Ka Nupepa Kuokoa, Volume LIX, Number 26, 1 July 1921 — O KA NELE I KE DALA KE KUMU E HANA OLE IA AI KE ALANUI [ARTICLE]

O KA NELE I KE DALA KE KUMU E HANA OLE IA AI KE ALANUI

Me he mea la e hoopaneeia aku ana no ka manawa i maopopo ole ka hana ana i ka pauku elua o ke alanui holopuni Kamehameha, a pela me ke alanui o Waianae koe wale no a haawi mai ka lehulehu i ke kokua i ke aupuni kulanakauhale ame kalana, elike me ka na luna aupuni kulanakauhale o ka hoike ana ae. Ma ka ahaolelo i hala koke aku nei ua hoomanaia ka hoopuka ana aku i na bona, no keia mau hana hou, eia nae o ka $300,000 no ke alanui holopuni ame ka $200,000 no ke alanui o Waianae aohe i kuaiia. He hana aneane ole, elike iho la me ke kulana hookunana e pili ana i ke dala i nei manawa, ke kuai ana aku i na bona elike me ka uku a ke kanawai i hoakaka ai he 98, a ua ku-e ka loio kulanakauhale i na manao i hoakakaia ae e kuaiia aku ia mau bona ma ke 92 a e noi ae ana i ka papa o na lunakiai e hoopiha aku i ke koena. Ke upu mai nei na luna aupuni kulanakauhale ame kalana na kekahi mau ahahui a na makaainana e hoopiha aku i ke koena a i ole haawi mai paha i kekahi kokua ma ka huli ana i dala ma kekahi ano no ka hoopiha ana aku ia koena, i mea e hiki ai ka hoomaka hou ana aku e hana i ke alanui holopuni. He hana maalahi ka huli ana i na dala i makemakeia ma o ka auhau ana aku i na kalapu ame na ahahui e ae, wahi a na luna aupuni kulanakauhale, a ua manaoioia aole mau ku-e ma ke kanawai e hoalaia mai ana. No kekahi mau makahiki lehulehu i hala ko ke aupuni kulanakauhale ame kalana hoolilo ana ma kahi o $20,000 no ka malama ana i ka maemae o ke alanui ma Waianae, wahi a ka Meia Wilson, aka ina e hiki ana e hoohanaia ka $20,000, e hiki ana ia mau dala he hoohanaia aku e loaa ai ma kahi o ewalu mile alanui maikai a e ikeia aku ai hoi he hana hou ia i hanaia me ka paa ame ka maikai. Me na dala hoi $300,000 e loaa a e hookanaia aku ana, e loaa ana ma kahi o elima a eono paha mau mile alanui hou i hanaia me ka maikai, a e loaa ana hoi he 60 mile alanui i hanaia a maikai mailoko ae o ke 84 mile alanui apuni keia mokupuni. Me na dala $200,000 ka waiwaiio ma na bona i kuaiia e ke Kiaaina McCarthy ma ka la 10 o Iune, ame $65,000 o ka $500,000 mua i hooholoia ai no ka hapamua o ke alanui holopuni, ua loaa i ke terotore he $265,000 me ia mau dala e hiki ana ke hanaia ke alahaka 900 kapuai no ke alanui ma

Heeia ame aneane ekolu a eha mile alanui paha e hanaia me ia mau dala. Ua manaoia mahope koke iho o ka la 1 o Sepatemaba e hanaia aku ai kela alanui alahaka ma Heeia.