Ka Nupepa Kuokoa, Volume LIX, Number 17, 29 April 1921 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

KA HUAKAI A NA KOMITE OLA O NA HALE KAUKANAWAI NO KALAUPAPA

(Kakauia e J.K. Mokumaia)

(Hoopau ana.)

Oiai au maluna o ia kahua i loaa mai ai he lio mai kekahi makamaka maikai mai o kela ike lahulio no ua lawe koke ae la au ia kulana ame ke akua ana mai o kekahi keonimana i ke alakai hele ana iau ma na alanui keekee, ua kauia na inoa ma na alanui apuni ia kahua.

He alanui kula no malaila, a he nui aku no inoa e ae a komo aku la maua i ka home bihopa, he nani keia home na kaikamahine he kulana maemae e nana aku aia au ke lululima  la na makuahine o ka pono, e malama ma ia lakou a hui iho la au me ia makuahine wilikina i noho mua ai ma ka pa mai o kalihi.

Ua nui ko maua kamailio ana no na mea i kaahope aku oiai oia e ake mai ma e loaa aku ka mea oiaio ua wehewehe aku au i na mea nona e ike koke mai ai oiai au e kalaiwa ana i ke ma buss e holo ana i kalihi ame moanalua ame kou hoolimalima ia ana hoi e lawe i na kaikamahine i ka kai iwaho o waikiki akahi no maopopo iaia ame ka mare ana o kekahi kaikamahine au no e malama ia Mr. Chas O Sullivan.

Ua nui kona hauoli i ko maua hui ana no ka mea ua loaa iaia ka ike maopopo ana oiai oia e hai mai ana i ke kulana o ia home ame ka nui o ka keiki me ka piha me ka mea e hauoli ai ko lakou noho ana oiai ua makaukau i na mea apau.

He nui na home e ku mai ana, a o kekahi o ia mau home aole he nohoia a i ko maua haalele ana ia kahua i imohiki aku ai maua i ka home banawina he nani ke nana aku o ia ka home o na mai i loaa i ka maka hapopo ua nui maoli ka poe i kamaaina kuu oiai o ke aloha wale aku no aia ia au ame kou pailaka malua o ka a ke hele la maua no ke kahua o na keikikane liilii he ui no ke nana aku oiai o kou ake e nui kau mea e ike ai i makepono ka hele ana una luna o ka aina i lohe wale ia ai oiai ua hoopokoleia mai ke alahele e hele oi na ka lio o ka hana oiai ka manawa e nee mau ana imua a pela me kou lohe mau no ka hale ipukukui o kalapapa.

 

Nolaila o kou mea kakau nei, Hon. R Ahuna ame hon. kaumeeiwa mamuli o ka oluolu o kekahi kokua malama halekukui i kau aku ai maluna o ke kaa otomobile aia ka ihu o ua wahi mokukaa nei ke auku la i ka makani ma kou nana aku la i ka makani ma kou nana aku he pailaka ike maoli keia no ka mea o na anuu ame na lau heaha la ia mea i ka ike ame ka makaukau o keia opio a ku iho la makou ma kona home a hele aku la i kahi i ku ai o ka halekukui i lohe wale ai i kone kaulana.

Ke mahalo la makou i ka maemae ame ke kulana o ua kukui nei hai ka a i ke nana ae oiai ko makou alakai i koma aku ai ma ka puka no a pii ana iluna aia na alapii i hana puoia a oiai makou e pii ana me ka hana ani me ka paupauaho pu aka o kela ake e ikemaka o ka mea ia nana i ka pai i ka manao e pii ahiki i ka ike maka ana oiai i ko makou hiki ana i kahi e hoopaa ai i kou inoa he rumi nani maoli keia o kahi no hoi ia o ka mea malama kukui e hoomaha ai ame ka lawelawe i kekahi mau hana a i ka maha ana i pii hou aku ai makou i kahi e a ai ke kukui.

He nui na mea kupanaha a ka maka e nana ai oiai na mea apau he hulali wale no o ke aniani i hana pioia a kohu olepelepe ke nana aku ame na mikini nana e hooninie ame ka lele ana o kona a he mau mile ka mamao. O kona kiekie mai ka honua ae he 223 kapuai kona ikaika hoolele i kona malamalama he 620,000.

Oiai makou e nana ana i keia mea kupanaha ame ko makou nana ana mai i ke kahua mai i ka moana i na mamea he nani wale no ia a makou e ike keia a ke pa nei ka makani me ka ikaika me he la e wili iho ana maluna ae. He like ole maoli no ka pa ana o ka makani ma keia wahi a makou e ku nei me ko ka honua paa' a aia no hoi kahi nene aukai e hoi ana i ka muku hoi i ka hema iluna a ilalo e kimokimo ai oiai ia e ku malie ana, a haupu ae la au i keia mau wahi hua kukui:

Hanohano Kalaupapa i ka'u ike,

I ka halekuku kau mai iluna,

Puiwa hikilele kou moe ana

I ka malamalama kupanaha i ke aouli

Hana mai ka uwila i kona mana

Ahuwale Mikahala a e ku ana

Kilakila enoka ke ku mai

pailaka akamai i kau ike.

A he ui a he ninau ia

Owai keia halekukui o kalaupapa

e hoopakele ana i ke ola o na moku

he lohe pepeiao wale no kou akahi a ikemaka i kona nani

i ka huila makeneki e ninau ana

malamalama ka hikina me ka komohana

Ahuwale kalawao me kalaupapa

haina ia ka puana

o ka halekukui o kalaupapa

e kala mai ua pahee loa aku la e aho nae hoi ia mikomiko iho a mea aku la au i kou mau hoa ua nui maoli na pomaikai i loaa ia kakou i keia la i ka loaa ana he manawa e ike ai i keia mau mea i lohe wale ia ai a ua ikemaka i na mea oiaio a ke kaena nei au o keia ka oi ma ka maemae o kona malamaia ana aole no i pau iho ma ia wahi aia na aekai e hoike mai ana aia ma ia mau aekai na mea e pono ai keia ola honua ana a pela me na home o ka poe e malama nei i keia halekukui e kaulana nei i kona ikaika i kona hoolele ana i kona malamalama a ma ka mokou mea i ike iho ka ua nui loa ko makou mahalo i ka mea nana i pailaka ia makou iluna o keia halekukui.

Ua huli hoi mai la makou a ike mai la i na waapa e halihali ana i na malihini aia mau na ani hainaka anna ame ka haawi aku i ke aloha leo no lakou oiai na mea apau i kau mai ai iluna o ka moku a hui iho la me kuu kapena maikai a oiai na mea apau i kau mai ai i haalele iho ai ua wahi nene aukai nei i ka hora eha a oni mai la nomua.

Oiai na mea apau e walea ana iluna o ua wahi nene aukai nei aia na hunakai ke pehia mau la i kou papalina oiai ua hele kahi kino a luhi lala a lapuu iho la iluna o kahi punee o kou lilo aku la no ia me Anoipua, a puiwa ana i kahi pakini e hoala mai ana e hoopiha ia hanale oiai aia makou i kela manawa i ke kowa o molokai ame oahu a hui iho la me kuu kapena maikai a ninau aku la au i ka hora e ku ai i ke kaona, o ka hora 9 o keia po.

Ke nana la au i ka waiho mai a ke kai ame ka imoimo mai o ke kukui o makapuu a kaalo ana makou ia hanauma e kau hoolai mai ana o daimana hila ka hokua o ka ale ka i mamala honi ana i ka ea lipoa o waikiki ke nana mai oe i ka nani o ke kulanakauhale oiai na kukui e a ana he ui maoli no o kekahi mea i oi loa ai o ka nani o ia ke kea i kukuluia ai iluna o puowaina e ku mai ana me kona nani a na kukui uwila o na papu e hoolele pau ana i ko lakou malamalama iluna on a ahuwale na wahi apau o ua puu nei.

Kaalo ana ia waikiki a hone ana ka leo o ka hoe hele a kau hoolai mai ana kahi hoe apiki a kaalo ae la ka hale kukui o ke awa o kou o ka nee malie mai la no ia o ua wahi nene nei a pili ana i ka uwapo me ka maikai.

Oiai na mea apau e iho ana no ka uwapo, lululima pumehana iho la au me kuu kapena maikai oiai o ka manawa i haiia ua kulike me kana i olelo mai ai ia hora a hui iho la me kau lele oiai e kali ae ana ua hele a naha ka puuwai a hoi mai la me ka piha i ka hauoli aole mau keia ahiki hou i ka home.

Ke hoomaikai ae nei au i na komite ola imua o ke akua i ko lakou ae oluolu ana mai iau no keia huakai a ke haawi aku nei au i kau mau hoomaikai i ka lunanui nana e malama nei ia kalaupapa ame kalawao me na makamaka i launa mai ai i kela la poina ole ame na mea e pono ai keia kino o kau leo pule e kiai mai ke akua ia oukou a ia kakou apau ma o kona mana la. 

 

KA BILA NOI LIMAHANA I KA AHAOLELO LAHUI

E hooholoia e ka ahaolelo o ke teritore o hawaii:

pauku 1. he komisina a e ikeia ke komisina limahana o hawaii a maloko o ia ekolu mau hoa a e hookohuia aku lakou e ke kiaaina elike me ia i hoikakaia maloko o ke kanawai kumu ma keia ke hookumuia nei. O kekahi o na hoa i oleloia ae la e hookohuia aku oia ma ke ano he lunahoomalu no ke komisina i oleloia.

Pauku 2. E holo aku ke komisina i oleloia e like me ka hikiwawe e loaa ana mahope o ka hooholoia ana o keia kanawai i wakinekona d.c. a malaila e kokua aku ai i ka elele i ka ahaolelo lahui mai hawaii aku nei ma ka waiho ana aku mamua o ka ahaolelo i na hana i hoakakaia maloko o ka olelo hooholo i apono like ia e keia kau ahaolelo o hawaii a ma ke noi ana aku hoi i ka ahaolelo lahui i ke kupono ole o ka hooholo koke ia mai o ke kanawai e lilo ai i mea hoola ae i na kulana kuhaiki i hoakakaia maloko o ka olelo hooholo i oleloia.

Pauku 3. O ka huina o umikumamalima kaukani ($15,000) a i ole elike paha me ia ka nui elike me ia e ikeia ana ke kupono ma keia ke hookaawaleia nei mailoko ae o na lona laula o ke tertore no ka uku ana aku i na hoolilo o ke komisina i oleloia ae lailoko o kona manawa e kaawale aku ai mai ke teritore aku a o ia hiina e hooliloia mai na bila kikoo aku i aponoia e ka lunahoomalu o ke komisina i oleloia. O na hoolilo e ae o ke komisina i oleloia aole e kaupalenaia ma muli o na manao o ka olelo hooholo hui helu 3 o ke kau o 1917 o ka aha olelo o Hawaii. Pauku 4. E mana keia kanawai ma kona aponoia ana.

NA LETA I KII OLE IA MAI AHIKI I KA LA 16 O APERILA, 1921

Hakuole, Mrs Annie                kamau, mrs louise

Huli, john                    kamaka, mrs joe kauhi

kaihiuli, fred                kanakaole, grant

kaohiai, john               kapahu, mrs kaniela

kawai, helen e             kealaa, frank

kohananui, joe                        kekuewa, henry

kahawai, miss rachel               joe, mrs kealoha

makalia, mrs eliza                    kua, fitz

kaleohana, gus             lainana, mrs jas

kalauawa, mrs kekiokalani                  mika, henrietta

kalua, john                  makolo, mary w

kaleohana, gus             maluae, joseph

kaluakini, mrs julia                  namakelua, joseph

kali (w), mrs keopuolani                      naope, mrs maria

kalaluhi, mitchell                     nakapaahu, miss amelia

paa, jk

panaewa, stella

E ninau i na leka hoolahaia ke kii mai.

HE MANAO HAUOLI AME KA OLIOLI

E mr. lunahooponopono o ka nupepa kuokoa e aloha kaua a nui loa: e oluolu mai hoi oe nou kekahi kolamu o ka nupepa kuokoa no kela poomanao e kau ae la maluna.

Ma ka nupepa hoku au i ike iho ai i ka hoolaha a c.m. kamakawiwoole i ka nui o kana mau moopuna a ua hiki aku no ia ma kahi o ke 40 a koe aku hoi na keiki.

ea, ma keia ike ana iho o'u nnui kou hauoli ame ka olioli i keia hoolaupa i a hooulu lahui a in a paha elike oe me lokaba in a paha he oi kelakela loa aku oe o ka heke o ka puka uwahi. i nui ke aho a oi aku mamua o iseaela (iakoha). oiai, he 66 wale no lakou mai kona puhaka aku; a eia no kaua i ka ehu kakahiaka aole no i olomana a ike hou aku no i na moopuna a ua keiki ame na moopuna a na moopuna.

Ina owau kekahi lunamakaainana o keia kau ahaolelo in a ua noi koke au i ka ahaolelo e uku hoomau ia oe no na kumu: 1 hoolaupai a hooulu i ka lahui oiai o ka ulu o ka lahui ka mea e ikaika ai ke aupuni a e nui ai ka waiwai; 2, ua ike au i ka nui o kou mau makahiki ua hiki aku ma kahi o 71 aole anei hoi e hanai i kanawai no ka poe i hiki aku ko lakou makahiki i ke 70 a e uku hoomau ia lakou nia o ka uku kupon elike me na uku hoomau e ukuia mai nei i ka poe noho loihi i na oihana a ukuia aku la ka laukou mau wahine a ukuia aku la ka poe noho loihi ma ka oihana ame na hoopiipii uku oihana?

Lulu i ka makani ohi i ka puahiohio. Ke makemake nei au e hooloihiia ko olua mau la me kou mama a oi aku ka olua mau hua mamua o iakoba i ko olua wa e ola nei. No laila, ke nonoi nei au i ka makua mana loa e hooloihi i ko olua mau makahiki a elemakule a luahine kolopupu kanikoo palalauhala, haumakaiole a kaikoko o kau ola ia e iehova.

Pela pu oe me ka olua mau keiki maikai ame na moopuna aloha.

Me na keiki hoonohohua kuu welina, a o kuu aloha nui pau ole me ka lunahooponopono.

Owau no me ke aloha,

Z.P. KALOKUOKAMAILE

Napoopoo, Kona Hawaii.

HE HANA ANO HAAAHAA

I ka nupepa kuokoa e oluolu mai i kekahi kowa kaawale o kou mau kolamu no kau wahi ukana e hooili aku nei na kou ahonui hoi ia e waiho aku imua o kou poe heluhelu a he wahi meahou ano hookaumaha no hoi ma kekahi ano, a kou meakakau no hoi i manao ole ai e hanaia ana ia ano hana hoohaahaa iloko o ko kakou hale kaukanawai.

I ka poaono i hala aku nei a mahope iho hoi o ka noonooia ana o ka olelo hooholo pili i ka bila hoopulapula hou o na hawaii, ua ulu ae la he wahi hoopaapaa liilii mawaena o kekahi mau hoa hanohano o ka hale o na lunamakaainana a he mau olelo no hoi i manaoia aole la e alakai aku ana i ka nui loa.

I ka manawa e kamailio ana ka lunamakaainana pukiki o maui imua o ka lunamakaainana norman k. laimana o hilo no ka mea pili i kana mau kue me ke kokua pu no hoi i kekahi mau mea pili i kela olelo hooholo, ame ka bila kanawai i kakui pu ia mai me kela olelo hooholo i ka ahaolelo o amerika ua komo pu aku la kekahi hoa o ka ahaolelo oia hoi ka loio christy o ka apana eha o ka mokupuni o oahu a mamuli paha o ke ano huhu o kela lunamakaainana o hawaii hikina ua pane ano kikoola mai la oia i keia loio opio a e kapa ana hoi ma ka olelo haole "he loui shyster" (loio aihemu), a ua panai aku la no hoi o loio christy ma ka olelo ana aku ia norman k. laimana "e hele i ka luaahi" a me ke komo no o ko christy mau lima iloko o ka pakeke o kona lolewawae a makaukau ole hoi no ka hakaka ua lele kapo mai la o laimana a puiki i ka puanai o cristy a kui aku la ma kona papaauwae a ua loaa ka eha ia christy ma ka hai ana o kekahi niho a i oaa hoi kela poino iaia mamuli o keia kui kimo po a kona hoa lunamakaainana a mamua o ka hiki hou ana ia laimana e hookauhou aku i kekahi hoopai maluna o kona hoa o ka aha olelo ua loaa mai la oia ia hon.wm. wannatta o hamakua a hukiia aku la mai kona paa ana i ka ai o hon. a. m. christy ame ka hoopuka aku o vanatta i keia mau olelo "e hoopau oe i ka hana".

Ua lilo keia hana kui malu a laimana i kona hoa o ka ahaolelo i mea hoopiha loa i ka manao o ka lunamakaainana pukiki o maui i ka huhu a ua olelo aku oia ia laimana i ke anohohewale o kela hana a o ka mea kupono ana e kui mai ai oia no kela lunamakaainana pukiki oiai nana hoi i hoala kela mau kamailio ana mamua iki iho aka aole o laimana i aa e lawelawe lima mai me ka mea i makaukau e pale nona iho.

Ua hoomaopopo koke no paha o laimana i ka hewa o kana i hana hoohaahaa ai i kona hoa hanohano o ka hale a ua mihi koke mai la oiai nae e kahe ana ke koko o ka waha o hon. a. m. cristy a mamuli no hoi o ke ano keonimana o ka mea hoehaia ua huikala aku la oia i ka mea kui iaia a lululima ae la lana.

Ua lilo nae keia hana ano hoohaahaa a laimana i mea hoowahawahaia a ua nui ka poe i apono ole i keia hana a laimana maluna o kona hoa hanohano o ka hale.

Ua hoikeia ae la e kekahi poe he hana maamau no ka keia i keia hoa hanohano o hawaii hikina he wikiwiki loa kona lima i ke kui malu i kana mea e huhu ai a o ke kahu ka kekahi o haiki i kui malu ia no e keia laimana a o kekahi haole lunahooponopono o kekahi nupepa o hilo a i noho lunakula nui iho nei no ke teritore o hawaii oia hoi o h.w. kini a ua kuiia no oia me ke kau no o na makaniani i kona maka a o ka loio rolina no ka kekahi i loaa pu keia haawina i hanaia iho la maluna o hon. a.m. cristy.

Ma ka manao o ka meakakau i keia mea aole loa he hana hanohano na kekahi kauwa o ka lehulehu ka hoao ana e hoohana i keia ano hana a haalele hoi i ka paoo ana ma ka leo. he hana hoowahawaha loa ia ke kui malu me ka makaukau ole o ka hoa hakaka a ua lilo keia hana ano hoohaahaa i mea ahewa nui ia e na hoa e ae o ka ahaolelo no keia hana ano hohewale.

iolani palace.

Ko makou pokii aloha ua hala.

Mr. Solomon hanohano aloha kakou: ke noi aloha aku nei i kou oluolu no kauwahi rumi kaawale o ke kuokoa nno ka makou poomanao o kau ae la maluna i ike mai ai na ohana he nui, na hoaloha me na makamaka mai hawaii, moku o keawe ahiki aku ii kaui o mana o levi kaalouahi ua hala.

Ma ke kakahiaka sabati, aperila 3, 1921 hora 10:30, i pauaho mai ai ko makou pokii aloha i keia ola ana. Ua waiho iho mahope nei i ka ukana luuluu o ke aloha na ka ohana na hoaloha ame na makamaka he nui e u ana nona. Ua hala mua aku ko makou mama aloha ma kela ao no na mahina he eiwa ilalo a uhai aku la no ke keiki mahope o kona meheu. Walohia wale!

Ua hanauia ko makou pokii, lei kaalouahi mai ka puhaka mai o lono (w) ame john kaalouiahi (k) nia halawa molokai i iulai 4, 1894; ua piha iaia na makahiki he 26, me na mahina he eiwa o ka hanu ana i na ea huihui o keia oia ana.

Ua hoonaauaoia oia ma ka halekula o halwa, e noho aoia ana e na kumu kula peter pascal, matthew h. kane, sol. fuller, emma kane ame david kalaau puka mai halawa mai hoi no ke kula nui o lahainaluna, a malaila oia i hoonaauao hou ia ai a ua puka pono mai oia me ka loaa pu mai o kona palapala hoomaikai mai ka lakou kumupoo mai mr. mcdonald.

Aole malaila pau kona huli ana i ka naauao aka ua hoi mai oia ma honolulu nei a komo aku la i ke kula o mckinely high, a mamuli o ka ohiia ana o ka poe no ke koa pela i kaawale mai ai o levi kaalouahi mai ke kula mai o mckinley high, me ka minamina nui no makou pokii hele loa. He paahana no ia no na hana a ko kakou makua lani no na makahiki lehulehu.

O ko makou pokii aloha he keiki aloha makua oia a pela no i ka ohana apau.

Ua kaa mai ia e ko makou pokii aloha no na mahina loihi a ua imiia no hoi kona ola ma ke ike a na kauka o ko keia ao a oi loa aku ma ka mana hoola nui o ko kakou haku aloha ma ka lani, aka, elike me kana i palapala ai ma buke nui he mahu ke ola o ke kanaka i pua ae a nalu aku pela io no ua hiki io mai no ka wanana a ke akua elike me ia i palapalaia e hoi ka lepo i ka lepo a o ka uhana e hoi no ia i ka mea nana i hana.

E ka aina hanau o ko makou pokii hele loa ame na ohana na makamaka na hoaloha o ka wai kaulana o moaula ia wai kilihune i na pali wai huikoni i ka ili ua pau ko oukou ike ana ame ka hoopulu ana i ka papalina o levi, ua nalo aku oia no ka wa mau loa.

E na kula sabati kaulana mai halawa a ke onehanau o ko makou pokii aloha ahiki aku i kalaiakamanu, ua pau ko levi kaalouahi kaahele pu ana me oukou ka papa himeni nana i hooni aku mai hawaii nei apuni ke ao holookoa. he mea ole ka loa ka piina ame ka ihona i ka pekiwawaeia e ko makou pokii na haumana kula sabati ame ko makou papa aloha, no ka ke akua hana.

Ua pau ko levi hana pu ana me oukou ua pau ka auwe ana i na ehaeha ua kuu ka luhi ua hele aku oia i ke alahele no na mea apau. Aloha wale! na ke akua ka makua lani e hoomama mai i na kaumaha ame na luuluu i kau iho maluna o makou apau. o makou iho no me ka haahaa.

MIKALA PERIRA,

VINCENT PEREIRA,

SAM KAALOUAHI,

ELIZA KAALOUAHI

LOUSA KAALOUAHI

Redding, cal. apr. 15- Ua waihoia aku mamua o ka loio kuhina i keia la he hoopii e olelo ana he ilikini nona ka inoa o wm. taylor a i loaa i ka mai komlapoki ua kanu olaia aku oia ma ke ilina hat greek elua ule i hala aku neim no ka ninaninau a noii pono ana aku i ka mea oiaio.

Mr. lunahooponopono o ke kuokoa aloha oe: e oluolu mai kou ahonui i kekahi wahi kaawale o ke kuokoa i kela puolo waimaka o ke aloha e kau ae la maluna i ike mai ai na kini makamaka na hoaloha o kuu kane i haalele mai i keia ola ana a niau palanehe aku la ma kela aoao o ka muliwai eleele o ka make: hehe i ke ala hoi ole mai haalele iho la iau me ka leialoha a mana a he moopuna a ko iho la ka olelo a ka buke bui, e hoi no ka lepo i ka lepo no ka mea mai ka lepo mai no oe.

Make kuu kane aloha i ka la 3 o maraki 1921 o ia hoi o maua wale no me ka mama o kuu kane aloha ame ka aunty o maua.

Make oia i ka hora 5. pm o ka poaha.

Ua hanauia o john alapai akiu ma makapala kohala ma ka la 115 o ianuari 1878 mai ka puhaka mai o kona mama kauhiokekailimoku ame kona mama kauhiokekailimoku ame kona papa akiu; ua hala mua no kona papa i kona wa uuku loa a ua piho hoi iaia na makahiki he 43 ame elua mahina ame na la keu o kona hanu ana i na ea huihui o keia ola honua ana. Aloha no kuu kane!

Ua homailo no ka mai maluna o ku kane mahope mai o ka makahiki hou a moe aku la. Auwe no hoi ka minamina e!

Ua hoohuiia maua ma ka berita maemae o ka mare i ka la 12 o februari a moe aku la kona kino no ka wa mau loa a waiho iho la iau me ka leialoha a maua e u aku nona ma keia ao. Auwe ka mea luuluu e!

Me ka luuluu kaumaha au e hoomanao nei no kuu kane i haalele mai; aloha ia home a maua i walea ai aloha kuu kane i ka wai awili pu ame ke kai.

E maunalua, e pau kou ike hou ana i kuu kane e hele ana ma kou wahi aloha kuu kane i ke one o koko; ua pau kona hele ana ma ua kai; akahi hoi au a ike i ka hana a ke aloha ke hana mao ole nei i kuu kino ua pau ka aka ana o kuu kane i ka lehua o manoa alohana kuu kane i ka ua o manoa ua pau kau ike ana ia aina a ka nani; kuu kane i ka huikaulua o ke kaona!

Aloha kuu kane i na pali o nuuanu. E koko e ua ike paha oe i kuu aloha aia aku nei paha me haina ka wahina lewa i ke kai hoi ke aloha no ke kaona wehi a ke uakukalahale kiina ka mailelaulii i ka uka na ka ua lililehua o palolo i lei punahele no kuu kane aloha.

He aloha nuuanu i ka makani wehe lau kawela o lanihuli me ka ua waahila i na palu ame ka mahalo i ou mau hoahanau iloko o ka hui poola o na wahine ame na kaikunane.

Nolaila, ke haawi aku nei au i na hoomaikai a nui loa i na makamaka na hoaloha na hoahanau i komo pu mai a haawi i ka lakou mau kokua nui iau o ia hoi na boke pua mai kela ame keia naau i puha i ke aloha.

Eia na inoa o ka poe malalo nei: silva parlors, mrs. kaaheakeo kilawa, wm. kepano jr., mrs. maggie kepano kr, mr. ame mrs kepano se mr. w. p. weisbarth, mr. ame mrs. r. k. marek, mr. g. makalena, mr. r. k. marek, mr. g. makalena, mr. ame mrs kawaihoa, mrs. nani ahikong, mrs lily kong kau, mrs annie kama, na boke pua keia o na hoaloha o kuu kane a na ke akua e kokua mai a e haawi mai i na mea maikai a nui maluna iho o oukou a pela pu no hoi me au me ke aloha.

Owau iho no me ka haahaa

MRS. JOHN ALAPAI AKIU.

HE HOOMAIKAI.

Mr. solomon hanohano lunahooponopono o ke kuokoa aloha kakou: e oluolu oe e hookomo iho ma kekahi rumi kaawale o kau pepa i keia poo manao e kau ae la maluna.

Ke haawi aku nei ka ohana o levi kaalouahi o ka mea i make i na hoomaikai palena ole i na ohana, no hoaloha na makamakaa me na hoahanau o ka ekalesia o kalihiwaena i komo pu mai me no ohana o ka mea i hala, e auamo pu ana i na luuluu pela i ka poe i haawi mai i ka lakou mau makana pua no ka hoohiwahiwe ana i kona kino wailua me ke ala pu ana me makou a pela pu no hoi ma kona anaina hoolewa no kona lua kupapau.

Maluna ae o na mea apau na ke akua e hoopomaikai mai ia oukou apau.

I ka lunahooponopono o ke kuokoa ame na keiki o kou papapai ko makou adieu.

O makou iho no me ka haahaa,

KA OHANA.

HOOLAHA KUAI O NA HOOLIMALIMA AUPUNI

Ma ka hola 1:30 p.m. Poalua, Mei 31, 1921, ma ke kaona o ka hope akena mr g.w. sahr, lihue, kauai, malailo o kuaiia aku ai ma ke kuala akea i ka mea koho kiekie loa malalo o ka pauku 380 o na kanawai hooponopono hou ia o hawaii 1915, na hoolimalima laula o na aina aupun i hoakakaia malalo iho nei:

1. aina ma kapaa i keia ma ke ano kapaa camp a apana halelio, kapaa, puna, kauai, nona ka iliaina o 3953 eka, oi aku a emi mai paha; manawa o ka hoolimalima 10 makahiki mai sepatemaba 17, 1921 aku; uku hoolimalima haahaa, $100 o ka makahiki e uku hapa makahiki mua ia.

2. Apana helu 4, na apna o anahola, koolau, kauai, nona ka iliaina o 197 eka oi aku a emi mai paha; manawa o ka hoolimalima 10 makahiki mai sepatemaba 25, 1921 aku; uku hoolimalima haahaa $40.00 o ka makahiki e uku hapa makahiki mua ia.

3. apana helo 20, na apana o anahola, koolau, kauai nona ka iliaina o 31/100 eka oi aku a emi mai paha; manawa o ka hoolimalima 10 makahiki mai sepatemba 25, 1921 aku; uku hoolimalima haahaa $20.00 o ka makahiki e uku hapa makahiki mua ia.

4. apana helu 22 na apana o anahola, koolau, kauai, nona ka iliaina o 1.7 eka oi aku a emi mai paha manawa o ka hoolimalima 10 makahiki mai sepatemaba 25, 1921 aku; uku hoolimalima haahaa $20.000 o ka makahiki e uku hapa makahiki mua ia.

5. apana helu 53 na apana o anahola, koolau, kauai nona ka iliaina o 88/100 eka, oi aku a emi mai paha manawa o ka hoolimalima, 10 makahiki mai sepatemaba 25, 192 laku; uku hoolialima hahaa, $20.00 o ka makahiki e uku hapa makahiki mua ia.

6. apana helu 54, na apana o anahola, koolau, kauai, nona ka iliaina o 1.2 eka oi aku a emi mai paha; manawa o ka hoolimalima, 10 makahiki mai sepatemaba 25, 1921 aku; uku hoolimalima haahaa $20. 00 o ka makahiki, e uku hapap makahiki mua ia.

7. apana helu 55, na apana o anahola, koolau, kauai, nona ka iliaina o 1.85 eka, oi aku a emi mai paha; manawa o ka hoolimalima, 10 makahiki mai sepatemaba 25, 1921 aku; uku hoolimalima haahaa $25.00 o ka makahiki e uku hapa makahiki mua ia.

8. 7. apana helu 56, na apana o anahola, koolau, kauai, nona ka iliaina o 2.48 eka, oi aku a emi mai paha; manawa o ka hoolimalima, 10 makahiki mai sepatemaba 25, 1921 aku; uku hoolimalima haahaa $30.00 o ka makahiki e uku hapa makahiki mua ia.

9. apana helu 57, na apana o anahola, koolau, kauai, nona ka iliaina o 2.06 eka, oi aku a emi mai paha; manawa o ka hoolimalima, 10 makahiki mai sepatemaba 19, 1921 aku; uku hoolimalima haahaa $30.00 o ka makahiki e uku hapa makahiki mua ia.

E uku ka poe e lilo ai i ka hoolimalima o na mahina mua eono ma ka haule ana o ka hamare.

Na ka põe e lilo ai e uku i na lilo o ka hoolaha ana ame kekahi mau kaki e ae e pili ana me ka hoomakaukau ana i keia mau hoolimalima.

E kaa aku no ke kuai o na hoolima lima maluna ae malalo o ka hoolimalima aupuni laula i hoopukaia e ke keena o ke komisina o na aina aupuni.

No na kii palapala aina, ke ano o ka hoolimalima laula, ame na hoakaka aku i koe e noi ae ma ke keena e ka hope-akena, mr. g.w. sahr, lihua, kauai a i ole ma ke keena o ke komisina o na aina aupuni, hale kapitala, honolulu t.h.

C.T. BAILEY

Komisina o na aina aupuni. Hanaia ma honolulu; aperila 23, 1921. 6449-apr. 29; mei 6.

HOOLAHA A KA LUNAHOOPONOPONO O KA WAIWAI O WILLIAM PUKO MAUWALE.

E ike ananei na mea apau, ma ka la 31 o Maraki, 1921, ua hookuuia mai ka mea nona ka inoa malalo iho nei e ka mea hanohano jas j. banks, lunahi i lunahooponopono no ka waiwai ohi i lunahooponopono ka waiwai o william puko mauwale i make kauoha ole o honolulu, mokupuni o oahu.

Nolaila, o ka poe apau a ka mea i make i aie ai e waiho mai i ka lakou mau kou ame na hooiaio iloko o na mahina ekolu mai ka puka mua ana maka nupepa kuokoa a in a aole pela alaila aole e aeia a o ka poe he mau aie ko lakou i ka mea i make e uku mai i ka mea nona ka inoa malalo ihe; o na koi ana apau ame na hookaa ana, e hoouna iau ma kou wahi noho ma ka helu 1233 bacle lane, honoluluu.

MRS. HANNAH THORNTON

Lunahooponopono o ka waiwai o william puko mauwale i make.

6446-apr. 8, 15, 22, 29.

I O Marata Furniture Store

(Na noho hoolimalima me lako pa maanei.) Na lako hale hou me kahiko

Hoolimalima me kuei hoolilo. 715 alanui hema honolulu t.h. kelepona 1695.

HOOLAHA I KA POE LAWE WAI PAAMAU.

O na hora kikiwai mai ka hora 6 am a 8 am o kela me keia 4 pm a 6pm la. o ke ku eia o ka rula maluna ae e lilo no ia i kumu e nele ai i ka wai me ka hoolaha hou ole ia aku, a aole e hoolako hou ole ia aku a aole e holako hou ia ahiki i ka uku ana mai i ke kaki mau o $5.00.

W.A. WALL

Lunanui Laula, Keena Oihana wai me sua.

6448-apr. 23, 30; mei 6, 13.

Ua Hoea Mai ka manawa

aole e kamailio no ke kapiki ame na moi aka no ke kuai ana i kela paalle hou au i noonoo nui ai. eia me makou ka paalole au i makemake ai kau kumukaui i makemake ai a ua hiki ia oe ke wehe i MOOHELU AIE.

The Model Clothiers

"Ka halekuai hoemi hoolilo"

ALANUI PAPU

Makoi o ka halepule kakolika

HOOLAHA AKEA O KE KUAI O NA AINA AUPUNI MA HONOKOWAI, LAHAINA, MAUI

Ma keia ke haawiia aku nei ka hoo laha akea ma ka poalua ka la 31 mei 1921, ma ka hola 10 am ma ka puka komo mamua o ka hale kapitala honolulu, T.H.,malaila e kuai hoolilo ia aku ai ma ke kudala akea i ka makoho kiekie loa, mamuli o ka manao ka pauku 358 o na kanawai hooponopono hou ia hawaii o 1915 ka hapa o na aina aupuni ma honokawai lahaina, maui no ke kahua luawai hoo kio paamau ka pono alahele auwae ame na pono alahela o na hana laiana paipu, elike me ia malalo iho nei:

1. Ka aina no ka kahua kuawai hookio nona ka iliaina oi aku a emi mai paha o …3.20 Ek.

2. Ka aina no ka pono alahele auwai, 20 kapuai ke akea mai ke kahua luawai hookio mai a i honokawai, mahinahina 1/4 pale aina nona ka ili oi aku a emi mai paha o …88 eka

3. Ka aina no ka pono alahele laina paipu, 16 kapuai akea moi ka palena akauhikina o ka L.C.A. 47 93 b apana 5 ia hanuna e ae aha i ke kahawai o honokawai ahiki i ke kahua luawai hookio nana ka iliaina oi aku a emi mai paha o …1.02 eka

Huina iliaina (oi aku a emi mai paha) …5.10 eka

O na aina i oleloia e kuaiia aku ana malalo o na kulana penei:

1. Ina e hooko ole ana ka mea e lilo ai ma kekahi manawa i ka hoohana ana i na aina i oleloia no ka kahua luawai hookio pono alabela auwai ame na pono alahele o na hana laina paipu e lilo no ke kuleana no ia mea i mea mana ole a e hohou ka aina i ae on a ia e ke teritore.

2. Ke hookoe nei ke teritore i ka pono iloko on a iho a e haawi aku ka poe okoa i ka pono ame ke kuleama o ka ai ana ame ka hoohana ana i na aina e kuai hooliloia aku ana me, a no na hawai na laina paipi, na laina uwila na alanui ua auwai ame kekahi mau pono ala hele, ame na hoohana ana e ikeia ana ka kupono. E hoohana ia no ka pono ma ka aoao o ke teritore ame ka poe e haawiia aku a ka pono e ae ma na aina i oleloia ma ke ano, e hoopilikia ole aku a i ka mea e lilo ai ma ka hoohana ana i na aina i oleloia no ka lua wai hookio ka pono alahele auwai ame na pono alahele o na hana laina paipu.

3. Na ka mea e lilo ai e uku i na hoolilo o ka hoolaha ana ame na hoolilo e ae e pili ana me ka hoomakaukau ana i ka palapala kuai. Kumu kuai haahaa: $ 2550.00.

Aelikie: Kuike.

No na kii palapala aina ame na hoakaka aku i koe e noi ae ma ke keena o ka hope akena mr. t.n. lyons, wailiki maui a i ole ma ke keena o ke komisina o na aina aupuni hale kapitala, honolulu, t.h.

C.T. BAILEY

Komisina o na aina aupuni. Hanaia ma honolulu, aperila 22, 1921.

6449-Apr. 29; mei 6.

HOOLAHA I KA POE PAA AIE O KA WATERHOUSE OFFICE OUTFITING COMPANY LTD HE HUI I HOOPAUIA

Mamuli o ka hookohuia ana mai o ka mea nona ka inoa malalo nei ma ke kauoha a delbert e. metzger esp., puuku o ke teritore o hawaii i hanaia ma ka la 22 o maraki, 1921, i kahu waiwai no ka poe paa kuleana ame ka poe paa aie o ka waterhouse office outfitting company, limited, he hui i hoopauis me ka mana puho e hooponopono i kana mau hana, i kulike me ke kanawai, nolaila ma keia ke haawiia aku nei ka hoolaha i ka poe apau he mau koi ka lakou i ka hui mua i oleloia e waiho mai ia koi i hooiaio pono ia, ma ke keena o ka mea nona ka inoa malalo nei, ma ke alanui bihopa, helu 1039 maloko o ka hale alexander young, maloko o honolulu, teritore o hawaii, ma, a i ole mamua ae o ka pau ana o na la he kanaiwa (90) mai ka la aku o keia hoolaha (o ia ka la mua o ka hoopuka ana aku maanei), a i ole pela, e hoole mau ia aku no.

Hanaia, Honolulu, T.H., Aperila 29, 1921.

J.O. YOUNG

Kahu Waiwai no ka poe paa ai ame ka poe paa kuleana o ka hui i hoopauia i oleloia ae la.

6449 Apr. 29; Mei 6, 12, 20, 27.