Ka Nupepa Kuokoa, Volume LVIII, Number 27, 2 July 1920 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

He Moolelo no

MAGARITA ADAMU

a i ole

            “I kou hoea ana ma kela kulanakauhale ina aole e hoea oa e hele i ka holoholo a he nui na buke maikai au e hooke hopohopo loa nei au no ka loaa he manawa kaawale iaia alaila e kau oe maluna o kekahi kaapio a holo pololei aku no kahi a’u hoike aku ana ia oe i ka inoa.

            “E hooina e ana au ia oa no kahi o ko’u makuahine he aina hanai holoholona me ka mehameha no o ka noho ana aka he nui no na kauwa malaila aia no na lio ke makemake oee hele i ka holoholo a he nui na buke maikai au e hoohala ai i kou manawa ma ka heluhelu ana i na moolelo.

            “Ua ike no o Kapena Rede i kela wahi a i kona manawa kaawale ua hiki iaia ke hele aku e ike ia oa aka nae ke kanalua loa nei au no ka loa he manawa kaawale aliikoa e hele no kekahi wahi iloko o ka wa haunaele o ka aina.  Pehea e hiki ana anei ia oe ke hoomaopopo mai i keia mau mea apau a’u e hoakaka aku nei imua ou?”

            “Ke manao nei au ua paanaau loa ia’u na huaolelo apau au i kamailio mai nei ia’u pela n me kau mau olelo ma kela manawa mua loa o ko kaua hoolaunaia ana oiai au e ku ana ma ka aoao o ke kaa o Kapena Rede ma kela la a olaa i kipa mai ai ma ko’u hale nei.”

            “Alaila e hiki ana anei ia oi ke noho hookahi ma kela wahi o kuu makuahine?  Aole kakou e hele like ana i ka manawa hookahi aka e noho iki ae maua no ka hoolohelohe ana i ka mea a na kanaka maanei e kamailio ai nou a i ka wa e pau ai ka pa ana a ka makani o ko maua wa ia e haalele iho ai no Nu Ioka pehea la keia i kou manao?”

            “Heaha auanei ua maa no au i ka noho mehameha ana i na makahiki loihi ae nei i hala aole no he poe hookokoke mai ma ko’u wahi nei nolaila aole e lilo kou noho ana aku ma kela wahi i mea e mehameha ai no ka mea aia no hoi kekahi poe kauwa malaila e loaa ai no ka poe e kamailio ai ahiki i ko olua hoea ana ae.”

            “Ua pau na hemahema o ko lole i keia manawa e hookuku hou kaua malia he wahi kekahi i koe e hana hou aku ai.”  o ke komo iho la no ia o Magarita i ka lole a Nina o ka hoololiloli ana ae alaila wehe ae la i kekahi papale ana i hookaawale mua ai a haakau aku la maluna o ke poo o Magarita me ka puili ana ae o kona mau lima mamua o ke alo e hoike aku ana ae i kona piha loa  i ka olioli no ke kupono o na mea apau ia Magarita a no ka u’i no hoi o ua kaikamahine nei oiai nae o ka mea oiaio loa ua hele oloko ona e noho la a piha i na manao lili aole hoi e hihi he pono aia ke hoonu’anu’a aku ia Magarita i wahi e punihei mai ai kela kaikamahine malalo ona o hookoia na mea a laua i hoolala ai me Kalani Fiki no ka hookau ana aku i na poino maluna o ua o Magarita.

            He keu aku maoli no kou huapala e Miss Adamu,” wahi a ua o Nina i noke aku ai i ka pai ia Magarita.  O e Miss Adamu ua loli loa kou mau ano apau i kou wa i komo mai la i keia lole a kau mai hoi i kona papale.  Ina he lole oi aku o ka maikai kou e komo ai a hao mai hoi ka lei daimana me na komolima gula aohe kaikamahine u’i e ae ma ka honua nei o oe wale no.  Aole loa he mea oi aku o ke ino malalo iho o ka malamalama i ka la mamua o ka ilihune!”

            Ke kilohi la o Magarita maloko o kona wahi aniani i hele a hapa’upa’u me kona ike maoli ana aku no i ka loli loa o kona helehelena aole nae ia he mea nona e haaheo ai aka aia iloko ona ka hauoli no na mea a kona mau hoaloha i hana aku ai nona e loaa ole ai iaia na huaolelo kupono loa no ka haawi ana mai i kana mau mahalo ana ia lakou.

            “Eia hou keia mea a’u e kamailio aku nei ia oe e Magarita ma kou wa e haalele iho ai i kou hale nei aole oe e komo i kena lole ame ka papale aka e komo no oe i kela lole kahiko ou ame ka papale a o keia mau mea ua hiki ia oe ke hookomo iloko o kekahi eke pepa a i kou hoea ana ma Bosetona na ko’u makuahine e lawe ia oe no kekahi hokele malaila oe e komo mai ai i kena lole ame ka papale a waiho kou lole kahiko me kou hookomo ana maloko o kela eke pepa a no ka paleili ua hiki no ia oe ke komo mua oiai aia ia maloko e ike ole ia mai ai e kekahi mea.

            “I kou hoea ana ma ka hale a’u e kuhikuhi aku ana ia oe o kou wahi ia e noho ai e loaa ana he mau lole lehulehu ia oe malaila ua hiki ia oe ke kauoha aku i kekahi o na kauwa lawelawe e holoioli ae i kekahi mau lole elike me kou makemake.  Ke maopopo mai la anei oe i keia mau mea a’u e kamailio aku nei?”

            “Aole he hookahi o kau mau mea i kamailio mai nei a’u i poina me he mea la ua kakaia a paa iloko o kuu poo.” 

            “Ina pela ua pono e halele ana au ia oe i keia manawa.  E lawe pu oe i keia eke dala aia maloko e ke eke ka pepa inoa o kahi au e kuhikuhi aku ai i ke kalaiwakaa ilaila e lawe aku ai ia oe aia pu no hoi maloko olaila kekahi huina dala no kou mau hoolilo kaahele ame kekahi mau mea e ae au i makemake ai e kuai nolaila aole au mea e hopohopo ai a maka’u iho ai paha.”

            “Heaha auanei hoi ka’u mea e maka’u ai e Nina?”

            “Aole i’o no paha au mea e maka’u ai e hoomanao oe e hele aku ana oe iwaena o ka poe au i kamaaina mua ole ai a i kakahi wahi okoa loa hoi i malihini i kou mau maka a pela au i manao ai e maka’u ana paha oe i na kanaka e hala wai aku ana me oe a e maka’u ana paha oe me ka olelo iho aole makou he mau hoaloha oiaio no’u mamuli o kou kamaaina pono ole i ko makou mau ano oiai he mau pule kakaikahi wale no ko kakou kamaaina ana.”

            “Pahola ae la ka minoaka ma na papalima o Magarita a i aku la: “Pehea aunei e hiki ole ai ia’u ke hilinai aku maluna o oukou e Nina no ka mea o oukou ka poe na lakou i haawi mai i ka noho hauoli ana ia’u.  Heaha auanei ka pomaikai e loaa aku ana ia oe e Nina ina oe e hoopoino mai ana ia’u?”  wahi a Maharita me ka hoomaopopo ole i ka lilo o kana mau olelo me he pahi la e hou okoa aku ana i ka puuwai o Nina no ka mea ua kamailio aku oia i ka mea oiaio loa e ku a hilahila okoa ai kela wahine.

            Aole he nana pono aku o Nina maluna o na maka i Magarita no kona ike iho i ka maemae o kela kaikamahine a ua piha hoi oia me na manao ekaeka ma ka hoolala ana i na alahele apau e poholo ai o Magarita iloko o ka umii.

            “Ma ke kaaahi e haalele iho ana i ka hora eono me kanaha minuke e kau aku ai oe a holo no Bosetona o kela ke kaa ahi nui ole o na ohua no ka nui ae o na kaaahi mahope mai.  e piha mau ana i ka poe kaahele mai kekahi wahi a e kekahi, o ka mea nui no e Miss Adamu mai kamailio wale aku oe me ka poe au i ike mua ole ai a mai kamailio aku hoi no kau wahi e hele ana ame na mea i pili ia’u ame ko kaua mau hoaloha.

            “Ua maopopo pono aku la na mea apau ia oe e Miss Adamu nolaila e moe me ka oluolu o ka manao a e ala oe i ka wa kakahiaka nui a hoomakaukau ia oe iho no kau huaka’i hele.”  alaila honi aku la ua o Nina ia Magarita i ka honi kamakaia elike me Iuda Isekariota i honi aku ai i kona Haku ma kona manawa i kumakaia ai Iaia imua o na kahuna nui elike me ka moolelo Baibala.

            Ia Nina Hilakona i huli aku ai no ka hokele aole he wahine hauoli e ae pu me ia no kona ike e hoea mai ana i ka holopono ana o ka iini a kona puuwai.

            Ma kela po hoi o Magarita hookahi ke kaikamahine i piha me na haawina o ka hauoli a iaia i hiamoe aku ai ua moe oia me ka oluolu maikai aole hoi elike me kekahi poe ka hiaa i ka po me ka pihoihoi no na mea e hoea mai ana no ko lakou pomaikai.

 

MOKUNA XX.

 

            Hakalia no a wehewehe kaiao ma kekahi kakahiaka ae ua puoho e ae la o Magarita a hoomaka koke iho la ho ke komo ana i kona lole me ke kekali ana aku o ka manawa e ku mai ai ke kaaahi no Manakeka.  Aole loa he wahi hiona o ka hopohopo me ka maka’u ma kona helehelena o ka hauoli wale no elike me na mea i kukuluia aku imua o kona alo e ka poe i kapa ia lakou iho he mau hoaloha nona oiai nae he iliohae iloko o ke kahiko o ka huluhipa.

            Ua loaa mua no ko Magarita tikiki e kau ai ma ke kaaahi o kela kakahiaka no Bosetona no ka mea ua makaala mua o Kalani Fiki no ka holopono o kana papahana a i ka hoea ana o Magarita no ka hale hoolulu kaaahi aole ona nana wale ae ma o a maanei aka aia wale no kona noonoo o konu haalele iho i kela kulanakauhale a komo aku iloko o ka aina hou kahi ana e li’a mau la o kona paredaiso ia.

            O Kalani Fiki kekahi i hoea mua no ka hale hoolulu ma kela kakahiaka maluna o kona kaalio i ua kanaka nei no ka ike kau ana o Magarita maluna o ke kaaahi o ka hoohuli mai la no ia i kona mau lio pa aku la kana huipa maluna o ua mau lio nei o ka lilo mai la no ia o kona kaa me ka hele hoi o na papalina o ua kanaka nei a ulumahiehie no ka mea aia ka manu ke lele pololei la no kahi e pau aku ai ka hulu i ka unuunuia.

            Iloko o kela mau la hope o ko Magarita noho ana ma Manakeke aole loa ona hoomanao no kahi ana i noho ai me ka hoomanawanui no na makahiki he nui e hooikaika kino wahine ana i wahi e loaa mai ai kana mau mea e ai ai pela hoi kona mau lole e aahu ai.  Aole loa no he hookahi ana mea e hoomanao ai e laa kekahi mea i hana maikai mai iaia a i haawi mai paha i na kokua ana no kona pono a oki loa aku hoi kona hoomano ana no na manawa hauoli i loaa iaia he hookahi wale no mea nui iloko o kona noonoo o ia kona komo aku iloko o kekahi ola ana i oi ae ka hauoli ka maha ame ka pomaikai e kaulike aku ai oia me poe i maa i kela noho ana.

            Aole loa he wahi ano kaumaha iki iloko o ua o Magarita no keia haalele iho i kona wahi i noho ai i kanaka makua aka ua hele oia a piha me na manaolana no ka hauoli ana e moeuhane mau la aia ke waiho mai la imua o kona alo.

            Ma kela manawa a ua kaikamahine nei o ka haule ana iho maluna o kekahi noho nolunolu oloko o ka kaaahi me he mea la ua maha maoli kona noonoo a iaia i nana aku ai mawaho o ka puka aniani a kilohi aku i na hiona nani o Manakeka aole he hu mai o kona aloha no kahi ana i holoholo ai iloko o na la kamalii a i ole hoi ia kulu iho kona mau waimaka no kona mau hoaloha kahiko he oki loa no ma na ano apau a i ka haalele ana iho o ke kaaahi i ka hale hoolulu ia puana malie ae la ua kaikamahine nei i ka i ana ae:

            “O ke aloha no kou e Manakeka,” wahi ana me ke kilohi hope ana aku i ka nani o ka aina me ka minoaka hoi ma kona mau papalina me ka namunamu hou ana iho:

            “Ua noho aie nui au i na mea a kou mau kai i hana mai ai no’u.  Mailaila i loaa mai ai na i’a ia’u no ke kuai ana aku i wahi e loaa mai ai ka’u mau meaai nana i haawi mai i keia kino i ka ikaika e imi aku i ka hauoli a’u e upu aku nei e loaa mai ia’u ma keia huaka’i hele no ia hana au ke haawi ae nei au i ka’u mau hoomaikai kiekie ana aka no na mea e ae he nui ke lana nei kuu manao aole loa e hehi hou ana ko’u mau kapuai wawae maluna o kou mau lepo.

            “O kela mau kai i hele a kamaaina ia’u i ka heleia ke lana nei kuu manao aole loa e kilohi hou aku ana ko’u mau maka ia lakou aole hoi e hoohana hou ia na hoe o kuu waa pela hoi ka pa hou o ko’u mau lima i na hoe o kuu waapa ke waiho nei au ia mau mea apau mahope nei me ka huli hou ole mai o ko’u alo i kahi nana i hookau mai i na hoomaewaewa ana maluna o kuu kino opiopio.”

            Aia wale no na maka o Magarita ke nana la i na hiona malihini iaia ma kahi e holo aku nei o ke kaaahi me he mea la nae aole ana mau mea maopopo loa i ike aku oiai e holo ana ke kaaahi me ka puahia loa.  He nui no na noonoo like ole e oiliili ae la iloko ona aole nae he hookahi mea maopopo e hiki ai iaia ke hoakaka ae me na huaolelo moakaka; o ka mea oiaio no me he mea la i ka nana aku i ua kaikamahine la aia oia iloko o kekahi hihi’o moeuhne e puoho ae ai oia a ike eia ka he aka wailiu-la wale no i ke kula alailia.

            No kela piha loa o Magarita i na noonoo like ole iloko ona aole e hiki iaia ke hoomaopopo i ka loihi o kela manawa ana mai o ka mea ohi kikiki aia ke kaaahi ke hookoke aku la no ke kulanakauhle o Bosetona; a ia hoea ana aku no hoi o ke kaa i ke kulanakauhale ia wa i ku ae ai oia iluna me ka maloeloe a no ka malihini paha hoi kekahi o kela kulanakauhale iaia nolaila aole he wahi maka’u iki iloko ona no kekahi mea oiai aole i maopopo i na kanaka o kela wahi ka moolelo no ke karaima papahikanaka i hooliliia mai ai na ahwea ana maluna ona.

            Lele like aku la keia mailuna aku o ke kaaahi me ka nui ae o na ohua aohe no he hopohopo a lelele paha o kona oili a kana wale no e nana la ma o a maanei o ia kona ike aku ia Mrs. Hilakona ka makuahine o Nina.  Mamuli nae o ka hookeke o na ohua aoha ana mea ike aku aka kona kaawale ana aku ma kahi mamao mai ka huikau aku o na kanaka ia wa i ike aku ai oia i ke ku mai o Mrs. Hilakona a iloko o kona hauoli hele pololei aku la oia a hui me ua wahine nei me ka i ana aku:

            “Pehea la e hiki pono ai ia’u ke hoakaka aku imua ou e Mrs. Hilakona i ka nui o ko’u hauoli no kou auamo ana i na ko’iko’i apau no ko’u hauoli i wahi ana me ka lalau ana aku i ka lima o Mrs. Hilakona.

            Me he mea la nae aole i lilo kela mau olelo ma ka aoao o Magarita i mea hoihoi i ka noonoo o Mrs. Hilakona no ka mea aole he minoaka ma kona mau papalina aole no hoi he ano mahamaha mai no kela hoea ana aku o Magarita aka he haka-nu kona mau ano apau a o ia mae ka ua wahine nei o ka i ana mai:

            “Eia ka ua holo i’o mai nei no oe,”  wahi ana me kela ano hoihoi ole no ma kona mau maka.

            “Alaila ua kanalua loa ka paha oe no ko’u hoea mai ma keia kaaahi ea?”  wahi a Magarita me ka manao maikai iloko ona me kona noho pouliuli loa nae no na mea iloko o kela wahine.

            Aole he pane hou mai o Mrs. Hilakona ia Magarita aka huli aku la kana nana ana i kahi e a ina nae e imi pono ia aku ana ke kumu o kela noho malie ana e loaa ana ka manao e pane mai ana no oia aole ona kanalua no ko ia nei hoea mai no Bosetona ma kela kaaahi oiai nae o ka hauoli hookahi iloko o kela wahine o ia no ka hoea ole aku o Magarita elike me na mea i hoolalaia e Nina Hilakona kana kaikamahine.

            Me kela ano hoihoi ole no iloko o Mrs. Hilakona i kaha aku ai oia hele me ke kunou ana mai ia Magarita e ukali aku mahope ona no kahi o ke kaapio e ku mai ana i hoolimalima mua ia e Mrs. Hilakona.

            Ia laua nei o ke kau ana aku maluna o kela kaapio aole no he kamailio wale mai o Mrs. Hilakona ia Magarita aka ke noho mumule loa la oia me ka lilo nae o ka noho malie o kela wahine i mea e hoala ole ia mai ai na manao kahaha iloko o ke kaikamahine opio ina paha he hoihoi ole ko kela wahine iaia ua noho pouli loa o Magarita no ke kumu oiaio o ka noho kukule o kela wahine mamuli mai no ia o ka nui o kana mau mea e noonoo la.

            Ua kuhikuhi mua aku o Mrs. Hilakona i ke kalaiwa o ke kaa i ka lakou wahi e hele ai no ka hapalua hora paha kela holo ana aku a ke kaa hoea ake la lakou no kekahi hokele he wahi keia i hele nui ole ia e na malihini maloko o kela hokele i hookipa aku ai o Mrs. Hilakona ia Magarita no ke komo ana mai o ua kaikamahine nei i lole okoa o ia kela lola a Nina i haawi mai ai no Magarita e komo ai ma ka manawa e haalele iho ai i ke kulanakauhale o Bosetona.

            Ua hoolimalima mua o Mrs. Hilakona i kekahi rumi o kela hokele no Magarita e noho ai no kekahi mau minuke pokole wale no no ka wehewehe ana i kona lole e komo ana a hao mai la i kekahi lole okoa a i kona makaukau ana o ko laua haalele hou iho la no ia i ka hokele a hoolimalima aku la i kekahi kaapio okoa no ka lawe ana aku ia laua no ka hale hoolulu kaaahi.

            No ka hapaha hora wale no kela noho ana iho o laua nei ma ka hale hoo lulu o ka hoea mai la no ia o ke kaaahi e holo ana no Nu Ioka o ka haawi ae la no ia o ke aloha hope mawaena o ua mau wahine nei a kau aku la o Magarita maluna o ke kaaahi me ke kakali ole o Mrs. Hilakona ahiki i ka holo ana o kela kaaahi ua kaha aku loa oia hele ma ke alanui me ka alawa ana mau iluna o ke kaaahi a namunamu iho la i keia mau olelo:

            “He hana hiki loa ia’u ke hoopakele ae i keia kaikamahine mailoko mai o ka umii e alakoia nei oia no ka poino o ka mea wale no nana i kaohi mai i ko’u hooko ana aku ia manao o ia ko’u maka’u ia Nina.  He mau mea wale no keia no’u e poino ai ina no ko’u ku-e aku i ko Nina mau makemake aole ana e nele kona hookau mai i na ahewa ko’iko’i ana maluna o’u no kela kumu wale no i kau ai kou weli iaia ame Kalani Fiki.”

            E kau ana no ka la iluna ma kela ahiahi ua hoea aku la ke kaaahi no ka hale hoolulu ma Nu Ioka mamua nae o ka hoea ana aku o ke kaaahi wehe mua ae la o Magarita mailoko ae o kana eke dala i na kuhikuhi i kakauia e Nina no kahi ana e hoi aku ai a noho ma kela kulanakauhale aia hoi iloko o ua o Magarita ka manaolana no kona ike aku ia Kapena Rede i hoi like aku aiu laua no kona wahi hou e noho ai aole hoi e mehameha ka hoi hookahi ana.

            Ua hele maoli oia a puni loa ia Nina elike no hoi me ia au e ka makamaka heluhelu i ike mua ae nei no na mea i hoolalaia no ka poino o Magarita pela oia i kuhihewa loa ai o Kapena Rede kekahi iloko o no hoolala ana no kana huaka’i i Nu Ioka.

            Ke ukali ake la oia mahope o na ohua o ka lele ana aku mailuna aku o ke kaaahi me ka alaalawa ana hoi o kana nana ana ma o a maanei o ka ike aku ia Kapena Rede aole nae he wahi mea a ikeia aku o ua kanaka opio nei nolaila hoomau aku la no ua o Magarita i ka hele ana ahiki i ke alanui.

            Aia na kaa he nui ke hi-o la pela no hoi me na kanaka a oiai oia nei ka ohua hookahi i kahiko iaia iho me kakahi lole nani a hui pu iho no hoi me ka u’i o kona helehelena aia ka nana ana mai a kekahi heluna nui o na kanaka maluna ona me ka lilo ole nae o ka lakou nana ana mai iaia nei i kumu nona e hilahila ai a e pihoihoi ai paha.

            I kona ike ana aole he manaolana no ka loaa o Kapena Rede iaia ma kela wahi kahea okoa aku la oia i kekahi kalaiwakaa e lawe aku iaia no kana wahi i makemake ai me ka haawi pu ana aku i ka pepa i kakauia ai ka inoa o kahi i ku ai o ka hale o kona kau aku la o ia maluna o kela kaa a iloko o na sekona pokole loa aia keia ke lilo la i ka hao a na lio eleele.

            Oiai o Magarita e holo la maluna o kona kaa aia wale no kona mau maka ke nana la i na hale nani ma kela ame keia aoao o ke alanui a no ka lilo loa o kona noonoo i na hiona o kela wahi aole ona hoomaopopo ae i ka loihi o kana wahi e holo nei i ka hala ana nae o kekahi manawa o kana mea hoomaopopo aku la o ia no ke kakaikahi mai o na kauhale aole hoi elike me kela manawa o kona haalele ana aku i ka hale hoolulu kaaahi eia nae he o ia mau no ke kulna nani o na kauhale e kuku mai ana.

            Iloko nae o kona nanea i ka holo o ke kaa komo ana keia ma kekahi alanui i uluia e na kumulaau ma kela ame keia aoao a ike aku la i ke ku mai o kekahi hale nani iloko loa o ka ululaau aia hoi ma na aoao o ua hale nei e hoopuniia ana e na pua kanu o kela ame keia ano a ke honi okoa aku la oia i ka moani mai o ke ala o na pua.

            He nui na hale nani a ua o Magarita i ike ai ma kela huaka’i ana no kona home hou ana i koho iho ai aia ma kahi o ka umi a i ole iwakalua kaukani dala i hooliloia ai no ke kukulu ana i kela mau home eia nae aole i oi aku kona hoohihi ia mau hale nani mamua o keia hale ana e ike nei ma keia wahi ano mehameha i hoopuniia e na pua ka home hoi ana e noho aku ai.

            I ke ku ana aku o ko laua nei kaa mamua pono mai o ka puka o kela hale nani ia wa i lele aku ai ke kalaiwa ilalo a wehe ae la i ka puka o kahi i noho ai o Magarita no kona lele ana aku ilalo a ia wa hookahi no hoi i hemo koke mai ai ka puka mamua o ua hale nei a oili mai la he kaikamahine lawelawe i kahikoia me na lole i kamaaina ia Magarita i ka ike ana ma na home i ka poe waiwai ma Manakeka.

            Iho mai la ua kaikamahine nei nolalo o kahi o ke kaa e ku ana a i ka ike ana mai i kela oili ana aku o Magarita a ku ma ka aoao o ke kaa ia wa i pane mai ai:

            “Hoi mai noloko nei o ka hale e ka madame,:  wahi a ua kaikamahine lawelawe nei me ke kaha ana aku pii noluna o ka hale.  “Aole au nana ana aku no kou kalaiwakaa na kekahi o na kauwa maanei e hoomaopopo aku i kana mau mea apau i makemake ai.”

            “Alaila ua upu mua ae nei no ka paha oe e hoea mai ana au?”  i ninau aku ai o Magarita me ke ano kahaha no kona kapaia mai he madame oiai he kaikamahine opio wale iho no oia.

            “Ae, ua maopopo mua ia’u e hoea mai ana oe; he hoea aku nei no ko’u no ka hale hoolulu kaaahi hea la oe e kau mai ai pela au i kanalua ai i ka hele i keia la; oiai aole no i hoikeia mai ka manawa pololei au e hoea mai ai koe wale no ka loaa ana mai o ka lohe ia makou o keia kou la e hiki mai ai.

            “Aole no hoi e nele kou maluhiluhi loa i kau a mea o ka loihi o kau huakai hele aka nae aia a loaa he mau minuke nou e hoomaha ai alaila e inu waki ti mua oe ua makaukau no aia maloko o kou rumi.

            Ua hookahaha loa ia mai ko Magarita manao no ka hanohano maoli o kona hookipaia ana ma kela home hou ka mea i loaa ole iaia mamua ma kekahi mau wahi e ae aku aole nae ona makemake e hoikeike wale ae i kona ano naaupo nolaila ua uumi malie wale iho la no oia iloko ona i kon ano pohihihi malia e hoea mai ana no i ka manawa e maopopo pono ai iaia ma mea apau e pili ana i keia home.

            Me ka minoaka ma na papalina o Magarita pane aku la oia me ka leo oleole loa i ka i ana aku:

            “Ae ua maluhiluhi i’o ae me ka hauoli loa e kamau wala ti; a ke haawi aku nei au i ko’u mahalo ia oe no ka noonoo mua ana no keia mea.”

            Ma kela wahi o ka laua mau kamailio huli aku la ke kai kamahine lawelawe komo iloko o ka hale aia o Magarita ke ke kilohi la maloko o kekahi keena nui i hoonaniia me na lako hale o kela ame keia ano me kona mahalo i ke ku maoli i ka nani no mea apau o kela home.

            I ko laua nei hoea ana aku no kekahi alapii loihi e moe ana no ka hale oluna alakai loa aku la ke kauwa wahine ia Magarita no kela hale maluna a maloko o kekahi keena i lako pono i na mea apau i huli mai ai ua kaikamahine nei ia Magarita a pane mai la:

            “Eia kou rumi e ka madame aole anei ou manao ua maikai na mea apau i hoonaniia maloko o keia rumi?  Ua hanaia keia mau mea apau i kulike me ka makemake o ka Madame Devere eia nae o ka maua me ka wahine malama hale i nalu iho ai i keia la ina paha ua kulike ka makemake o ka lede hou me kona a e ole ua makemake paha oia e hana i kekahi mau hoololiloli ana i kaokoa ae mau na mea i hoonaniia a kaua e ike nei i keia wa.”

            “Owai keia lede hou au e kamailio mai nei ia’u?”  wahi a Magarita me ke kahaha.

            “O oe no hoi ua lede la a ina ua ano pouliuli keia rumi i kou manao he hana hiki wale no ke hoololiia aku a nui ae ka malamalama.”

            Pono ole mai la ko Magarita manao mamuli o kona loheana aku i ka inoa o kekahi lede i malihini loa iaia oia ka Lede Devere eia nae aole ona makemake e niele aku i ke kaikamahine kauwa e waiho malie ana no kona pohihihi ahiki i kona maopopo ana i na mea apau.

            “Ke manao nei au aole loa he hana maikai ma ko’u aoao ka hoololi ana ma kekahi ano i na mea apau i hoolakoia no keia rumi nolaila ua lawa iho la no keia aole au mea e noonoo nui ai no ko’u makemake a makemake ole paha i keia rumi,”  i pane aku ai ua o Magarita me ka oluolu.

            “He kuleana nui kou e kauoha mai ai ia’u a i na kauwa paha apau e noho nei ma keia hale e hana aki i na mea apau i ku i kou makemake no ka mea o oe ka haku o keia hale he poe kauwa lawelawe wale aku no makou malalo.  Aole loa he kanaka oi aku o ka oleole ma ka honua aolokoa elike me ko’u haku a oia no hoi kekahi mea oluolu loa me ka piha waipahe i na lede apau e hoea mai ana maanei nei.  E huikala mai nae oe ia’u ke hu loa aku nei ka’u mau olelo a oi aku mamua o ka mea kupono e kakali iho no oe pela a e kii ae au i kou ti ke hala wale nei ka manawa ia kaua ma ke kamailio ana,”  o ka kaha aku la no ia o ua kaikamahine kauwa nei hele mamua o ka loaa ana o ka manawa ia Magarita e ka-ua aku ai i ua kaikamahine nei no ka niele pono ana mai iaia i ka manao o kana mau mea i kamailio aku ai.

            I ka noho hookahi ana aku hoi o ua o Magarita alaalawa ae la oia ma o a maanei nei oloko o ua rumi nei alaila noho iho la ilalo maluna o kekahi noho pulu nolunolu a no ka manawa mua loa akahi no a ala mai na manao hoohuoi iloko ona me ka maikai ole mai la o kona noonoo no kona hoea ana aku no kela home.

 

MOKUNA XXI.

 

            Iloko o na moeuhane a Magarita e noonoo mau ana no na home nani iloko hoi o kana mau kuko ana e loaa iaia he nohona hanohano ana iloko o ka waiwai aole loa oia i ike me kona mau maka i na mea nani elike me ia ana i ike la maloko o keia rumi.

            He ano okoa ae ka hoonaniia ana o kela rumi ai na rumi mai o kekahi mau home he kanalima maloko o Nu Ioka a oiai nae aole no o Magarita i ike ialoko o ia mau home nani nolaila mai ke kumu o kona hoopihaia ana aku me ke kahaha iaia i ike mai ai i keia rumi i hookaawaleia nona.

            Alawa aku la kana nana ana maluna o kekahi wahi pakaukau uuku ua hele na mea dala a mokaki e ahu mai ana nana aku la hoi oia i na pale puka aniani auwe hewa i ka maka ke ike aku i kau a mea o ka u’i ame ka nani maoli o ka lihilihi aia hoi ma ka paia e kau mai ana na kii hoonani me kekahi mau mea e ae he nui ana i maopopo ole ai i ke ano o ia mau mea ame ko lakou waiwai.

            Aiai kekahi aniani kilohi nui e waiho mai ana mamua pono aku o kona alo a no ka manawa mua loa akahi no oia a ike pono i kona helehelena alaila hooho ae la i keia mau olelo me ka leo malia loa:

            “He oiaio anei owau o ke kaikamahine a Iokia Adamu ka mea i hookauia mai na ahewa ana a ko ke ao nei owau ke mea nana i hana i ke karaima pepehikanaka he kaikamahine hoi a ko ke ao nei i nanakee mai ai me na manao hookae ka mea i ike ole i ka noho hauoli ana aka e hoomanawanui ana iloko o ka ilihune ame ka nele.  He mea oiaio anei owau no keia e noho nei iloko o keia hale nani a i ole he hihi’o moeuhane wale no paha keia?”

            Iloko nae o kela manawa i komo mai ai ke kaikamahine lawelawe me na lako inu ti no ua o Magarita ke ike aku la oia o ke pa nui i hookauia ai ke pola ti ame na mea e ae ua kupono wale no kela no kekahi moiwahine aole hoi nona nawai no e ole ke komohia o na manao kahaha iloko ona no ke ano o na mea e hanaia aku nei no kona pono.

            Uwai mai la ke kaikamahine lawelawe i kekahi wahi pakaukau uuku imua o ke alo o Magarita me ka hookau ana aku i ke pola ti ame na meaai e ae alaila me na manamanalima palamimo loa kii mai la e wehe i ka papale o Magarita a i ka hemo ana mai ke poo aku hooho ae la ua kaikamahine nei:

            “O he keu maoli ka u’i o kou lauoho e ka madame ma ko’u manao aole au i ike i kekahi wahine me ka luoho aeae maikai elike me kou.  O ka lauoho o ka Madame Devere he haulaula o ke ano o ka lauoho o ka poe ehu.”

            “Owai ia mea o ka Madame Devere?”  wahi a Magarita me kona noonoo ana iho ua hoea mai i kona manawa e ninau aku ai i na mea i noho pohihihi ai oia me kona nana pono ana aku maluna o ke kaikamahine kauwa oiai e ninini ana i ke ti iloko o ke pola.

            “Pehea la au i kamailio aku nei ia oe no ka Madame Devere,”  i pane mai ai ua kaikamahine nei ma ke ano hikilele ua palaka maoli oia pela i hiki ole ai ke paa aku kona waha mai ka hoopuka ana mai i ka inoa o kela lede.  “Ua kukuluia keia home no ka Madame Devere mamuli o kona makemake i ka noho ana ma na wahi kuaaina loa elike me keia.”

            Aole i lilo kela pane a ke kaikamaine kauwa i mea e hoopauia ae ai ko Magarita pohihihi a o ia kana o ka niele hou ana aku:  “Aole anei o Mrs. Hilakona ka ona nona keia home?”

 

( Aole i pau. )