Ka Nupepa Kuokoa, Volume LVIII, Number 7, 13 February 1920 — Page 6

Ka Nupepa Kuokoa

 

6    NUPEPA KUOKOA, HONOLULU T.H.,  POALIMA, FEBERUARI 13, 1920

 

He Moolelo no ka

MAKAIKIU MAKENEKI

a i ole

KA OHUA MAI KA PA KAPILIMOKU MAI O SEKOTIA

 

“ Ua maluhia maoli no kahi o ka waihoia ana e hike ole ai e lilo i ka mea manao kolohe, i pane mai ai ka lunanana ma ke ano paani, me ke kuhikuhi pu ana aku i ka pahuhao.  “ Aole e lilo kena puolo pepa au i kekahi poe aihue no ka mea ua paa i ka lakaia maloko o kela pahuhao.”

O ko’u hoihoi ana aku nei no ia e waiho i kela ope. pepa maloko o kela ume ma ka aoao o na palapala e ae o ka ahahui,” i pane mai ai o Bamebeia, “ no ka mea ua ike au o kahi maluhia wale no ia e hiki ole ai ke taweia aku a e hoopoinoia ai hoi.”

Aole hookahi o na malihini i kamailio iki aku e pili ana i ka nuhou hoopihoihoi noonoo maloko o ka nupepa Ekotia.

Mai haawi aku paha o Mr. Nila i kona aloha ia Mrs. Bamebeia, aole nae kela lede maloko o ka hale ia manawa, wahi a ke kane o ka pane ana mai.  Aole oia i hoi mai ka rumi haiolelo mai, a aole no paha oia e hoi mai ana a hala ekolu hapaha hora ma ia hope aku.

“ He kokua maikai maoli no o Mrs. Bamebeia nou, “ i pane aku ai o Mr. Nila, “ no ka mea, ina aole oia ua koikoi maoli ka hana e kau iho ana maluna o kou poohiwi, nana aku i ka hana o ka ahahui lala Palani na hana liilii e ae no hoi; o, he ko’iko’i maoli, elike me ka olelo a ka poe Palani.”

I ka ike ana aku o Mr. Nila ua loaa he manawa ia Mr. Bamebeia unuhi ae la oia i ka nupepa Ekotia a haawi aku la ia Mr. Bamebeia i heluhelu iho i ka meahou.

            I ka loaa ana mai la o ka puolo a ka Lunanana Baida i makemake loa ai e ike, kau hou aku la lakou maluna o ke kaalioa holo aku la no ka hokeie Nu Foda, ko Mr. Baida hokele ponoi e noho ai.

            I ka hoea nui ana aku ilaila, alakai pololei aku la ka lunanana i kona mau hoa iloko o kou amau rumi ponoi.  Iaia no ka puolo pepa kahi i paa ai, no kona hopohopo ina paha ia Mr. Nila, aole i ike ia aku kona wehe ma-lu ae i kekahi mea oloko, he mea nae ia i makemake loa ia e loaa.

            Ia lakou i komo aku ai i ka rumi, a paa mai la na puka i ke paneea, e hiki ole ai i kekahi lelo hookai ke komo mai e hoohaunaele i ka lakou hana, hoomaka iho la oia e wehe4wehe ae i ka puolo ma o ka okioki ana ae i na kaula kuaina i hoopaaia ai na pepa o ka I. O. T. A.

E akahele loa oe i kou wehewehe ana ae i kena mau pepa---ke a’o mua aku nei au ia oe e akahele loa kau lawelawe ana i kena mau pepa, no ka mea, e ike mai oe, he mau waiwai kena no ka ahahai, a ina no ka nalowale o kekahi pepa, e kauia aku ana na hoopa’i maluna ou,” i pane mai ai ka mea haiolelo o ka ahahui hoole waiona, me ke kau7 pu mai o kona lima maluna o ka lima o ka lunanana.

Ua piha oia i ka hulu pela ka hoomaopopo mai a ka Makaikiu Topina mamuli o ka pii o ka ula ma kona mau papalina, me ka haalulu pu o kona kino holookoa.

            “Ina he manao kou e hoakaka mai e hoike mai i keia manawa,” E pane mai ai ka Lunanana Baida ia Mr. Nila, “ ke makekmake ne maua e lohe aku ia manao ou, koe wale no keia, e oluolu nae oe e kamailio mai me ka waiwi no ka mea aole o maua makemake e hoopau manawa wale maanei no keia hana.”  Hoomaha iki iho la oia loaa i manawa no kekahi o laua e kamailio mai ai.

            Alaila i mai la o Mr. Nila: “O ka ahahui a’u e hana nei he mau hoaloha kiekie wale no kona ma na keena oihana like ole maanei a ma na wahi e ae o keia aupni.  Nolaila, e akahele loa olua i ka olua huli ana a lawelawe ana paha i kena puolo pepa!  He ahahui kiekie loa keia me kona mana pu!”  

Kakali iki iho la o Mr. Baida i kana wehe ana ae i ua puolo la.  No Topina hoi pii ae la ka ula ma kona mau papalina me na manao uluku like ole e pipii mau ae ana iloko ona no ko laua lanakila ana.  la manawa hookahi no hoi aole hiki i ua o Topina ke hoakaka mai o ka laua mea pono e hana mai ai.

“O, e hoopau oe i kau mau hana hoomaka’uka’u mai ia maua,” i pane aku ai ka Lunanana Baida, “ aohe au mea e hoopii aku ai, aohe no au mea e hopohopo iho ai no ka nalowale paha a nahaehae o ekahi8 o keia mau pepa.  Eia hopu, aole hoi oe i paa i ka hopuia a i kaa aku hoi malalo o ka hoomalu ana mai a ke aupuni.  Oia wale ae la no anei kau mau mea i makemake ai e kamailio mai?”

            Alaila hookaawale ae la o Mr. Nila i kona lima e haalulu ana na manamanalima mai ka lima ae o ka Lunanana Baida a hoomaka ihola e lalau i ka puolo no ka wehewehe ana ae.  “Ua maopopo oe ia’u, o ka Lunanana Baida, he kanaka i kaulana ma kau oihana mai ka manawa mua loa mai a’u o ka lohe ana noou, noplaila aole au e manao aku ana e loaa, mai ana ia’u ke alohaia mai kou hanohano mai, aka na hewa oe.  Eia oe ma ke ka’e o kekahi hana kuhihewa loa.  Aole i nei hana a kekahi la okoa aku i hookahi wale no la?”

Hoopinana ae la ka lunanana i kona mau lehelehe iluna a pela me kona mau ku’emaka, a luliluli malie ae la i kona poo me ka i  pu ana mai.  “ A- o – le.”

            “ Ke olelo aku nei au ia oe—ua hewa oe—HEWA!” wahi a Mr. Nila o ka pane ana mai me ka piha loa i ka huhu, ke ano o ka mea i piha i ka leleiona.  “Ke olelo hou aku nei no au ia oe pela---Ke lohe mai la anei oe?”

            No ka ike ana mai o ka Makaikiu Topina ia ano o Mr. Nila a o ka huki wale ae no paha koe o Mr. Nila i kaua pu, huki ae la oia i kona mau lima mailoko ae o kona mau pakeke no ka hoomakaukau ana e lele mai maluna o ke kanaka i uluhia i na manao kaimonio.  no ke mea aole ona makemake e ikeia kana noahuna e nei mau makaikiu.

            “Hookahi wale no mea a’u i maopopo oia hoi, kela mea e hoike mai ai i ka oiaio,” i pane aku ai ka lunanana.  “Oia hoi ka oleloike.

            “Ka oleloike!  Ha!  Oleloike!  Akahi ka hoi mea nui e hoolohe aku ai!”

            “E Mr. Nila, ke kauoha aku nei au ia oe e hoopau kau olelo ana mai me kela; ina he kanaka okoa aku ma ko’u wahi i keia manawa e hopu kokeia aku ana oe a laweia aku e haawi i na luna aupuni maanei no kou hoao mai e keakea i ka hana a ka oihana makai.  He iho o’u kke koikoi o keia hana a he mea pono ia’u ke hana no ko’u mao poo maluna ae o’u ma ka oihana.”

            “Pela no, aka, i lohe mai oe o kekahi o ua mau luna aupuni kiekie la maluna ae ou o lakou no kekahi mau lala o keia ahahui, a pehea oe i makemake ai e hookomo pu aku ia lakou iloko o ka pilikia mamuli o kau hana, me kou nana ole aku i ko lakou mau kulana ame ko lakou mau pono pu!”

            “O. he mau olelo pulapu lalau wale no kena au e kamailio mai nei.  Pehea la kou manao, ina e loaa aku ana lakou me ka waiwai aihue malalo o ko lakou malu, a malalo hoi o kekahi mau ano aole hiki ia lakou ke hoakaka mai i ke kumu o ke kaa ana aku o ia mau waiwai malalo o ko lakou malu, a i hanaia aku ana lakou elike me elike ana no lakou apau me oe i ka maka o ke kanawai.

            “E hilahila ana lakou, elike me kou hilahila, a e lilo ana ko lakou mau inoa maikai mamua i mau inoa maea.”

Aohe pane hou mai o Mr. Nila no nei mau olelo a ka Luananana Baida.  kau ae la nae i kona mau lima i ka lewa, hulili na maka a pupuku no hoi kona lae, alaila hoomaka aku la e holoholo iloko iho o ka rumi ma lu o ka Lunanana Baida me ka pea’o na lima i ke kua, ke ano o ka mea e kumakena ana.

I kela ame keia manawa, e hamo mau ae ana oia i kona mau oho me kona mau lima oiai ka hou e hiolo iho ana ma kona mau papalina a ma kona lae, he wahi ano hana ana a na makaikiu e nana aku ananme he mea la e hoonana wale ae ana no i na manao uluahewa o ka makau ame ka hilahila pu e hoonaku ana iloko ona ia manawa.

Hoko o kela rumi i kaupalenaia kona mau aoao, a me elua wale no hoi mau mea e nana aku ana i kana hana, a oia mau kauaka a aole mau kike olelo i hoopukaia no kekahi manawa.  E noonoo ana na makaikiu no ua o Mr. Nila, he kanaka haiolelo oia no ka Ahahui Hoole waiona, a. ina he kauaka maikai oia ma na ano apau no keaha la puolo.  Mamuli o ia ano o ua o Mr. Nila i koho iho ai na makaikiu he waiwai huna kekahi aia maloko o ka puolo a pu-a pepe paha, a oisa mau waiwai i hunaia maloko olaila oia no na daimana  a Mr. Wilemota i aihueia ai, aka, aole hiki ia laua ia manawa ke hooiaio loa ia manaokoho o laua.

            “O keia ka mea a’u i makemake loa ai e nana,” wahi a ka Lunanana Baida o ka i ana aku i ua o Nila, i ka manawa i haule aku ai kekahi apana pepa mailoko aku o ka nui o na palapala ana o ka hoomaholahola ana iho maluna o ke pakaukau, i ka manawa i hahae ae ai i ka wa-hi pepa maloko loa o ka pu-a i silaia.

            Me ka pepa lahilahi loa i wa-hiia ai ia ope, a e kau ana no hoe hekahi mau kikohukohu me he koko la, a i hiki loa hoi ke ike pono loa ia iho ia haukae o ka pepa mamuli o ka ikaika o’ka malamalama e pa pono ihbo ana maluna o ia mea ia manawa, a he hiki loa ia Topina ke ike mai ia haukae me ia mamao loa no ona mai kahi aku o ke pakaukau.

            Me ke akahele loa hahae ae la ka lunanana i ka pepa lahilahi e wahi ana wawaho, a wehewehe ae la i ka lopi kilika i nakiikiiia ai ka aoao o kekahi buke pakeke, a i ole pahu waiho leka paha, elike me ia a ka Makaikiu Topina e ike mai ana.

            Hakalia no a hemo ai ka lopi kilika i hoopaaia ai ka pahu a i ole buke pakeke paha, o ka helelei aku la no ia o kekahi mau pohaku hulali mai na aoao aku a elua o ka buke pakeke a mau ana iluna o ke pakaukau. 

“Auwe!  He mau pohaku liilii a maoli ka hoi kena!”  wahi a ka Makaikiu Topina o ka hooho ana mai.  “He mau daimana kena!”  wahi hou ana, me ka pihoihoi nui. 
            “Ae; he mau daimana, “ i pane mai ai o Mr. Nila, ke kanaka i manaoia e ka lehulehu he hoopono a he hemolele , oia nae ka i loaa pono iho la e maopopo loa ai ke kuhi aku nana i aihue na daimana, a i ole iaia i hoounaia mai ai ua mau daimana la e kekahi hoahui ona ma Enelani, ka mea nana i aihue maoli.

            “Me ka leo nui moakaka kela hooho ana mai a Mr. Nila, he leo o ka mea i piha i ka hoowahawaha ame ka hoonaukiuki; e kau ana kona poo iluna a i puupuu ana no hoi na li8ma mamua o kona umauma.  “Ae, he mau daimana!: wahi hou ana.

            “He oiaio ia au i olelo mai la, he mau daimana i’o no keia,” i pane aku ai ka lunanana, me ka biki ole iho la iaia ke uumi i kona manao kahaha, a i kona hopu ana iho i kekahi mau puupuu daimana he hapa kakini paha ka nui, kau ae la iluna a kokoke loa ae i kahi o ka malamalama.

 

MOKUNA XVIII.

            Me ke kanalua ole ke olelo ae ua piha loa ka lunanana i ke kahalha i ka manawa i kau iho ai ka ike a kona mau maka maluna o na pohaku e hulali ae ana mamua o kona alo o ka helelei ana iho mai na aoao elua iho o ka buke pakeke uuku.

            Aohe hiki pono i ka Makaikiu Topina ike ike mai i ka hulali mai kana wahi mai e ku ana ma ka puka, no ka mea, ma na aoao apau o ia mau puupuu daimana na pepa o kela ame keia ano e mokaki ana iluna o ke pakaukau a ka Ahahui I. O. T. A.

            “Ae, he mau daimana!” i hooia mai ai o Mr. Nila me ka leo e hoike maopopo mai ana i kona hoowahawaha, a i kekahi manawa e hoike mai ana i kona hooheuehene a ku-e loa i ka hana a na makaikiu.—ae, he mau edaimana kena!”

            Iloko o ko ka Makaikiu Topina pihoihoi nui no elua a ekolu manawa ana o ka hoopuka ana ae kekahi mau huaolelo hailiili8 ma ka olelo Palani.  Ia manawa ala ae la iloko o kona noonoo o keia no na daimana a Mr. Wilemota i aehueia ai no lakou’ ka waiwaiio he 20,000 paona. 

            O na puupuu daimana he hapa kakini a ka lunanana i bopu iho ai ua waiho hou ia iho la me ka nui ae o na pohaku a hookomo hou ia iho la a pau iloko o ka buke pakeke.  No ka Lunanana Baida aole oia he kanaka holona loa e hike ole ai iaia ke olelo iho o na pohaku e waiho ana mamua ona he mau apana aniani wale no olakou,l aka, he mau daimana oiaio.

            “Ea. e Mr. Nila er hoolohe mai.  Nau ponoi no anei keia mau daimana?” wahi a ka lunansana me ke kulou ana aku imua, me ka mau no nae o kana paa ana i ka buke pakeke e waiho ana maluna o ke pakaukau.

            “Aohe,” wahi a ka Nila pane.

            “Hiki ana anei ia oe ke hoakaka mai i ke alaheele i hoea mai ai keia mau daimana iloko o kou lima, a malalo hoi o kau malama ana!’

            “Hiki no.”

            “Ina pela e oluolu oe e hoakaka mai!” i noi aku ai ka lunanana. 

            “Hiki loa ia’u ke hoakaka aku i ke alahele i komo mai ai kena mau daimana iloko o ko’u lima no ka manawa” wahi a ua o Nila, “ina nae e oluolu mai ana oe e kakali no iwakalua kummaha hora.”

            Molo o iwakalua-kumamaha hora!  Kahaha, i kakali hou aha ana aku hoi ia?” i pane aku ai ka Lunanana Baida me ke ano kahaha. 

            “Ae hoi, aole e oi aku, pela ko’u manaolana.”

            “Aole o’u muaolana e loaa mai ana kau pane iloko o ia manawa,”a aole no au e ae aku ana e haawi aku i manawa hou ia oe.  O keia no ka manawa kupono au e hoike mai ai i ke alahele i loaa mai ai keia mau daimana ia oe.  E hoao oe e hoopokole loa mai i kela manawa, e Mr. Nila, no kou pono keia a’u e koi aku nei; e hoao oe e hoemi loa mai i ka manawa,  No kela poe ma ka hale oihana makai ma Enelani aole o lakou haawi mai i manawa hoomaha no makou, a pehea auanei e hiki ai la ia maua ke haawi aku i manawa nou e hoakaka mai ai i kahi o ka loaa ana mai o nei mau daimana ia oe,”

            “Eia no ke kumu o ko’u nonoi ana aku la ia oe, oia keia, aole owau ko’u haku no’u iho, he poe e ae kekahi maluna ae o’u, a he kauwa hana wale aku no au malalo o lakou,” i pane mai ai ua o Mr. Nila.

            “O, hoike koke mai i keia manawa-aole ia he hana nui ma kou aoao o ka hoike ana mai, i hookahi a i elua wale no au mau mea e hoakaka mai ai ua lawa ia.  Pehea i loaa mai ai keia mau daimana ia oe?  O kou olelo wale mai no me nei la i loaa mai ai, ua lawa ia.”

            “O, aole; ke makemake nei a e huopanee iki i ka’u haina a kekahi manawa aku, ia manawa e loaa ana ka’u haina piha no ka hoike ana aku ia olua, aole i nei manawa, “ i noi hoomano mai ai ua o Mr. Nila.

            “ I ka wa hea i loaa mai ai keia mau daimana ia oe?” i ninau hou aku ai ka lunanana Baida.

            “E pono au e noi aku ia oe e noonoo i kena ninau au oiae ua apoia no hoi ia iloko o kekahi ninau e ae, “i pane mai ai o Nila me ke ano kunahihi.

            “Aohe mea pohihihi iloko o keia ninau, e oluolu mai oe.  E hoomanao pu oe eia oe imua o na makai o ke aupuni e kamailio mai nei, nolaila e hoomaopopo mai oe i keia, e Mr. Nila,” i pane aku ai ka lunanana Baida.

            “Ina pela aole hiki ia’u ke kamailio hou aku i kekahi mea i keia manawa, hana aku olua e like me ko olua makemake.  Ua hoomaopopo au i lo olua kulana ame ka olua hana, nolaila aole e lilo ana i mea no’u e hoohikileleia ai.  Hoko o kekahi puolo a’u i hoike aku nei na’u ponoi ia, mawaena o na palapala e ae a ka ahahui nana au i hoolimalima mai, e loaa iho ana ia oe kekahi waiwai makamae loa i hunaia, no ka mea oia ka waiwai maloko o ia puolo, aole anei ia i hunaia me ka malu loa e Mr. Baida!

            “Ina o kou manao ia na’u i aihue na daimana, a i ole he hoahui au no ka mea nana i aihue, aia ia i ko olua noonoo ana.  Hana aku e like me ka olua i ike ai he pono.  Ua noi mua aku nei au ia olua e haawi mai i manawa no’u e noonoo ai, iloko o na hora he iwakalua-kumamaha e loaa ana ia’u ka mea pono a’u e hana ai ko olua pohihihi no ka mea e pili ana me keia waiwai, e loaa ole iho ai kekahi manao kanalua iloko o olua nou.

            “Ina e hiki ole ana ia olua ke kali aia ia ia olua, aole a’u koikoi wale ana aku.  Ina ua kanalua olua i ka haawi mai ia’u i manawa hou, a i manao hou, a i manao olua e hopu mai ia’u i nei manawa, ke waiho aku nei au ia’u iho malalo o ko olua mana, hewa hou no ka lua o ka manawa, e Mr. Baida.”

            No ka pane koke ole aku o ka lunanana Baida, i hou mai la o Mr. Nila i ka i ana mai:

            “Aole oia wale, aka, e noonoo pu iho olua i ka aina malihini.  Ha!  Hopu mai ia’u.  I hai aku au ia olua e akahele loa ko olua palapala hopu e hiki ai ia olua ke hopu mai ia’u a lawe aku malalo o ka olna hoomalu ana?  I hoike aku au ia olua ua nawaliwali maoli no au ma ko’u aoao; akahi no au a ike iho la i ko’u nawaliwali, oia hoi ko’u ae wale ana aku no ia olua e komo wale mai no e hokai iloko o ka’u mau hana.  E hopu mai ana anei olua ia’u?”

            “He hana maalahi loa ia ia Topina nei ke hana aku iloko o na minuke kakaikahi loa, ina o kou makemake ia o ka hana kokeia aku o ia hana,” i pane aku ai ka Lunanana Baida.  “O ka’u mae e hopohopo nei aoohe paha ou hoomaopopo mai i ke auo o ka maua hana i nei manawa.

            “O o ke kanaka i manaoia aia iaia ka waiwai i aihueia a malalo hoi o kona malu, na lona aku oia ua pepehiia a make maloko o ke kaaahi i ku mai ai i Panisa nei mai Ladana mai ma ka wanaao o nehinei.  O ka waiwai i manaoia ai aia maluna o kona kino aole i loaa aku.  O oe, e Mr. Nila, kekahi o na kanaka i kau pu mai ai maluna o kela kaaahi ua loaa iho la ia maua i nei manawa ma ka lua o ke ahiahi mahope iho o ka pepehiia ana o kela kanaka maluna o ke kaaaahi, a iloko o kau wahi i huna ai i loaa iho nei na waiwai i manaoia ai ua aihueia e ke kanaka i make ai maluna o ke kaaahi.

            “Eia hou, o ka oihana makaikiu o Palani nei, ka poe a Topina nei i komo pu aku ai a hana pu, ke hanu mai nei lakou mahope o ka mehou o ka mea nana i pepehi i kela kanaka, a ina no kou hoike ia aku ia, lakou ua loaa iho nei ua daimana malalo o kou malu, i hoike aku au ia oe aole e piha ana ua bora he iwakaluakumamaha mamua o kou noho ana aku iloko o ka halepaahao, aohe a lakou kali ana mai.  Pehea keia i kou manao!”

            “No ka hewa hea auanei lakou e hopu mai ai ia’u—no ka pepehikanaka anei!”

           
No ka aihue i na daimana me ko owili pu ia mai iloko o ka hewa pepehikanaka.  Oia la, i lohe oe.”

            “No ke aha!  E hoohuoiia mai ana anei owau ko mea nana pepehi i kela kanaka!”

            “Oia ana kou hopena, ina o Mr. Topina nei, ko’u hoahui ma ka hana, e kii aku ana ia lakou a koma mai iloko nei o keia rumi.  Oia ana kou hopena, e Mr. Nila, a ke hopohopo nei au no ia hopena e loaa ana ia oe, no ka mea, maluna o ka oleloike i hoakaka oleia,” alaila hoopa iho la ka lunanaua i ka puolo e waiho ana, “a e koeea mai ana maua e kahea aku i ko maua mau hoamakai Palani e hele mai maanei;

 

He Moolelo no

KEAKA TAZANA

Ka Weli o na Ululaau Mehameha o Aferika a o ka Hoaloha o na Holoholona Ahiu

           

            Kahikuhi aku la o Miriama, me ke ani ana o kona lima mai kekahi wah: a i kekahi, me he mea la, e olelo okoa aku ana, o ka hapalua o na ululaau o Aferika, ko Koraka home e noho ai, a e loaa no aia malaila, ke heleia aku e huli.

            “Pehea, e hiki ana no anei ia oe ke huli aku ahiki i kona loaa ana?”

            “Aole i maopopo ia’u ka pololei ke huli aku ahiki i kona loaa ana, aka he hookahi a’u mea e manaoio nei, ua hiki loa iaia ke huli mai ahiki i ko’u loaa ana iaia me ka maalahi loa.”

            “Mahope iho o kou hoakaka ana mai la.  he hana maalahi na ko Koraka ka hele ana mai e huli ia oe, ua hooholo iho la ko’u manao, e hoi pu mai oe me a’u aia no ko’u wahi i noho ai, ma kekahi wahi, aole i mamao loa mai keia kahua aku a kakou e nohyo nei.  Ua hike i ka’u wahine ke nana mai no kou pono, a ke hana mai hoi i na mea apau e palekana ai oe.  Oiaia oe e noho pu ana me maua, e hooikaika aua oe malalo o ka malu o kekahi mau hoaloha, aole hoi malalo o kela mau kanaka lapuwale.”

            Noonoo iho la o Miriama i kana mea e hana ai, me kona hoihoi ole nae i ka hoi aku a noho pu me keia me keia malihini, no ka mea aia no kona noonoo i na manawa apau maluna o Koraka.  Oiai hoi o Miriama e noho mumule la, aia pu o Tazana ke noonoo la iloko o ia manawa hookahi, no ka hiki ole iaia ke hookuu hookahi aku i kela kaikamahine, e huli hoi noloko o ka ululaau, no ka huli ana ia Koraka, no ka mea he hana paakiki loa, na kekahi kaikamahine opio, ka hele ana iloko o na ululaau i piha me na holoholona ahiu.

            Alukai aku la o Tazana ia Miriama nowaho o ka hale, aia hoi na Paele a Mabina ke hoomakaukau mai la i ka lakou mau ukana, no ka haalele ana iho i kela kahua hoomoan, a ke ku mai la no hoi o Mabina, ma kahi mamao aku, me ka noke ana i ka namunamu, a o ia ka Tazana i kahea aku ai i kekahi o kana mau Paele, e hele mai imua ona, me ka i ana aku;

            “Ke makemake nei au, e hele aku oe e ninau i kekahi o na Paele kauwa a kela kanaka, maihea mai la keia kaikawahine, a lakou i lawe mai ai?”

            Hooko aku la ka Paele elike me ke kauoha a Tazana, aole no hoi i loihi aku, hoea hou mai la oia, a i mai la:

            “Ua olelo mai nei kela Paele, ua kuaiia keia kaikamahine mai ia Kovuda mai, a mawaho ae o kela, aole he mea i maopopo iaia, a uas manaoio au, ua kamailio mai oia i ka mea oiaio wale no.  Ua hoike pu mai nei oia, he mau kanaka ino loa keia, me ko laua lawelawe ana i kekahi mau hana lapuwale i maopopo ole i ka laua mau kauwa. Ma ko’u manao maoli, he mea pono e pepehiia keia kanaka a make, i ole ai oia e hoomau aku i kana mau hana hoopilikia, maluna o ka poe e kaa aku ana malale o ko laua mana.”

            “Ae, ua kulike no ko’u manao me kou, ina aole i hanaia kekahi kanawai hou, no ka poe e noho ana ma keia hapa o ka aina.  Ina iloko o na la kahiko aku nei i hala, pela ka loaa ana mai nei o keia kanaka, e hoopilikia ana i keia kaikamahine, aole loa he mea nana e hoopakele ae iaia mai ka make mai,” i pane aku ai o Tazana, me ka leha ana aku o kana nana ana ma kahi a Mabina, e ku mai ana nana i kona poe kanaka.

            Noho iho la no o Tazana me kona poe kauwa, ahiki i ka hala ana aku o Mabina me kana poe kauwa, ma ke kukulu akau o ka aina, ia wa i koi hou aku ai oia ia Miriama e hoi no koua wahi e noho ai, eia nae, aole he maliu iki aku o ke kaikamahine opio, aka ke koi paakiki la no oia, e hele lakou e huli ia Koraka.          

            Ina paha he kanaka okoa aku keia, pela ka paakiki o keia kaikamahine, aole he hoolohe aku i na mea nona e pono ai, ina e hookikina okoa ia mai ana oia, a i ole, e hoopaaia ana pha na lima i ke kaula a malalo o ka mana o na kanaka Paele, e laweia aku ai o Miriama, ahiki i kahi o Tazana i noho ai, aole4 noe pela, he kauaka oluolu o Tazana, me ka piha akamai no hoi, nolaila ua ae aku la no oia i ka manao o Miriama, e hele lakou e huli ia Koraka, oiai nae, he mau hana hoolalau wale no kela ana, no ka hooluolu ana aku i ko Mirama manao.

            Ua kamoe pololei aku la ko lakou alahele no ke kukuylu hema, mai ka hoomaka’uka’u mai o Miriama, ahiki i kona hilinai piha ana aku maluna o kela kanaka malihini, me kona hoohalike ana no hoi iaia, me kana Koraka, ka oluolu, ame ka hana mai i na mea apau nona e pono ai.

            Ke hele nei lakou i ke ao ame ka po, a oiai aia kahi o Tazana i noho ai ma ke kukuylu hikina ke hoolalau wale la no oia ma ka hema ka elima o na la o ko lakou hoomau ana i ka hele, hoea aku la lakou nei ma kekahi9 kula nui oneanea, e huli pololei aku ana i kahi o ka hale o Tazana i ku ai, a ia Miriama e nana aku la i keola kauhale i kukuluia, ma ke ano o na kanaka Pelekane, aoke hoi elike me na kauhale o na Arabia ame na kanaka Paele.

            “Eia kakou ihea?” i ninau ae ai o Mirama ia Tazana, me ke kuhikuhi ana aku o kona lima, i kahi o na kauhale e ku mai ana. 

            “Eia kakou i ko’u wahi,” i pane mai ai o Tazana me ka leo oluolu. “ua nui oloa na la a kalou o ka huli ana i ko Koraka maloko o ka ululaau, aole nae ona loaa iki ia kakou, a oiai ua kokoke loa kakou i ko’u wahi, nolaila o ko’u poe kanaka e hele aku e huli ia Koraka, a ina no o ko kakou pono hele wale aku no iloko o na ululaau.”

            “ke hopohopo loa nei au, ina no ko’u noho aku ma ko oukou wahi, e hiliia mai ana au, elike me ka hana a ka moi o na kanaka Arabia, kuu makuakane ai’u.  E hookuu mai oe ia’u e hoi aku noloko o ka ululaau e nohoai, ua oi aku ko’u palekana malaila mamua o ka noho ana iwaena o na kanaka ili keokeo elike me kou ano, a kekahi kumu no hoi o ko’u kanalua, no ka noho up ana me oukou, aole loa e manao mai ana o Koraka, e loaa au iaia iwaena o na kauhale o na kanaka ili keokeo.”

            “Ina oe e noho ana me a’u, aole loa oe e hiliia, ua ike pono no hoi oe iloko o na la a kakou i hele mai nei, aole o”u hoopilikia wale aku ia oe.  Owau ka haku nona keia wahi, a o ka poe apau e noho ana maanei, aole loa o lakou pepehiia aku.  He oluolu loa ka’u wahine, ina no kou noho pu me ia, e ike auanei oe, ua like pu oia me he makuahine la nou, a no Karaka, e kakali kakou me ka hoomanawanui, malia o hoea mai no oia, no ka mea ua hoouna aku au i ko’u poe kanaka ma na wahi like ole oloko o ka ululaau no ka hule ana iaia.”

            “Ke kanalua loa nei au, no ka loaa o Koraka i kou poe kanaka, no ka mea aole loa oia e waiho mai ana i kela poe, ina no ko lakou halawai pu i kahi hookahi, aka e pepehiia mai ana lakou apau i ka make; nolaila e hookuu mai oukou ia’u; e hoi au e hui pu me kuu Koraka!”  me ka luliluli ana ae o ke poo o Miriama.

            “Mai paakiki kuhihewa oe e ke kaikamahine, he hana maalahi nou, ka hoi hou ana aku ihope, no ka mea ma ka po mua loa au e noho hookahi au maloko o na ululaau, e pau ana oe i ka aiia e na holoholona ahiu; a o kou manao ana e loaa o Koraka ia oe, he manaolana poho wale no ia.  E ae mai oe e noho pu mai me makou, malia o hoea no hoi i ka manawa e loaa ai o Koraka, o ka pau ae la no ia o ka pilikia me ka maalahi loa, mamua o kou onoupoo ana aku iloko o ka poino i maopopo loa e kau okoa mai ana no imua o kou alo.

            “Aole anei, owau ka mea nana i hoopakele ae ia oe mai kela mau kanaka ino mai?  Aole anei ua hoikeike aku au imua ou, i ko’u li9lo ana he hoaloha nou, iloko o na la elima aku la i hala; e mau aku ai no ko’u noho hoaloha ana nou, ahiki i ka loaa ana o Koraka?  E ae mai oe e noho pu me makou, no kekahi mau pule kakaikahi wale no, ahiki i ka loaqa ana o kekahi mea pono, e haua aku ai nou.  O ka hookuu ana aku ia oe e hele hookahi iloko o ka ululaau, he hana ku ia i ka lokoino, no ka mea he wahi kaikamahine uuku wale no, i loaa ole ka msanaukau ame ka ike, i ke ano o ka hele ana oloko o ka ululaau, e palekana ai mai na holoholona ahiu mai.”

            No kela mau olelo a Tazana, ua noke ae la o Miriama i ka akaaka, me ka i ana aku;  “he wahi kaikamahine uuku i’o no au, eia nae, oloko o ka uluylaau ko’u homer, o ko’u palekana, mamua o k’u noho pu ana me na kanake.  Aole loa o’u maka’u i ka liona, a i na holoholona ahiu paha apau, ua oi aku ko’u maka’u i na holoholona liilii, mamua o na pilikua o ka waonahele po ma mea; us hiki ia’u ke ike aku ia lakou, ke lohe aku i ko lakou hele ana mai a honi aku paha i ko lakou hohono, nolaila e pinana e ana au iluna o na kumulaau, mamua o ko lakou hoopoino ana mai i ko’u ola.

            “Oiai hoi, aole no i mamao aku kou mau kauhale mai na ululaau mai, a ke noke mai nei hoi oe i ke koi ia’u, e noho pu aku me oe, malia paha he oi aku ia o ka pono, e kakali au ma kou wahi, ahiki i ka hoea ana mai o Koraka.”

            “Ua hoohauoli loa mai oe e Miriama i ko’u manao,” wahi a Tazana, me ka hopu ana mai ma ka lima o ke kaikamahine opio, a alakai aku la no kahi e waiho mai ana kona mau kauhale, ma kekahi aina hanai holoholona nui.

            Oiai o Tazana ame kona poe e hookokoke aku ana i ka hale, ua ike mai la na ilio he nui ia lakou nei, a hoomaka nui, mai la e holo imua me ka noke ana i ke aoa, elike no hoi me ke ano mau o na ilio, i ka wa e hoea aku ai o na kanaka, aka nae i ka manawa o kela mau ilio i hoomaopopo mai ai i ko lakou kahu, ua holo mai la me ka lele ana iluna ona, ma ka honihoni pu ana mai ia Miriama, aole nai ia he mea no ua kaikamahine nei e mak’u aku ai, mamuli o kona ike aole e hoopilikia wale mai ana kela mau ilio iaia, elike me ka hoopilikia ole mai i ke kanaka ili keokeo ame na Paele.

            I ka hanuhanu ana mai nae o na ilio i ka ili holoholona, e kikepa ana ma ka puhaka o Mirama, ua noke mai la lakou i ka nunulu, aole nae ia he mea no Miriama e maka’u ai, aka kau iho la kona mau lima maluna o na poo o kekahi mau ilio elua, a hookomo okoa aku la i kona mau lima maloko o ke kala, me ia no oia i hoomau aku ai i ka hele ana imua, ma ka aoao o Tazana.

            Aia hoi maluna o ka lanai o ka hale, e noho mai na o Jene, ka wahine aloha a Tazana, a i ka ike ana aku a Miriama aiai, ua aup pipika ae la kana heie ana, a i aku la o Tazana iaia, ma ka pane ana aku7:

            “Aole au mea e maka’u ai, o kela ka’u wahine,” alaila iho mai la o Jene ilalo no ka hui pu ana me Tazana, me ka honi ana aku no hoi o Tazana i kana wahine me ka puili ana mai iloko ona, alaila hoolauna aku la oia ia Miriama, me ke kamailio ana aku i kana wahine ma ka olelo Arabia, i ka i ana aku;

            “O Miriama keia e kuu aloha,”  wahi ana, a hoomaka aku la oia e haha’i i ka moolelo o ke kaikamahine opio elike me kana mea i hoomaopopo ai. 

            Ke nana la o Miriama ia Jene, me kona ike ana aku, he kou maoli kela a ka wahine u’i, me ka oluohu hoi o kona mau ano apau, a i ka lohe pono ana mai o Jene i ka moolelo o Mirama, ua apo mai la oia ma ka a-i o ke kaikamahine opio, a honi pu mai la no hoi iaia, me ka hoopuka ana mai i keia mau olelo:

            “Ekuu kaikamahine, ke hookipa mai nei au ia oe me na manao maikai,” ia wa i hoopiliaku ai o Miriama i kona poo iloko o ka umauma o Jene, a hookahe aku la i kona mau waimaka, o ke aloha, me he mea la, he makuahine ponoi loa kela nona, ua lilo hoi kela mau waimaka i hookaheia aku, i mea hooluolu loa mai iaia, no ka mea, o keia ka makamuu loa o kekahi mea i kamailio aku iaia i na oolelo oluolu, a koe wale no kona makuahine ponoi, ana e hoomanao la iloko o kona wahi wa liilii, i ka hana aku elike me na mea a keia wahine e hana aku nei iaia.

            O keia iho la ke ano, o ka oili ana mai o Miriama mailoko mai o ka waoakna ahiu o Aferika, a i ke ao malamalama, me ka noho pa ana aku me Tazana ame Fene, e kapa ana hoi ia lana he mau makua nona, aka nae, aole no e pau na hoomanao ana no Koraka, aka ua ae aku oia e noho me kela mau mea, no ke kakali ana no ia, o ka hoea aku o Koraka i kekahi la, o kona haalele no ia i kona mau makua hou , a pili aku me ke kanaka hookahi wale no ana i nana aku ai, o kona kokoolua ia no na manawa apau o kona ola ana.

 

MOKUNA XV.

           

            Ua haalele aku kaua e ka makamaka heluhelu ia Koraka, ma kela manawa ana o ka, hoao ana e hoopakele ae ia Miriama mai ka mana mai o Kovuda, a loaa pono ai oia, me kona hakaka ana me na kanaka Paele, ahiki i kona haalele okoa ana, a holo iloko o ka ululaau, me ka hele o kona kino a manumanu me na palapu, he nui, me ke kaumah luuluu hoi o kona noonoo, no ka hiki ole ana iaia ke hoopakele i kana Miriama.

            Iaia i haalele aku ai i na kauhale o na kanaka Paele, ua kamoe pololei aku la kona alahele, no na wahi ana o ka haalele ana iho i na gorila, ua hele no hoi a ke kakahiaka o kekahi la ae, loaa aku la na gorila iaia, ua kaa e ma ka aoao o na gorila ka ike iaia nei, no ka mea aia o Koraka ma ka aoao makaui, a ku nui iho la i kahi hookahi, me ka hoakoakoa ana hele ana mai a poaipuni ae la ia Koraka no kekahi mau manawa, me ka hoonunulu ana i kona leo, a ia wa i poha aku ai ka leo o Koraka i ka pane ana aku;

            “Owau-no keia o Karaka, ka mea nana i wehe ae ia oe mailoko mai o ka umii a na kanada ili keokeo.  He hoaloha au no oukou, aole he enemi!”

            “Ae, ke ike aku nei ko’u mau maka, o Koraka i’o no oe, aole he mea e aku, nolaila he hoaloha oe no makou, a e lilo oe i mea noho pu ewaena o makou, a i hookahi ko kakou hele like ana e hahai holoholona, a e ku aku a paio like i ko kakou mau enemi,” i pane mai ai ka moi o na gorila.

            “Aole e hiki ia Koraka ke noho pu aku me oukou, a hele like i ka hahai holoholona.  I hoea mai nei au, no ka hoike ana aku imua o oukou, ua aihueia aku kuu Miriama e na kanaka Paele, aole e hiki ia Koraka hookahi ke hoopakele ae iaia mai ka mana mai o kela poe kanaka.  O Korak ka mea nana i hoopakele ia oe mai na kanaka ili keokeo mai; e hiki ana anei ia oe ke lawe mai i kou poe kanaka, a kokua ia Koraka, ma ka hoopakele ana ae i kuu Miriama!”

            “Ua kamaaina makou i na kanaka Paele, he nui ka lakou mau laa e loloa, e hou mai ai i na kino o ko’u poe kanaka a pau i ka make.  He poe kanaka ino loa kela poe, he hana naaupo paha na makou ka hoonahoa ana aku imua o ka make i na laau a na kanaka Paele!”  wahi a ka moi o na gorila, me ka manao kanalua no ka haawi mai i na kokua ana ia Koraka e hoopakele ae ia Miriama.

            “Ua hiki i’o i na Paele ke hoopoino mai i ko oukou mau ole i kahi mamao, aka ma kahi kokoke aole loa e hiki i kela mau laaa loloa ke hoopoino mai i ko oukou mau ola.  He mau pu ka na kanaka ili keokeo, ma kou manawa i kaa aku ai he  pio na laua, he mau ihe hoi ka na kanaka Paele, ma kela manawa hookahi no, a ina i holo o Koraka, me ka nana ole aku no kou pono, penei, aia oe maloko o ka halepaahao a na kanaka na laua i hoolilo ia oe he pio iloko o ka umii.”  Hooponiniu ae la ka moi o na gorila iaia iho, me ka wa’uwa’u ana ae i kona poo, alaila nana aku la o Koraka, maluna o na gorila e ae, aia hoi ko lakou mau maka ke ho-aiki mai la ka nana ana i na holoholona kolo liilii, malalo o na pauku laau, a he hookahi o kela mau gorila i pane mai.

            “He hana paakiki paha na makou ke komo pu ana aku e kokua ia oe e Koraka, no ka mea he kakaikahi loa makou.”

            “Aia he heluna nui o ko kakou poe iluna o na puu, i like aku me ka lau o na laau ka nui, na hiki ke keeea aku lakou, no ka hui pu ana mai me kakou,”  i pane mai ai hoi kekahi gorila okoa aku.  “Ua maopopo loa ia’u aole loa he makemake o kela poe o kakou i na kanaka Paele, a ina e lohe aku ana lakou, no keia manao o Koraka, e poe kanaka, nolaila o ko’u manao ea, e kii kakou i keia poe, a i hookahi ko kakou hele like ana aku e kokua ia Koaka, ma ka hoopakele ana mai i kana Miriama, “ alaila hoonunulu iho la kela gorila, me ka hoike okoa ana mai i kona makaukau, e hakaka me na enemi.

            “O kena ke ano o ke kamailio ana,” i pane aku ai o Koraka “Aole a kakou kauka’i ana aku i na gorila oluna o na puu, ua lawa iho la no kakou, no ke ku ana aku a paio me na Paele; no ka mea o ke kauka’i ana aku i kela poe gorila i kahi mamao loa, he hana hoolalau wale no ia, o hala auanei ka manawa kupono no ka hoopakele ana mai ia Mirama, no ka mea e hanaia mai ana maluna o ke kaikamahime opio, ina aole no kona pepehiia a make, alaila e ai okoa ia mai ana oia e na Paele.”

            “E hele koke kakou i keia manawa ano, no na kauhale o na kanaka Paele, ina me ka awiwi kakou e hele ai, e hoea koke ana kaqkou i ka ai maluna o kela poe, me ka boohakalia hou ole iho, a iloko auanei o ka maka’u o na Paele e hoomaka ana lakou e holo, me ka aa ole e ku mai a hakaka me kakou.  I ka manawa e pau ai kela poe i ka holo, o ko kakou manawa auanei ia e komo aku ai iloko o na kauhale no ka huli ana ia Miriama, nolaila e ike mai oukou, aole loa o Koraka i makemake e pepehi wale aku i na Paele, a e pepehiia mai paha kakou, o ka Koraka wale no i makemake ai o ka palekana o Mirama, mai ka mana mai o kela poe kanaka ino.”

”He kakaikahi loa makou, aole e hike e kokua aku ia oe,” i pane hou mai ai ka moi o na gorila.

            “Ae, ua kakaikahi loa makou,” i olowalu like mai ai na gorila er ae.

            Ike iho la o Koraka, he hana paakiki nana ka hookikina ana aku i kela mau gorila e hele pu me ia no ka hoopakele ana ae ia Mirama, nolaila ae okoa aku la oia i ko lakou manao, e kii i mau kakua hou, nolaila hooholo iho la, ka moi o na gorila ame kekahi mau gorila pilikua e ae, o lakou ka poe e hele e kii i ka nui o na gorila iluna o ka puu, me ka hahai pu ana aku o Koraka me lakou.

            No na la elua keia kaahele ana o Koraka ma me na gorila, hoea aku la lakou i kekahi kula oneanea, he wahi keia ana i hele ole ai mamua, ke ike la oia i ka nanai o ka aina, eia nae aole ana manawa e hoapapaa wale ai, he hookahi mea nui iloko o kona noonoo, o ia no ka palekana o Miriama, mai na Paele mai.

            Oiai aole he ululaau kokoke mai ma ko lakou alahele, ua ulolohi maoli ka hele ana o na gorila i ke kula, aka nae i ka hala ana o kekahi wahi laihi, ia wa i hoomaka aku ai kekahi mau gorila e kahea ma ke ano o ka lakou hoailona, aole i loihi iho, loheia aku la kekahi leo koli’uli’u, mai kahi mamao mai, ia wa i hoopololei aku ai ka hele ana a Koraka ma, ma kahi o ka leo hoailona i pa e mai ai, ma kahi kokoke i ka ululaau.

            No ka hapalua hoa paha kela hoomau ana aku a Koraka ma i ka hele, aia hoi, olii mai la he puali okoa o na gorila mai kahi mamao mai, no ka halawai pu ana me lakou nei, a no ka manawa mua loa, i ike iho ai o Koraka, he keu aku a ka nui maoli o kela puulu gorila, aia paha ma kahi o na haneri, a kaukani no paha, no ka mea he nonanona maoli ke ano o ko lakou nee ana mai imua.

            I ke kokoke loa ana mai o na gorila o na puu i kahi a Koraka ma e hele aku ana, ia wa i oili aku ai na moi o ua gorila o kekahi aoao mai, a i ka hui ana o ua mau moi nei i kahi hookahi, a mahope hoi o ka maopopo pono ana o kekahi i kekahi, ia wa i wa’uwa’u aki ai kekahi i ka poohiwi o kekahi, elike me ka rula o na gorila, alaila hoakaka, aku la ka moi o na gorila o ka hele pu ana aku me Koraka, i ke ano o ka lakou huaka’i, a i ka lohe ana aku o Koraka, i na mea e kamailioia ana, ia wa i oili okoa aku ai oia a ku ana imua, a i ka ike ana mai o na gorila malihini, ua piha loa lakou me ke pihoihoi, me ka manao okoa iho no o Koraka, e haehaeia mai ana kona kino e kela poe gorila, aole no nae ona maka’u nona iho, aka no Miriama kana e hopehope la, ina no lona make, alaila aole he mea nana e hoopakele ae i kela kaikamahine opio.

(Aole i Pau.)