Ka Nupepa Kuokoa, Volume LIX, Number 5, 4 February 1921 — ME WAHI MEAHOU MA KEOUMOKU. LANAI. [ARTICLE]

ME WAHI MEAHOU MA KEOUMOKU. LANAI.

E kuu Solomon Hanohano:--Ma ka la 5 o Ianuari, oiai ka makahi e pahalaole ana mai ke kukulu akau mai, me na nalu e poʻi halaole ana ma na kuaau, ua holo aku la o Lanai, aila ea o John Nakihei ka wiliki a kapena oia waapa, ame elua kanaka kokua; o ia holo no ia ka maikai a komo iloko o na nalu nui e poʻi mai ana, o ka moe ana iho la ia o ka mikini. Ma ka eleu no o ke kapena me ka hoe-ka a hoohuli ae la i ka ihu no ke awa, a kau mai la no me ka maikai. Hana hou no o John Nakihei i ka mikini a holo no me ka maikai, manao no ka wiliki aole e pilikia ana, o ka hoopuka hou aku la no ia, o ia holo no ia me ka maikai ahiki iloko o na nalu e poʻi mai ana, o ka moe iho la no ia o ka mikini, hoohuli hou no iuka, iloko no ia o na nalu e poʻi mau mai ana, ahiki hou no i kona pae ana. Auhea oukou e ka poe e heluhelu ana i ka milimili a kakou, e ike iho oukou i keia kaeʻaeʻa o John Nakhiei, keia opio makaʻu ole ia mea he ino o ka moana. Pau ka manao e holo hou ma kona waa aila ea, o ia kona wa i ike ai i ke kumu o ka pilikia o kona mikini, mai ke kula aila mai maloko o ke paipu aila, paa mau i ka lepo, ehu hao, aole holopono o ka aila iloko o ka mikini. Nolaila haalele oia i kona waa aila ea, kau maluna o Mikioi, waa aila ea o C. Gay, o ka holo aku la no ia iloko no o ia nalu a puka iwaho, no Lahaina ka palena, mai Lahaina ae ahiki i Manele, kiloi i ka ukana ame ka ohua, a hoi mai ia ahiahi no Keomoku, he o ia mau no ka makani mai ke kukulu akau mai. I ka la 15 o Ianuari, he Poaono ia la, nui loa mai la ka makani me na nalu ahiu, aole i holo na aila ea o ua aina nei, aohe he waa aila ea i holo i Lahaina e kii ai ame na mea e ae e pono ai na ohana o ua aina nei. I ka la 17 ae, Poakahi ia, ua hoomanawanui aku la no ia poe e holo i Lahaina e kii ai na makou, a hoi mai me ka hoomanawanui, manao ae la ke ola o na ohana o ua aina nei o Kaululaau. Eia keia mea hoike aku i ka poe heluhelu o ke Kuokoa, eia ke pahola nei ka maʻi flu ma Keoumoku nei, na kane, na wahine me na kamalii, o ia kahi meahou e hoike aku i ka poe e heluhelu nei i ka milimili a kakou mai Hawaii ahiki aku i Niihau, o keia no ka maʻi o kela makahiki i hala, ahiki i keia makahiki 1921, o ka lako no o na kanaka i ka laau, ua hoolako no na kamaaina i ka laau huaale eha o ke poo, huale eha o ke kino, paakai inu me ka hoomalu i ka mea maʻi aole hele iwaho. Me keia mau wahi meahou, ua lawa, ke haawi aku nei au i koʻu aloha i ka Lunahooponopono o ke Kuokoa ame na keiki limahei o ka papapaʻi. WM. BENI POKIPALA.