ka papale, na ʻ u e lawe aku e kaula ʻ i; ke hopohopo pu nei au, e loohia ana paha oe i ka ma ʻ i."

            "Ua hiki no ia ʻ u ke lawe aku i keia mau mea i pulu ma kahi kupono, a mai hooluhi wale ia oe iho e Magureta," i pane mai ai ke kauka opio, oiai no nae o ka mea oiaio, aia iloko ona ka hoomaikai no ka ike ana mai i keia mau ano makee e mahamaha o Magureta iaia, aole no nae he hoolohe ku o Magureta, aka kii okoa mai la no a wehe aku la i ke kuka o Reginola pela me ka papale a lawe aku la no a kekahi rumi mahope o ka hale.

            Aole no i emo aku ia nalo ana aku a ua o Magureta, hoea @ou aku la, me ke kokua ana e wehewehe ae i na lole o kana @ane a waiho aku la ma kahi kupono, me ka lawe ana mai @na lole noho hale, a lawe pu mai la no hoi i na nupepa o kela la, a waiho aku la imua o Reginola, me ka i ana aku:

            "E hoohala malie iho oe i kekahi mau minuke ma ka heluhelu ana i keia mau nupepa, a  hele aku au e hoomahanahana i na meaai aole no e loihi, alaila makaukau, o ko kaua @ee aku no ia e ai, ua kakali iho nei no au a hoi mai oe, he hookahi ko kaua ai like ana me ka mau nonae o kona ku mahope mai ka noho o kana kane, aia wale no kana @ana ana maluna o na maka o ke kauka opio, alaila paa mai la kekahi lima ma ka poohiwi, a i hou ae la:

"Aole o ʻ u makemake no keia hookina nui loa ou e Reginola i ka hana," me ka hamohamo ana iho o kekahi lima ma ka lauoho o Reginola, o keia mau hana a Magureta, ke lilo la ia i mea hooluolu loa aku i ko Reginola noonoo, in a hoi paha no ka pau loa o kela ano piena iloko o kana wahiine, in a ua loaa maoli he nohona hauoli ana ia laua.

            Ua lilo ko ʻ u ʻ hele ana i ka hana i mea hooluolu mai i ko ʻ u manao, a ua hoohauoliia mai no hoi au, no ka ʻ u mau hana i keia mau la, me ka nana ole ae i ka nui me ke ko ʻ iko ʻ i o ia mau hana," wahi a Reginola me ka minoaka.

            "Aole he maikai iki o keia hooikaika ou i ka hana ina nei no kou loohia i ka ma ʻ i, a kau mai ka poino maluna ou, pehea iho la ko ʻ u pono? Heaha ka ʻ u mea e hana aku ai?"

            Ua aneane loa o Reginola e ku ae a puliki mai ia Magureta iloko o kona umauma, ua hiki ole @ae, oiai he olelo hoopaa ka laua aole e hoala mai i kekahi mau hana, e maka olelo paha no kol aua aloha me ka makee o kekahi no kekahi oiai he kumuhana nui loa ia e hoopiena ia aku ai ka noonoo o kela wahine opio.

            Hopu wale ae la no nae o Reginola i ka lima o Magureta e paa ana ma kona poo, me ka pane ana ae: "Ua hoea mai anei i ka manawa au i hoomaopopo ai i ka ʻ u lilo i mea nou e pono ai? O e kuu Magureta, e haawi mai i ka mea hookahi a kuu puuwai e ake aku nei e loaa mai ia ʻ u!"

            "O oe hookahi wale no ka mea nui loa ia ʻ u e Reginola ma ka honua nei, aohe ohana aohe hoaloha, o oe wale no, ka mea a ʻ u e olelo ae ai, he hoopakele oe no ʻ u i ka wa o kuu pilikia," me ka nana nae o kona mau maka iluna o ka moena veiveka, oiai nae e puliki ana kona lima, ma kahi a Reginola i hopu aku ai.

             No kekahi mau sekona, aole loa e hiki ia Reginola ke pane ae i kau a mea o ka hele o kona puuwai a piha me ka hauoli, a manaoio iho la oia ua kokoke loa o ka hauoli ua nohoalii iho la ka haikea, a o ia nae i pane ae ai:

            "Alaila, e lilo i ʻ o ana anei ko ʻ u kaawale ana mai ia oe aku, in a nei no ke kau mai o kekahi haawina ko ʻ iko ʻ i maluna o ʻ u i mea nau e noonoo nui ai?"

            "Ea, ua loohia oe e Reginola i ka ma ʻ i, oiai he keu aku a ka haikea o kou helehelena," me ke kulou ana mai o Magureta imua, no ka nana pono ana i na maka o kana kane.

            Me he mea la, i ka nana mai a Reginola ia Magureta i kela manawa, ua oi hou ae ka u ʻ i ame ka huapala o kela wahine opio, ka mea hoi nana i hoomahuahua hou ae i kona aloha, ame kona makee nona, a me ka hoomanawanui wale no, i hiki ai iaia ke uumi iho, i na noonoo e hapai mau ai ae ana iloko on a no ka huki ana mai i ka wahine hookahi ana i aloha ai a pili me ai.

            He hookahi wale no nae kumu nui, nana i kaohi aku i ke kauka opio, mai ka hooko ana mai i ka hana, e hoike ae ai i kona aloha oiaio o ia no kona hopohopo, o lilo auamei kekahi hana ma kona aoao, i kumu, e hoala hou ia aku ai kela diabolo kahiko, e noho la iloko on a, aka pane ae la no nae oia me ka leo malie:

            "Aole au i loohia i ka ma ʻ i e kuu Magureta aloha, in a ua ike mai oe i ka maikai ole o ko ʻ u helehelena, mamuli mai ia o ko ʻ u maluhluhi, oiai ua nui maoli ka ʻ u hana i keia la; aka o ka mea oiaio loa a ʻ u e kamailio aku nei ia oe, ua hele kuu uhane a pha me ka hauoli i keia manawa, mamua o na manawa e ae oiai ua Kamailio mai nei oe, ua lilo ko ʻ u ola ana i mea ano nui loa ia oe, aole malaila wale iho la no pau, aka ua hoike okoa mai oe i kou mau ano oluolu i keia ahiahi ua hana mai oe i na mea a kekahi wahine nona ka puuwai i piha me ke aloha.

            "O e kuu Magureta, ina no hoi paha e haawi mai ana oe ia ʻ u, elike me na olelo au i kamailio mua mai nei, alaila owau ke kanaka hauoli hookahi ma ka hinua nei. Mai ka manawa mai a kaua i ku ai imua o ke kuahu laahia o ka mare, a hoopaa aku ia kaua iho imua o ke Akua, i kane a i wahine kaua kekahi na kekahi, aole loa au i honi aku ma kou mau papalina a ma kou mau lehelehe hoi, ahiki i keia minuke. He honi no na kaikunane i ko lakou mau kaikuahine, o kaua ua nele loa ka hooka ana ia mea, i hoike no ka oiaio o ka kaua mau puuwai. E ae mai ana anei oe i hookahi a ʻ u mu-ki ana ma kou mau papalina, no ka haawi ana mai i ʻ au i ka manaolana, e hoea mai ana i ka la o kuu haoli piha?"

            Huki malie mai la oia i ka lima o Magureta, aohe no hoi he wahi mea a kaili aku o kana wahine i kona lime, aka ke ike aku la nae ua kauka opio nei i ka puapua ʻ i o ka ula ma na papalina o kana wahine, me he mea la e hoike okoa ae ana i ka like o ka pana anna a ko laua mau puuwai pakhi, ke ike pu aku la no hoi oia ika hulehulei o ka pihapiha o ka lole ma ka umauma o Magureat, a puana okoa ae la oia i keia mau olelo:

            "O, e Magureta, kuu wahine ame kuu aloha," me ka hoao ana mai o kekahi lima, e apo ma ka puhaka o Magureta a hoopili aku iloko ona ua kani koke mai la nae ka bele kahea mamua o ka lanai o ka hale, o ke emi hope aku la no ia o Magureta a auhee koke aku la kela lamalama ma ka helehelena o Magureta a auhee koke aku la kela lamalama ma ka helehelena o Magureta, koe wale no ka hoi hou ana mai o kela ano kuoo o ka uahoa maluna on a:

            Nui iho la ka hanu o Reginola no ke kahamahaia ana mai o kela hana ana o ka aneane loa ana e hooko aku, a e pau hoi ko laua noho ana he kane ahe wahine ma ka inoa wale no a laia i ku ae ai iluna, no ka hele ana aku e wehe i ka puka, aole nae me ka manao pupuahulu, aka no ka makemake no e kamailio hou mai ia Magureta, o ia nae ka ua wahine opio nei o ka pane ana aku:

            "He hu'ihu'i loa keia po, mai hoohakalia oe i ka hele ana aku e hui pu me ka mea mawaho, malia paha he ma'i keia i makemake i kau mau kokua ana."

            Ina paha maopopo mua i ke kauka opio, he puiwa hikilele maoli ko Magureta no ke kani ana mai o ka bele kahea, aole he piena elike me kona ano mamua o kona lawe ana mai iaia i wahine nana, ina ua ninau okoa mai oia i kana wahine, ina he aloha kekahi on a iaia aka ua koho hewa wale aku oia, ma ke ano ua piena o Magureta i kona koi aku e honi laua, ua lilo kela hana ma ke aoao o Magureta, i mea hoehaeha loa aku i kona manao.

            Me na kaina wawae kaumaha, aole hoi o ke ano o na kanaka i piha me ka hoioi, ke eleu o ka hele ana, i haalele iho ai oia i ke keena hookipa, me ke pani ole mai i ka puka, no ka halawai pu ana me ka mea i makemake e ike iaia; ,e keia hoohamama ana nae ana i ka puka, i lilo ai ia hana i kumu e komo hou ai ko laua noho ana iloko o ka pilikia.

            I ka wehe ana aku a Reginola i ka puka, e ku mai ana kekahi mea mawaho, a ma ka malamalama o ke kukui, i ike koke aku ai oia me ka piha i ke kahaha eia ka o kona hoakula no, o a hele like ana maloko o ke kula, oia o Elioka Kepa.

            "O, nani maoli kuu hauoli o ka halawai hou ana me oe e Alika," wahi a Elioka o ka pane ana mai, me ka lalau pu ana mai i ka lima o kona hoaloha. "Pehea oe e kuu hoa? Ua ike lihi aku au ia oe ma nehinei, o koukau koke no nae ia maluna o ke kaa a hiki ole ia'u ke hoea aku imua ou i ka wa pono e halawai pu ai kaua. Ea, he keu a ke kuna liihi o kou helehelena e Alika, ua loohia anei oe i ka ma'i?"

            "O, e Elioka, e hamau, mai kamailio mai oe ma ka pihoihoi," wahi a Reginola, me ka hopu ana aku i ka lima o kona hoaloha, a alakai aku la noloko o kona keena, me ke pani ana mai i ka puka a paa.

            Ma kela manawa a Reginola i hele mai ai no ka nana ana i ka mea nana i kikeke aku i ka puka, ua ku mai o Magureta a nana i kona hele, me ka puili ana ae o na lima mamua o kona umauma me he mea la ua aneane e hiki olei ua wahine opio nei ke hoomanawanui hou aku i ka nui o kona makee no keia kauka, a in a paha no ka huli mai o Reginola ihope, a ike i kela ano o kana wahine, in a ua maopopo iaia, ua hoea mai i ka manawa i lanakila ai kana mau hooikaika ana, no ke komohia ana o ke aloha oiaio iloko o Magureta nona.

            Ke ku like la o Magureta nana i kana kane, aole wale no ka makee i ke kauka opio, aka no ke ake ana kekahi e ike i ka hana a ka mea mawaho i makemake ai e hanaia aku nona, in a paha no ke kii ana mai i kana kane e hele aku iloko o kela ua ame ka hu'ihu'i o ka po.

            O ka mea nae nana i hookahaha loa mai i kona manao, o ia no kona lohe ana aku i ka hoopuka ana mai a ke kanaka malihini i ka inoa o kana kane o Alika, aole hoi o Reginola, a i ole, o Kauka Moka paha, a komo iho la ka noonoo iloko o Magureta, ua kuhihewa kela kanaka i kana kane.

            Ma kana mau mea nae o ka hoomaopopo ana aku, ua kamaaina maoli kela kanaka malihini i kana kane, he ohoia ke ano o ka lau halawai ana ae, a no kela lohe pono ana aku, i ke kaheaia ana mai o kana kane, ma ka inoa Alika, ua hoopiha loa ia mai ua o Magureta me ke kahaha, a ke nana aku i ua wahine opio nei, me he mea la, ua ku malie ka holo ana o ke koko iloko o kona, i kau a mea o ka hele a haikea pu ka helehelena.

            "O Alika anei ka inoa oiaio loa o kuu kane?" wahi ana i hooho ae ai me ka leo malie. "Heaha la ka manao o ka mea a'u i lohe aku o kana kane ame ke kanaka malihini, maloko o ke keena oihana o Reginola.

            Aole he mau hoohewahewa ana iloko o Magurerta i koe, no kana mau mea i lohe ai, hooiaio iho la oia, o Alika maoli no ka inoa oiaio o kana kane, a ua hana hewa loa aku hoi o Reginola iaia, ma ka huna ana i kona inoa pololei; o kela komo awiwi ana aku o kana kane maloko o ke keena me ka malihini he mau mea ia nana i hooiaio loa mai i kono mau manao koho, no ka makemake ole o Reginola, e lohe aku ua o Magureta i na mea e kamailioia ana mawaena o laua.

            Elike me kekahi mea loohia i kekahi ma'i ikaika loa a pohala mai pela iho la ko Magureta ano, iaia i huli hoi aku ai noloko o ke keena hookipa, a noho iho la maluna o kona noho, palulu ae la i na lima ma kona mau maka, me ka onioni ole, no kekahi mau minuke elima.

            I ka maalili ana nae o kona mau noonoo ulu-ku, ia wa i eu ae ai ua o Magureta iluna, me ka hele ana mai e hooponopono i na pepa e mokaki ana maluna o ke pakaukau, a iaia nae e waiho oakahi ana i na nupepa, haule iho la kekahi leka, i kakauia me ka limakakau o ka wahine, aole on a makemake e heluhelu i kela leka, aka o na huaolelo nae malalo loa o ka leka kana o a ike ana aku, ka mea nana i hoopii hou mai i na manao uluahewa iloko ona.

            Ke ku malie la ua o Kanani me ka aneane e hiki ole iaia ke nee aku imua no hookahi iniha, ua like pu na mea ana i ike ai ma kela po, me kakahi hihi'o moeuhane. Iloko ka hoi on a minuke i aneane loa e hawipio okoa aku oia i kona mau ano uahoa apau malalo o Reginola, o ka wa ia i kahamahaia ae ai, ma o ka hoea ana mai o kekahi kanaka malihini, a iloko no hoi o kela manawa hokahi, i loaa mai ai iaia ka ike, no ka inoa oiaio o kana kane, a o ka mea oi loa aku o kona kahaha, o ia no na mea ana i ike aku ai malalo o ka leka e paa aha maloko o kona lima.

            Kuwakuwai ae la ua o Magureta i kona mau maka, mamuli o kona manao kuhihewa, he hihi'o moeuhane paha ka@a mea i ike ai, o ka mea wale no nana i hoauhee i kona mau manao kuhihewa apau, o ia no kela leka e paa la iloko o kona lima, ma ke ano, he mea oiaio loa kana i ike ai, oiaio e kau okoa ae ana keia mau huolelo: "Kou kaikuahinealoha-Kanani."

 

MOKUNA XXVIII.

 

            Elike me kona ike maoli ana aku i kona kii ponoi maloko o ke aniani kilohi, pela iho la ua o Magureta i nana aku ai ihope, o Kanani Alika, a o Mrs. Noela Kauwila ka mea nana, kela leka i hoouna mai i kona kaikunane, a ua pololei kela inoa ana i lohe aku ai, a ke kanaka malihini o ke lahea ana mai i kana kane; nolaila ua hana aku kana kane iaia, i kekahi hana hoopunipuni ino haahaa loa, e hiki ole ai iaia ke huikala aku ia Reginola.

            Ua mare aku au o Magureta ia Reginola, mamuli o kona manaoio loa, o Kauka Noka kela kanaka opio, i hooikaika e loaa iaia nei ka palekana mai ka ma'i pupule mai, eia ka auanei, ua mare aku oia i ke kaikunane o ka wahine ana i hoowahawaha loa ai, no ke kaili ana aku i ke kanaka hookahi i haulehia ai oia i ke aloha kupouli.

            Me he mea la, ke paa la oia i kekahi moo mahesa iloko o kona lima, ua kiola aku la oia i ka leka i kahi e, a hele holoholo ae ai maloko o kela rumi, me ka eena o kona mau maka, i kau a mea o ka ke hele mai la a hoonaukiuki i ke kanaka ana i ike iho ai, i ka epa ame ke kolohe iaia.

            Aia kona mau maka, ke nana pono la, ma kahi o ke keena a kana kane i komo aku ai me ke kanaka malihini, a ke nalu wale la no oia, i ka hana a kela mau kanaka maloko o kela keena.

            Ua hoopunipuni ino loa aku kana kane iaia, he mea kela i hiki ole i ua o Magureta ke hoole ae, ua nui na ike i loaa iaia ma kela po; no kela hana ma ka aoao o kana kane, ua like pu ai me kekahi pahi i hou aku ma kona puuwai.

            Iloko o kela manawa a Magueta e holoholo la maloko o ke keena hookipa, ala mai la iloko on a kekahi manao, ua hoolilo wale mai no o Reginola iaia, i mea e hoao ai kela kauka opio i kona ike ame ke akamai i ka oihana lapaau, no na ma'i opulepule elike me ia i loaa i ua o Kanani.

            Ua maopopo ia kaua e ka makamaka heluhelu, ka oiaio ole o kela mau mea a Magureta e noonoo la, aka, iloko nae o ka manawa i uluhia ai oia i na manao hehena, aole loa he noonoo maikai iki iloko ona, ua nana waie aku no oia i kana kane, ma ke ano oia kekahi o na kanaka ino lapuwale loa.

            Ua maopopo no i ua o Magureta na ano maikai a kilakila iloko o kela kauka opio o kela manawa loihi o ko laua noho pu ana, e hana wale mai ana no o Reginola, i na mea apau e pono ai oia, a e loaa ai hoi ka nohona hauoli ana, aole nae e lilo kela mau ano maikai o ke kanaka opio, i kumu e uhiia ae ai kekahi hiona maikai ole i oili ae ma kela po, ka mea nana i hoala mai i ka ninau iloko o Magureta i ke kumu o ka hoao ana o Reginola e hoopunipuni aku aiai.

            Oiai keia mau noonoo lehulehu e oiliili mau mai ana iloko on a, mihi loa iho la ua o Magureta no kona pomaikai, aohe wa a lilo oia i ka mea paani na kela kauka opio, oiai ua aneane loa oia, e hua'i okoa aku i ka meahuna iloko o kona puuwai, no kona aloha ana i kana kane, o ke kahamaha wale ia ana mai no e kela kanaka malihini, o ke kumu ia o kona haawi ole ana aku i kona kino ame kona uhane, malalo o ka malu Reginola.

            He ku maoli i ka oluolu, ke aloha ame ka oiaio, ke kulana o Reginola ua maopopo loa ia mau ano ia Magureta, eia nae, heaha kana mea e hana aku aii keia wa, o kona ike ana, he-kaikunane ponoi loa keia, no ka wahine ana i inaina loa ai?

            Ua paa oia maialo o na kanawai o ka mare me ke kaikanane o ka wahine nana i kaili aku ia Noela Kauwila, ke kanaka hookahi ana i aloha ai. Ua haawi ku oia i kana hoohiki paa imua o ke Akua, o ka make wale no ka mea nana e hookaawale ae iaia mai kana kane mai, nolaila he hana paakiki maoli, a he ninau pohihihi no hoi m kona aoao, ka imi ana aku i wahi nona e kaawale mai ai mai ia Reginola mai.

            Ua palace pu amolli ko Magureta noonoo no Kanani, oiai ua paa kona manawa ma kana mau hana o ka hale, ke a'o ana no hoi i ka ike hookani pila me ka himeni, ke hora kaawale o ka la ma ka hele makaikai ana ma kekahi penakii, a i kekahi manawa e hoohala ana oia i ko namanawa ma kekahi wahi kaulana, a ua hoopoina loa n ohoi oia i ka noonoo pu ana no Kauwila.

            O ka oili hou ana mai nae, o na hana i houlu-ku aku i kona noonoo, a aneane loa oia e lilo i wahine hehena, oiai oia e noho hoola'i ana iloko o ka maluhia ame ka maha, ua hoihoi hou ia mai kona mau ano leleiona apau, a ua hoala pu ai mai hoi kona mau ano leleiona apau, a ua hoala pu ia mai hoi kono manao inaina me ka huhu no kana kane.

            Elike me kekahi liona wahine, i hoopaaia maloko o kona hale paa loa, e ake ana e puka aku iwaho o kahi akea, pela iho la ke kulana oiaio loa o Magureta, iaia e holoholo ana maloko o ke keena hookipa, ke pana la hoi kona puuwai me ke kapalili, o ia no oe o ka hamare e kikoni mau aku ana i ke poo o ke kui.

            Oiai no nae oia e holoholo ana, lohe aku la ua o Magureta i ka weheia ana mai o ke keena oihana o kana kane, he hoailona kela no ka haalele mai o ke kanaka malihini ia Reginola nolaila ua kokoke loa mai i ka manawa, ana e koi aku ai i kana kane, e hoakaka mai i na mea pohihihi apau e hoopuni ana i kona mau inoa lehulehu.

            Ke lohe aku la no ua o Reginola i ke kamailo mai o ua mau keonimana nei, me ka leo liilii, a haawi ae lo ko laua aloha hope, aia hoi ua o Magureta ke ku la me ka makaukau, me kekahi mau meapaahana no ka waiho ana mai imua o ke kanaka, aua i koho maoli iho ai i ke kolohe ame ka epa.

            Ia hala ana aku o ka hoaloha o Reginola, huli hoi mai la oia noloko o ke keena hookipa, a iaia i ike mai ai i ka leleiona o ka helehelena o kana wahine, maopopo koke iho la iaia ua lohe mai o Magureta, i na olelo mua a ka hoaloha malihini, i kahea mai ai iaia ma ka inoa o Alika, aka nae me kela ano oluolu mau no iloko on a, me ka makee no kana wahine, hele pololei mai la o Reginola a mamua o kahi a Magureta e ku ana i mai la:

            "E Magureta, heaha ke kumu nana i hoala aku i na ano maikai ole iloko ou i keia po?" wahi ana me ka hoao ana mai e lalau i ka lima o kana wahine.

            "He keu aku oe a ke kanaka lapuwale," i pane mai ai no hoi o Magureta me ka leo pikanana, e hoike mai ana, i kona hele a ulupuni me ka inaina.

            Ma kela pane a Magureta, ua hoopau loa ia ae la ka pohihihi iloko o Reginola, ua lohe kana wahine i na mea apau ana i hopohopo ai, nolaila he hana nui, ma kona aoao ka huli hoi hou ana, ma ka hoomaka ana mai, a hoakaka aku imua o Magureta, i wahi e hoopauia ae ai kona huhu, a e ike iho ai, i ka loaa ole o na manao kolo@e iloko oia nei, ma ka lawe ana mai iaia i wahine nana.

            "Aole au he kanaka lapuwale elike me kau e kapa mai nei ia'u e Magureta," wahi a Reginola me ka leo kuoo. "Ua maopopo ia'u, ua hoalaia mai kou manao huhu me ka inaina ia'u mamuli o kou lohe ana, i na olelo a kuu hoaloha elioka i keia po, a ua ala mai na hoohuoi ana, ua hana hewa aku au ia oe ma kekahi ano."

            "Aole ko'u he hoohuoi, aku ua manaoio maoli no au, ua hoopunipuni ino loa mai oe ia'u, mamuli o kou mare ana mai ia'u malalo o kekahi inoa kapakapa, a huna aku i kou inoa oiaio, me ka manao, pela iho la e ko ai kekahi manao lapuwale iloko ou, ma o'u nei e lilo ai i mea paani na kou mau makemake ame kou mau iini."

            "Ua kuhihewa loa oe e Magureta kuu wahine, ma kena mau olelo au e ahewa wale nei no maluna o'u. Aole loa he mau manao kolohe iloko o'u, ma kuu manawa i mare aku ai ia oe, koe wale no, ka hoao ana e hoopakele ae ai oe, mai ka mana mai o ka ma'i pupule, a ua lilo i mea na'u e hauoli loa ai@ke olelo ae, ua aneane e hoea mai ka la a'u e ike aku ai i ka lanakila o ka'u mau hoomanawanui ana."

            "Ua lawe aku oe ia'u, e lilo i kahua no kou huli ana i ke akamai o ka oihana lapaau, ma na ma'i pupule, heaha hou aku anuanei ia hana okoa e ae au, no ka mea ua piha maoli oe i ke kolohe."

            "Ua lawe aku oe ia'u, e lilo i kahua no kou huli ana i ke akamai o ka oihana lapaau, ma na ma'i pupule, heaha hou aku ananei ia hana okoa e ae au, no ka mea ua piha maoli oe i ke kolohe."

            "Ke hoinoino wale mai nei no oe ia'u me na kumu kupono ole," i pane hou aku ai ke kauka opio, me ka hele o kona helehelena a haikea pu, no ka malee i kona inoa maikai, me ka hoehaeha pu ia o kona nonoo, no na olelo ku i ka lokoino a Magureta iaia.

            "Aole au e hoole aku ana imua ou, o kou ma'i kekahi o na ma'i nana i hoopuhili loa aku i ka ike ame ke akamai o na kauka kaulana loa o ka honua nei. Ua hoolilo nui aku au i ko'u manawa, ma ka hooikaika ana e kaawale kela ma'i mai ia oe aku, a e hoi hou mai kou mau ano maikai elike me mamua, me ka loaa ole he wahi noonoo kolohe ame ka epa iloko o'u, elike me kau mau olelo ku i ka lokoino i hooili mai nei maluna o'u.

            "Me ka hookamani ole, a o ke Akua ka hoike hookahi no ka oiaio o ka'u mea e kamailio aku nei imua ou, ua aloha aku au ia oe e Magureta me kuu naau apau, na ia aloha hookahi wale no, i kono mai ia'u, e haawi aku i ka'u mau hooikaika ana no kou palekana, a ua hookooia ka iini a kuu puuwai."

            Ma kela wahi, ua hooki honua iho la o Reginola i kana kamailio ana aku, a ua maopoo mai la no ia Magureta, aole kana kane, i makemake e hoehaeha aku i kona noonoo, ma ka noe ana aku i ke kamailio, i na mea apau i hanaia aku no ka pono o ua o Magureta.

            Ke ike la ua o Magureta, ua kamailio wale aku no o Reginola iaia i na mea oiaio loa, a ua noho aie maoli no oia, malalo o kela kauka opio, no ka hoi hou ana mai o ke kulana maikai iloko on a, eia nae iloko o ka manawa o kona uluhia ana i na manao hehena, ua paleia ae na mea maikai mai kona noonoo ae, a kanuia aku la ma ia makalua, ka hoowahawaha ame ka hoihoi ole.

            "No ko'u huna ana i ko'u inoa oiaio, elike me kau i hoahewa mai nei ia'u e Magureta, a ua mare aku au ia oe, malalo o kekahi inoa kapakapa, aole he pololei o ia mau olelo; no ka mea, aole loa au i hana i kekahi mea e hoohaahaaia ai kekahi o kaua, a e kau mai ai paha he mau hoohilahila ana ma kekahi ana."

            "Pehea ka oe i kapa ai ia oe iho o Kauka Noka, aole o Kauka Alika?" i pane hou mai ai o Magureta me ka leo pikanana.

            "O ko'u inoa pololei no ia a o ka hoopau pono ana i ko'u inoa, o ia no o Kauka Noka Alika."

            "Ae, o oe ke kaikunane o Kanani Alika, kela wahine hookahi a'u i lili ai, mamuli o kona kaili ana aku ia Noela Kauwila."

            "Ua ike no oe, aole o'u hoihoi i kela kaikuahine ou, pehea la oe i hoao ai e hoopunipuni mai imua o'u, ma o ka hoike mua ole ana mai he kaikunane ponoi oe nona?"

            "E noho iho e Magureta ilalo," wahi a ke kauka opio, me kona uwai ana mai i kekahi noho paipai imua o Magureta, a hooko aku la nohoi ka wahine opio i ke kauoha a kena kane, no ka mea ua hele oia a piha me ke pihoihoi, in a no kona homau i ke ku ana iluna, e hina ana oia ilalo, lalau aku la no hoi o Reginola i kekahi noho okoa, a panee mai la mamua o ke alo o kana wahine, me ka hoomau ana aku i ke kamailio ana:

            "E hoolohe mai oe e Magureta kuu wahine i na mea apau a'u e kamailio aku ana ia oe niai kinohi mai, a nau ia e hooholo iloko o kou noonoo, in a paha he epa kekahi iloko o'u ma ka@ mau han a apau i hooko aku ai, aole paha."

            Aole ua o Magureta i hoohewahewa, aia na manao oiaio ame ka makee iloko o ke kanaka ana i mare mai ai i kane nana; aka nae, o kela ike i loaa aku iaia, o keia ka ke kaikunane o ka wahine ana i hoowahawaha loa ai, ua lawa ia, no ka hiki ole iaia ke huikala mai ia Reginola.