Ka Nupepa Kuokoa, Volume LVIII, Number 29, 16 July 1920 — PIHOLO EKOLU KEIKI LIILII I KA WAI. [ARTICLE]

PIHOLO EKOLU KEIKI LIILII I KA WAI.

Ma ka auwina la o ka Poakolu o ka pule aku nei i hala, i kulike ai me ha meahou o ka hoounaia ana mai i ka nupepa Advertiser mai Hilo mai, i piholo ai he ekolu mau keiki liilii iloko o ka muliwai o Wailuku, ma Hilo, a pau loa lakou ekolu i ka make. O kela mau keiki a ekolu, noloko lakou o ka ohana hookahi, o ia ka ohana o Hirhen, he elua mau keikikane me hookahi kaikamahine. Penei kahi moolelo pokole e pili ana no ke piholo ana o kela poe keiki iloko o ka wai: E auau ana ke keiki uuku loa o lakou nona na makahiki he eono maloko o ka muliwai Wailuku, a i kona paupauaho ana, ua ike mai la kona kaikuaana me ke kaikuahine i kela poino, nolaila holo mai la laua no ka hoopakele ana ae i ke ola.o ko laua kaikaina, eia nae, ua kaualakoia na kaikuaana e ke kaikaina ahiki i ko lakou pau like ana i ke piholo iloko o ka wai. Ua loheia nae ka leo uwe o kela poe keiki e kekahi poe ma kahi kokoke i kela wahi, a na lakou i hele mai a luu iloko o ka wai, me ka hoihoiia ana ae o ko lakou mau kino no ka aina paa, a ua hoea pu ae he eha mau kauka no ke kokua ana i kela mau keiki, eia nae, no kekahi manawa ko lakou noke ana i ka hana ma na alahele apau e hoopakeleia ae ai ko lakou ola, ua lilo ia hooikaika ana a lakou i manaolana poho.