Ka Nupepa Kuokoa, Volume LVII, Number 34, 22 August 1919 — Page 7

NUPEPA KUOKOA, HONOLULU, T-H, POALIMA, AUGATE 22, 1919

 

He Moolelo no

MAGURETA

a i ole

Iloko o na Wiliau a ke Aloha. He Moolelo i

Piha me na Haawina o ka Eheaeha.

 

Hoihoi aku la o Magureta i kona noonoo ihope, i kela manawa a laua i haalele aku ai ia Amerika, ua hiki la iaia ke heluhelu aku me ka moakaka loa, i ka waiho ana aku o Reginola i kana oihana, ke kaulana ame ka waiwai mahope mamuli wale no o kela makee, e loaa iaia nei ka palekana mai kona mai mai, a e hoi hou mai hoi ka hauoli iloko o kona noho ana.

"E haalele anei au iaia, a hele aku no kekahi wahi okoa?" i hoala mai ai ua o Magureta i kela ninau, me ka nana ana ae o kona mau maka maloko o kona rumi. "O, aole loa e hiki iau ke haalele iaia." me ka noke hou ana aku o ua o Magureta i ka uwe, no ka mea ina no kona huli hoi no Amerika, a haalele hookahi iho ia Reginola ma Palani, ua like no ia me he mea la ua make kekahi o laua e pau ai ka ike hou ana aku o kekahi i kekahi.

Me he olino ana la na ke kukuna malamalama o ka la i ke kakahiaka, pela iho la no ka uwiuwiki ana ae o ka hoomaopopo ana iloko o Magureta, aole loa he kumu e ae o knoa makemake ole ana e hookaawaleia oia mai ia Reginola mai, mamuli mai no ia o kona aloha i keia kanaka, olino pu mai la no hoi ka malamalama no ke ano o ke ola ana aku iloko o ka hauoli, ia manawa i paulu hou ae ai oia i kona mau maka, a hookahe aku la i na waimaka, aole he mau waiinaka o ka ehaeha aka he mau waimaka no ka hauoli, ka mea nana i hoopilikia mau mai i kona noonoo iloko o na la ku i hala a laua e noho pu ana.

O keia mau waimaka a ua o Magureta e hookahe la, ke holoi la ia i kona mau manao lili me ka hoowahawaha ia Kanani, ke kaikuahine o ke kane ana i mare aku ai, a e ike nei hoi ike aloha iaia; a me hihio moeuhane la, ua hiki loa i ua o Magureta ke ike aku, ua hoea mai i ka manawa ana e panai aku ai i ke aloha a kana kane i ake mai ai iaia e haawi aku, a ua hoopakekeia ae hoi oia mai kona mau ano olalau mai o na wa i hala.

 

MOKUNA XXX

I ke akakuu ana mai o na manao pihoihoi iloko o ua o Magureta, wehewehe ae la oi ai kona mau lole, a haule aku la luamoe, me he mea la, aole he mau ano maikai ole i koe iloko o kona noonoo, ua like maoli kana hiamoe ana me kekahi mea i helo a luhi, ia kau ana no o ke poo iluna o ka uluna, o ka lilo aku la no ia.

Iloko nae o kela nanea o ua o Magureta i ka hiamoe,ua puiwa oia i ke kani ana mai o ka uwaki, eia ka o ka hora umikumamalua ia o ka po, ala ae la oia iluna, a hele mai la e kiei mawaho o ka puka aniani, a oiai ua oili ae ka mahina i kea manawa, he keu aku a ka ui o ka hiona ana e nana aku la iwaho.

Aole ona lohe mai i ka nakeke o kana kane maloko o kona keena, elike me kela manawa ana e noke ana i ka uwe, mamua o kona hoi ana e hiamoe, eia nae, ke kau mai la no kana mau hoomanao ana no ka helehelena kaumaha o kana kane elike me ia ana i ike hope ai, ma kona manawa o ka haalele ana iho i ke pakaukau aina, na ia hiona i hoopau loa ae i ka makehiamoe mai iaia aea oili mai la oia iwaho o kona rumi, no ka nana ana, in a no paha aia o Reginola ke ala mai la no maloko o kona keena hana.

Iho mai la oia no ka hale olalo, a ma ka malamalama o ke kukui, oloko o ke keena o kana kane, i hoomaopopo aku ai oia, aole i hiamoe o Reginola, aka ke ala mai la no ma kana mau hana i makemake ai e makaukau, mamua o ka hoea ana mai o ekahi la ae.

"in a penei iho la ka nui hooikaika o Reginola ma kama mau hana, e hoea mai ana ka manawa, e hiki hou ole aku ai ke hoomanawanui," i namunamu liilii wale iho ai no ua o Magureta, me kona hoomau ana aku no i ka hele ana no kahi o ke keena o Reginola i waiho ai.

I kona hoea ana aku no ka puka, wehe aku la oia, ano ka hiona i halawai mai me ka ike a kona maka, o ia kekahi hiona nana i hookaumaha loa mai i kona noonoo, no ka mea, e noho ana no o Reginola malua o kona noho, aia hoi kekahi lima e kalele ana iluna o ka pua pepa e mokaki ana maluna o ke pakaukau, o o kekahi lima e puluki ana ma kono poo, me ke kulou nae o ke poo ilalo, e hoike mai ana i ka nui maoli o kona luhi maoli i ka hana.

Ma na mea a Magureta e hoomaopopo aku la, aole loa i lawelawe iki kana kane i na hana elike me kana i hoike mai ai iaia e hoi ana e hoomakaukau i kana hoike, aka ua hoohala wale no o Reginola i kona manawa, ma ka noonoo nui ana i na mea maikai ole i oili ae mawaena o laua ma kela ahiahi, a ua o Magureta e mihi loa la no kana mea i hana aku ai i kana kane.

Me ka manaopaa nae e hooluolu aku i ka manao o kana kane, hele pololei aku la o Magureta a kau iho la i kekahi lima maluna o ka poohiwi o kana kane, me ka pane pu ana aku me ka leo oluolu:

E Reginola, ua aumoe maoli keia manawa, in a e hooikaika nui ana oe i ka hana, e ku a mai ana oe i keia la"

No kela mau olelo a kana wahine, nana mai la o Reginola maluna o Magureta me na maka kaumaha, ka mea nana i hookomo mai i na manao aloha iloko o Magureta no kana kane, a ua kokoke loa no oia e hoike okoa aku i ka mea oiaio i kela manawa, no ka nui o kona aloha i kana kane, a e nonoi aku hoi i kana mau huikala ana mai iaia, no kana mau mea i hana aku ai; no ke ku`eku`e ana ae nae o na poohiwi o Reginola e pale mai ana i ka lima o ua o Magureta, na ia mea i kaohi mai i ka hoopuka ana aku i kona manao.

"Heaha ka mea nana i kono aku ia oe e Magureta e hoea mai no kuu keena iloko o keia manawa o ka po?" wahi a Reginola me ka leo kuoo. "Aole e hiki ia`u ke hoi koke e hiamoe i keia manawa, oiai e waiho ana ka`u mau hana me ka pau ole i ka hooponoponoia. E hoi koke oe e Magureta no kou rumi no ka hooluolu ana, ua aumoe maoli keia manawa o ka po!"

"Ua hiamoe iki mai nei no au, a mailoko mai o ka hiamoe ko`u puoho ana mai nei, me he mea la e olelo okoa ia mai ana au, e hele mai e nana ia oe pela iho la au i hoea mai nei, a loaa oe e ala ana no. O ka`u wale no e nonoi aku nei ia oe ae Reginola, e hoi oe e hooluolu i keia manawa."

"Ae, e hoi koke aku ana au e hiamoe," wahi a Reginola me ka lalau ana aku i ka peni, a hoomaka aku la e kakau,iai Hoi o Magureta e kakali aku ana, o ke kamilio mai o kana kane i hookahi huaolelo oluolu o ke aloha, alaila, o kona manawa ia e hua`i pau aku ai i ka meahuna oloko o kona puuwai, aole nae he hiona iki o kela ano, ua nohoalii maoli iho no ka uahoa maluna o Reginola.

He manao nui loa kekahi o ua o Magureta o kela hele ana mai e ike i kana kane, in a nei no ka oluolu o na olelo e kamailio mai ai iaia, aole ana hoohakalia hou ana iho, i ka hoike ana aku i ka nui maoli o kona aloha no kana kane aole nae e hookoia ana ia manao on a, a no ka nana hou ole mai o Reginola iaia, a kamailio mai paha, haawi aku la o Magureta i ke aloha i kana kane, a pana`i mai la no hoi o Reginola, me ka mau no nae i ke kakau, me he mea liilii loa la ka wahine iloko o kona noonoo.

Me na kaina wawae kaumaha i huli hoi aku ai o Magureta noloko o kona rumi, a oiai aole he mea hou aku ana e noonoo ai, hoomakaukau iho la oia no ka hooluolu ana, aia nae iloko o kona noonoo, ka manao kanalua, in a paha ua lilo kana mau hana ma kela po i mea e hoalaia aku ai na manao hoowahawaha o kana kane nona.

No kekahi manawa loihi nae kela noke ana i ka hoololo maluna o kona wai moe, akahi no oia a pa`uhia i ka hiamoe, a na ke ao ana ae ma kekahi la mai i kono aku iaia e ala.

Ma kela huli hoi ana mai hoi a Magureta noloko o kona rumi, a haalele ak ula ia Reginola ma kona keene hana, ua nooikaika maoli aku la o Reginola i ka hoomakaukau ana i kana hoike, a no ka hora hookahi a oi, akahi no oia a eu ae mai kona noho mai, no ka hoi ana aku e hooluolu, oiai ua hele maoli oia a maluhiluhi.

Ma ke kakahiaka o kekahi la mai, ua hoea like aku la no ke kane me kana wahine ma ka aoao o ke pakaukau aina, me ka hoao ana o kela ame keia pakahi o laua e kamailio mai me kela ano i maa ia laua o na la aku i hala, aku nae he hiki wale n ke ikeia aku, aia kekahi mau mea ano nui loa iloko o ko laua mau noonoo pakahi.

O ko laua ai nae ia ahiki i ka maona ana o Reginola, ku ae la liuna, no ka hoomakaukau ana e hele aku i ka hana, a o ia nae kana i pane mai ai i kana wahine:

"No keia la, mai kakali ae oe ia`u e Magureta no ko`u hoi ana mai i ka hale nei e ai ai i ko`u aina awakea; Ke manao nei au, he hana paakiki ia`u ka hoi ana mai, aka e noho ana au e ai maloko o kekahi o na hale aina e pili kokoke la i ka halema`i."

O keia ka manawa mua loa a Reginola i kamailio mai ai, no kona ai ana maloko o kekahi o na hale aina, ma na manawa apau mamua aku, pehea la ka nui o kana mau hana, aole loa he hookahi awakea, ana e hoi ole mai ai i ka hale e ai ai i kona aina awakea, me kana wahine. Ua maopopo loa ia Magureta, aole he kumu okoa ae o kela makemake ana o kana kane e ai i ka haleaina, mamuli no ia o ke kulana maikai ole mawaena o laua, a in a aole i hoalaia mai na olelo e piena ai kekahi i kekahi, aole e puka kela mau olelo mai ia Reginola aku, no kona hoi ole mai i ka hale e ai ai.

"E hoao oe e hoi mai e ai i keia awakea maka hale nei; o keia ka manawa mua loa o kou noho ana i ka haleaina, a e mehameha loa ana au i ka ai hookahi, me ka mea ole ma kou wahi a`u e nana aku ai," wahi a Magureta me ka nui o kona kaumaha no ka loli loa o ko Reginola mau ano mai ka po aku i hala, ahiki i keia kakahiaka.

"Ua ike no au, e mehameha loa ana oe e Magureta, aka nae, mamuli o ka nui o ka`u mau hana, me ka uuku loa o kahi manawa kaawale, ke ike nei au, he hana paakiki loa na`u ka hoi ana mai i ka hale nei i keia awakea," alaila kunou mai la oia imua o kana wahine, me ka haawi na mai i kona aloha kakahiaka, o kona oili aku la no ia mailoko aku o ka rumi aina.

Halo`ilo`i ae la na kulu waimaka ma na lihilihi o Magureta, no ka mea, o kela ka manawa mua loa a kana kane i hoike mai ai i na ano uahoa, nona ponoi no nae ka hewa, o kona ae ole e kaa ma kona aoao ke kamailio ana aku i ka meahuna a kona puuwai e hiipoi ana,a e nonoi aku paha i na huikala ana mai a Reginola iaia, o ka mea ia nana e hookau mai nei i na haawina hoehaeha malun ona.

"Aole au e uwe ana me he bebe la," wahi a ua o Magureta me ke ku ana ae iluna, no ka hoomakaukau ana e hoihoi aku i na meaai. "Aole a`u hooili wale ana aku i na ahewa ana maluna o kekahi mea, no keia kulana i oili ae nei mawaena o`u ame ka`u kane, aka maluna iho no ia o`u. O ka hana pono wale no ma ko`u aoao, o ia no ka liooko ana aku i ka`u mau hana apau me ka maikai, me ka hoikeike aku hoi i kuu kane, i ka loli o ko`u man ano, mai kela mau ano kahiko ana i kamaaina ai."

Me kela manaopaa iloko on a, i hoomaka aku ai no ola i kana mau hana maamau o ka hale, a iloko o kona mau manawa kaawale, e hoohala ana oia, ma ke pena ana i kana mau kii, he hookahi nae o kela mau kii i paa ma kela la, a hookomo aku la iloko o ka laau, me ke kau aa aku ma kekahi wahi o ko laua keena hookipa, me kona manao e hookahaha aku i ka manao o kana kane, i ka wa e hoi mai ai i ke ahiahi.

Ma na hora o kela auwina la a oiai e kokoke ae ana i na hora e huli hoi mai ai o Reginola mai kana hana mai, ua kokua aku la o Magureta ia Nora, ma ka hoomakaukau ana i kekahi mau meaai maikai loa, na meaai ana i ikeai, i ka makemake nui o kana kane, me ka lawe ana maii i kekahi mau pika pua, a waiho iluna o ke pakaukau, i wahi no kana kane e ike mai ai, aia ka manao makee iloko oia nei nona.

Oiai no nae o Magurea e hoomakaukau ana i ke pakaukau aina, kani mai la ka hele kahea mamua o ka lanai o ka hale, o Nora ka i hele aku e nana i ke kumu o ka hookaniia ana mai o kela hele, a iaia i huli hoi mai ai, haawi mai la he leke ia Magureta, a me ka naau i piha i ka ehaeha ame ke kaumaha i heluhelu iho ai oia i na manao i kakauia maloko elike me keia:

"Mamuli o kekahi halawai ano nui a na luna hooko o ka halema`i ma keia ahiahi, ua hiki ole ia`u ke hoi aku no ka ain ahiahi, nolaila, mai kakali mai oe e Magureta ia`u, aia paha ko`u hoea aku i ka hale ma na hora o ke aumoe- R.N. Alika."

Me he mea la i lalauia mai kela leka mailoko ae o kona lima, ua haule wale aku la no ka palapala mai iaia aku, o ke kumu ua hookaumaha nui ia mai kona noonoo, no ke ano uahoa o na manao a kana kane i kakau mai ai maloo o kana leka, aole hoi o na olelo oluolu, a i ole la hoi ia o ke kakau mai i kekahi wahi huaolelo o ke aloha, he oki loa no ma na ano apau.

Kulou iho la inae ua o Magureta ilalo no ka nana ana i ka leka a kana kane no ka lua o ka manawa a ia pau ana no o kana heluhelu ana, lumilumi ho la oia i na leka nei iloko o kona lima, kaomi aku la i ka bele kahea aole no hoi i emo iho, ku ana no o Nora ma kona aoao a ninau mai la i ka hana i makemakeia ai oia ia wa no hoi kona haku wahine i pane aku ai"

"Aole e hoi mai ana ke kauka e ai i kona aina ahiahi i ka hale nei," wahi ana me ka olelo pu ana aku aole a laua hooluhi hou ana aku ia laua iho ma ka hoomakaukau ana i kekahi mau mea e ae e lawa pono ai ke pakaukau.

"He keu aku ka ko kaua luhi makehewa i ka hoomakaukau ana i he halwai ka na kauka e malama ana maloko o ka halema`i; nolaila aole a kaua mea e aku e hana ai koe wale no ka hoihoi hou ana aku i keia mau mea a kaua i lawe mai ne."

"Ipa hoi ha peia e lawe mua mai au i kau mau meaai a mahope aku e hoi hoi ai i keia mau mea."

"Aohe ono o ka`u ai i keia ahiahi, mamuli o ka hoi ole mai o ka`u kane aka nae e lawe mai oe i pola kone wale no ua lawa ia no ka hoomau aku i ko`u ikaika ahiki i ka la apopo."

"Aole paha he pololei o ia noonoo ou e kuu haku na ike no kaua in a aole e lona ana na meaai kupono i ke kino e lilo ana ia i kumu e ma`i ai. I keia awakea iho nei aole no nui kau mau mea i ai ai, a hui pu iho me kou ai ole ma keia ahiahi, ua uuku maoli na meaai i komo iloko o kou kino."

"I pola kope wale no kau e lawe mai ai no`u, me kekahi mau apana palaoa i hamoia i ka waiubata. Anuhea nae oe e Nora ma keia hope aku, e kapa aku oe i ka inoa o ke kauka o Kauka Alika, aole hoi o Kauka Noka, elike me kau i kamaaina ai."

"E kapa aku anei au iaia o Kauka Alika, aole o Kauka Noka?" wahi a Nora me ka hoike ana mai i kona kahaha, no keia hooloiia ana o ka inoa o kona haku kane.

"No kekahi kumu, i hiki pono ole ia`u ke hoakaka aku ia oe i keia manawa, pela oia i lawe ae ai i kona inoa waena a kapa iaia iho o Kauka Noka, aka nae no keia mua aku, e i eia oia ma ka inoa o Kauka Alika, o kona inoa oiaio loa ia a ua makemake pu oia, e kapaia mai au, ma kona inoa hou."

"Elike me kau i makemake ai, pela no au e hooko aku ai," wahi a Nora, me ka niele hou ole mai, aka nae akahi no a maopopo mai la iaia kekahi mea no ke kumu o ka ai nui ole mai o kona haku wahine ma kela la aia kekahi mea maikai ole mawaena o ke kane ame kana wahine ma ka po aku mamua, a o ke kumu nui no hoi ia o ka hoi ole ana mai o ke kauka e ai i keia la.

I ka hoea ana mai o ke pola kope, hoomaka iho la o Magureta e  inu, me kona hoopa ole aku i kekahi mau meaai ono e waiho mai ana imua o kona alo, aole no he nui o kahi o ke pola kope i pau iaia i ka inuia, aka he liilii wale no, alaila ku ae la oia a huli hoi pololei aku la noloko o kona rumi, a oiai aole he hoihoi iki iloko on a, e heluhelu aku i kana mau buke, a e lawelawe aku paha i kekahi mau hana, nolaila haule aku la oia iluna o ka moe, hoololo, me ka wehewehe ole i kona mau lole he hookahi hana o ke kaapa wale iho no iluna o ka uluna, me ka hoolohelohe ana o ka huli hoi mai o kana kane.

Ma kela po aole i hiki ia Magureta ka hiamoe ahiki i ka hora umi-kumamakahi, lohe aku la oia i ka nakeke mai o kana kane, me ka hoi pololei loa ana ae nae noloko o kona rumi, akahi no a hoomamaia mai kona manao, o ke ala ae la no ia, wehewehe i kona mau lole, a haule aku la hiamoe, me kona ala ole mai i kona manawa maamau e ala ai, ahiki i ka hookani aua mai o Nora i ka bele kahea.

 I kona puoho ana ae, ua maikai maoli kona mau ano apau, nolaila komo awiwi iho la oia i kona mau lole, me ka kahiko ana iaia iho e lilo ai i mea na kana kane e mahalo mai ai, a i kona makaukau ana, iho mai la noloko o ke keena aina ua hoea mua hoi o Reginola noloko o kela keena e kakali mai ana o ka hoea aku o kana wahine.

Iaia nae i ike mai ai a Magureta i ke komo ana aku, haawi mai la i kona aloha kakahiaka, me ka lamalama o kona mau maka e hoike mai ana no kona mahalo i ke kulana u`i a hiehie o kana wahine, eia ne he mau sekona pokole wale no kela ano maluna o kona mau maka, ua kulou iho la kona poo ilalo a hekau hou iho la ke ano haka-nu maluna on a.

Ua hoehaeha loa ia mai ko Magureta noonoo, no ke ano o kana kane, aole no nae oia i hoikeike aku ma kana mau hana, aka hoao aku la oia e kamilio me ka oluolu, oiai oia e ninini aku ana i ke kope no kana kane, a o ia kana o ka i ana aku:

"Ua ku a mehameha maoli au i ke awakea onehinei i kou hoi ole ana mai i ka hale nei e ai ai, a pela nohoi ma ke ahiahi ana iho no ka mea o kela ka manawa mua loa o ko`u ike ole ana ia oe ma kou wahi mau ma ke pakaukau nei; a ke lana nei ko`u manao, aole e hoomauia aku ana ia ano o ko kaua noho ana, ua ike maoli iho no au i ka mehameha o ka noho hookahi ana owau wale iho no."

"Ke kaumaha loa nei au, in a ua lilo ko`u hoi ole ana mai e Magureta i mea nou e ha`oha`o ai," wahi a Reginola me kela ano kuoo mau no on a.

"Pehea, he nui, no nae paha ka poe ma`i ma ka halema`i e noho mai nei i keia manawa ea?"

"Ae, ua nui maoli na ma`i i keia manawa."

"He keu aku a ka nui maoli o kau hana, a mamuli o kou hooikaika i ka hana, i ke ao ame ka po, ke hopohopo loa nei au e hoea mai ana i ka manawa e loohia ai oe i ka ma`i."

"Mai hopohopo kou manao no`u, ua hiki loa ia`u ke malama ia`u iho me ke kupono, a in a no e hoea mai ana ka ma`i, he mea liki ole ia kaua ke alo ae, in a no ia mamuli o ka hooikaika nui ana i ka hana, a i ole, ma ka noho malie wale ana no paha i kahi hookahi."

"Ma ka`u nana aku ia oe iloko o keia mau la, ke emi mai nei kou kino, ua nui maoli kou hooikaika i ka hana, me ka loaa ole o ka hoomaha a hooluolu ana i kou kno, O ka`u e uwalo aku nei ia oe e Reginola, e waiho aku oe i na hana oloko o ka halema`i a  e lawe mai kaua a hoohana aku i na dala e waiho wale mai nei me ka waiwai ole."

"E olelo mai ana anei oe, elilo au i mea hoopomaikaiia malalo o na dala a kekahi wahine, i nele ke aloha no kana kane? O kena manao au e kamailio mai nei imua o`u, inahope o na olelo hahana i kamilioia mawaena o kaua ma kela po aku nei, ua like ia me kekahi kui e hou mai ana i kuu puuwai."

Ua hoehaeha loa ia aku ko Magureta noonoo, no ke kapa ana aku o kana kane iaia, i ka wahine aloha ole, alaila hoomaka mai la oia e kamailio no ka manao, e hoike okoa mai i ka nui o kona aloha ia Reginola, aka nae ua kahamaha e aku la kana kane, ma ka pane ana aku:

 

MOKUNA XXXI

 

"E huikala mai oe ia`u, ina ua lilo ka`u mau olelo i kamalio aku nei`i mea hoehaeha aku ia oe e Reginola," wahi a Magureta me kona ku pu ana ae no oi iluna, mai kona noho ae. "Aole loa he kumu naua i kono mai e kamilio aku ia oe, i na mea au i lohe mai nei, mamuli wale no ia o ka nana ana aku ke emi mau nei kou kino aole hoi elike me kela manawa mua a kaua i noho mai ai i kela wahi."

No ka manawa mua loa akahi no a hiki ia Reginola ke ike mai i ke kulana oiaio maoli o kana wahine, o kela mau waimaka o ka hanini ana mai e kihe`ahe`a ana ma kona mau papalina, he mau waimaka ia i holoi loa ia aku ai na manao nonohua iloko on a, no Magureta a o ia kana o ka pane koke ana mai:

"Ua ikaika loa aku nei paha ka`u unau olelo ia oe, a ke nonoi aku nei au i kau mau huikala ana mai. Aole au mea e hopohopo ai no`u, he o ia mau na ko`u kulana maikai, aole i lilo ka nui o ka`u mau hana e lawelawe nei i mea hoopilikia mai i ko`u ola kino."

"E huli hoi mai ana anei oe no ka hale nei, elike me ka mau i na la aku nei i hala e Reginola?"

"No ka paina awakea, he hana hiki ole no`u ka hoi ana mai i ka hale nei e ai ai, aka malia i ka aina ahiahi au e hoi mai ai eia nae, i kakau ae oe a ahiahi loa, mai kakali hou aku, e ai aku no oe, a iloko no hoi o ia manawa hookahi e hoomanao iho ai oe, ua paa loa au i ka hana. Ua manao no hoi au he mea maikai paha ma keia hope aku ko`u ai ana i ke awakea maloko o kekahi hale aina e pili kokoke ana i ka halema`i, no ka mea he hana nui no hoi ka hoi mau ana mai i ka hale nei e ai ai, a o kekahi, aia ma kahi kokoke i kela haleaina, kekahi o ka`u poe ma`i kahi i noho ai."

He mea hookahaha loa aku keia i ko Magureta manao no ka mea, i na la mamua aku e maikai ana ko laua noho aku oe i hio ka manao o kahi i ku ai o ko laua home mai  ke halema`i mai, i mea na Reginola e kamailio ai, he mea ha nana, ka hoi ana i ka hale e ai ai, nolaila he mea ano keia i ko Magureta noonoo ana, alaila nui iho la kona ha me ka i ana mai:

"Ina i`o ua hoopilikia ia aku oe ma ka hoi mau ana mai i ka hale nei i ke awakea, alaila he oi aku ka pono, e ai oe ma loko o ka haleain, aia no hoi a pau kau hana ma ke alualu ia manawa oe e hoi mai ai, a i hookahi ko kaua ai like ana.

"No keia hoike au e hana nei, no ka hoomama ana ae i kua mau hana, ua hiki ia`u ke kokua aku ia oe, ke kuhikuhi mai no hoi oe i ka`u mea e hana aku ai. Ua ike au i ka nui o ma hana ma ka halema`i, a o ia luhi no o ko hoi ana mai a i oe hana makaukau hou aku la oe i kau hoike, nolaila e haawi mai o i kekahi hapa o kau mau hana, na`u e lawelawe aku ma ka mea hiki."

"Ke haawi aku nei au i ko`u mahalo ia oe no kou ake ma mai e kokua ia`u, aka nae, aole au i makemake e hoopilikia wle aku ia oe," alaila alawa iho la oia i kana uwaki, ua i o koke loa ae i kona manawa, a i aku la: "Aole he manawa hou no kaua e kamailio ai, ua kokoke e kani ka hora eiwa, e hele koke au i ka`u hana," haawi aku la ia ke aloha kakahiahi a kana wahine, o kona kaha mai la no ia hele no kahi o ka puka.

"He hookahi a`u mea i koe i makemake ai e noi aku ia oe malia paha hoi he mau minuke no kekahi i koe au e noho nou iho ai ma ka hale nei, ua makemake au e hoikeike aku ia oe i kekahi kii pena a`u i pau i ka hanaia," me kona komo ana ahu iloko o ke keena hookipa, a kukuhi aku la i ke kii ana i waiho ai ma kekahi wahi kupono, no ka hoikeike ana aku i he ano o ka mea aua i hana ai imua o kana kane.

"He keu a ka u`i o kela kii, a ua pololei maoli no na olelo a kau kumu i kaena ai no ka nui o kou akamai ma ke pena kii, wahi a Reginola, me ka alawa hou ana iho i kana uwiki. "Aole o`u manawa i koe e hoololohi wale iho ai no, nolaila o ke aloha kakahiaka no kou e Magureta," a oili mai la no ka hele ana i kana hana.

I kela haalele ana mai a Reginola, ma kela ano uahoa no on a, ua lilo ia i mea hoopilikia loa mai i ko Magureta noonoo aka nae aole he makemake o ua wahine opio nei e loohia oa i ka ma`i, nolaila waiho aku la oia i kona mau manao maikai ole apau, hoi pololei loa aku la holoko o kona rumi, me ke komo ana mai i kekahi lole, no ka hele holoholo ana, he oi aku ia, mamua o kona noho malie ana i kauhale.

I kona makaukau ana, iho mai la no ka hale olalo, a kauoha aku la ia Nora e hookomo mai i mau meaai mama nana maloko o kekahi wahi ie paalima, me ka olelo pu ana aku, aole oia e hoi mai ana i ke awakea, oiai i ka noho ana o Reginola e ai ma ka haleaina, he mea maikai ole hoi nona ka noho hookahi ana e ai ma ka hale, he kumu no ia e hoalaia mai ai na noonoo kaumaha iloko on a no kana kane.

O kahi a Magureta i hele ai ma kela la, maloko no ia o kekahi hale i kauia ai na kii i kahaia e na kanaka kaulana loa ma ke kahakii, he wahi no keia nana e hele mau ai e hoohala i kona mau manawa kaawale o ka la.

He pono hele wale iho no keia a Magureta e nana pakahi ai i na kii, maloko o kela ame keia rumi. I ka hoea ana nae o ua o Magureta mamua pono o kekahi kii nui, he kii no ka poe hulahula maloko o ke keena kalanu o ka halealii ku maile iho la oia me ka nana akahele ana i ua kii nei e malulo ana i ke akamai ame ka noeau o ka mea nana i pena, aia hoi ua hoopuiwa loa ia oia i ka paa ana mai o kekahi mea ma kona lima, me ka hooho ana mai:

"O, nani maoli ka hauoli o kuu uhane, ua hoi mai ka Madame Magureta," wahi ana me ka noke ana iho i ka puliki i kekahi lima o Magureta.

"Ua hookahaha loa ia aku o Magureta i ka hana a kela wahine, me ka mau no i ka paa i kona lima, ahiki i kona noke ana i ka uwe, he uwe nae a ua o Magureta e noonoo la ua kuhihew a loa keia wahine, iaia nei, no kekahi mea okoa aku i kamaaina loa i ua wahine la.

Aia na makahiki o keia wahine, ma ka Magureta koho aku ma kahi o ke kanalima a kanaono paha, ua o mai ka lauoho keokeo ma kona poo, a ma ke ano o kona lole e komo ana hoike okoa mai ai kela wahine, aole oia no ka papa haa loa, aole no hoi no ka papa o ka poe waiwai, aka he wahine oia i loaa kekahi wahi waihona nona iho, pela i hiki ai iaia ke kuai i na lole maemae elike me kona e komo ana.

O kekahi mea nana i hookahaha loa aku i ko Magureta manao, o ia no ka pololei loa o ke kahea ana aku a keia wahine i kona inoa, a iaia i hoike pu aku ai i ka hoihoi loa no halawai pu ana o laua, ua maopopo loa iho la i ua o Magureta, ua kuhihewa keia wahine iaia, no kekahi mea okoa loa i kamaaina i ua wahine nei.

I ke akakuu ana mai hoi o ka uwe ana a ka wahine mau hini, ia wa i pane iho ai o Magureta me keia mau olelo: "I ka wahine malihini, e ku ae iluna," me kona lalau ana i hoi ka lima a huki ae la no ke ku ana iluna. "Ke manao nei au ua kuhihewa oe ia`u no kekahi mea okoa aku au i kamaaina ai."

"Aole loa au i kuhihewa," i pane ae ai ka wahine malihui me ka mau no i ka puliki ika lima o Magureta. "O eie no o Magureta, a ke hoomaikai ae nei au i ke Akua, no ke ai kai ana ia Jeneta a halawai pu me oe i keia la. Ihea oe kani i nalowale ai iloko o keia mau makahiki loihi loa?"

"Ke hoomanao nei no anei oe i na makahiki o kou ike hoa ole ana ia Magureta?"

"Alia e hoonoo ae au," wahi a ka wahine malihini, me ka puliki ana ae o kekahi lima ma kona poo, a i ka hala ana o kekahi mau minuke, akahi no oia a pane mai: "Ke hoomanao nei au, o keia ka piha ana o na makahiki he iwakaluakumamaha o ko`u ike ole ana iaia," me ka nana pono loa ana mai nae o ua wahine nei ma na maka o Magureta ai hou mai ku.

"He opiopio loa oe a`u e ike aku nei, no Magureta nae, in a o oe ia aia ma kahi o ke kanaha kona mau makahiki i keia manawa."

"O ka`u e manao nei, ua kuhihewa loa oe ia`u": wahi a Magureta me ka leo oluolu, a ke ike i`o mai la no hoi oia, i ka hoomaopopo ana o kela wahine i kona kuhihewa.

"Malia paha ua kuhihewa i`o au, aka nae ma kou mau ano apau loa aole he wahi lilo iki o Magureta. O kou mau lauoho, kou mau maka ame kou mau papalina loloa, pela no me ke ano o kau hele aina, aohe he wahi lilo mai ia Magureta mai," wahi a ka wahine malihini, me ka nui ana iloko kona hanu.

"E oluolu ana anei oe e hoikeike mai i ke ano o keia wahine au i kuhihewa ai ia`u, oia ia?" wahi a Magureta, me ka leo oluolu loa.

"O Magureta Delavina kona inoa, me he mea la aole he wahine e ae a ke Akua i hana mai ai, i oi aku ka u`i, ka nae mae ame ke aloha elike me ia, a owau no kona mea nana i malama ahiki i ka nui ana, me ka nui o ko`u aloha iaia," ma kela wahi`i hoomaka hou aku ai ua wahine nei e hookahi i kona mau waimaka.

"Alaila, ua haalele mai anei kela leoe ia oe, aholo aku he wahi okoa e noho ai iloko o keia mau makahiki he iwakalua a oi?"

Ua lilo kela ninau a Magureta i kumu e hooiia aku ai ka uwe o ka wahine malihini, me ka hiki ole iaia ke pane koke mai, a i wahi hoi e ike ole ia mai ai kela ano o laua e ka nui o ka poe e hele ana maloko o kela hale, pane hou iho la ua o Magureta:

"E hoi ae kaua maluna o kela noho ai, a malaila oe e hoakaka mai ai ia`u, i na mea e pili ana i ka wahine au i aloha ai," me ka huki okoa ana aku o Magureta i ua wahine nei, no ka noho laau loihi.

(Aole i pau.)