Ka Nupepa Kuokoa, Volume LIX, Number 28, 15 July 1921 — KANIKAU NO EDA KALUA. [ARTICLE]

KANIKAU NO EDA KALUA.

Kanikau he aloha nui keia, Nou e Kawaikauomaunahina. Nou paha ka uhane e naue nei, Na hora o ke kakahiaka nui. Ia oe e ka wahine poaimoku, Eia e ka luhi a o kaua, Ke hele aku nei mahope ou, I lei pu ia e kaua, I ka uluwehiwehi o Nuhou, Me ka ua Kenikeni o Lihue, E uwe helu mai o Kaapuwai, He aloha ino no kuu leihulu, O ka makani kiu a o Konalea, Me ka wai kaulana o Kemamo, O ka ua Lihau o Haupu, Me ka Uanoe anu o Koloa, O ka ua koluna me ka uwila, Kakou kolalo e naue nei, O ka loku a ka ua me ka makani, Mea ole e ke anu a o ia uka. Heleia i ka ua me ka makani, Aloia i ke anu me ke ko'eko'e, Ko'eko'e e ka po ua hele oe, Ua wehe i ka pili me ka makua, Noho oe i ka hale puanuanu, I ka hale ike makamaka ole ia, A ka la'i i Ahulua kuu leihulu, I ka makani anu a he Puukolu, Hoi i ka aina o ka makua, I ka poli aloha oo Kauwaihee, Aia i Polihale kuu leihulu, I ka pahapaha lei a ka malihini. Malihini Nohili a he onekani, O ka ipo aloha a Papiohuli. Huli mai ka makani he Puukapele, Alualu wailiula i ke kula. I ke kula laula o Kaunalewa,

A Limaloa la e hooipo nei, O ke konohiki nui ai aina, Kukulu kauhale o ke alia; Alia oe a e pulale mai, Ei ae ka makani Moeahua, Ka makani aloha o kuu aina, A e pa kolonahe mai nei, O ka Mikioi mai o Kawaihoa, A ka Naulu a e hapai nei, A ka la kowelo poli o Lehua. I ka moana kai o Kaulakahi, Akahi ka ikena ia Waimea, I ka home o ka Waiulailiahi, O ka hoa pili hoi a ka Waikea, Me ka makani anu a he Waipao, Ke huli hoi nei kuu leihulu, Ike i ke onehanau o ka makua, I ka poli aloha o Paieie, Aina hanau o kuu lei, Ka makani Lupua a o Wainiha, Ke nounou nei ia Luluupali, Ilaila haalele kuu leihulu, Ua hele i ke ala hoi ole mai, He aloha ka leo o kuu leihulu, I ke kaukau mai pehea au, Hele au i ke ala hoi ole mai, Pau ka ike ia oe la e ka makua. Hele i ke ala maewaewa, A ka waimaka e hanini nei, E haale nei i ka lau lihilihi, E kaohi mai ana he ole ka paa. Haina ka uhane kino wailua, Nou e ka Waikau o Maunahina. Hakuia e J. P. Kaapuwai, Hanalei, Kauai, Iulai 11, 1921.