Ka Nupepa Kuokoa, Volume LVII, Number 37, 12 September 1919 — UA MAE KA PUA O KA ILIMA I KA EHU KAKAHIAKA. [ARTICLE+ILLUSTRATION]

UA MAE KA PUA O KA ILIMA I KA EHU KAKAHIAKA.

E kuu Solomon aloha, anoai kaua: — E oluolu mai kou ahonui i kauwahi rumi kaawale o ka hiwahiwa a ka lahui, i ike mai ai kona mau ohana ame na hoaloha mai ka pukaana o ka la ma Kumukahi a ka welona a ka la i ka mole o Lehua, ka palena o na moku. Oiai na hora puanuanu o ke kakahiaka nui loa o ka la 26 o Augate i hala aku la e kuhi ae ana hoi ka manawa o ka uwaki o ka hora 12:30, aia hoi me he uwila la i ka maka o ka opua, a me he hekili pa malo la i hoohaku'i iho ia minuke hookahi, e hoopili pu ana hoi i ka hanu o na mea ola apau, pela no i upoi a pili malie iho la na lihilihi maka o ka makou mea aloha, no ka wa hope loa, ua hala, ua moe aku la o Mary Ellen Ha-nau-umi-a-Kanoena Bridges Pahau, kekahi o na pua alii ou e Hawaii kuauli mailoko mai o na lii aimoku o Maui o Kama ma ka aoao o kona kupunakane o Kaleimakalii, oia iho keia:

Kihaapiilani (k) moe ia Kumaka (w) hanau mai o Kamalalawalu (k).; Kamalalawalu (k) moe ia Piilani (w), hanau o Kauhiakama (k); Kauhiakama (k) moe ia Kapukini (w), hanau o Kalani-kaumaka-o-Wakea (k); Kalanikauma-ka-o-Wakea (k) moe ia Kaneakauhi (w), hanau o Lonohonuakini (k); Lonohonuakini (k) moe ia Kalanikauanakinilani, hanau o Kaulaheanuiokamoku (k); Kaulaheanuiokamoku (k) moe ia Papaikaniau (w), hanau o Kekaulike (k); Kekaulike (k) moe ia Kekuiapoiwanui (w), hanau o Kamehamehanui (k) Ailuau); Kahekili (k), Naaiakalani (w), Kalola (w), Manuailehua (k); Naaiakalani (w) moe ia Puunui, hanau o Kaheananui (k), Kamokoelemakule (k), Kaheananui (k), Kamokoelemakule (k), Kekuahilo (w) ame Molowa (w); Kaheananui (k) moe ia Aulani (w), hanau o Kaleimakalii (k); Kaleimakalii (k) moe ia Kamakea (w), hanau o Keliiholani (w) ame Kaainahuna (w); Kaainahuna (w) moe ia Geo. A. Bridges, hanau o Mary Eilen Hanau-umi-a-Kanoena Bridges Pahau. O keia ae la ka mookuauhau ma ka aoao o kona kupunakane, a eia mai ka mookuauhau ma ka aoao o kona kupunawahine, oia iho keia: Kuka'ilani (k) moe ia Kaohukiokalani (w), hanau o Makau'alii (k); Maka'ualii (k) moe ia Kapukamole (w), hanau o Iwikauikaua (k); Iwikauikaua (k) moe ia Keakamahana (w), hanau o Keakealani (w); Keakealani moe ia Kaneikauaiwilani (k), hanau o Kalanikauleleieiwi (w); Kalanikauleleieiwi (w) moe ia Lonoikahaupu, hanau o Keawepoepoe (k) ame Kanoena (k); Keawepoepoe (k) moe pi'o ia Kanoena, hanau o Kameeiamoku (k) ame Kamanawa (k), na mahoe kapu; Kameeiamoku (k) moe ia Kamakaehaikuli (w) hanau o Kepookalani (k); Kepookalani (k) moe ia Alapai (w), hanau o Kamanawa opio ame Kapelakapu-o-kakae (w), Kapelakapuo-kakae (w), moe ia Kaua-a-kukapu (k), hanau o Kamakea (w); Kamakea (w) moe ia Kaleimakalii, hanau o Keliiholani (w) ame Kaainahuna (w); Kaainahuna (w) moe ia G. A. Bridges, hanau o Mary Ellen Hanau-umi-a-Kanoena Bridges Pahau. O keia ae la ka mookuauhau ma ka aoao o kona kupunawahine. Ua hanau ia oia ma Kawaiahao ma ka la 4 o Okatoba, 1872, nolaila ua piha iaia he 46 makahiki, 10 mahina, 22 la, o kona ola ana ma keia ao. Ua hoonaauaoia oia ma ke kula hanai o Kawaiahao a i kona puka ana mai ua hoohuiia ae la oia ma ka berita maemae o ka mare me Mr. Robert Kolomoku Pahau i hala mua ma kela alahele hookahi a kana wahine i huli aku la, ua hoopomaikaiia mai laua me na hua ohaha maikai elua e ola nei, oia o Robert Kolomoku Pahau Jr., ame Mrs. Lydia Pahau Horner. He wahine oia i aloha nui ia e kona ohana ame na hoaloha lehulehu no na ano maikai apau i loaa iaia, he oluolu heahea, lokomaikai a hoomanawanui. He home kona i kipa ia e ka poe hanohano a haahaa, a he home punahele ia i na keiki a kona mau hoahanau, a he mea nui no hoi oia ia lakou. He kupa oia no Waikiki, ke kai hoopuluelo i kaili o ka malihini, ke one hanau o kona kupunawahine ame kona makuahine. E Waikiki i ka holunape a ka lau o ka niu, nou keia mawaewaewa, ua pau ae la kou ike ana i kona helehelena, ua nalo aku la i ke ao polohiwa-a-Kane. E Hamohamo i ke ehukai i Paoa i ke ala o ka lipoa, nou keia, walohia nui, eia makou la ke hamo wale ae nei no i ke aloha o ko kama aole e na, ua laweia ua lilo me he aka la no ka wahine o ka li'ula ka maalo pulelo i kai o Kawehewehe. Wehe ka pilina a ke kama pili me Niolopua, he pua ko aloha na makou e hiipoi e popoi iho ana i ka waimaka aohe e na. E Kalia i ke kai nehe i ka pu-e one ame kahi wai limu nui o Piinaio, no olua keia ilihia nui, a no ka mea, ma ko olua poli iho la no oia a ike ole iho la no olua, ua pulelo aku la kela a noho me Hiku, ka wahine ako pua o Kanahele. Luuluu wale! E ka Uakukalahale e, ka ua kaulana o ke one hanau o na kama, ua pau kou hoopulu ana i kona helehelena nohea. Aloha e ka la wela o ke kaona ia wahi ana e alo hele ai, ua pau kona hehi hou ana i kou mau alahele. Aloha ka ne hone ae a ke kaa uwila,

ua pau, ua lawa kou hooholoholo ana iaia. Auwe, aloha wale ia wahi i pili ia ai! Ua haalele iho oia mahope nei i kana mau keiki elua me elua moopuna, kona kaikuaana o Mrs. Ria Keliiholani Bridges Dunbar e noho mai la i Amerika, kona kaikunane Chas. Wm. Kaualii Bridges, kona mau kaikaina oia o Mrs. Florence K. Bridges Paoa ame Mrs. Ella Kamakea Bridges Kaai, ame ka ohana lehulehu. Nolaila ke haawi aku nei ka pohai ohana holookoa i ka mahalo a nui ame na hoomaikai palena ole i na hoaloha ame na makamaka apau i akoakoa pu a i makena pu oiai oia e kau ana iluna ma ka hale kupapa'u o Williams, a pela pu no hoi me na makamaka na lakou na hoohiwahiwa pua he nui, a na ke Akua aloha iloko o ka lani e kokua a e kiai ia kakou pakahi apau, a Nana no e lawe ae i na kaumaha ame na luuluu i kau iho maluna o ka pohai ohana o ka mea i make. A ke haawi aku nei makou i ka mahalo i ka Lunahooponopono ame na keiki ulele hua mekala ke aloha nui. O makou no i hooluuluuia. HERMAN KAPULE. Ame ka Ohana.

MARY E. H. BRIDGES PAHAU,