Ka Nupepa Kuokoa, Volume LIX, Number 25, 24 June 1921 — Page 2

Ka Nupepa Kuokoa

KE KILOHANA POOKELA NO KA LAHUI HAWAII.

 

 

NA HANA A KA PAPA O NA LUNAKIAI.

 

            I kulike me kekahi olelo hooholo i hooholoia e ka halawai a ka papa o na lunakikai kulanakauhale o ka noho ana ma ka po Poalua nei a i kauohaio aku hoi ke kakauolelo kulanakauhale no ka hooko ana aku ia hana, e kaheaia mai ana na kohokoho ana a ka poe lawe aelike no ka hana ana i kekaho hale hoahu i’o bipi nui me ka hoolakoia me ka hau maloko o ka makeke kulanakauhale ma nei mua koke iho i mea e hiki ai i ke aupuni kulanakauhale ke kuai i ka i’o bipi ma ke kuai kukaa a hoahu aku maloko o ia hale a kuai aku ia i’o bipi i ka poe kuai liilii ma ka makeke.

            O kela hale hoahu i’o bipi i hoolalaia he mea pili ia i kekahi aelike i hanaia na ka aina hanai holoholona a Raymond e hoolako mai i ka bipi mai ka 20 a ka 100 poo o ka mahina, a e loaa hoi i ke aupuni kulanakauhale 5 pakeneta uku komisina.

            Ua ku-e Paeheeo i keia ano hana mamuli o kona manao aole e hoopomaikai wale aku ana no i ka poe kuai liilii, ka poe e kuai aku ana ma ia kumukuai like elike me ka na hui mawaho, oiai e kuai ana me ka emi loa. Hoakaka mai ka Meia he mea hiki keia pilikia ke hoopauia ma o ka hana ana i kekahi aelike me ka poe e hoolimalima ana i na pakaukau, ma o ka hookau ana aku i ka lakou mau kumukuai elike me ia i hoakakaia ma ka rula e hooponopono ana i ke kumukuai. Hoakaka mai ka Lunakiai Low aole keia hana he mea hoopomaikai wale aku no i ka poe e kuai mai ana, aka e koaa pu ana kekahi pomaikai i ke aupuni kulanakauhale ia manawa hookahi, elike me ka heluna ame ke ano o ka bipi e aiia mai ana e ka poe kuai, ma ke koho haahaa ana aia ma kahi o ke 330 poo bipi i ka mahina, a he loaa hoi no ke aupuni kulanakauhale aneane ma kahi o ka $100 o ka mahina. Wahi a Lunakiai Low ua ae mai o Mr. Raymond e hoolako ma i i ke aupuni kulanakauhale i na i’o bipi helu ekahi wale no a he hiohiona maikai ia e nana aku ai no ka hoolako ana aku i ka poe e makemake mai ana ia i ka i’o bipi me ke kumukuai kupono. Ua aponoia ka olelo hooholo.

            O ka bila haawina o $433,410 no na hoolilo o ka hapaha mai Iulai 1 a Sepatemaba 30, ua hooholoia ma ka heluhelu eluaia ana me na hoololi, oia hoi he $250 ke emi iho malalo o ia huina. He hoemi keia i laweia mai ke keena mai o ka akena nana e kuai i na lako no ke aupuni kulanakauhale.

            O ka olelo hooholo a Kumalae no ka hookaawale ana i ka huina o $2,987 no kekahi paipuwai nui eono iniha ame ona kiwai no ke alanui Nakuina, Kalihi, ua waihoia i ke komie waiwai.

            O na olelo hooholo e hookaawale ana i $5000 no ke alanui holopuni Kamehameha ame ka $10,000 no ke alanui Waimanalo, ua holo ma ka heluhelu ekoluia ana.

 

HOOLE O HELENE I KA HOOPAU ANA I KE KAUA ME TUREKE

 

            Ahea la loaa ka maluhia i na aupuni o Europa?  He ninau pohihihi keia. Ma ka nuhou mai na aina e mai e hoakaka ia ana malalo nei ke hoomau mai la no o Helene i ke kaua ana me Tureke me ka hoole pu o Helene i ka hoolohe mai i ka mauao o na Aupuni Huiia o ke noi ana aku iaia e hookaulua iki kana lele kaua ana aku maluna o Tureke no kekahi manawa.

           

LONDON, Iune 20.-Ma ka hoakaka a ka mea kakau meahou o ka Nupepa Daily Mail, elike me ka lono oiaio i loaa aku iaia mai na luna aupuni aku, ua paa ko Helene manao aole e apono i na manao a na Aupuni Huiia i hoolala aku ai iaia e hookaulua i kana lele kaua anan aku makuna o na pualikoa a ka aoao lahui Tureke.

 

HOOKOHUIA ELUA MAU LUNAKANAWAI APANA HOU.

 

            O James von Ekekela ka i hookohuia aku e ka Lunakanawai Kiekie Jas. L Coke i lunakanawai apana no ka apana o Kawaihau, Kauai, no ke pani ana ma kahi o ka Lunakanawai E. Puuki i waiho mai i ka hana, a i haawiia ai hoi he uku hoomau nona e ka ahaokelo i hala aku nei.

 

KUU KAUKUNANE ALOHA, KEOLANUI KALOLOUKIA, UA HALA

(picture below)

KEOLANUI KALOLOULIA.

 

            I ka lunahooponopono o ka Nupepa Kuokoa, Mr. Solomon Hanohano, Aloha oe;--E oluolu oe e haawi mai i kekahi wahi kaawale o na kolamu o ka hiwahiwa a ka lahui no kaho poomanao e kau ae la maluna i ike mai ai hoi na kini makamaka ame na hoaloha he lehulehu e noho mai la mai Hawaii moku nui o Keawe, ahiki aku i Kauai o Manokalanipo, ua haalele mai kuu kaukunane aloha Keolanui Kaloloulia i keia ola ana maloko o ka Haukipila Moiwahine ma ka auinala o ka Poalima, Iune 13, 1921. mahope iho o ka hoomailo ana a ka ma’i maluna ona no hookahi makahiki a oi mamuli o kekahi eha iloko o kona opu no kekahi puu, elike me ka hoike a na kauka. Mamuli o ka nui o ka eha i loaa iaia i hoi aku ai oia noloko o ka halema’i Moiwahine no ke okiia ana mai, a mamuli o ia okiia ana e ke kauka me ka holopono ole i pauaho koke mai ai oia i keia ola ana.

Ua hanauaia oia ma Kapalama-kai, Honolulu, Oahu, ma ka la 22 o Mei, 1884, nolaila, iaia i moe aku la ua piha iaia na makahiki he kanakolu-kumamahiku, hookahi pule ame na la keu o ka hanu ana i na ea huihui o keia ole honua ana. Aloha wale!

            Ua hanauia mai makou mailoko mai o ka puhaka o Luka ko makou luaui makuahine a o Kaloloulia ko makou makuakane; ua lawe aku ka po i ko makou nui a koe makou e ola nei, elua maua kaikuahine ame ko maua pokii kaikunane; ua hala e no ma kela ao ko makou papa ame ko makou mama. Ua mare mua o Keolanui Kaloloulia i ka wahine a ua loaa ia laua he mau keiki lehulehu eia nae, ua pau loa no lakou i ka make, a iaia i hala aku la ua haalele iho oia mahope nei e kania-a mau aku nona he mau kaikuahine elua, kona pokii, kana wahine ame ka nui ohana me ka hoomanao poina ole mau aku iaia.

            Ua pau kana hana ma keia ao, ua kuu aku la kona luhi, ua pau ka ike ana i na ehaeha ame na auwe. O ke alahele ana i hele aku la he hopena loaa ia ke ukaliia aku e na mea apau, a ke hoomaikai ae nei au i ka Makua lano a no ka mea, Nana no i haawi mai a Nana no i lawe aaku la, a ke kalokalo pu ae nei no au Nana no e hoomama mai i na u ame na kaumaha a e holoi ae hoi i na waimaka mai ka ohana ae i hoo luuluuia. luuluu wale!

            Ke haawi aku nei ka ohana apau o ka mea i haalele mai la i keia ola ana i ak lakou hoomaikai kiekie palena ole i ka poe apau i haawi mai ika lakou mau kokua, oiai makou iloko o ka luuluu ame ke kaumaha, a pela hoi i ka poe apau i ala pu me makou no ke ku kiai ana ikona kino, a pela hoi i na makamaka ame na hoaloha i haawi mai i ka lakou mau makana pua nani no ka hoohiwahiwa ana iho i ke kino o ka makou mea aloha, a pela me ka poe na lakou i eli i ka lua ame ka poe i komo pu mai ma ka huakai hoolewa, a i na makua uhane hoi no ko laua hoomaikai hope ana iho i ke kino o ka makou mea aloha maloko o ko makou home a ma ka lua ka home o ke kino lepo. Ke nonoi aku nei makou ia oukoou apau e lawe aku i ka makou mau hoomaikai a na ka Makua lani e haawi mai i na hoomaikai oi ae,

            Ke haawi pu aku nei makou i na hoomaikai i ka Lunahooponopono no ka ae ana mai i kowa maloko o ke Kuokoa no keia kanaenae.

            Na makou no me na manao kaumaha

                        PAUL HELELA,

                        MRS. LUKA NUI,

                        MISS HATTIE AKAU,

 

 

HOLO KAAPUNI O MRS. JOSEPH FERN ME KANA MAU LEI.

 

            Mr. S. Hanohano, Lunahooponopono o ke Kuokoa, Aloha oe: -E oluolu mai kou ahonui i kekahi wahi kaawale o ka kaua milimili elike me kela e kau ae la maluna.

            Ua holo aku au i Honolulu ma ka la 28 o Mei, no ke kaupua ma ka la 30. Aole au i hui me kuu auntie, Mrs Joseph Fern, a pau ka la kaupua, ua hala oia i Koolau ma ia la no, mahope o ke kau pua ana; aia no au me kuu unele, Henry Fern kahi i noho ai; ua kelepona au i kahi o R. Kaihue e niuau, o ka pane i loaa mai ua hala i Koolau aka ua kono mai no o Mrs. Kaaihue ia’u e iho aku i Kalia, ua hele no au ilaila.

            Ua hookipa aku o Mr. ame Mrs. Kaaihue ia’u elike me ka laua keiki ponoi, e poina ole ai ia’u i keia manawa.

            Kakahiaka Poalua, Mei 31, kani ana ke kelepona a kuu auntie e ninau mai ana i ka ohana, pehea la?  Haiia aku ana maikai no, a eia ke kaikamahine maanei. Ua ku au a hui walaau me kuu auntie ma ke kelepona, a ua kono mai oia ia’u e kau aku a holo i na Koolau. Hai aku au Poakolu an holo aku; nolaila Poakolu lawe kuu hoahanau Roselia Kauhane a kau au i ka moku, holo no Koolau.

            E kali mai ana kuu hoahanau Mrs. Ano me kuu auntie Mrs. J. Fern; a i ka hui walaau ana, mahope iho lawe kuu hoahanau ia’u e makaikai i ka hale hana hala; ua ike au i na lahui like ole apau malaia; ai no hoi i ka hala a haalele.

            Ma ka Poaha mai, Iune 2, hoomaka e haalele i kahi o kuu hoahanau, Mrs. Ano, hora 7; ua lawa i na meaai e lawa ai ka lua o ka inaina, ka hala, ka ipu aiwaha, ame na meaai like ole, aole poina o ka waimomona, lawe pu no.

            Ua kuhikuhi mai kamaaina i na wahi pana o na Koolau, nui na mea e makaikai ai ma kela mau alanui; ike i na pohaku kupanaha ka wai kupanaha a hoea makou i Waimea, hoomaha, a oiai ua hiki mai o Keoni Bulu. Oiai makou e haupa nei, ua hele aku kuu auntie e kuai lei pupu no makou, a ua loaa mai no na lei eono; nolaila ua lei au i ka lei pupu kanioe o Waimea. Eia ka pane a ke  keiki nona ke kaa ia makou: E holo mau ana au maanei, aole maopopo ia’u eia i nei e loa ai ka lei pupu e leiia nei.

            Nolila ua ohu like makou apau i ka lei pupu, mai Waimea mai, aole hoolalau ana, holo pololei i ke kaona nei. Ua holo aku au e ike i kuu uncle Geo. Fern, mailaila mai ike ia Mrs. Ahuna, ka hope no hoi kahi a kuu auntie e noho nei ma Kalia. Ua makaukau na mea apau iluna o ke pakaukau e pono ai o Hanale, hookahi no o Keoni Bulu mama o Hanlale i ka holo. Eia ka mea aka, ninau mai ka poe e holo kaapuni nei, nohea ko oukou lei pupu?  No Waimea. Aole o makou ike a elua a’u holo ana. Olelo mai ka haole you too late, lei mua ka malihini o Puukapu i ka lei pupu.

            Poalua, Iune 7, kau i ke kaa, na Uncle William keia; owau, o Auntie Fern ame William, holo e nana i kahi e ku nei ka hale o kuu auntie, ma Kaimuki, mailaila mai holo puni ike ohana; holo e ike i ka ua kilihune o Manoa, a hooiho ana i Pauoa, a loaa keia:

            Aia i Pauoa ka like lehua,

            Ka iini pau ole a ka makemake.

            La 8 o Iune kau i ka Maunakea, huli no hoi i ka ina. Ke haawi aku nei au i ka’u mahalo i ko’u poe hoahanau, na lakou i hoolei mai i na lei ilima kahiko ou e Oahu; haawi ke aloha muki hope i ka ohana, oni ka moku anihainaka ahiki i ka pau o ka ike ana, hoi e hooluolu.

            Hoea i kawaihae, e kali ae ana ke aloha, kau i ke kaa, aia ka pahu hopu o ka home. E kau ana ka maka o ka makua me na bebe; ha’i i na meahou o Oahu-ame na meahou o na Koolau.

            Me ke aloha ia oe e ka Lunahooponopono ame na keiki hoonohohua ko’u homaikai.

MRS. ANNIE K. LOUIS

____________________________________________________________________________

 

NANAHUIA KE KAHU E KE KEKO I KA MANAWA I WELA AI I KE KIKALIKA

 

            No ka nanahuia ana e ke keko o ka pulime hema i ka manamananui me ka lima akau i hele ae ai o George Conrad, ke kanaka nana e malama na holoholona o ka Paka Kaiolani i ka halema’i o na ponio ulia ma ka Poakolu nei o ka pule i hala, no ka lapaauia a na mai o ia mau wahi ona i moku ai.

            Ma kana mea ka o ka hoike ana ae e hana ana oia ma kahi kokoke i ka hale o na keoko a lohe mai la oia i ka uwe kapalili o ke keko, a mamua ka o ka loaa ana o ka ike iaia no ke kumu o ia uwe ana o ke keko ua lele mai la ke keko a kau ana maluna ona, a ma ka Conrad hhoakaka no ka iek ana o ke keko i ka hewa loa o kanaa mea i hana ai ua hoi aku la ka oia a kuono a noke i ka uwe. Ma kela manawa ona i nanahuia ai e ke keko ua ike aku oia i kekahi-mea e holo ana a ma kona manaoio na kela kanaka ana o ka ike ana aku e holo ana i kuni mai i ke keko me ke kikalika e a ana a wela ke keko, a o  ke kumu hoi o kona huhu ana a nanahu mai ai iaia, he okoa ka mea nana i hana eha mai ike keko oia nae ka i eha mauwale.

____________________________________________________________________________

 

LOAA KA WAIONA MA KAHI NO I LOAA MUA AI.

 

            No ka lua o ka manawa i loaa hou aku ai i na kanaka o ka oihana kinai waiona ma ka Poalua o ka pule i hala, maloko o ka hale o Chaozo Matsukaawa ma kw alanui Auwaiolimu, kahi mua no i hopuia ai ma kekahi mau la kakaikahi i hala aku la o kekahi mau omole okolehao ua kanuia iloko o ka lepo malalo o ka hale, o ka lua iho la ia o ka loaa ana aku o ka waiona maloko o ia hale hookahi maloko o ka manawa o hookahi pule.

            Ua hoopaiia o Matsukawa ma ka pule aku la i hala eha mahina e noho ai i ka halepaahao me ka hoopai dala pu o $400, ma ka manawa ona i hookolokoloia ai mamua o ka aha federala no ke kumuhoopii ona i hoopiiia ae ai oia ka loaa ana aku o kekahi ipuhao puhi okokehao ame kekahi mau omole okolehao maloko o koua wahi. I ka manawa o na kanaka o ke aupuni i hoea aku ai ia hale ma ka auina la Poakolu mai ua loaa hou aku la ia lakou kekahi mau omole okolehao ua kanuia iloko o ka lepo he mau kapuai ka hohonu mlalo pono iho o ka hale.

            Ua loaa pu aku i na kanaka hooko kanawai hookapu waiona kekahi Pake o AhSing ka inoa e lawe ana i kekahi ipuhao puhi okolehao maluna o kana kaa ma ke alanui a e hoihoi ana no kona hale. Ua lawe pu ia aku oia a hiki i kona hale, a i ka huliia ana aku o ka hale ua loaa aku he 10 galani lama i hoawaawaia; ua paa oia i ka hopuia a ma ke kakahiaka onehinei i hooloheia aikona hihia mamua o ka aha federala.

____________________________________________________________________________

 

LEHULEHU KA POE HA’IHA’I KANAWAI I HOOPUIA

 

            Oia mau ka hooikaika ana a ka lunahoomalu i ke komite alanui a ka papa, Eben Low, ma ka hopuhopu ana i na kalaiwa laa kalaka i oi aku ke kaumaha o na ukana i hoopihaia ai ia mau kaa mamua o ke ana i kauia e ke kanawai.

            O keia iho na hui nui i ikeia ka hahaki i ke kanawai hou: T.H. Davies & Co., American Factors, Henry May & Co., Union Feed Co., Honolulu Construction & Draying Co ame ka City Mill Co. No ka poe apau i hopuia aneane apau loa ma kahi o ke kanalima, eia nae, aole hookahi o ia poe i hoopoooa ae, o ke a’o wale aku no ia lakou aole e hana hou aku. Hookahi naae mea i maopopo loa ina no ka hookuli o ia poe a o kekahi poe e ae paha ma nei mua aku e laweia ae ana lakou mamua o ka aha hoomalu, a ina no ke ku i ka hewa e kauia mai ana ka hoopa’i elike me ia i hoakakaia ma ke kanawai.

____________________________________________________________________________

 

PAINA LUAU PIHA KANALIMA MAKAHIKI.

 

            Ia oe e ke koa kawalia Solomon Hanohano, ke kapena opio hoi nana e hoo kele ana i ka moku naukilo hoopahaohao i ko ke ao holookoa, o ia hoi ka Nupepa Kuokoa; Aloha nui kaua @e ka mahoehie: ---Eia au kau kiu imua o kou alo me kela mau lalani olelo e kau ae la maluna ke loaa nae kahi keena kaawale ma ke kino lahilahi o ka kaua milimili ahonui o ia iho keia:  

            Ma ka la elima o keia mahina o Iune, a haawi ae ke keiki onamiliona o ke one pua rose o Maili he paina luau piha kanalima makahiki, no kana wahine Liliana Luka Keliikipi, ma Waianae nei, ma ko laua home.

            Ua kukuluia kekahi lanai nui i uhiia me ka pe’a, aia maloko okeia lanai ekolu pakaukau loloa no lakou na kapuai pakahi he kanakolu a oi aku a emi mai paha. Ike aku nei kou kiu i na opio wahine kuene, e hoonoho mai ana i na ono like ole iluna o na pakaukau, ke momoni wale la no ka puu o kou kiu nei, ka poi uouo kaohi puu, na laulau i’o puaa momona, puaa kalua kele, amaama momona o ka lokoi’a o Ukoa me na aholehole momona na hua opihi makaiauli noho poli o ka lae o Kaena, na hua wana moe poli o Maili, na poke hee i huiia me ka wai o ka niuhaohao, ake pipi onoono puu, limukohu o ka lae o Nenue, ame na lau lipoa, limu lipeepee, limu uaualoli, limu hunehune noho poli o Keawaula, haupia, kulolo, meaono, kukui akimona o Lanikaula, waimomona, wai hau hu’ihu’i o ka puu ke moni aku a he nui aku na mea i koe i poina i kou kiu nei

            I ka makaukau ana o na meaai anau iluna o na pakaukau, ua hoomaikaiia keia paiha e kekahi o na hoaloha oia hoi o J.K. Kupihea, ia wa i noho ai ka poe apau e hookomo kowaho ialoko, ua nui ka hakaka o ia mau wahi ka aka, oia hoi o Hanale me Keoni Bulu, a ua eha nae ia Bulu, ua nui ka poe i konoia; malaila ae ke alii makai o Waianae nei, a kona mau makai, Senatoa Correa me kana Mrs.

            Ma keia paina luau nui i hawiia e ua keiki onamiliona nei, aole i nanaia ma ka poe maka nunui wale no, ua like na mea apau imua o ko laua alo, ua ai a lawa i ka lokomaikai o neia mau mea puuwai hamama me ka oiaio, oia hoi o Mr. Luka Keliikipi ame Mrs. Liliana Luka Keliilipi, ka mea nona keia paina luau piha kanalima makahiki.

            E hooloihiia ko olia ola e a’u mau ailana maikai, a palalauhala, a kolopupu a haumakaiole, kau ola ka hoi ia e ke Akua a e hoopihaia ko olua waihona, me na mea maikai apau, ka poe i akoakoa aku ma ko olua home na ke Akua mana loa e kiai ia kakou apau ma Kona aloha nui.

            Me oe e ka Lunahooponopono ame kau mau keiki hoonohohua o ka papapa’i ko’u aloha nui.

            Owau iho no me ka haahaa,

                        KIU WAHINE O KA HEMA.

_____________________________________________________________________________

 

KA HAIOLELO A DR H WILLIAMS

 

            Wahi a Dr. Harold Williams ma kana haiolelo o ka haawi ana ae ma ka paina awakea ma ka runi halawai a ke Kalapu Rotary ma ka Poaha aku la i hala, kekahi o na paahana e hooikaika mai nei ma ka imi ama i ka pono mawaena o na opio o Kaleponi.

            “O ka oi aku o ka naauao o na makua oia ke kakaikahi mai o ka lakou mau keiki.”

            “Elua pakeneka o na keiki kula he mau noonoo nawaliwali ko lakou. Aneane o na kanaka holomua apau o ka naauao maloko o ke kula he poe akamai lakou, aka nae, kekahi no o lakou aole no i holomua loa ma ka waiwai. O na keiki me na noonoo nawaliwali e lilo ana no lakou i mau makua nawaliwali o na noonookanaka makua.

            “Ke kukulu nei makou i kekahi hale nui maloko o Kaleponi i nei manawa a maloko olaila e malamaia ai na kanaka nawaliwali o na noonoo 3000. Maloko o kekahi halepaahao o kekahi mokuaina ua loaa aku ia makou he 40 pakeneka o na paahap he poe nawaliwali o na noonoo. Ua kauohaia mai au e kekahi mau luna aupuni o Kaleponi e nana i ka noonoo o kekahi kanaka nana i pepehi a make ekolu mau kanaka. Ua hala okoa ia’u he 10 mkinuke ma ia nana ana a ua loaa ia’u ka ike ua like loa kona noonoo me ko kekahi keiki uuku o eiwa makahiki, oiai nae he 30 ona mau makahiki, oiai oiai he 30 ona makahiki ia manawa. Ina i nanaia ka noonoo o kela kanaka ma kona manawa he 10 makahiki elike pu ana no ka mea e ikeia ana, ina i hoopaaia oia maloko o kekahi halepaa ina aole e make ana na ola o na kanak ekolu ana i pepehi ai.

            “He makaala loa ka poe mahiai i ka wae ana i na anoano, e pono o na anoano maikai wale no ke kanuia aku i hoohua mai ai lakou i na hua ohaha wale no. Pela no me ka poe hanai holoholona, e wae ana lakou a na ohi koko piha maikai, i hoohua mai ai lakou i na keiki maikai. No ke ola o na kanaka ua oi aku ia mamua o ko ka holoholona a mamua hoi o na mea e ae, a nolaila he mea pono e malama maikai loa ia i hoohua mai ai i na hua maikai. Ua ikeia he 50 pakeneka o ka poe aihue ame pepehi kanaka he poe nawaliwali lakou o na noonoo, wahi a Dr. Harold Williams ma kana haiolelo ma kela la.

______________________________________________________________________________

 

            LONDON, Iune 19-He kelekalapa i ka Nupepa Exchange Telegraph mai Konatinopela mai, i hanaia ma ka la 18 o Iune, a i loaa mai hoi ianei i keia la, e hoakaka ana ma ia lona ua loaa kekahi aelike me na luna nui o ka Aoao Lahui Tureke ma Angora ame ke aupuni kuikawa Rukini ma Makao no ka halihali ana mai i na poka ame na lako kaua no na pualikoa o ka aoao lahui Tureke, mai ka hapa hema mai o Rukini maluna mai o ke Kai Eleele a i kekahi awakumoju Tureke maluna o na moku Rukini.

_____________________________________________________________________________

 

HOOMANA NAAUAO O HAWAII

 

            E noho ana ka Ahahui @. Hoomana Naauao o Hawaii @ Luakini o Kealaula o ka @

ma Koula, Honolulu, Oahu. @ 25 o Iulai, 1921

            Ke kauohaia aku nei na @ hoikeia ae la maluna me @ hoike elele ame na hoik@ @

            Owau no me ka oiai@

                        REV. J.K.K. @

               Peresidena Nui o ka @

_____________________________________________________________________________

 

HALEKUAI O NA HAWAII ME KA LEHULEHU

 

Helu 8 Aala Makeke, me Makeke i ke Kalana.

KUMUKUAI O NA MEAAI MAANEI.

 

 

            Kopaa helu 1, keokeo, 12 ½ paona no ka ……….. @

            Kopaa helu,2, hapa keokeo, 14 paona no ka …….. @

            Kopaa helu 3, ulaula, 16 poana no ka …………… @

            Kaiki Hawaii, helu 1, 16 paona no ka …………… @

            Laiki Kepani, helu 1,17 paona no ka …………….. @

            Palaoa maka, White River, 49 paona no ka ……… @

            Palaoa maka, Asoria, 9 ¾ paona no ka …………… @

            Kini aila mahu, 1 no ka …………………………… @

            Eke lanahu kuawa me kiawe, 1 eke no ka ………… @

            Kini Pipi Libby me Swift, 1 paona, 3 kini no ……… @

            Kini Kamano Medium Red, 1 paona, 2 kini no …….. @

            Kini Srdina Ohia, 3 kini no …………………………. @

            Kini Sardine Aila, 12 kini no ……………………….. @

            Kini Waiu Carnation nunui, 12 kini no ……………… @

            @ Kini Waiu Carnation nunui, 12 kini no …………… @

            Kini Sardine Alpine me Carnation liilii, 12 no ………. @

            Kini Waiu e ae, Federala, Milk Maid, 12 Kini no ……. @

            Kopa holoi lole, Crystal White Chunk, 16 no ka ……… @

            Kopa holoi lole, White Chunk, 16 no ka ………. @

            Kopa holoi lole, Kitchen Brown, 12 no ka …….. @

            Waiupaka New Zealand a na Maori mai, 1 paona no ka …@

            Puaa @ame liilii maikai, 6 a 7 paona …………… @

            Puaa Paakai momona, 1 paona no ka …………… @

            Pipi Paakai momona, 1 paona no ka ……………. @

            Kamano momona, King Salmon, 1 paona no ka … @

            Poi maikai ono, 12 paona no ka …………………. @

            Opelu maloo o Lahaina mai, 40 no ………………. @

            Opelu maloo o Kona mai, 5 no …………………… @

            E kuahine me mama ma, ina ua kupono keia mau kumukuai ia @ e ola ai ka home, nane nui mai maanei i keia Poaono, la 26 o Iune.

            Ua makaukau maua e hooipa ia oukou apau, he ai u oa he @ kauhale , aohe hoi e nele.

 

            JAMES L. HOLE,                                                                              PETE KALALUHI

 

            Helu 8 Aala Makeke, Kelepona 6311.                                                Makeke o ke Kalana

______________________________________________________________________________

 

LUAU   

Na PA, NOHO, PAKAUKAU ame na HALELOLE no ka Hoolimalima.

PEOPLE’S HARDWARE STORE.

453 Alanui Moi Akau, Kokoke i Palama Settlement.

KELEPONA 2670.

6348-8wks.

______________________________________________________________________________

 

HOOMAKAUKAU NO MUA AKU NEI

 

E Hoao e Hoomakaulii Ano---E Malama i ke Dala e wehe i Buke Banako Hoahu me ke

 

CHINESE- AMERICAN BANK

A NANA AKU I KA ULU O KAU DALA

 

NA PAHU DALA                             $1.00 no ka Wehe                               Kihi o ke Alanui

no ka Hoolimalima                                  Ana i ka Hoahu                                 Moi me Nuuanu

______________________________________________________________________________

 

 

Kukulu i Mau Home Hou!

O ke Kalahea ia o ka Manawa

 

O ka hoolako ana i hale no na kamaaina me na malihini ka ninau nui. Aohe i lawa na hale i kukuluia elike me ia e hanaia nei i keia wa; e hoea mai ana anei i ka wa e’pau ai keia pilikia?

 

E hoohana i kau dala e loaa mai i dala hou.

Hookomo i kau dala ma kekahi hana mahele puka, kahi i noonoo nui ia ai no ka pono o ka poe paa mahele.

 

            Kumuwaiwai---$1.00 o ka mahele Iwakalua- kumamalima pakeneka ukumua o ke koena ma ka uku liilii.

 

E ninau ia S.K. Kamaiopili.

 

 

UNION SYNDICATE, LTD.

12 Alanui Beritania Akau                               Keleepona 5222