Ka Nupepa Kuokoa, Volume LVIII, Number 9, 27 February 1920 — HE HOALOHALOHA NO MRS. KAPAHU ALAKAI, SR. [ARTICLE]

HE HOALOHALOHA NO MRS. KAPAHU ALAKAI, SR.

Mr. Lunahooponopono o ke Kuokoa, Aloha oe:—E oluolu mai hoi oe no'u kau wahi keena o ka kakou hiwahiwa, no na hua e kau ae la maluna, i ike mai na kini, na makamaka, e noho ana mai ka puka ana a ka la ahiki loa aku i ka welona a ka la i Lehua, o Mrs. Kapahu Alakai, Sr., ka wahine elua ia a ko maua papa aloha, ua haalele mai i keia ola ana, a niau palanehe aku la ma ke ala o na mea apau, a waiho iho la i ke kino puanuanu na ke kane, a na makou hoi ka ohana, e kanikau aku, aloha wale! He makuahine piha oluolu, heahea, iike, he puuwai hamama, a he makuahine hoopono. He mea nui maua iaia, pela pu ka ohana apau, a pela no hoi me na malihini, aole ona kaniuhu. Auwe no hoi ka makuahine o maua! Ua pau, ua pau ka lohe hou ana i kou leo, ua pau ka ike hou ana i kou maalo mai ma ke kaa, e ike ia makou. Auwe ka ehaeha o ka naau! Kuu hoa pili o na kuahiwi apau, kuu hoapili o ke kahawai, aloha wale ia mau wahi i piliia e kakou. Auwe no hoi ke aloha i ka mama o maua! E ke Kupua e, auwe no hoi ka menemene e, o ka home aloha keia o makou i piliia ai me ka mama aloha o makou a hala aku la, ua pau, ua pau kona maalo hou ana ma kou mau paia, a pela hoi me kou mau alanui. Auwe no hoi ka mama o maua e. He halekipa ia na ka malihini; aloha ka ihu o ka lio, na maua na malihini ame ka ohana hiki mai, hookahi ka hauoli like ana. E mama Kanani e, auhea iho nei oe? Auwe kuu hoomanao ia oe! Kuu hoa ohumu, kuu hoahele, ua pili aloha wale ia no e kaua ahiki i kona haalele ana mai ia makou. E ka Waiulailiahi e, ua pau kou hoopulu hou ana i ke kino o ka mama aloha o maua. E Pupukanioe e, ua pau ka maalo hou ana o ka mama o maua ma kou niau kuahiwi; e ka wailele o Mine haha, ua pau, ua pau kou ike hou ana i ka mama o maua, e niau hele ana ma kou mau kahawai. Aloha wale ia wahi e piliia ai me ke kane ame ka ohana. Auwe no hoi ka luuluu e! E mama Kanani e, auhea oe? Aia aku nei paha oe i Mokuleia, e ike i ka moena pawehe. Aloha wale ia mau wahi i piliia e kakou; aloha ke kula o Kawaihapai, ia mau wahi a kakou e haulani ai. E Waialua aloha wale ia mau wahi i hele pu ai. Na maua i noho aku ia aina malihini, o ke aloha keiki no, pokole ke kai ,a hiki ae la no na makua o maua. Ua ike oia ahiki i Kawailoa; auwe ka menemene e! Aloha ka la'i o ke kaona, ua he'e like wale ia no ia mau wahi e makou. E Kapuaiwa oia kuu pokii kaikaina, aole oe e ike hou i ka mama o kakou, aole hoi kona pulima ma ke aiai o ke kalana. Auwe no hoi ka mama o maua! No'u ka pokii, he mea nui iaia, a he mea nui no hoi ka mama o makou i ko'u pokii. E oluolu hoi oe e kuu pokii e hoike aku i ka ohana o kakon. Auwe ka luuluu o ka naau e, i ka hoomanao ae, aole iho la ka mama o makou. He mea hiki ole ke hoopoina iho, ua pili aloha wale ia no na wahi apau o Kauai nei e makou, mai ke kuahiwi a ke kahakai. Me ka moeuhane mua ole, e haalele mai ana oia ia makou, oiai o ka papa o maua ka mea nawaliwali. I ka Poaono iho no kona loaa ana i ka ma'i, he numonia, a hoihoiia i ka haukipila. Eha no la o ka haalele mai la no ia ia makou. Auwe ka minamina i ka mama o maua! Me ka maikai wale no, ma ka la 30 nei, o ia ke kakahiaka Poalima, hora 9, i upo'i iho ai kona lihilihi maka no ka manawa mau loa. Mamua o kona haalele ana mai ua himeni ae oia i keia himeni ku i ke aloha, "Imi i ke Kahu," oiai maua me ke kaikuaana o makou oia o Kekuiolelo, e lomi aku ana i kona mau lima me na waimaka. Auwe no hoi ka manaonao e; a o ka hope loa, kahea ae la e Leinani, o ke keiki hanai no ia ana e waiho ana no i ka nawaliwali, pau ae la ka lohe hou ana i kona leo. He hope peresidena oia no ke C. E., a he lala no ka Ahahui Kaahumanu, a he peresidena no ka Ahahui Aloha. E mama Kanani, pau ka ike hou ana i kou helehelena, i keia lapule e noho ai ka Ahahui Aloha a kakou, pau ka lohe hou ana i kou leo pule; pau ko makou ike hou ana aku ia oe e noho mai ana ma kou noho. Auwe no hoi ka mea ehaeha o ka naau! Ua lawe ae keia mau ahahui i ke kiai ana iaia, ia po, a ao ae, a pela me kona hoolewa. Maloko o ka luakini o Waimea i waiho ai kona kino, ahiki i kona hoolewaia ana.

Nolaila ke haawi aku nei makou i na hoomaikai palena ole ia Mrs. Cook, Mrs. Wright ame na lala apau o na ahahui elua ,ame na hoaloha i komo pu mai me makou e auamo pu i na mea e pono ai ko makou mama aloha. Ke hooki nei makou, a na ke Akua e haawi mai i ua hoomaikai i oi ae maluna o oukou pakahi. O makou iho no me ka haahaa, KAPAHU ALAKAI, SR., W. KAPAHU ALAKAI, JR., MRS. W. K. ALAKAI, JR.