Ka Nupepa Kuokoa, Volume LVII, Number 38, 19 September 1919 — HE HOOMANAO NO MRS. MAU-A J. N. UAHINUI I HALA. [ARTICLE]

HE HOOMANAO NO MRS. MAU-A J. N. UAHINUI I HALA

Owau o J. A. Kahiona ame ko'u mau pokii e ola nei, o makou kekahi mau kaikunane i pili kokole loa iaia ma na makua, o Hakipuu, Koolaupoko, ko makou aina hanau, o Kahinu o kona kaikunane no ia mailoko mai o Kameahale, elua wale no laua. Na kekaikuaana ka palaoa lawalu ono a Kaehu, oia o Mrs. Lokai ia Mr. Paulo, o Mrs. Kalakini ia Aikue, Mu-a ia J.N. Uahinui, o ia neepapa ana o ka pili ana o na makua o ka noho ana. Ua loaa pono mai no ia'u kau leka hoike i kau wahine e Mr. J. N. Uahinui, ua hoolaha aku au iwaena ohana iho o ko wahine, me na kuluwaimaka pu o ka ohana o Hr. Iinino me Mrs. Paku, o ka laua mau keiki, eia no ke ola nei, o ka Kahalehili wahine mare eia no i Laie nei, oia pu kekahi i lohe aku, Mrs. Kamaka Kaleohano ame ka Kapaki ohana e ola nei, aia i Punaluu o Mrs. Kanamu aia i Honolulu a kupa'i ka ohana o ko wahine. Nui kuu mahalo i ko wahine i ka hoike ana aku ia oe, he poe kaikunane makou, ke lele aku nei ko makou aloha maluna ou o ka mea e ola ana, e auamo ana i na kupinai aloha no kau wahine ame ka ohana, ka nui hoaaloha o Molokai, a eia ke Koolau nou wale no, ka la e pii ana a iho, mai kanalua o makou no kou mau kaikoeke a kaikuaana ma ke kino, elike me ka maikai o ko olua noho ana, a hoopono, pela ka lehulahue e ike mai ai, a lilo ko olua noho ana i oluolu a hookuonoono elike me kau hoolaha kanikau i kau wahine, pela i lilo ai ka hoolewa o kau aloha i mea nui, ame kou nohona hoopono, ua oi loa aku ia mamua o ke gula ame ke dala, oiai o ka lahui ponoi o Iseraela, aole ia he lahui waiwai, aole no hoi he ilihune, o ia ka hoopa'i a ke Akua i ko kakou mau kupuna no ko lakou hoomana i na kii, a haalele ia Iehova ke Akua, mai Aigubita ae i Kanaana, ma ka waonahele i Sinai.

Hookahi kakou mai ia Adamu mai, nolaila, o ko makou makuahine Mrs. Mu-a, he kupa no na kihi eha o na Koolau elua, he ihuanu no ke Koolau, he alo halii i ka makani, o ke ko'a mokumoku o na Heeia, a i ka ua poaihale o Kahaluu, e hoi ke kalo paa i Waiahole, i ka pili paa i Waikane, o ia pili aekai o Pahalona, i ka lae iliili pili o Moliiloko o Molii Ailana ia Apua Kaakauloko, ke kiai lae makani o ka oio, ke aiwaiwa nanahoa, he kupua a he pouhana no ke Koolaupoko a Koolauloa, ka luahuna Pohukaina waiwai nui o ka Mokupuni o Kakuhihewa, ke kini ahi miliona a na kupuna i ka lihi elua o na Kaaawa, nolaila mai o'u makuakane he aiwaiwa mai ka po mai, malaila mai oe e Mrs. Mu-a J. N. Uahinui, a nou a mau ame ka poe apau i auamo pu i na hoohanohano ana i ka la kumakena o kau wahine hele loa. O makou no o kona mau kaikunane e ola nei i koe: JOEL K. APUAKEHAU, JOS. K. APUAKEHAU, WM. K. APUAKEHAU, MOSE KONAAIHELE, AWILI INOINO, Na Koolau, Sept. 5, 1919.