Ka Nupepa Kuokoa, Volume LIX, Number 31, 5 August 1921 — Page 4

Ka Nupepa Kuokoa

 

 

NUPEPA KUOKOA

SOLOMON HANOHANO, LUNAHOOPONOPONO

HOOPUKAIA I NA KAKAHIAAKA POALIMA APAU

 

E KUPALE NO HAWAII NEI E PONO AI.

 

            O kekahi o na ninau nui ko’iko’i loa i keia mau la e paionia mai la maloko o ka ahaolelo lahui o Amerika Huipuia, o ia no ka hoololi i ke kanawai hoopae limahana lahui, i hiki ai ke hookomoia mai kekahi heluna Pake no Hawaii nei, i mau limahana no ka hoopakele ana ae i ko kakou mau oihana mikiala, na oihana e loaa ai na kahua e ku ai keia Teritore, maluna o kona mau wawae iho me kulanalana ole.

            No keila ninau, i hoouna aku ai o Hawaii nei i kekahi komisina limahana i ka ahaolelo lahui, e hoakaka ana, a e hoikeike aku ana, i na kumu maikai apau, i ake loa ia ai na limahana Pake, e hookomo mai iloko nei o ka aina.

            Iloko o ia manawa hookahi, ua hoalaia mai na ku-e ikaika ana, ma ka aoao o na hui uniona, i noho poo ia e Samuel Gompers, ka peresidena nui o na Hui Uniona Amerika, imua o ke komite hoopae limahana o ka hale o na lunamakaainana, me ka olelo ana i na mea oiaio ole, e hoike ana, ua makemake wale no na kanaka kanu ko o Hawaii ne, e hoopiha i ko lakkou mau pakeke i ke dala , aole no ka nele inaoli i na limahana.

            Ma na oiaio maoli, ua ala mai na ku-e ikaika ana no ka hookomo ana mai i na limahana Pake i Hawaii nei, mai kekahi poe ko’iko’i mai ma Wahinekona, ka poe i loaa aku ko lakou ike, mamuli o ka lohe wale no, me ka maopopo ole i na kulana oiaio e ikeia nei maanei, nolaila, no ke kupale ana i ka inoa maikai o Hawaii ame kona mau hana mikiala, he pono no i na makaainana o keia Teritore, ke komo pu iloko o keia paio, no ka hoopakele ana ae i keia mau oihana hoowaiawai i ka aina.

            He mea oiaio no hoi, aia ma Wahinekona i keia la, na kanaka mai Hawaii aku nei, e ku makaukau ana, no ke kakoo ana i ka hookomoia mai o na limahana Pake, e hoikeike ana hoi, i na kahua kupono, ma na ano apau e hiki ole ai, ke nanamakaia na oihana mikiala iloko nei o ka aina, he hana paakiki nae, na lakou ka paio ana aku no ka lanakila, oiai e noho pouliuli ana ko Wahinekona poe, no ke kaulana oiaio maoli o keia ninau ma Hawaii nei.

            Ua waiho aku ka Nupepa Advertiser, he kono imua o Samuel Gompers, ka peresidena nui o na uniona ma Aerika, e holo kino mai aia no keia Teritore, malalo o na lilo o kela nupepa, a e huli aku, me ka noii pono ana, i ke kulana o na limahana maanei nei ame na oihana mikiala, o ka mea apiki nae, ua hoole mai oia i kela kono; a o ka mea oi loa o ke kuapaianaha, o ia ka hoole ana mai, no kona kamilio ole ana, i kekahi mau mea makai ole no hawaii nei, elike me na loko kelekalapai hoea mai i keia kulanakauhale.

            Apuni ke Teritore i keia manawa, ua hapa loa mai na limahana ma na mahiko, ke waiho mai nei kekahi mau eka aina mahuahua, me ka mahi ole ia, ke maloo mai nei hoi ke ko, no ka nele i na limahana, o ka mea oiaio loa, e emi mai ana na tona kopaa i keia makahiki, ka mea i ke mua ole ia ma na makahiki ae nei i hala.

            Mai na hui mahiko mai, na loaa mahuahua, o keia Teritore, ame na oihana mikiala e ae iloko o ka aina, e ku wale aku ane kako, a nana me ka lawelawe ole aku i kekahi mau hana, e ku-e aku ana, i na mea oiaio ole, i kamailioia, e na enemi o Hawaii nei, imua o ke komite o ka ahaolelo lahu?

            O ka Ahahui Kanu Ko Hawaii, ke kupono loa, e koho ai i kekahi poe kupono i kamaaina i na kulana apau o na limahana maanei nei, no ka hoomakaukau ana i na hoike oiaio, a waiho aku imua o kela komite, na kulana hoi a makou e manaoio nei, ua oi kela aku ia, i na kulana o na limahana e ae, ma Amerika, a ma kekahi mau wahi e aku o ka pomaikai holomua , o keia Teritore.

            Ke haalele hiilii nei na Kepani i ka noho hana ana no na mahiko, a huli hoi aku no Iapana, pela me na Pilipino, no ka huli ana aku i mau hana nunui o ka uku; hookahi wale no alahele e hoopakele ia ae ai keia oihana, mamauli no ia o ka loaa ana o na limahana e pani iho ana i ko lakou mau makalua.

            He hana hiki ole loa, i na limahana o na mahiko i keia manawa, ke kauka’i ana aku, e loaa ia lakou na ukuhana keikie i keia wa, emi loa mai o ke kumukuai o ke kopaa.  Me he mea la, aole he wahi elike me Hawaii nei, i hoao mau ai na ona o na hui mahiko, e haawai aku, a e hana aku, i na mea apau e popo ai na limahana.

            Ma ka manawa pii o ke kumukuai o ke kopaa aole wale i hoomahuahuaia ae ka ukuhana o na limahana apau, me ka loaa pu o ka uku manuahi;  aka ua hoomahuahua pu ia ae ke kulana maemae a maalahi o ko lakou noho ana, ka mea i ke ole ia ma na wahi e ae, he mea oiaio loa keia, e hiki ole ai i na limahana maanei nei ke hoole mai.

 

 

HE HANA MAIKAI LOA

 

            Ma ka halawai kukakuka, i malamaia e na hoa o ka papa o ka 1891, i puka o ke Kula Kamehameha ma Waimea, Kauai, i hooholo lokahi ae ae kela papa, e hoahu i kekahi waihona hoonaauao i na keiki Hawaii, me ka manao nae, he pohaku paepae wale no ia, no ka hookumu ana i kela hana kilakila, na na papa apau i puka mai Kamehameha mai, e komo pu aku ai ma kela mau hana maikai.

            Mamuli o ka hoomaopopo ana, i ke kulana nele a pilikia iloko o na Hawaii e hiki ole ai ke hoonaauao i ka lakou poe keiki, pela i hoalaia mai ai keiamanao e kukulu i waihona hoonaauao, he hana hoi a keia pepa e kakoo nui nei, noi ke komo pu ana mai o na papa e ae apau i hookuuia mai ke Kula Kamehameha mai, e alu like ai, ma keia hana pookela.

            Mai ka makahiki 8191 mai, ahiki i ka makahiki 1921, aia ma kahi o ka aneane aku i ke kanakolu ka nui o na papa i hookuuia mai Kamehameha mai, ina e lawe ana kela ame keia papa pakahi i kona mahele, no keia waihona, alaila, e hiki ana ke hoonaauaoia kekahi heluna nui o na keiki Hawaii, i loaa ole i na manawa mamua aku nei.

            Ma ka hoala ana i keia waihona, e hiki auanei ke hoonaauaoia, aole wale no o na keiki a ka poe i kuleana maoli i kela waihona, aka na keiki pono nui, i akeia aku ai e keia pono.

 

KA ELELE KUHIO MA KA PAPA KOMISINA

 

            Ma ka wae ana ae o Kiaaina W.R. Farrington i ka Elele Kuhio, i hoa no ka papa komisina Home Hawaii; me ka apono ana mai hoi o ka Elele Kuhio, ia kulana oihana, aole he kanalua ana, no ka hoea mai i ka Manawa e hooiaio ai ka elele lahui, i kana mea i iini nui ai, e loaa in a Hawaii ka pomakai malolo o ka bila hoopulapula Hawaii.

            Ua kupono loa kela hookohuia ana aku la o ka Elele Kuhio i hoa no papa komisina. No ka mea, oia ka i ike ma kea no laula in a aoao apau o ka bila hoopulapula. Pela hoi kona lilo ana mai, i mea kokua, no ka pono o na Hawaii, e makemake ana, e hoi maluna o na aina i hookaawaleia. Ma keia bila, no ka hookuonoono ana.

            O ka holopono o ka manao hoopulapula maloko o kela bila, no na Hawaii; aka nae, o ka holopono oi aku, aia no ia maluna o na Hawaii ponoi, ka poe e hoi aku ana a noho maluna o na aina hookuonoono.

            He mau Hawaii no koe, e hoopiha aku a ii ke koena aku o na hoa o ka papa elike me ia i koiina mai ai e kela kanawai hoopulapula, o ka keia pepa e iini nei, e hoopihaia kela mau makalua, e na Hawaii, i komo pu iloko o na hooikaika ana no ka holopono o kela bila; a i ole he poe i loaa ia lakou na manao make, no ka holomua ame ka pomaikai o na Hawaii.

            Ua nui na mea a makou i hoakaka aku ai maluna o keia bila hoopulapula, a ua hoopukaia aku no hoi bila no ka pomaikai o na Hawaii, ke manao nei makou, ua lawa loa ka ike ame ka hoomaopopo ana e hana aku ai no keia manawa, mamua ae o ka wa e koiia mai ai na kanaka e waiho aku i ka lakou mau no ii mau apana hookuonoono no lakou.

 

 

HE KUMU HOOLALIKE KUPONO

 

            I ke kamailio ana no ka bila hoopulapula i na Hawaii, o kekahi kumu hoohalike maikai loa, no na Hawaii, o ia no ka hana a kekahi ohana Hawaii e noho nei ma Haena, Hanalei, Kauai.

            Aia malaila kekahi mau Hawaii, i hoolilo i ko lakou ola ana ma ka hana mahiai, a he mea hauoli no ka manao, ka ike ana, i ka hoomanawanui maoli o kela ohana, me ke ku o kekahi hale wilipoi, e hoolako ana, i kekahi mahele nui o na makaainana o kela mokupuni me ka ai; ka hana hoi a kekahi poe Hawaii e ae, i hoohemahema ai, me ka hahai mau o ka pilikia ia lakou.

            Malia paha a olelo mai ana kekahi poe Hawaii, ua ku ka hana i kela ohana, no ka mea aia he wai e ulu ai na meakanu, he mea pololei no ia, aka ina nae aole kela manao hana iloko, elike me ia i loaa a ii na kanaka o na aina wai e aku, aole loa e loaa ne noho ulakolako ana, a he kuonoono hoi.

            O na aina e weheia aku ana no ka hookuonoono ana o na Hawaii, he mau aina wai ole ia, he mau aina panoa, i kupono no ka hanai holoholona ana no ka manwa mua, a ke loaa hoi ka wai, alaila kanu aku in a meaulu.  Ina aole ka hoomanawanui, i kea no o ka noho ana, aole ka makaala ame ka hanamau he mea maopopo loa, he paakiki no ka loaa ana o ka holomua; ka hopena hoi i ake nui ia aku ai, e oili mai, ma keoa hookuonoono ana.

            Mai mano kakou na Hawaii, he maalahi ka hoi ana aku a noho maluna o keia mau aina hookuonoono, no ka hoopulapula ana; he paakiki no ka oh ii na pomaikai, i ahona paha, in a kokua e loaa mai ana, mai na kanaka ike ma ia hana, e hoolimalimaia aku ana e ke aupuni.

            Ua like pu no ka pilikia ma ka oihana mahi aia no a loaa ka ike me ka makaukau i ka malama ana in a meakanu, alaila holopono; no keia mau kumu la, aole he maalahi me kupaka ana ae o kekahi poe Hawaii o kakau, iloko o ko lakou mau manao ohohia, koe wale no a maopopo ko lakou mau kahua oiaio i ku ai.

 

 

NUHOU KULOKO

 

            Mamuli o ka piha loa o ka nupepa i keia pule, ua hoopaneeia ka hoopu ka ana aku in a palapala a na makamaka a keia pule ae.

 

            Ua hookohua ae ka Lunamakaainana Levi L. Joseph O hana, Maui, e ka Makai Nui Clem Crowell, i hope makai nui no ka Mokupuni o Molokai.

 

            Ma ke Kinau o kakahiaka Sabati ne i hoea mai ai ka Lunakanawai Kaapuni Achi, Jr., no ke pani ana ae ma kahi o ka Lunakanawai Kaapuni Banks i hala aku i ka hoomaha no Kauai.

 

            Ua hooloiia ae nei ka manawa e haalele iho ai o ke Kinau no Kauai, mai ka hora elima mai o ke ahiahi, a i ka hora ewalu o ka po, elike me ka manawa o ka mokuahi Kalaudina.

 

            E hoomaka ana mai keia manawa aku, he elua dala me ka hapalua, ka auhau hou o ka Nupepa Kuokoa no ka makahiki, ua like ia me hookah dala me ka hapaha no na mahina eono.

 

            Ma ka Poalua iho nei, i huli hoi mai ai o Senatoa John H. Wise, mai Wahinekona mai, a wahi ana, aole e huli hoi koke mai ana ka Elele Kalanianaole, ahiki i ka maopono ana o ka hopena, o ka bila hoopae limahana o Hawaii nei.

 

            Ma ka Manoa o ke kakahiaka o ka Poakolu nei, i hala aku ai o Mr. L.A. Kakina, ka presidena o keia hui pa’i nupepa no Kapalakiko, no ka hooponopono ana ina mea e pono ai ka huaka’i a na kanaka kakau nupepa, e holo mai ai no Hawaii nei, iloko o ka mahina o Okatoba ae nei.

 

            Iloko o nap o ekolu o ka malamaia ana o na heihei au, maloko ae nei o ke awa, ua aha’i ae o Pua Kealoha i ke eo o ka pahu o 100 i-a, me ke kaulike o kona manawa, no kela pahu, me ko Duke P. Kahanamoku, ka moho heihei au kaulana o ke no nei.

 

            E noho ae ana ka halawai a ka poe i kuleana i ka pa ilina o Moanalua, ma ka hora 2:30 p.m. o keia Sabato iho ma kahi mau, no ka hoolohe ana i ka hoike a na lunanui, ame ka noonoo pu ana i kekahi mau kumuhana i pili i ka pomaikai o na lala o ka nui pa ilina.

 

            Mahope iho o ke kaama’i ana no kekahi mau la kakaikahi wale no i pauaho mai ai o Solomon P. Kahoohalahala i keia ola ana, ma ke kakahiaka o ka Poakahi nei, a ma ke auwina lao ka Plalua ma ii hoomoeia aku ai kona kino lepo ma ka ilina o Manoa, ine kana wahine i hala mua ma kela ao.

 

            Ma ka hui ana mai nei a na hoa o ka papa kula o ka 1891 o ke Kula Kamehameha ma Kauaii hooholoia ai, ma Hilo, Hawaii, lakou e hui hou ae ai, ma ka mahina o Iulai o keia makahiki ae, maluli o ke kono a Samuel Kauhane, ka lunahoomalu o ka papa lunakiai o ke Kalana o Hawaii, kekahi hoi o na hoa o kela papa.

 

 

NA  MARE.

 

            Moses Kaniho Lyons ia Maryann Kaleo Iulai 25.

            William Manuai ia Hana Kihei, Iulai 30.

            Joseph M. Freitas ia Fannie Kong, Iulai 30.

            Farnk Rodrigues ia Laura K Kaai, Iulai 30.

            Thomas E. Wise ia Emily Wilkins, Iulai 30.

            Tom William ia Lily Salamanca, Iulai 30.

            Geo. K. Kuamoo ia Mrs. Ekekela Kaniho, Aug. 1.

 

NA  HANAU.

 

            Na Geo. K Kanekoa ame Sarah Wong Kong he keikikane.  Iulai 28.

            Na Samuel Solomon ame Louisa Kekai, he kaikamahine, Iulai 30.

            Na Geo. Halualani Miranda ame Rose Trask he kaikamahine, Aug. 1.

            Na Herman Kamoku ame Lydia Kekoowai he keikikane, Aug. 1.

 

NA  MAKE.

 

            Walter Kekipi, ma ke alanui Alapai, Iulai 27.

            Keliikanakaole Opio, ma ke alanui 10, Iulai 28.

            Solomon K. Myers, ma ke alanui Campbell, Iulai 29.

            Eli K. Fountaine, ma ke alanui Elm.  Iulai 31.

            John Manaku, ma ka halema’i Moiwahine, Iulai 30.

            Julia Kahakauila Pika, ma ke alanui Kukui, Aug. 1.

            Mrs. Elisabeta Poai, ma ke alanui Kawaiahao, Aug. 1.

            Joseph S. Kahoohalahalu, nea ka halema’i Moiwahine Aug. 1.

            He bebe na Mrs. J.K. Nainoaelua, ma ke alanui Waikahalulu, Aug. 3.

 

Nuhou Kuwaho

 

            WAKINEKONA, Iulai 28.—Ua hoikeia mai e ke Kanikela Gale e noho mai la i Hongkong i ke keena aupuni ke mahuahua loa aku la ka hookomoia ana aku o ka waiona iloko o ia aupuni, a no ka opiuma hoi ke emi loa aku la ka hoounaia ana malaila.

 

ESEKI Asia Tureke, Iulai 31.—Ua emi iho malalo o 50,000 na koa Tureke malalo o ke alakai ana a Mustapha Kemal, pela ke koho waleia, mahope o ka nahaha ana iloko o ke kaua i hooukaia ai me na koa Helena, a i kaa ai hoi ka lanakila ma kan aoao o na Helena.  Ua lawe ae na Tureke i mau kahua hou maloko o na mauna he kanaha mile ka mamao ma ka hikina aku o Eski Shehr.  O na mahele koa ikaika loa a na Helena he 10 wale no mile ko lakou mamao mai kela wai mai a na Tureke e hoomoana mai la.

 

            OKALANA, Aug. 1.­—He hihia hoao no ka auhau o na lahui e a i hooholoia ai hoi e ka ahaolelo i hala, ka i hookomoia aku i ka aha i keia la ma o ka hopuia ana Heikichi Terui, he kakauolelo na ka ahahui a na kanaka lawelawe oihana Kepani o Okalana.  Ua hoole o Terui i ka hoopaa ana ae i kona inoa ame ka hookaa ana i kona auhau o $10.

 

            Ua hooholo na luna aupuni o ka mokuaina e lawe pololei loa aku i keia hihia imua o ka aha kiekie o ka mokuaina no kekahi olelo hooholo e pili ana i ke ku i ke kumukanawai o ke kanawai  i hooholoia ai.  Ua hookuuia o Terui amauli o ka bela ana ae.

 

            KIKAKO, Aug. 2.—He umi-kumanialima palapala hopu federala i hoopukaia aku no na hoahui i hoopiiia mai e John W.  Worthington, ma ka mea e pili ana i ka powaia ana o na ekeleka i hiki aku ka huina nui i ka $6,000,000.  O na palapala hoopaa i hiki aku ka waiwaiio i ka $350,000 ka i loaa aku iloko o ke keena oihana o Worthington.

 

TERITORE O HAWAII.

___

 

            OIAI, o ka ANAHULU  LAND Keena o ka Puuku, Honolulu, Oahu

            Ma ka hana e hoopau ana i ke KAALA LAND COMPANY, LIMITED.

            OIAI, o ke KAALA LAND COMPANY, LIMITED, he hui ia i kukuluia a e ku ana malalo a ma ka mana o na kanawai o ke Teritore o Hawaii, i ku like ai me ke kanawai hoomakaukauia ma na hana o keia ano, ua waihoia mai iloko o keia ano, ua waihoia mai iloko o keia keena he palapala noi no ka hoopau ana i ka hui i oleloia, hui pu me kekahi palapala i hooiaioia i hoohui pu ia me ia, elike me ia i koiia ai ma ke kanawai.

 

            NOLAILA, ma keia ke haawiia aku nei ka hoolaha i kekahi mea, a i na kanaka apau, he mau kuleana mamua a e kuleana nei paha i keia manawa ma kekahi ano iloko o ka hui i oleloia, e pono e waiho mai i na ku-e ana no ka aeia aku o ka palapala noi i oleloia maloko o keia keena, mamua ae o ka hora 12 awakea o ka la 10 o Okatoba, 1921, a o kela ame keia mea e makemake ana e hooloheia aku maluna o ia mea, he pono e hoea kino ae ma ke keena o ka mea nona ka ino malalo iho maloko o ka Hale Mana Hooko, Honolulu, ma ka hora 12 awakea o ka la i oleloia, a e hoike mai i ke kumu, ina he kumu kekahi, i wahi e ae ole ia aku ai ka palapala noi i oleloia.

DELBERT E. METZGER

Puuku, Teritore o Hawaii

Honolulu, Augate 3, 1921.

6463—Aug. 5 12. 19. 26; Sept. 2, 9, 16,

            23, 30; Oct. 7.

 

 

HOOLAHA.

E malamaia ana ka halawai kumau o ka Hale o na Alii o Hawaii (Ahahui Poo) ma ka Phoenix Hall i keia Sabati Aug. 7, hora 2 p.m..                                       

Ma ke kauoha o ka Iku Hai.

WM. J. COELO,

Iku Kau.

 

HOOLAHA HALAWAI

            E malamaia ana ka halawi makahiki o ka Hui Kuni Aina o Wainiha, ma kona kena hana ma Wainiha, Kalana o Kauai, Teritore o Hawaii, ma ka Poaha, hora 10 a.m., o ka la 1 o Sepatemaba, M H. 1921.

WM. HYDE RICE,

Hope Peresidena, Hui Kuai Aina o Wainiha.

 

HOOLAHA HALAWAI.

            E malamaia ana ka halawai makahiki o ka Hui Kunai Aina o Haena, ma ka Haena Hall ma Haena, Kalana o Kauai¸ma ka Poalima, hora 10 a.m., o ka la 2 o Sepatemaba, M.H. 1921.

1. MENEFOGLIO.

Lunanui, Hui Kuai Aina o Haena.

6463—Aug. 5, 12, 19. 26.

KA HALEKUAI O NA HAWAII ME KA LEHULEHU

            Ahea oukou e na Hawaii a ala mai apau, e kuai i ka oukou mau MEAAU e ola ai ka HOME maanei?  Ina ua hiki ia u me ko’u mau limahana Hawaii, ke lawelawe i keia oihana kalepa, a aneane e pha $40,000, ka loaa o ka makahiki mailoko mai o ke kumupaa o $7,500 wale no, aole anei e hoike aku ana ia ia oukou i ka holomua, a e paulele mai hoi kakou apau ilaila e kii ai i ka oukou MEAAI?

KUMUKUA O NA MEAAI O KEIA PULE.

Alpine me Carnation Cream Nunui, 1 kakini kini............................$1.50

Alpine me Carnation Cream Liilii, 1 kakini.....................................    .75

Peerless Kamano Kini, ½ paona Med. Red, 1 kakini...........................  1.20

Columbia Kamano Kini, ½ Paona Blood Red, 1 kakini......................... 2.50

King Kamano Paakai, 1 paona, Momona................................................  .25

Pipi Paakai Kaleponi, 1 paona, Momona................................................  .25

Pua Paakai Kaleponi, 1 paona, Momona................................................  .35

Puaa Ola no ke kalua, 1 paona, Momona................................................. .20

Big me White Chunk Kopa Holoi Lole, 16 no...................................... 1.00

Crystal White Kopa Holoi Lole, 14 no.................................................  1.00

Liberty Corn Starch me Pia Lole, 1 no..................................................  .25

Omole Kuawa Kele, 8 oz., 15c; 12 oz., 20c; 24 oz...............................  .25

IXL me Oakleaf Ass’d Jams, 20c pakahi; 1 kakini no........................   2.25

Smoked Terehe Moi o Niukilani mai, 1 paona no..................................  .30

Park Dale Waiubaka ono maikai, 1 paona no.........................................  .55

Waiupaka ono o  Nukilani mai, 1 paona no............................................  .60

Poi Lehua o Laie mai, he nui ka ono, 12 ½ paona no...........................  1.00

            Ua hiki ia makou ke hoolawa i ko oukou makemake no ke ola o ka HOME a piha me ke klumukuai makepono loa ma ke dala kuike me ka manuahi pa aku i 4 pakeneta puka o ka huina o ia mau dela au i kuai mai ai maanei.  He hana no na Kepani me na Pake ia oukou ia mea?  E hoao mai i ka Hawaii Aloha. 

            Naue mai a ikemaka i pau kuhihewa.

 

HALEKUAI O NA HAWAII ME KA LEHULEHU.

 

 

 

E POHO ANA OE KEKUAI

I NA I’O PIPI PIPII

 

He oiaio ua lawa makou me ia mea.  He mau i’o ono lakou, aka ke hoomaunauna nei oe i kau dala maikai me ka loaa ole oka mana hoomomona i ke kino o ka makou mau i’o pipi palupalu emi.

KUAI I NA I’O EMI

   

He mea makepono ke kuai i ka Pipi Ku, Pipi Palai, Pipi Paakai, Pipi Koala, I’o Aoao Miko, no ka 20c no ka paona, a no ka Hipa Palai ma ka 15c a no ka Hipa Ku no ka 12 1-2c.  He kanalua ole ke olelo ae e uku ana oe ma kahi o 5c oi aku, ke haahaa ma kekahi mau wahi e ae.

 

METROPOLITAN

MEAT MARKET

MAEMAE         -          KEOKEO        -       MAKA-ALA-HOU LOA