Ka Nupepa Kuokoa, Volume LVIII, Number 34, 20 August 1920 — Page 7

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, HONOLULU, T. H, POALIMA, AUGATE 20, 1920.

He Moolelo no

MAGARITA ADAMU

@ a i ole

Ka Hoohokaia Ana o na Manao Lapuwale o ka Mea Kolohe- Ka Papahi Ana o ka Mea Hoopono i ka Hanohano me ka Waiwai

"A laila e olelo mai ana anei oe e Aline, o keia hale, ana i lawe mai ai ia'u, malalo o na hana apuhi o ke kolohe ame ka epa, he hale ia i hoolaaia no na hana haumia?" i pane aku ai na o Magarita, me ka hele mai la o kona mau ano a piha me ka pihoihoi, e hiki ole iho ai iaia ke kaohi i kona mau manao iloko.

"O key home au i ninau mai la e ka madame, he home ia a Kalani Fiki i lawe mai ai ia oe, no ka hoohanohano ana aku ia oe me kona aloha, i nele nae i na hoopakele ana mai a kona inoa."

MOKUNA XXXII.

Ua hiki ole i ka meakakau ke hoakaka ae i ka haawina i kau aku maluna o Magarita i kela manawa i lohe aku ai i ka pane a ke kaikamahine lawelawe, a no kekahi mau sekona, aole e hiki iaia ke pane koke aku, aka nae ia auhee ana aku o kela ano pihoihoi mai iaia aku, hoomaka aku la oia e kamailio, me ka loli loa o kona leo, mai kela ano mai ana i kamailio aku ai i ke kaikamahine lawelawe mamua iho, i ka pane ana aku:

"O ka manao anei o kau mau mea i kamailio mua mai nei ia'u o ia hoi, aole keia he home, me kekahi inoa maikai?"

"He like ole ka manna o na kanaka ma ia ninau, o ia hoi ma ka na kanaka hele pule e olelo mai ai, he hale maikai ole keia, aka i ka poe hele pule ole. e olelo ana no lakou, o keia kekahi o na home maikai loa."

"Ea, ua lawa, mai kamailio hou mai oe no ke ano o keia home," wahi a Magarita me kona ku okoa ana ae iluna, me he mea la, e hoao ana oia e alo ae i kekahi puupuu i ku'iia mai mamua o kona umauma. "Mamuli o keia mau mea au e kamailio mai nei ia'u, ua hoehaeha loa ia mai kuu uhane, no ka hana a ko haku, o ka lawe ana mai ia'u, a hoikeikeku imua o oukou kana poe kauwa, me he mea la, ua kulike ko'u manao me kona."

"Ke manzo nei au e ka madame, aole au hooili ana aku i na ahewa ana maluna wale no o Kalani Fiki, aka maluna pu no kekahi ou, no ka mea ua ae aku oe e kaa malalo o kana hoopakele ana, ua'ae aku oe e hoolilo oia i kana mau dala no kou pono, ua lawe mai hoi i na lole ana i hoomakaukau ai nou, na lole nani, i kupono wale no i ka poe nui o ke dala ke komo, ame ka poe waiwai. Heaha ke kumu i hana mai ai kela kanaka i keia mau mea apau nou? Aole ia no ke kokua ana i ka mea nele, ame ka hoopakele ana ae i ka mea iloko o ka popilikia, aka no kekahi mea ano nui loa.

"Aole paha on a noonoo nui, no ka lawe ana aku e hanai ia oe maloko o kekahi hokele, ame na hoolilo liilii e ae ana i uku aku ai me kekahi mau dala, aka no ka hoaahu ana mai ia oe, me na lole nani, ame ka lawe okoa ana mai ia oe, a hoonoho maloko nei o keia home, ma ia wahi, e koho iho ai oe. he hookahi wale no kumu nui o kona hana ana mai pela, no kou noho pu me ia, ma ke ano kane a wahine."

Oiai o Aline e hoakaka aku ana i kona manao, ua hoi hou iho la o Magarita maluna o kona noho, ke puliki la hoi kona mau lima a elua mamua pono o kona alo, a o ia kana o ka pane ana mai me ka leo haalulu:

"Aole loa au i ike i ka manao o na hana a Kalani Fiki; ua manao kuhihewa maoli au, o Miss Nina Hilakona ka on a nona keia home, pla wale no au i ae aku ai e hele mai maanei nei e noho ai, ahiki i kona hoea ana mai, eia nae he okoa loa ka ma i oili ae, he mea na'u i moeuhane mua ole ai."

"O kena wahine au e kamailio mai nei o Nina Hilakona, oia kekahi o na wahine epa loa, a e hoolohe mai oe i ka'u mea i maopopo no kena wahine. He kane ka kena wahine o ka mare ana, a no kekahi manawa loihi, ua noho laua me ka hauoli, ka nae mahope mai. ua haalele aku la kela wahine i kana kane, kela kanaka i aloha iaia, me kona puuwai apau.

"Aole ma ke ano maikai, i mare ai o Nina Hilakona i kela kanaka, aka i hoowalewaleia, ahiki i ka haalele ana aku o na kanaka nei i kana wahine mua, a i ko Nina Hilakona ike ana, ua pau iho la no kona hoihoi i kela kanaka, o kona haalele iho la no ia, a lilo aku la me kekahi kane hou, o keia iho la ke ano maoli o kela wahine au paha i hilinai loa aku ai maluna on a, ma ke ano he hoaloha oiai loa oia nou.

"I kela la koke aku nei no i kamailio mai ai ke kauwa lawelawe a Kalani Fiki ia'u, eia kela wahne ke pahele nei i ka noonoo o kekahi kapena koa waiwai oloko o ka pualikoa kiai lahui; a i hoike aku no au ia oe i ka mea oiaio ea, aole no ke aloha maoli mai ke kumu o kela wahine i makemake ai e mare me kela kapena koa, aka no ke ake i ka nui o kona waiwai."

I ka manawa i lohe pono aku ai o Magarita i kela mau hoakaka a ke kaikamahine lawelawe, ua aneane hiki ole iaia ke kamailio mai, no ka me aole oia i moeuhane mua. pele iho la o Nina i hoolala ai e uhola aku i kana upena, a hooninau hou mai la nae oia ia Aline:

"Aole anei ou manao, o kau mau mea i kamailio hope mai nei. he mau manao koho wale aku no ia?"

"O ka'u mau mea apau i hoakaka aku nei, he mau mea oiaio loa ia elike ka oiaio, me ko Kalani Fiki kuleana, i ka Lede Devere."

"Alaila, ua hoopalau anei o Nina Hilakona, me kela kapena koa?"

"No kena ninau ea, aole a'u mea i ike. Ua haalele aku oia ia Manakeka me ka hikiwawe loa, mamuli o ke kauoha a ke kiaaina i na pulikoa, no kekahi haunaele i ala ae ma Nu @oka nei. E hiki ana anei ia'u ke hilinai aku maluna ou e ka madame, in a au e hoike aku ana i ka mea oiaio no keia kumuhana a kaua e kamailio nei?"

Kunou wale aku la no o Magarita i kona poo, me kona pane ole aku he hookahi huaolelo, no ka mea ala koke mai la no iaia na hoohuoi ana. aole he kapena koa okoa ae ka Aline e kmailio aku nei iaia, aka o Kapena Rede no ia, aka i wahi nae e hilinai mai ai o Aline iaia nei, ua i okoa aku la ua o Magarita:

"Ke hoohiki aku nei au imua oi, aole loa au e lilo i mea kumakaia ia oe, ma ka hoike ana ae i kekahi kino kanaka mawaho o kaua. i kau mau mea apau e kamailio ma nei, koe wale no ka lilo ana o ia mau mea, i mau mea hoonaauao mai ia'u, me ka maopopo o ka'u mau mea e hana aku ai."

I ka maopopo ana aku ia Aline, aole i'o o Magarit o hoike wale aku ana i na mea a laua e kamailio ai uwai mai la oia i kona noho a mamua o ko Magarita alo, hoomaka mai la e kamailio:

"E kala mai oe ia'u, no keia noho aku mamua o kou alo, pela iho la nae e hiki pono ai ia'u ke kamailio mamua hoi o ka noho kaawale mai ia oe mai O ka meahuna o'u ame

@e kauwa lawelawe a Kalani Fiki, o ia no ke aloha ana mai o kela kanaka ia'u, a ua paa ko maua manao, e mare maua i kekahi la e hoea mai ana. Ua hoike mai oia ia'u, ua maopopo na mea apau iaia, i hoolalaia e kona haku. Oia pu kekahi me Kalani Fiki ma Manakeka, a ua ike i ko oukou hele ana i ka holoholo maluna o ka mokuheihei o Kapena Rede.

"Ua maopopo loa iaia ka haulehia ana o kona haku i ke aloha nou, pela me na hoolala ana a kona haku me Nina Hilakona, i wahi e hookoia ai ko laua mau makemake pakahi iho. Ua makemake loa o Miss Nina Hilakona e mare aku ia Kapena Rede, a ua makemake hoi o Kalani Fiki e lilo aku oe nana. Aole nae e hiki ia Kalani Fiki e mare mai ia oe, no ka mea he wahine mare no kana e ola nei, a no ko laua ike, ua haulehia o Kapena Rede i ke aloha ia oe, pela laua i hoolala ai, i na hana e kaawale ai oe i kahi e loa, a e hookuu aku ia Nina Hilakona, e pahele ma na ano apau e lilo mai o Kapena Rede i kane nana, oiai hoi oe e noho pu ana me Kalani Fiki, ma keia hale."

"Auwe no ka hoi e! He mea oiaio loa anei keia?" i hoo@o ae ai ua o Magarita me ka palulu ana ae o kona mau lima ma na maka.

"He mea oiao loa keia a'u e kamailio aku nei imua ou e ka Madame, no ka mea, ua ike au, aole loa e hoike hoopunipuni mai kela kauwa a Klani Fiki ia'u i kekahi mea."

"Ina o keia iho la ka mea oiaio loa. i hoolalaia e kela mau mea a'u i manao kuhihewa aku ai he mau hoaloha no'u, alaila e haalele koke ana au i keia home, i keia manawa ano, me ka hoohakalia hou ole iho."

"Ke kanalua loa nei au no ka hiki ia oe ke haalele i keia home, no ke kumu, ua haawiia aku ke kauoha i na kauwa apau e noho nei ma keia wahi, aole e ae ia oe e kaawale aku mai keia home aku, koe wale no a o Kalani Fiki pu kekahi me oe."

"Alaila ke noho nei anei au ma keia wahi, ma ke ano he paahao?"

"O kena maoli no ka mea oiaio, he paahao oe  na ke aloha."

"O, ke kuu Akua! Heaha la ka'u mea e hana ai? Aole anei e lilo oe i mea kokua mai ia'u? Ua maopopo ia oe ka moolelo o na hana kolohe i hoolalaia mawaena o kela ma'i mea, a ke nonoi aku nei au ia oe, e lilo kaua i mau hoaloha. E Aline, i ko'u wa mua loa i hoea mai ai malojo nei o keia home, ua kom omai ka manao maikai ole iloko o'u nou. aka nae ke ike nei au i ke kuhihewa loa o ia manao, no ka mea e lilo ana oe i mea kokua mai ia'u i wahi e ko ole ai na hoolala ana a ko haku, maluna o'u."

Ua komo loa aku na olelo uwalo a Magarita iloko o ka noonoo o Aline, me ka hu mai la o kona aloha no Magarita, alaila, ku ae la ua kaikamahine nei iluna, me ka holoholo ana maloko o ka rumi no kekahi mau manawa, a iaia i hoi mai ai a ku iho la mamua o Magarita, me ka i ana mai

"Aole ma ke ano he hoaloha au nou. a i ole mamuli mai paha o ke aloha iloko o kuu puuwai, i konoia mai ai au e hoike aku ia oe i na mea au i lohe mai nei," wahi ana me ka leo kuoo. "aole no hoi no ka iini iloko o'u e hoopakele ae ia oe, a i ole no kekahi noonooo Kristiano paha iloko o'u e hoohauoliia ai au, ke ike aku, i kou kaawale ana mai keia home aku, aole loa!

"He nani ia, ua kamailio aku nei au ia oe i na mea oiaio wale no, aole o'u makemake e paku'i aku i kekahi hoopunipuni, aka o na mea oiaio wale no ka'u i iini ai, ma keia kukakuka ana o kaua. He hookahi wale no kumu nui o ko'u manao ana e lohe mai oe i na mea oiaio apau, no ko'u aloha mai no ia ia Kalani Fiki. Owau ka mea mua loa i haawi aku i ko'u aloha i kela kanaka, eia nae. ua kapae ae oia ia'u ma kuono, a lawe mai la i ka Madame Devere, i kokoolua nona, a eia hou hoi oia ke hoao mai nei e hoopiha aku i ka makalua o kela wahine me oe, me kona noonooo ole iho ia'u. ka mea e noho aku ana imua o kona alo.

"Iloko o na la apau o ko'u noho ana ma keia home, ua hooliloia au i kauwa, e lawealawe aku ana no ka Madame Devere, ka mea ana i lawe ae ai i wahine nana ; a in a ua haulehia oe i ke aloha no Kalani Fiki, in a ua ike oe i ka'u mea e hana aku ai maluna ou. Aole nae a kaua kamailio ana no ka'u mea i manao ai e hana aku, o ka'u wale no i ake ai e lohe mai ia oe mai, in a paha o ka mea oiaio loa ia, aole o ualoha i kela kanaka?"

"Aole he kanaka e ae a'u i hoowahawaha ai, mamua o Kalani Fiki, no ka mea, ua hoike maoli mai oia i kona ano oiaio loa, mamuli o kana mau hana, he iliohae hihiu oia, iloko o ka aahu huluhipa."

"No kou hoike ana mai la i kou manao hoowahawaha no keia kanaka ea, akahi no au a haawi aku ia oe i ko'u ae, e kokua no au ia oe, ma ka imi ana i na alahele e kawale aku ai oe mai keia home aku, mamua o ka hoea ana mai o Kalani Fiki."

"E haawi i'o mai ana anei oe i na kokua ana, i wahi no'u e kaawale ai mai keia hale aku?" wahi a Magarita me ka hoihoi o kona mau maka.

"Ae, aka nae, ma ke ano wale no elike me ka'u i manao ai,' aole hoi elike paha me kau i makemake ai, oiai nae, o ka iini wale no iloko o'u, e loaa ole aku ka ike ame ka hoohuoi ana iloko o Kalani Fiki, ua komo pu aku au ma kekahi ano, i wahi nou e pakele ai.

"Eia ko'u manao e kakau oe i kekahi leka ia Kapena Rede a mai ka'u mau mea mai apau i lohe ai nona, aole au hopohopo ana no ka loaa o na kokua mai iaia mai no kou pono. E hoike aku oe iaia. maloko o kau leka, no kou hoopaaia ana ma keia wahi, ma ke ano paahao, me kou kaa ana malalo o ke kiaiia ana e na kauwa, i ukuia e ko lakou haku, oia no o Kalanni Fiki.

"E hoakaka pu aku maloko o kau leka. no na ano apau o ka hale i hoopaaia ai oe, pela hoi ka paakiki o ke alahele e hiki ai iaia ke komo mai iloko o ka pa, aka ma ke akamai wale no, a i ole, me kekahi puali kanaka nui, e hiki ai oia ke komo mai iloko, ma ka wawahi maoli ana i ka pukapa. O kahi i ku ai o keia hale, aia no ia ma kahi he hookahi mile me ka hapa mai ke kulanakauhale mai, ma ke alanui Eono."

"Pehea e hiki ai keia leka a'u e kakau aku ana imua o Kapena Rede?"

"E kakau oe mawaho o ka wa-hi leka i kona inoa, a o kakau pu iho i ka inoa o kona pualikoa. a owau ponoi no ka mea nana e lawe aku i kela leka, a haawi aku paha i ka'u mea i hilinai ai."

"O, e Aline, na ke Akua e hoomaikai mai ia oe no keia hana ku i ke aloha hoa kanaka!" wahi a Magarita me kona paa okoa ana mai i k lima o ke kaikamahine kauwa.

"Aole e nele ana ko ke Akua hoomaikai mai i ka manao, aka aole oia e hoomaikai mai ana i ka hana. Iloko o ko'u ola ana, aole loa au i lohe no ka loaa ana o kekahi makana, no kekahi hana ma'ua," wahi a Aline, me kona kakali ole iho nae e lohe i ka pane mai ia Magarita aku, o kona uwai mai la no ia i ke pakaukau kakau, kela pakaukau a Magarita i hoohihi loa ai, i kau a mea o ke ku moli no i ka nani, me kona makemake ole e hoopa aku i kela pakaukau, o ka nana ae nae, aohe wahi e kakau aku ai, noho aku la oia, a hoomaka iho la e kakau i kana leka, a o keia na manao oloko ana o ke kakau ana iho:

"E kou Kapena Rede Aloha:--Ke hoomanao nei no paha oe i kekahi manawa au i kamailio mai ai ia'u, i noho au @ manao e ui aku imua o kekahi hoaloha, e ui aku au imua oi, ua hoea mai i ka manawa a'u e hooko aku ai ia manao o'u. no ka mea eia au he kino wahine, ma ke kulana, i konoia mai ai au, e ui aku imua o ko'u hoaloha, a o ua hoaloha la, o oe no ia e Kapena Rede.

"Ma o kekahi leka epa i kakauia, me kou inoa, a'u o ka manaoio loa ana mai ia oe mai la ia, ua hoea mai la au no keia hale, kahi o'u i hoopaaia ai he paahao, a hiki i keia manawa a'u e kakau nei i keia leka ia oe. Iloko o keia manawa o ko'u pilikia, ua konoia mai au e kakau aku ia oe. Eia au maloko o kekahi hale e ku ana ma ke Alanui Eono. he hookahi mile me ka hapa mai ke kulanakauhale mai. a ua hiki loa ia oe ke ike mai i keia hale, ma ke ano o kona mau aniani nunui i hanaia, me na waihooluu like ole, i kaokoa loa hoi mai na hale e ae i kukuluia ma keia wahi.

"Ua hoopuniia na aoao apau o keia hale me na kumulaau loloa, aia ma kela ae keia aoao o ke alanui e hoea aku ai i ua hale nei, e ulu ana na kumulaau, aka nae, ua laka ia ka puka-pa hao i na manawa apau, a mamuli wale no o na hana maaleo a i ole, me kekahi puali nui o na kanaka, e hiki ai oe ke komo mai iloko o ka pa, ma ka wawahi maoli ana i kela puka-pa i hanaia me ka paa loa.

"Ke uwalo aku nei au imua oi e Kapena Rede, e kii mai oe e hoopake ae ia'u mailoko aku o keia wahi, a e hoihoi hou aku ia'u i kela ano kahiko o ko'u ola ana, kela ola ana i loaa ai ia'u ka hauoli aole hoi e hooau aku i ka noho ana ma keia wahi i hoopuniia, me ka hilahila ame ka hoehaehaia. Aia maluna wale no ou ko'u mau manaolana no ko'u palekana. Mamuli o ka makee no ke ola o ko'u uhane a pela pu hoi me ka palekana o kuu kino, pela iho la i waiho aku ai au ia'u iho iloko o kou mau lima, in a e hoohakalia ana oe i ka haawi ana mai i kau mau kokua ia'u, mlia e hooi loa ia ae ana ka poino e kau mai ana maluna o'u i oi aku imua o ka make."

MOKUNA XXXIII.

Pela iki mai kaua e ka makamaka heluhelu e hoomanawanui ai, no ka hopena o kela leka a Magarita, e hoi hou aku kaua ihope, a nana i ka nee ana o na pualikoa, no ke kahua o ka hana hoohaunaele i kauohaia mai ai o Kapena Rede, e alakai aku i kona puali.

He oiaio, ma ka manawa i haalele aku ai o na pualikoa i ka halekoa, ua maki pololei aku la na mea apau no ka hale hoolulu kaaahi, a maluna o kekahi kaaahi kuikawa, i kau aku ai kela mau pualikoa, a holo aku la ke kaahi me ka puahia loa no ke kiekiena o ke kulanakauhale o Bufalo. kahi o ka haunaele i manaoia.

I ka hookokoke ana aku nae o ke kaahi no kahi o ka haunaele, ua hooholo malie ia iho la ke kaaahi, mamuli o ke kauoha a ke konela, no ka mea ua ike oia, he hana naaupo loa, ke komo poo ana aku iloko o ka haunaele, oiai e hoopuniia ana na wahi apau, e na kanaka hoohaunaele i lako me na meakaua e lele makawalu mai ai maluna o na koa.

Ma kela wahi nae a ke kaahi i ku iho ai, e ahuwale mai ana na hana a ka poe hoohaunaele, o ia no ke puhiia ana o kekahi mau kaa i ke ahu, ka weheia ana no hoi o na alanui hao, a he nui wale aku na hana hoopoino a na kanaka hoohaunaele.

Mai na puka aniani aku o na kaa a na koa e kau ana, ua hiki loa ia lakou ke ike aku i na kanaka he nui maloko o ka pa, o ka hui kaaahi, me ka lakou mau pu, a e welo ana hoi he mau have ulaula, e hoike mai ana, ua makaukau kela poe no na hana hookahekoko.

Aia maluna o na kaa mua loa elua. o Kapena Rede ame kona pualikoa. ua haawiia aku la ke kauoha iaia. e lele oia me kona puali ma kela wahi. no ke kupale ana, mai ka ppuka ana mai o na kanaka olohani iwaho, a o na puali e ae e hoomau aku no ke kaaahi i ka holo ana imua. me ka hoolele liilii ana i kela ame keia puali, ma na wahi kupono e ikeia ana.

I ka manawa i ike mai ai ka poe hoohaunaele i ka hoea ana aku o na puali koa, ua hooi loa ia aku ka manao have iloko o lakou, elike me ka pipi bulu i ka wa e hoaniia aku ai o ka have ulaula imua o kona maka. Ua nui no ka poe iwaena o na kanaka hoohaunaele i lako me na pu raifela, o ke koena iho nae o lakou, o na pohaku ame ua pauku laau, ka lakou mau meakaua.

I kinohi o ke ku laina pono ana ae o ka puali o Kapena Rede, ua nana mai la na kanaka hoohaunaele, me na manao maka'u a wiwo i na koa, no ka hooko ana i ka lakou hana, aka i ka manawa nae i nee aku ai o ka puali imua, e hoohana ana i na elau o ka lakou mau pu, ua emi aku la kela poe hoohaunaele ihope, aole nae me na manao maikai, aka me na huaolelo hailiili ma ko lakou mau lehelehe, me ka hele hoi a piena, i kau a mea o ka piha i ka inaina ame ka huhu, no ka hokai wale ia aku, o ka lakou mau mea i manao ai he pono.

I kinohi, ua manao maoli no na koa, he hana maalahi na lakou ka hooke ana aku i na kanaka hoohaunaele a pilipu i ka paia, aka iloko o ko lakou nanea i ka nee ana imua, ua pa-hu ae la kekahi poka, i waihoia e ka poe hoohaunaele ma ke alanui, me ka nui o na koa i pau i ka eha, a o ka poe no hoi i kukonukonu mai i ka poka, ua make maoli lakou, me ka lilo i hana nui na ka poe ola, ka hookaawale ana i ko lakou poe i eha.

Aole i lilo kela mau hana poipu a ka poe hoohaunaele i mea no Kapena Rede e hopo iho ai, aka ua hookomoia aku na manao uilani iloko on a, ia wa i kahea ae ai oia me ka leo nui i kona poe koa, e ki i ka lakou mau pu, me ka hooponopono ole aku, eia nae aole i haawiia ke kauoha no ke ki ana. no ka mea i ka wa i ike mai ai o ka poe hoohaunaele, e kau pono aku ana na pu a na koa imua o lakou, ua pau nui aku la i ke auhee, me ka haawi ana ae o Kapena Rede i ke kauoha, no ka hoihoi hou ana i na pu, iluna o na poohiwi, a e hoomau aku i ke ka'i ana imua, ma kahi e holo la o na kanaka.

Iloko o ka manawa pokole loa o kela nee ana aku o ka pualikoa imua, ua mehameha iho la oloko o ka pa kaaahi. me ke kaa ana mai o ka hoomalu ana i kela pa malalo o ka pualikoa, me ka loheia aku no nae o na olelo kuamuamuame hailiili mai na kanaka hoohaunaele mai, i holo aku no kahi mamao, aole no nae he hoolohe aku o Kapena Rede i kela mau olelo, no ka mea aohe a lakou eha, o ka poka wale no kana mea maka'u.

Ke hoomaopopo aku la nae o Kapena Rede, ke oi loa mai la ka nui o ka poe hoohaunaele, me kona ike iho, he kakaikahi loa kona mau koa, nolaila aole he wa hou iho no ke kunana ana, aka kakau awiwi iho la oia i kekahi palapala. n ke konela, e kauoha aku ana oia e hoouna hou ia mai i pualikoa no ke kokua ana iaia, alaila kahea aku la oia i ke kakiana ekahi e hele mai imua on a, a i aku la:

"Ke mkemake nei au e haawi aku oe i keia palapala ma ka lima o kekahi o kau poe i hilinai loa ai, nana e lawe aku a haawi i ke konela a e kakali malie oia ahiki i ka loaa ana mai o ka pane; alaila huli hoi mai!"

I kela manawa hookahi nae, i ike aku ai oia i ke pioloke o kona poe koa, nolaila mahope o kona haawi ana aku i ka palapala i ke kakiana ekahi, hele kino aku la oia no kahi o ka pioloke, a he hana nui nana ka hoomalielie ana aku i kona poe koa, ahiki i ka hoi hou ana mai o ka maluhia, aka iloko nae o kela manawa, ke lohe okoa aku la oia i ka hele o ka poe hoohaunaele a hae, o ia no oe o na ilio.

No ka hora hokahi ke kakali ana aku a Kapena Rede. aole he hoi mai o ka elele me ka pane mai ke konela mai. ia wa i kahea aku ai oia i ke kakiana ekahi, me ka i ana aku imua on a me ka maikai ole o kona noonoo:

"Ua hoouna aku anei oe e Mr. Bea i kuu palapala ma ka lima o kekahi elele?"

"Ae, ua hooko aku au elike me kau kauoha, a o Makala ka'u koa o ka hoouna ana aku, e lawe i kela palapala."

"Aole loa o'u makemake iki i kela kanaka, a ke kanalua loa nei au, no ka hoea aku o kuu palapala imua o ke konela."

"No kou makemake i kanaka me ka noonoo akahele ka'u e hoouna ai, pela au i wae ae ai ia Makala, a o kekahi no hoi. he mea oia i maa i ka hoouna mau ia ma na hana o keia ano."

No ka manawa mua loa, i ike aku ai ke kaikiana ekahi i ka maikai ole o ka helehelena o kona kapena, aka nae aole i pku'iku'i olelo hou aku o Kapena Rede, aka i aku la oia i ke kakiana:

"Ke makemake nei au e lawe mai oe i ke kope o ka hoike imua o'u, a e hoouna aku i kekahi koa i ka Lukanela Danafoda, ua makemake au e ike iaia."

"Ua paa ka Lukanela Danafoda i ka hana i keia manawa, aole paha e hiki iaia ke hele mai."

"Me ka nana ole no kona paa a paa ole paha i ka hana ke makemake nei au e ike iaia!"

He manawa pokole loa, mahope iho o ka nalo ana aku o ke kakiana ekahi, oili hou mai la oia me ka Lukanela Danafoda, me kona hookuu ana aku i ke kakiana e hele, a iaia i koe iho ai me kona lukanela, ia wa i hoakaka pono mai ai oia i kana mea i hoomaopopo, ma ka pane ana mai:

"He hookahi wale no mea a'u i ike ai e pono ke hanaia me ka hoohakalia hou ole iho. E lawe koke oe i kela kaaahi a holo aku me ka nana ole ae i na poino, aia ka pono o ka hoea no ka hale hoolulu, a haawi aku i keia palapala iloko o ka lima o ke konela, no ka mea ana aole e loaa mai ana na kokua ou ia kakou. aole loa he manaolana no ko kakou pakele. mamua o ka napoo ana o ka la, i keia la."

Ua lawa kela mau hoakaka ma ka aoao o Kapena Rede, e hiki ole i i kona lukanela ke ku-e mai a hoole mai paha oiai no nae, ua ike kahiko no kela aliikoa i ka poino me kona kahaha, no ka hoouna mua ole ana o kona kapena i na kokua, aka nae, e lawe ana no oia, i kona ola ponoi iho iloko o kona mau lima. no ka pono ame ke ola o kona mau hoa ame kona aina.

Me ka hoohakalia ole iho o ka Lukanela Danafoda, o kona holo aku la no ia a kau iluna o ke kaaahi, alaila kauoha aku la i ka wiliki, e kuupau i ka holo o ke kaa, ina no ka make, a no ke ola paha, o ka hoomaka aku la no ia o ke kaaahi e holo, me ka puahia nui, a i ka nalowale ana aku o ua kaaahi nei, ma ka uakee o ke alahao, ia wa i loheia aku ai ka leo o na pu ma kela ame keia aoao o ke alahao, a ke ike la o Kapena Rede, ua hoea mai i na minuke, o ka hahanaloa, no ka mea aia ka poe hoohaunaele ke nee mai la imua, me ka aa ana mai e paio me na koa.

Haawi aku la oia ke kauoha i kona pualikoa, e ku laina no ka hoomakaukau ana, e paio aku me na enemi, me kona haawi pu ana aku i na olelo hoolana imua o lakou, a oiai aia ka poe hoohaunaele ke nee mai la imua, ua ku okoa ae la oia mamua o kona pualikoa, a kamailio aku la imua o lakou. a emi aku ihope, o pau aku auanei lakou i ka make, o kekahi manao no hoi o kela hoao ana aku o Kapena Rede e kamailio i kela poe, no ka hoololohi ana no ia, i ka lele ana mai o kela poe kanaka maluna o kona wahi pualikoa uuku, a no ke kauka'i no hoi kekahi e hoea mai na kokua no ko lakou aoao.

Aia ka põe hoohaunaele ke hoopuni mai la i ko lakou nei puali, ua hele no hoi a have, o ia no oe i ka ilio, i kau a mea o ka wela oloko i ka huhu, a hui pu iho me ka  inu ana i ka rama, aole he hooloheia mai o na olelo a Kapena Rede e kamailio aku ana imua o lakou, aia no ua poe kanaka nei ke noke mai la i ka uwa, e kakali wale ana no o ke ku ae o kekahi kanaka mamua, a hoomaka mai e alakai i ka puali nui o ka poe hoohaunaele, no ka lele ana mai maluna o ka pualikoa o Kapena Rede.

Iloko nae oke kunana o na kanaka hoohaunaele i ka lakou mea e hana mai ai, ua oili mai la kekahi kanaka Italia a ku ana mamua o lakou, ua kahi'ohi'o i ka waiona, alaila hopu aku la i ka have ulaula, a hoani mai la imua o Kapena Rede, ia wa i ike iho ai ua kapena nei, ua pau ka pono o na olelo a'o imua o kela poe. o ka hoouka kaua wale aku no ka hana i koe, nolaila haawi mai la oia i ke kauoha i kona mau koa, i ka i ana mai:

"E kukuli ka puaii ilalo! Makaukau!" aole nae i pau pono aku ke kauoha i ka naawia, no ka mea ua hina e iho la o Kapena Rede ilalo, a na ka lukanela elua i hoopau pono aku i ke kauoha, no ke ki ana i ka pu, o ka hoomaka iho la no ia o ka hoouka ana i ke kaua me ka hahana loa ma na aoao a elua.

Ma kela manawa a Kapena Rede i haawi ae ai i ke kauoha i kona mau kanaka, ua kani alapine mai la na pu raifela a ka enemi, a pela iho la i ku mai ai ua kapena nai i ka poka a hina ilalo.

MOKUNA XXXIV.

Aohe no hoi he wa a hoea mai na kokua, no ka aoao o Kapena Rede, no ka mea e punohu ana no ka uwahi o na pu raifela, ma kela ki ana aku a na koa i na enemi, kapalul@ ana no he elua mau kaaahi, me na kaa ohua, he ewlu ka nui, 'i lako i na pualikoa, a i hakalia no i ua mau kaa nei a ku iho, o ka lele aku la no ia o na koa iwaho, e hoopiha na i kekahi kahua nui, me na kanaka o ke aupuni, a ia wa i ike mai ai na kanaka hoohaunaele, me ke kahea ana me ka leo nui, ua hoea mai na pualikoa hou, nolaila hoomaka nui aku la e auhee, eia  nae, ua kiia aku na pu mahope o lakou. me ka nui o ka poe i make, a o ka poe i pakele aku, mamuli wale no ia o ka hookuuia ana aku, e holo no ko lakou mau ola iho.

Ua paa maoli kekahi poe i ka hopuia, a hauhoaia na lima i ke kaula, a o na koa ieha, ua hookauia ae la maluna o kekahi kaa ohua. i hookaawaleia i haukipila, a iwaena o na koa i eha, o Kapena Rede kekahi, ke kanaka hookahi i oi aku kona aloha ia e na koa.

Oiai ke Kino o Kapena Rede e waiho ana maluna o kona manele, a no ka nui aloha o na koa iaia, ua kau okoa ia iho la he hae Amerika ma ke pp o kona manele, aka nae, mahope o ka pau ana o ka ke kauka nana ana ia Kapena Rede, ia wa i hani ae ai oia i kela have Amerika, a me ka minoaka ma kona mau papalina, kamailio aku la:

"O ka uhi ana i ka have maluna o ke kino, he hoailona ia no ka mea i make, aka no Kapena Rede, aole oia i make i keia manawa e o'u mau hoaloha, nolaila aole i kupono keia have e uhiia aku maluna on a. Ua komo no ka poka iloko o ke kino o ke kapena, aka nae aole oia e make ana. no ka mea aole i pololei ke ki ana mai a ka enemi i kana pu, ma ka puuwai, he hapaha iniha wale no nae koe, alaila loaa mai i ka puuwai."

I ka pahola ana aku o kela nuhou hauoli, aia no ke ola iloko o Kapena Rede, a e ola ae ana no oia. ua hoopiha loa ia aku na koa apau mee ka hauoli, me ke kola okoa ana ae i ko  lakou mau papale iluna o ka lewa.

I ka pau ana o ka hana a ke kauka, me na koa i eha, a i make, ua hoohuli aku la oia i kona noonoo maluna o na kino o ka poe hoohaunaele i kukonukonu ko lakou poino pela hoi me ka poe i pau i ka make, i haaleleia iho ko lakou mau kino, e na alakai o ka poe hoohaunaele, a i na koa i nana aku ai maluna o ko lakou mau helehelena haikea, ua hiki ole i kekahi o lakou ke kaohi mai i na manao aloha no kela poe kanaka i alakai hewa ia, e hoala mai i kekahi haunaele maila paha o kekahi o kela poe kanaka i pau i ka make, he mau wahine ka lakou me na keiki eola ana, e @apalua ana ka poino e kau aku ana maluna o lakou. mamuli o ka make ana o ka makua o ka ohana, a pela hoi ka noho nele ana o kela mau ohana iloko o ka pilikia ame ka poino.

(Aole i pau.)