Ka Nupepa Kuokoa, Volume LVIII, Number 42, 15 October 1920 — NOIIA AE KA MANAO O KA AHA KIEKIE. [ARTICLE]

NOIIA AE KA MANAO O KA AHA KIEKIE.

Ma ka Poakahi noi i noiia ae ai ka manao o ka aha kiekie e hooholo mai maluna o ka ninau he kuleana anei ko J. K. Nakookoo ame 30 poe kupono e ae i ke koho baloka o ka mahele eono, apana elima, e hoopaaia ai ko lakou mau inoa maloko o ka buke hoopaainoa nui a ke aupuni kulanakauhale. Ua hoopaa keia poe ae la i ko lakou mau inoa maloko o ka mahele koho kahi a lakou e noho ana mamua ae o ka pau ana o ka manawa e hoopaaia ai na inoa i ku i ke kanawai, eia nae aole i laweia mai ko lakou mau inoa e hoopaaia maloko o ka buke hoopaainoa nui a ke Kakauolelo Kalauokalani ahiki i ka hala ana o ka manawa, oia hoi ka hora 12 o ke aumoe o Sept. 14 i hala aku la. Ua hooholo ka ka papa hoopaainoa o ka poe kupono i ke koho baloka ua hiki no i ko lakou mau inoa ke hookomoia maloko o ka buke hoopaainoa nui a ke kakauolelo kalana, eia nae, ua hoike mua ae ka loio kalana i kona manao aole hiki ke hoopaaia ia mau inoa he 30 a oi maloko o ka buke hoopaainoa nui. No keia pohihihi ua noi ae ka Loio Kalana Heen no kekahi rula ana mai ka aha kiekie mai maluna o keia ninau, a o ka olelo hooholo a ka aha kiekie ka mea e hoopauia ae ai na pohihihi.