Ka Nupepa Kuokoa, Volume LVIII, Number 17, 23 April 1920 — MIRIAMA HANAUUMI KEKOA. KA LEI I ALOHA IA. [ARTICLE+ILLUSTRATION]

MIRIAMA HANAUUMI KEKOA. KA LEI I ALOHA IA.

Mr. Sol. Hanohano, Lunahooponopono o ke Kuokoa, me ka mahalo: —E oluolu mai i kekahi wahi keena o ko Kuokoa no ka lei "wahine." Ma ka hora 9 a. m., la 30 o Maraki, 1920, me he kahanawai ka mio ana iho o Mrs. Hanauumi J. P. Kekoa, ma ka hale o kana moopuna, Emma Malolo, a o Mrs. Pilipo Kaaihue hoi i keia la, ma Kaimuki, 5th Avenue. Ua hanauia kuu wahine aloha mai ka puhaka mai o Kamalolo (w) ame Uluhua (k) ma Kauakipuupuu, iniki maeele, Waimea, S. Kohala, Hawaii, i ka 1857. Ua hoohuiia maua i ka berita o ka mare ma Feb. 9, 1898, nolaila ua piha he 23 makahiki a oi o ko maua noho mare ana, a haalele mai la oia ia'u. O kahi i hanauia ai kona papa aia ma Nailima, ka aina aia ka wai i ke kawelelaulima e ola 'i ke kini ilaila, ke kokea e ai a maoa, N. Kohala.

Kona mookuauhau pokole, oia keia: Namaka (k) mare ia Kaoiokalani (w) hanau mai eono keiki, Uluhua (k) keiki elua. Auwae (k) mare ia Hulimai (w) hanau mai o Kamalolo (w); Kamalolo (w) mare ia Uluhua (k), hanau mai o Hanauumi; ka mare mua i kahi a Kaululaau (Kupua) i hoopapa ai ma Keaea, hanau mai nana he kaikamahine; i ka oili ana mai o ka la, 1902, paa iho la ke kukuna i ke kaikamahine, hanau mai la elua keiki, keikikane ka mua, Emma Malolo ka lua.

Eiwa makahiki ko maua noho ana ma Puaikaula, kokoke i ka papu Kamehameha, ma ke awalau o Ewa, Oahu. Hoomanawanui ka hanu ana, hoomailo loihi ka nawaliwali ana.

O Mrs. Hanauumi J. P. Kekoa, he hoahanau oia no Kaumakapili i ka wa e noho kahu ana o W. N. Lono i ka 1900. Elua laua i komo ai i ka wa hookahi, he mau Pope laua, Mrs. D. L. Keliipio, Mrs. J. P. Kekoa, he makemake mau oia i ka ke Akua hana, elike no hoi me ka ikaika e loaa mai ana. Ua waiho na mea a kona lima i hana ai i mea hoomanao, hanuu a hanupa.

Ke haawi aku nei au ame ke kaikamahine i nele i ka mama, na moopuna ame ka ohana, ke kane i hookaumahaia i ka makou hoomaikai i ka poe i nee a

hele mai e ike iaia ame kana huaka'i heleloa, na makana wehi pua. Owau iho no, JOHN P. KEKOA.

MRS. HANAUUMI KEKOA,