Ka Nupepa Kuokoa, Volume LVIII, Number 42, 15 October 1920 — KA MANAO O KAUKA WAYSON NO KA HOOKUUIA O NA LEPERA [ARTICLE]

KA MANAO O KAUKA WAYSON NO KA HOOKUUIA O NA LEPERA

Oiai, ua kulike no ka manao o Kauka Wayson, me na kauka na lakou i lapaau i ka poe i loohia i ka ma'i lepera mauka ae nei o Kalihi, no ka hoolaia aan o kekahi poe, me ka aila chaulmoogra. ua kanalua loa nae oia no ka hoola loa ia ana o ka poe i hookuuia, me ke kanalua ole i ka hoike akea ana ae i kona manao, he mea pono e laweia ae na makaala ana no ka oili hou ae o ka ma'i i kela poe.

O Kauka Wayson kekahi i komo pu aku iloko o na hooikaika ana, no ka holopono o na lapaau ana i lawelaweia me ka aila chaulmoogra, maluna o ka poe lahilahi o ka ma'i maluna o lakou ; nolaila aole oia i noho pouliuli, no ka laau ola e oleloia nei, aka ua kanalua loa oia, no ka lilo ana o ia laau i mea hoola i na ma'i apau i hookuuia, aka e hoomauia aku ka lapaau ana ia lakou, no na makahiki ekolu, mahope iho o ka hookuuia ana mai Kalihi mai.

Ua hookahuaia na manao hopohopo a kanalua o Kauka Wayson. no na hana pupuahulu, ma ka aoao o na kauka, na lakou e hookuu nei i ka poe i ikeia, ua ola ko lakou ma'i lepera, malalo o kekahi mau kumu kupono ; o ia no ka hele huikau aku o kela poe iwaena o na kanaka, ina he poe kanaka makua ka i hookuuia, a iwaena hoi o na kamalii, ina he poe kamalii ke hookuuia ana ; pela hoi ka mare ana aku o na ma'i i hookuuia : aia wale no a kaawale loa aku na hoailona apau o ka ma'i mai ia lakou aku, pela iho la e lanakila ai, ka lehulehu mai ka loohia ana aku i keia ano ma'i.

He manao pololei no keia o kela kauka; ua makemake i'o kakou e hookuu lanakilaia ka poe e ikeia ana ua kaawale loa aku ka ma'i lepera mai ia lakou aku, me ka hopohopo ole, no ko lakou lilo i mea hoopilikia aku, i ka poe nia'i ole, e pono ai e laweia ae kekahi mau hooponopono ana, ma ke alahele, e palekana ai ka lehulehu.

He ninau kekahi i waihoia ma nei i keia keena, no ke kumu i hooneleia aku ai kekahi mau wahine Hawaii, i mare i na kane Pake, i ka mana koho baloka ma Keanae, Maui, a loaa hoi ia pono i na wahine Hawaii, i mare no i na kane Pake ma ia wahi hookahi no, ma ke kau koho wae moho aku la i hala. Eia ke kumu : O na wahine i mareia i na Pake, i hanauia ma Kina, ua nele lakou i ka pono koho, elike me ka nele ana o ka lakou mau kane ; o na wahine hoi i mare i na Pake. i hanauia ma Hawaii nei, o lakou ka i loaa ka pono koho, elike me ka hiki ana i ka lakou mau kane ke koho baloa. ma ke ano he mau makaainana no Amerika.