Ka Nupepa Kuokoa, Volume LVII, Number 45, 7 November 1919 — LAWE I KE OLA ME KA LAAU MAKE. [ARTICLE]

LAWE I KE OLA ME KA LAAU MAKE.

Ma Lahaina Maui, i kulike ai me ka hoakaka a kekahi meahou maloko o kekahi o na nupepa Kepani o keia kulanakauhale, ua lawe okoa ae he kaikamahine Kepani, o umi-kumamaiwa makahiki i kona ola, ma ka Poalima i hala, mamuli o ka inu ana i ka laaumake. Ma ka meahou e pili ana i ka make ana o kela kaikamahine Kepani, e hoakaka ana ia, ua haulehia kela kaikamahine i ke aloha me kekahi Kepani opio, aka nae, ua hoole kona mau makua, i kona mare ana aku i ka mea ana i aloha ai, no ia kumu i lawe okoa ae ai i kona ola iho, ma ka ai ana i ka laaumake, elike me ka hana mau a na Kepani, i ka manawa e hooleia ai ko lakou makemake. Ua hele ka kela kaikamahine i ka nana kiionioni, ma kela po Poalima, a iaia i huli hoi aku ai noloko o kona rumi, ua kii aku la oia i ka laaumake, a ai ae la, a iloko o na minuke he kanaha mahope mai, ua make loa aku la oia.