Ka Nupepa Kuokoa, Volume LVIII, Number 18, 7 May 1920 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

HE HOALOHALOHA NA KA EKALESIA, KE KULA SABATI AME KA

AHAHUI C. E. O KALALAKAMANU, KAUNAKAKAI, MOLOKAI.

----------

            Solomon Hanohano, Aloha oe:---Ina he wahi kaawale iki o ke Kilohana Pookela o ka Lahui Hawaii i koe, e maliu mai hoi i keia uwalo walohia ana no ka makou mea minamina, mea aloha, mea moe ole hui o ka po e hiaa mau nei, me ka u mau ana hoi ahea la e pau ae ai keia eha nui e koni nei; i ike mai ai hoi na kini makamaka o ka mea i hala aku i niau hookahi aku la i ka welona a ka la i Lehua, e hookolo ana paha i ka ohu o Manokalanipo, i maikai Kauai hemolele i ka malie e pili, ke onehanau o ka mea aloha i hiki ole ka nalo ae na hiohiona e maaloalo mau nei.

            Eia ka iloko o keia au o ke kenekulia e nee mai nei, ke ola ame ka malamalama hou, kipa ae la ka anela o ka make ma o kona kino hou la o flu, ka mea nana i holopapa ae na ohana lehulehu apuni ke Teribore, me he manu la ua mae, e okioki ana a liilii me he oka laau la, holopapa ae la ka ma’i flu ma ke kulanakauhale o Kaunakakai, a uhola aku la mai kekahi pe’a a kekahi pe’a o ka aina me he mea la ua piha i na heana; a ma ka auwina la o ka la 14 o Aperila, i aui ae la, 1920, kipa palanehe ae la ka anela o ka make ma na paepae puka o ka home o Heneri Peelua, ke K.K.S. o alaiakamau, he luna o ka ekalesia, a he makai hoi o ka apana o Kaunakakai, a kaili kohana aku la i ka hanu makamae, maemae o Mrs. Ida H. Peelua, ka mea aloha menemene a ke kane; ka hoapili o ke kane he wahine o kahi mehameha, hoa ohumuhumu oka wa nele, ka wa ilihune, o ka wa popikia; hoa hoomanawanui o ka wa popilikia; hoa hoomanawanui o ka imi ana i na pono ame na pomaikai o keia ola honua ana o ko laua ola ana; mai ka ilihune mai no hoi ka nee liilii ana mai o ka hooikaika ana ahiki wale i ka hooikaika ana ahiki wale i ka wehe ana mai o ke ao malamalama o ka noho kuonoono ana, ua lani hoi iluna, ua honua ilalo, ua maloeloe hi na kapuai; eia ka, moku ae la ke kaula kaakolu o ka noho pu ana, he kane a he wahine, a puanuanu ka hale, ua nalo ka wahine ka mea e pumehana ai ka home.

            O ka wahine ka hoa hopaapaa o ke kane, a kuhalahala a kaawale ae, aka, o ke kaula kaakolu o ke aloha pumehana kakia i ke kino ka mea nana laua e ume a lilo i hookahi.

            E ka ihuanu e, ka laau ala o Kawela, aole he ihu nana oe e hoomau aku i kou onaona, ke hoi nei ka u’i o na kakai pali o Kawaikini i ka ohu noe i kanahele o Puukapele.

            E aha ana oe e ka liki one hauli o Kamiloloa, e lohi nei i ka moe kau, moe hooilo. Eia ko hale la ke paniku nei na ipuka, ua hemahema oe. O na kapuai nehe malie, haahaa, heahea hookipa mai ke kiekie a ka haahaa, aole loa oe e ike hou ana ia mea nani malaila: ua kumakaia oe i ka mea maemae!

            E Kalaiakamanu e, ka heiau  ka mea kiekie loa, ke kapu a na haipule e hoonini ai, ua pau, ua kua ka luhi o Ida, aole e kahakaha hou ia kona mau mauamaualima ma kou mau paia laahi, ke hele nei o Ida me kona Haka aloha i kela home mau ma o me Iesu.

            Ua hanauia o Mrs. Ida Peelua ma Hanapepe, kauai, a he wahine u’i oia i kona mau la o ka hoea ana mai: he ohana pili loa oia i ka Lunakanawai C. C. Conradt o Molokai nei mamua iho nei, lilo ae la hoi i ke keiki a Heneri Peelua oia o Hapipa o Kaihuanu, ka laauala o Kawela, a iaia iho la no loi la a alu’a ke kino, eia nae, o ka hie ame ka maemae ame ka hanohano o ke kulana, me he la, aia no i na la omakamua o kona mau makahiki mae ia aneane aku no ia i ke 50.

            He makuahine hoopono, waipahe me ka oluolu piha, e hookipa ana mai ke he la aia no i na la es dluprhuppuun kiekie a ka haahaa; i na la o kona ola ana i hala aku la, aole e haule iaia ke Sabati mailoko o ka luakini o Kalaiakamanu, he luna wahine iloko o ka ekalesia, he peresidena C.E. i kekahi mau manawa, a he makuahine alakai iloko o na hana ekalesia o keia ekalesia.

            Polokei ka ka haipule i i mai ai: “ Pomaikai ka poe make ke make iloko o ka Haku, a ke hahai nei ka lakou hana mahope o lakou.” Hala ia lima ikaika kokua nui o na hana o ka pono o ke aupuni o ke Akua, ma keia ekalesia, he pohaku paa naue ole iloko o ka ekalesia, eia nae, ua okaoka liilii, a ko ae la ka olelo pookela a ka lunaolelo e i ana: “ Ina i wawahiia ko makou hale kino lepo o ka halelewa nei, e loaa auanei ia makou ka hale, na ke Akua, he hale i hana ole ia e na lima, ua mau loa iloko o ka lani.”

            Nolaila, e hooholoia, o makou o ke kahu, na luna, na hoahanau, na haumana Kula Sabati, na hooikaika Kristiano, ke komo pu aku nei me oe e ke kane i hooneleia i ka hoapili he wahine, na keiki, na moopuna ame ohana he lehulehu ame hoaloha, e kumakena pu me oukou ka ohana, a e kaana pu i na luuluu o na haawina i kau iho maluna o oukou me ka ehaeha.

            Nolaila, ke pule nei makou i ka Makua Lani, e hoomama ae i na naau luuluu i piha i ke kumakena no ka kakou mea aloha i haalele mai i keia ola ana; a Nana hoi e holoi mai i ko kakou mau waimaka o ke kaumaha luuluu i ka aila o ka manaoio, ka hauoli ame ka olioli mai loa e nana aku ana imua i ka mea nana i hali ko kakou mau luhi ame na kaumaha.

            E hooholo hou ia, i hookahi kope i ka Nupepa Kuokoa, a i hookahi i ka Hoaloha. O makou iho no na komite,

REV. I.D. IAEA,

D. KAAI, JR.

JOSEPH N. UAHINUI,

J.P. NAKELEAWE.

 

LOAA NA UKU MAIKAI I NA KUMUKULA O KAPALAKIKO.

----------

 

KAPALAKIKO, Apr. 18.---Ua hoolahaia ae e ka Papa Hoonaauao kekahi papa kuhikuhi hou o na ukuhana ma ka halawai kumu o ka noho ana ma ke kakahiaka o nehinei a e waihoia aku ana i ka Papa o na Lunakiai no ka hoomakaukau ana i ka bila haawina makahiki no ka makahiki 1920-21.

            Ma keia hoolahaia ana ae ua hoike ae ke Kahukula Nui Alfred Roncovieri mamuli o ka loli ana o na kumukuai o na mea e pono ai ke ola ana ua lilo ia i mea e pono ai ke ola ana ua lilo ia i mea hoihoi ole no na kumukula hou e pono e ukuia aku me na uku maikai ma ka hoomaka ana.

            Maloko o na kula kumu mua o ke ana hou i haawiia no na ukuhana haahaa loa he $1400, a o ka uku kiekie loa he $1900 no ka makahiki. O ka uku mua e ku nei haahaa loa no na kula o na pokii, ka makahiki kula elua, ekolu ame eha, he $960, a o ka ukuhana kiekie he $1476.

            No ka lima o na makahiki ame ke ono o ka ukuhana haahaa loa he $1450, a o ka uku kiekie loa he $1950. O ka ukuhana e ku nei no keia mau papakula he $1200 ka haahaa loa a he $1512 ke kiekie loa.

            No na papa o ka hiku ame ka walu o na makahiki he $1500 ka haahaa loa a he $2000 ke kiekie loa. O ka uku e ku nei i nei manawa no keia mau papa he $1200 ka haahaa loa a he $1536 ke kiekie.

 

KE ALANUI KAHIKO AME KE

 

(Hoomauia mai.)

            O ka mea nui wale no, o ia no ka hoopono ame ka malama i na mea liilii, nolaila e ka lahui, heaha ka mea a kakou e hana ai?

He ninau nui keia e kamailioia nei iwaena o kakou, ma na pipa alanui ahiki aku i na hui hoeueu ame na hale halawai, a komo loa aku i na luakini, no ka lawe ana mai a noonoo i keia ninau ano nui, no ka pono ame ka holomua o keia lahui, ame kona ulu ae a lilo i lahui nui ame ka naauao, e hooponopono ana i na ninau ano nui o ka hooponopono aupuni ana.

            E ku mai kakou a hana no kakou iho me kela manao hana no kou pono ame kou home, o ia ka mea nui, eia i keia mau la e nee nei, na imi ana i dala no ka hoonaauao ana i na keiki i makaukau, a e hoonui aku i ka ike o na ano apau, i loaa ke pani o ka mea e haalele mai ana i keia ola ana.

            Nolaila e hemo kou lima me kau lau oliwa o ke aloha no keia hana, e hapaiia nei, aole o keia wale no, e hapai mai ka noonoo ana i ko kakou noho ana, ke pii loa mai nei na meakuai, ua oi loa aku mamua o ka mea kupono, eiai ke ike maka nei kakou i keia mau mea, o ka mea apiki, aole loa kakou i hana i kekahi mea e ikeia mai ai, ua hana kakou.

            E kukulu aku au i heia mea, ua hui iho la au me kela lahui Inia, o ia kela ano lahui e wa-hi ana i kona poo me ka welu, a kohu papale, a mai iaia mai au i lohe mai ai, oiai oia ame kona mau hoa e noho ana i Kaleponi, ma ke ano he mahiai waina iloko o keia mau makahiki ewalu, ua nui (ka loaa o ka waiwai,  a e hoi ana i ka aina hanau, ua nui loa kona kahaha i ko kakou noho ana, i ka pii loa o na meakuai ame ka uuku o kahi ukuhana, oiai oia e noho ana iloko o kona mahinaai, me kona mau hoa, e uku ana i na limahaua elima dala o ka la, o na mesai, he emi iki mai mamua o ko Honolulu nei o kana mea i olelo mai ai i ka onioni ole o ka lahui e ku iluna, a paio i na mea e pono ai oe.

            Ma ka nana aku i ko oukou kulanakauhale nei, he nanai ame ke kilakila, o ka mea apiki oke ola ana, ua pipii loa na meakuai, o ko oukou lahui kekahi o na lahui naauao ame ke Kristiano, aole e like me ko’u lahui.

 

NA LEKA KII OLE IA MAI AHIKI  I

MEI 1, 1920.

 

Aki, Geo.                     Kaninau, Miss E.

Opunui, Mrs. Emily     Kealoha, David

Uhulu, Mrs. L.H.         Kekai, I

Haliaka, Mrs.               Lukela, Mrs. H.

Haliimaile, Mrs. M.      Maloi, Carrie

Kaina, Miss Ida                        Mahelona, Mrs. E.N.

Kaopua, Mrs.L             Maui

Kahalama, Keliipio      Nakea, Apela

Kaha, Sol.                    Pakele, Jas.

 

 

HE KANAENAE NO KUU WAHINE

ALOHA.

(picture)

 

            Mr. Lunahooponopono o ke Kuokoa, Aloha pumehana kaua:---E oluolu mai hoi oe i kauwahi rumi kaawale o ka hiwahiwa a ka lahui no ka’u wahi kanaenae hope loa no kuu wahine e kau ae la maluna, i ike mai ai ka ohana, na hoaloha ame na makamaka o ku’i wahine, mai ka puka ana a ka la i Kumukahi a ka welona a ka la i lehua.

            Hanauia mai kuu wahine mai ka puhaka mai o John Kaniaupio (k) ami Kealoha (w) i ka makahiki 1889, Augate 17, ma Kailua, Koolaupoko,  nolaila ua piha i kua wahine aloha na makahiki he 30 me 8 malama o ka hana ana i na ea hu’ihu’i a nalo aku la, aloha wale ia mau la o ka pili ana.

            Hoohuiia mana e ka Rev. Kamakaia i ka makahiki 1906, Iulai 13, a loaa mai na hua elua e ola nei a  hookahi i hala e aku’ mamua, a kii mai la ka anela o ka make i ka uhane o kuu wahine aloha i ka hora 2 p.m., la 17 o Maraki, 1920, ma ko maua home ma Poipu, Koloa, Kauai, a waiho iho la i kona kino puanuanu na’u ame na lei a maua e paiauma aku. Auwe kuu minamina kuu ehaeha ia oe e kuu aloha, eia na lei a kaua, ua nele i ka mama, ka makua o ka kaua, ua nele i ka mama, ka makua o ka home, ua anu, ua hemahema kuu home, ua hala aku la no oe ka kiai o ka home ame na keiki a kaua.

            E Makahuena Light Station e, kahi a kuu aloha i hookamaaina mua ai i neia aina malihiui, huli aku o Mahaulepu, ame na makalae no apau o ia kaha kahi hoi a kuu aloha e alawa ana e kilohi ana i na hua opihi hoeha kino; ua pau kona hehi ana i kou mau aekai ame kou mau kualono; aloha wale na la o ka pili ana, o ka ua ko luna e haloku ana, a o kuu aloha kolalo e naue ana.

            Moe aku la oe kuu aloha, o kau mau hana eia no ia ke ku nei; he kiahoomanao mau ia a mau loa, na kuu puuwai e poina ole ai. Aloha no oe e Waipuilani, ka home a kuu makuahine i hookama ai, a ikeia ae maua he keiki, na ka makuahine Kini puuwai hamama, o kona leo ka maua i hoolohe o kana kauoha hoi ka maua i hooko, a ikeia ae la maua he lani iluna, he wahi hoi e hoomoe ai ike poo o kuu aloha, o ka moe no ka ia o kuu aloha moe loa, a haalele iho la ia’u me na lei a maua i kahi a ke kino i luhi ai.

            E mama Kini e, ua hala aku la o Kela, aole e loaa hou ana ko puni o ka limu, ua pau, ua hele aku la no oia la!

            E Kaina Keawe e ke aikane pilipaa a kuu aloha, ka hoa kaana hoi o kuu la loaa, na la hauoli o Kihohuna, ilaila i ikeia ai maua me kuu aloha, he hale kipa no ka lehulehu, a nau hoi ka loaa e kuu sis, ua aiia, a na kuu aloha hoi ka loaa ua hoolawa ia.

            Nou ka home, ua moeia me kuu poina ole i ko olua lokomaikai, e manao ana au la ilaila no pau ko aloha ia maua me kuu wahine aloha, eia ka ke paa nei no oe i ka aelike o ke aloha aikane.

            Nou ko’u hoomaikai palena ole ana i kau mau hana lokomaikai, e ole oe e kuu sis maha ai au, ka lima kokua hoomaemae a hoomanawanui i ke kino o kuu aloha, ko aikane, no aloha oe.

            E na makuahine puuwai hamama i na ai a ka uhane, ua hala aku la o Kela o ka olua mau a’o ana ia maua, o ia mau no ia, ua ai iho nei no o Kela a maona, a hala wale aku la no, a o kana mau hoomanao hope loa ana nou e Aunty Fanny ma kau a’o ana, a ina i ike oe i kahi au i hewa ai e mihi no,) o ia a’o ana au, me Kela ia a hele aku la, a ua ikemaka i kana mau pule ana. Aloha wale kuu wahine hoomanawanui!

            E Rose e, kuu makua hope o ka la, kahi hoi a ku ualoha i luakaha ai a imua iho la no ou ke aloha a kaua, a na kona makemake no i kono aku e hoi mai, eia ka ua maopopo mua no iaia kona hopena.

            Nolaila ke hoomaikai aku nei au i kau mau hana ahonui o ka malama ana ia makou i ka ai ame na pono o ke kino oiai na la o ka ikiiki, a ua hala aku la no o Sarah, ko aikane, ke kuleana hoi e hiki aku ai, aka o kuu home ua hamama ia nou ame ka ohana, aloha wale oe e kuu hoapili, nau i kui ka loke a kaua, na’u nae ka lei ana, auwe kuu ehaeha ia oe e kuu aloha; aka, o ko ke Akua makemake no ke hanaia; nana no i haawi mai a Nana no i lawe aku; e hoomaikai ia Kona inoa.

            Mamua o ko’u hooki ana, ke haawi aku nei au i ka’u hoomaikai ana ia oukou; ia M. Peter Kamano Sr., Olopua, Kalani Mikaele, John Mikaele, Keau Puaoliwa, no ka oukou makana eli lua, a uhi iho i ke kino o kuu wahine, aloha oukou apau, a pela hoi na lede maikai, Mrs.Peter Kamano ame kana ohana, Mrs. Olopua me kana ohana, Mr.Malakiele, Mrs. Keawe, Mrs. Esther Madeiros, Mrs. Minnie Aka, Miss Lena Mikaele, Mrs. Keomalu, Mr. ame Mrs. Kapahee, Miss Helen Kalawe, a no oukou ko’u hoomaikai palena ole no ko oukou luana pu ana mai me a’u i na la o ke kaumaha, ke ala pu ana a ao ka po, a ka’i pu me kuu aloha a kona hale lua, no oukou ko’u hoomaikai pau ole me ke aloha.

            A maluna ae o na mea apau, ke hoomaikai nei au i ke Akua ka Makua mana loa, Nana i hana keia kino, ka uhane ame na mea apau e piha ai, e hoopomaikai iho i na ohua apau i kumakena pu me a’u iloko o ke aloha.

            Pela hoi au e haawi aku nei i ko’u aloha poina ole nou e Mr. Lunahooponopono.

            Owau iho no iloko o ka luuluu no kuu wahine.

                                                                                    DAVID K. PELE SR.

                                                                                    DAVID K. PELE JR.

 

HE HOALOHALOHA NO MISS MARY

AKANA.

 

            I ka Lunahooponopono o ka Nupepa Kuokoa, Mr. Solomon Hanohano, Aloha oe:---E ae mai kou hanohano no’u kauwahi kaawale o kau nupepa, no kela poomanao e kau ae la maluna, a nau hoi ia e auamo ahonui aku i neia puolo luuluu o ke aloha, no ko makou hoapaahana, ma na kaiaulu o ka aina kulaiwi o kaua, a loaa aku ka ohana ame na makamaka e noho ana mai ka la puka ae ma Ha’eha’e, a ka welona a ka la i Lehua.

            I na makua i hooneleia i ka olua mea aloha he kaikamahine, Mr. ame Mrs. Eddie Kaimana, Mahukona, Hawaii, Walohia wale hoi:---Oiai ua oluolu i ka Haku i ka Makua mana loa ke kii ana mai a lawe palanehe aku la i ka hana ola mai ka hale kino aku o ka olua ka: kamahine i aloha nui ia ma ko olua home ma Mahukona, i ka Poaha, hora 6, Aperila 1, 1920, a waiho iho la i ke kino puanuanu imua o olua, kona mau makua, ame kona ohana pu ia mau hora ehaeha, e kanikau a e kumakena aka nona ma keia aoao o ka muliwai eleele o ka make. Nolaila,

            E hooholoia, o makou o na lunanui ame ua lala o ke Kula Sabati, ame ka Ekalesia o ka Poe Hoano o na La Hope Nei o Kokoiki, Kohala Akau, ma o ko makou komite la, ke komo pu aku nei me olua e ka makua i hooneleia i ka olua mea aloha he keiki, oiai o ka mea i hala iho la, he haumana a he hoahanau oia no ko makou ekalesia.

            Nolaila he mea minamina nui no hoi ka laweia ana aku o na opio ka manaolana hoi e loaa ana he makuahine maikai, eia nae aole pela ko ka Haku makemake no ka mea ua kii mai la no ia a lawe aku la a waiho iho la ia kakou e auamo i keia puolo kaumaha mahope nei; eia nae o ke alahele ana i niau iho la, nalo na maka mai ia kakou aku, ma ia alahele hookahi no kakou e hele aku ai.

            Nolaila, e hooholo ia e ae mai ia makou e komo pu aku me oukou ka ohana i hookaumahaia e kaana pu i na ehaehaeha i hekau iho maluna o kakou apau no ka mea o ka ehaeha i loaa ia oukou, o kakou pu iloko o ia mau ehaeha, a ko ae la ka ,ea i palapalaia o ke kanaka i kanauaia e ka wahine he hapa kona mau la, a ua piha nae ia na popilikia ame na inea o keia ao luhi, a kuu aku la oia iloko o ka maha mau loa, e kali ana i ka leo o ka pu a ka anela no ke ala ana mai o ka poe i moe ma na ilina, apau ae la ka auwe ana i na ehaeha o ka pilikia, no ka mea ke kuhea mai la no ka Haku aloha, e hele mai oukou apau i O’u nei, e ka poe luhi a kaumaha, Na’u e hoomaha aku, a ko ae la ka mea i palapalaia, e hoi ka lepo i ka lepo, a o ka palaho i ka palaho, e hoomaikaiia Kona inoa hoano ma na lani kiekie koa, he malu ma ka honua, he aloha i na keiki a kanaka.

            E hooholoia e hoounaia i hookahi kope o keia hoalohaloha i na makua i hookaumahaia no ka laua mea aloha he kaikamahine, hookahi kope i ka Nupepa Ka Hoku o Hawaii, hookahi kope i ka Nupepa Kuokoa, a ke noi ae nei ka makou mau leo pule i ka Haku, ka Makua mau loa, Naua e lawe ae i na luuluu ame na kaumaha i hekau iho maluna o kakou apau. O keia ka makou noi iloko o ka inoa o ka Makua, o ke Keiki ame ka Uhane Hemolele, amene.

            O makou iho no me ka luuluu paumako na lunanui ame na lala o ke Kula Sabati ame Ekalesia, ame oe ko makou hoomaikai ana he nui no keia hooluhi ana ia oe ame na keiki o kou papapa’i ko makou anoi.

S.K. HELELANI,

JOHN KOMAIA,

JOHN KAILIKINI,

L.K. KUHINAPULE, JR.,

                                                               Komite.

 

 

O ROSIE ANTONIO RICHARDS UA HALA.

 

(picture)

 

 

            I ka Lunahooponopono o ka Nupepa Kuokoa, aloha kaua:---E oluolu oe e hookau aku i ka’u whai puolo waimaka ma kekahi wahi kaawale o ka hiwahiwa a ka lahui, o ia keia e kau ae la maluna, a nana hoi ia e hii hele aku ma na pe’a eha o ko kakou mau paemoku a hoike aku, o Mrs. Rosie A. Richards (Loke Likeke) o Kalihi, Honolulu, kuu milimili, kuu hoapili o keia ola mauleule ana, ua moe aku oia i ka moe mau loa no na kau a kau, ua wehe mai i ka maua pili aloha ana, a ua haalele mai la hoi ia’u me na lei a-i a maua, a pela hoi me ka nui ame ka lehulehu o na hoaloha ame na makamaka e hoomanao mau aku nona me na waimaka, me ka minamina nui, a no ka mea, he makuahine oluolu a lokomaikai oia, he piha aloha i ka ohana ame na hoaloha, a no kona mau ano maikai apau, ua lilo oia i mea ia, he kakaikahi loa na wahine i like me kona ano maikai.

            O, ua eha au i ka eha lima ole a ke aloha, o hoonana ae aua ka hoi i ke aloha, aole e pau o ka hu’e mau wale no ia a ka waimaka me he waimapuna la.

            Ua hoaoia ma na ano apau e hoopakele ae i kona ola aohe nae he hiki, no ka mea, ua huapo loa ka hana aua mai a ka ma’i maluna ona a ua moe aku oia me ia ano ma’i mahope o ka hala ana o na la lehulehu o ka waiho ana. O, he ku i ka manaonao ke hoomanao ae nona, oiai oia e waiho ana iloko o kela kulana ma’i ia mau la! Me ka minamina pau ole au e kania-a ae nei nona me ke kukia mau i ke ao ame ka po me na hoomanao poina ole. O kuu Loke aloha ua nalo kona mau maka, ua pua ka lohe hou ana i kona leo, a oiai he lepo ke kanaka a o ka uhane ua hoi hou aku la ia i ka mea Nana i haawi mai, a ua hiki ole no hoi i ke ola ke kuaiia me na waiwai apau o ke ao, e hoonaiia aku ke Akua kiekie loa, ka Mea i kuleana i ke kino ame ka uhane.

            Ua hanauia mai oia mai ka puhaka mai o Mr. ame Mrs.Jose de la Cruz ma Honolulu nei i ka 1872, a iaia i moe aku la ma ka la 27 o Aperila, ua piha iaia na makahiki he 48 a oi; ua haalele mai oia ia’u kana kane me ka maua kaikamahine me ka moopuna, a mawaho ae na makamaka he nui e kumakena aku nona. Auwe ka mea mokumokuahua o ka naau ke hoomanao ae iaia! Nona au e kukia mau ae nei i na la apau, aloha wale oe a! Puanuanu ka home na hala ka mea e pumehana ai.

            Iloko o kona mau la opio, ua hoi oia me kona mau makua no Makapala, Kohala Akau, a malaila lakou i noho ai no kekahi mau makahiki, oiai he mea malama no kekahi hale kalapu kona makuakane, a malaila oia i hoonaauaoia ana maloko o kekahi o na kula o Honolulu nei.

            I ka la 17 o ka’ mahina o Dekemaba, 1891, i hoohuiia ai maua ma ka berita maemae o ka mare e ka Makua Kelemenete, a mailoko mai a ke ola nei oia i keia la me ka loaa pu o ka hua mailoko mai ona. Iloko o keia mau makahiki he 29 o ko maua noho mare ana, aole i loaa kekahi paee mawaena o maua a moe wale aku la no oia, he wahine maikai a oluolu, he haahaa, he heahea, a ua nui kona mau hoaloha mamuli o ia mau ano maikai ona.

            Ke haawi aku nei au i ka’u hoomaikai a nui i ka Hui Kokua a Hookuonoono o na Wahine Oiwi no kana mau hana maikai i ka’u mea aloha, no ka mea, i kona manawa ma’i ua malama mau mai keia ahahui, a i kona wa i make aku la ua lawe aku keia ahahui i na ko’iko’i apau ma kona aoao, elike me ko lakou mau kanawai, a ke hoike aku nei au maanei i na wahine apau i komo ole i keia ahahui e pono lakou e komo mai i keia manawa me ke kali ole, no ka mea, elike me ka loaa ana o na pomaikai i ka’u wahine,pela no e loaa like aku ai na pomaikai i na wahine apau e lilo ana i lala no keia ahahui, ke ma’i a ke haule aku ai na pomaikai i’na wahine apau e lilo ana i lala no keia ahahui, ke ma’i a ke haule aku.

            E haawi aku ana au i ka’u hoomaikai nui i na hoaloha apau i komo pu mai e kumakena pu me a’u, a pela hoi i ka poe i haawi mai i na makana pua, a i ka’i pu aku hoi me ia ma kaua huaka’i hope loa.

            Me ka Lunahooponopono ko’u hoomaikai nui loa.

            Na makou me ka luuluu,

                        ANTONE RICHARDS, JR.

 

HE NANANE.

-----------

 

            E Mr. Lunahooponopono, Aloha kaua a nui loa:---E oluolu oe e uwila ae i ike hou mai no na loea huli nane, a he hookahi makahiki lawe wale i ka Nupepa Kuokoa, o ka mea hiki mua o ka loaa. Ekolu mahele o kuu inoa, penei:

1.       Aia au i ka lewanuu, i ka lewa lani: puni ka lani ame ka honua ke makemake au e hele, a ina hoihoi ole au ko’u hiamoe no ia. Owai la au!

2.       Aia no ka loaa pololei o ka inoa o kuu kaina a kapaia ka inoa o ke kamu elua o Molowa. Owai la au!

3.       He hoaloha au no na mea apau ke hoolohe a malama, o huhu auanei au eha oukou ia’u. He moe pu no au me oukou, kiai a malama. Owai la au!

Ina e hoohuiia na mahele ekolu o kuu inoa piha!

He lila maia no ka E’a, aole e pohole i ka makahiki hookahi. Me na keiki hoonohohua ke aloha, a o kuu welina me ka Lunahooponopono.

Z. P. K. KAWAIKAUMAIIKAMAKAOKAOPUA.

 

OLELO HOOLAHA.

----------

 

            E ike auanei na kanaka apau, owau o ka mea nona ka inoa malalo nei, ua hoonoho, a hookohu aku au ia Moses Akawa, o Kaluaaha, Molokai, Kalana o Maui, i Hope Agena, Lunahooponopono a Kahu Malama Waiwai, no ko’u mau waiwai apau, mai na Waiwaipaa a Waiwai Lewa apau e waiho la ma Kaamola, Kamalo, Molokai, Kalana o Maui, a o na hooponopono ana apau me ko’u hope uo ia i hoikeia ae la.   

                                                                                                HOA INAINA,

            Kulnakauhale me Kalana o Honolulu.

              Mei 6, 1920.

 

HOOLAHA.

 

            Mamuli o ka haalele ana mai o kuu wahine mare, Mrs. Kealoha Hamana Kalihi i ko’u wahi moe ame na meani, ke haawi aku nei au i ka hoolaha, aole e ili mai ke ko’iko’i maluna o’u no ka uku ana aku i na aie e hanaia ana eia, a e kekahi mea e ae paha, me ko’u ae mua ole, i kakauia.

                                                                                    HAMAMA KALILI.

 

 

HOOLAHA ANO NUI !

 

            He halawai kuikawa ko ka “AHAHUI KALEPA O NA HAWAII I KAUPALENAIA, no ka La 21 o keia mahina, ma ka Library of Hawaii, hora 7:30 P.M.

            Makemakeia na lala apau loa e hoea mai ma ia halawai, aole e haule. He mau hana ano nui loa ka i makemakeia e waiho aku imua o lakou.

 

KA AHAHUI KALEPA O NA HAWAII

 

Kuai i na Palulu no

Na Ihoiho Kukui

 

No ka hooko pono ana aku i ka “Manao Hoomaemae” o ka

pule, ke waiho aku nei makou he “Kuai Hoomaemae”

o na Palulu Ihoiho Kukui.

 

 

Eia keia mau palulu nani ma na ano like ole me na kaila, e luaiia aku ana me ka nana ole i ko lakou kumulilo mai ka 10e a pii aku iluna. E paku’i aku ana lakou me kou Home i Hoomaemaeia, a aole loa he Home i Hoomaemae, a aole loa he kaualua no ka nui o ko lakou makemake ia mai.

 

Na Kukui Uwila

Liilii Nani

 

E hoike ana keia kii i kekahi o ka makou mau kukui nani. Aka nae, i ke Kukui Birch. Mahogany Rumi ua makemake makou e ike pono oi Moe a makou e waiho aku nei.

 

Elike me ka loihi o ke koe ana o keia ano kukui hoikeike, e kuai aku ana makou no $3.50 pakahi me na mea apau.

Ke ike oe i ko lakou nani maoli, e hikiwawe loa ana ko lakou pau i ka lilo, nolaila ke a’o aku nei makou ia oe e kipa koke mai.

 

W. W. Dimond & Co. LTD.

“THE HOUSE OF HOUSEWARES”

53-65 KING STREET, HONOLULU

 

 

TERITORE O HAWAII.

 

Keena o ka Puuku, Honolulu, Oahu.

            Ma ka hana e hoopau ana i ka WAIMEA WINE COMPANY, LIMITED.

            OIAI, o ka WAIMEA WINE COMPANY, LIMITED, he hui ia i kukuluia a e ku ana malalo a ma ka maua o na kanawai o ke Teritore o Hawaii, i kulike ai me ke kanawai i hoomakaukauia ma na hana o keia ano, ua waihoia mai iloko o keia keena he palapala noi no ka hoopau ana i ka hui i oleloia, hui pu me kekahi palapala i hooiaioia i hoohui pu ia me ia, elike me ia i koiia ai ma ke kanawai.

            NOLAILA, ma keia ke haawiia aku nei ka hoolaha i kekahi mea, a i na kanaka nei paha i keia manawa ma kekahi ano iloko o ka hui i oleloia, e pono e waiho mai i na ku e ana no ka aeia aku o ka palapala noi i oleloia maloko o keia keena, mamua ae o ka hora 12 awakea o ka la 19 o Iulai, 1920, a o kela ame keia mea e makemake ana e hooloheia aku maluna o ia mea, he pono e hoea kino ae ma ke keena o ka mea nona ka inoa malalo iho maloko o ka Hale Mana Hooko, Honolulu, ma ka hora 12 awakea o ka la i oleloia, a e hoike mai i ke kumu, ina he kumu kekahi i wahi e ae ole ia aku ai ka palapala noi i oleloia.

DELBERT E. METZGER,

                                                            Puuku, Teritore o Hawaii,

            Honolulu, Mei 4, 1920.

 

QUALITY

 

                                                                        (picture)

 

PRICES

 

Ilalo o ka makou hana ia.

O KA HOOMAU I KA MAIKAI ILUNA a hoemi i ke kumukuai ilalo o ka makou hana ia.

Oke ano maikai o ka mea nui ia ma ka makou oihana, a he mea hoi na makou e hoomau aku ai.

Hiki ia oe ke hilinai i na mea apau au e kuai ai maanei me kou hoohalahala ole.

Na Paalole mai ka $15 a $65.

Wehe i Moohelu Aie.

Lawaeia na Bona Kuokoa.

 

The Model Clothiers