Ka Nupepa Kuokoa, Volume LIX, Number 32, 12 August 1921 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

 

He Moolelo no KONARADI KENEKONA

a i ole

Ka Hiena o na Awawa Kuhoho ame Demo-

na ka Lio Eleele Kupaianaha

 

            I ka holopono ana o kela mau hana a na kanaka ino kolohe, wehewehe ae la laua i na kaula i hoopaaia ai na lima ame na wawae o Konaradi, alaila kamailio aku la o Dukona i ka i ana aku:

            "Maloko nei o keia rumi oe e noho ai, me ka maluhia loa, a ke hoomaikai ae nei au i kou makuakane, no ka hoomaukaukau e ana i keia keena, me kona moeuhane mua ole paha, o kana keiki ponoi aku ana, ka paahao maloko o keia wahi."

            "E hoopaahao ana anei oe ia'u maloko nei o keia wahi ahiki i kuu make ana?" i ninau ae ai o Konaradi, me ka aneane e hiki ole ke puka aku kona leo, i kau a mea o ka hele a eha loa kona puu.

            "Aole oe e make ana, e lawe mau mai ana no o Felipe i mau meaai nau ame kakahi wai i kela ame keia manawa.

            E noho ana oe maloko o keia rumi paahao, ahiki i ka holopono ana o ka'u mau hana i hoolala ai ma Amerika Hema, i ko'u wa e makaukau ai e haalele iho ia Amerika nei, ia wa  loaa hou ai ia oe kou noho lanakila ana, aole nae e hiki ia'u ke hoike aku i ka loihi o ka manawa, malia paha he pule hookahi mai keia wa aku, a i ole he mau mahina paha."

            "O, he keu aku oe a ke kanaka lokoino!" i noke okoa ae ai o Konaradi i ka uwe. Aia ka makemake nui iloko ona, e lele kokoe e uumi i ke kania-i o kela kanaka, o ka nana ae nae, ua nele oia me ka ikaika, uumi wale iho la no oia i kona inaina, me ka noho, maile mai, nana i kela mau kanaka ino.

            Aia iloko o Habaki Dukona, ka hilahila, no kana mea i hana aku ai maluna o ke kanaka opio, me kona aa ole e nana mai ma na maka O Konaradi, a oiai ke hoi pono mai la ko Konaradi ikaika, o ka haalele iho la no ia o ua mau kanaka nei, i kela keena, no ka hophopo, o hoao mai auanei o Konaradi, e paio me laua-

            I ka hala ana aku hoi o na kanaka ino, a paniia aku la ka puka, koe iho la o Konaradi iloko o kela keena pouli, aole nae e hiki iaia ke noho malie, me ka hana ole aku i kekahi mea, nolaila hooikaika mai la oia e hele ahiki i kona hoea ana no kahi o ka puka, noke aku la i ke peku me kona ikaika apau, aole nae ia he kumu e hemo aku ai, a e, weheia mai ai paha, no ka mea ua hooepaaia mai he kuahao mawaho mai o ka puka.

            No ka hooliloia aku o Konaradi i paahao, ma kekahi ano haahaa ino loa, ua noke okoa iho la oia i ka uwe, me ka naau walania, alaila hooho ae la i keia mau olelo:

            "O, e kuu makuakane! Aole ana e hiki ia‘u ke hoopakele ae ia oe, mai ka mana mai o keia mau mea, no ka mea eia like kaua iloko o ka poino. Aia anei he Akua ma ka lani? Pehea la Oia i ae ai e lanakila na hana lokoini a keia mau kanaka?"

            I ua o Konaradi e noho la iloko o ka pouli, ke hoomaopopo la oia i ka nui o na pilikia ame na poino e kau mai ana maluna ona, e laa ka pololi ame ka makewai ke noke la oia, i ka haha ma ha paia o kela keena aole he wahi manaolaua iki no kekahi wahi e hiki ai oia ke hemo aku iwaho.

            Ua ala aku la no o Konaradi, me ka hoao hou ole aku e imi i wahi nona e pakele ai, ahiki i ka lulumi ana mai o ka makehiamoe maluna o kona mau maka, o kona haule iho la no ia hiamoe, iluna o kela papahele puna kameki, i ke kaakaa ana ae nae o kona mau maka, he mau hora mahope mai, ike aku la oia i ka a o kekahi ihoiho kukui, pela hoi me kekahi ie meaai, ame ka pakekewai, he mau meaai hoi a Felipe o ka lawe ana mai i kona wa e hiamoe ana.

            Oiai ua hele maoli no ua o Konaradi a pololi, o kona hele mai la no ia no kahi o le ie meaai, a hoomaka aku la e ai, aole noe he maikai o kela mau meaai, aka nae, aohe ana hoohalahala ana ae iloko o ka w nele, aia ka pono o ka piha aku o ka houpolewalewa, a kamau mai la kahi wai, hala ae la ka maka poniuniu.

            Hookahi wale no ana mea hoonaukiuki loa, o ia ka pokole o kela ihoiho kukui i waihoia iho maloko o kona rumi paahao, noke aku la oia i ke kahea me ka leo nui, e laweia mai i ihoiho kukui hou, ua like nae ia mau hooikaika ana aku me ka ole, oiai aohe mea hoolohe mai i kana kahea.

            Me kela wahi ihoiho kukui pokole nae, i nana pono aku ai ua o Konaradi, ialoko o kona keena pouli, ikeae la oia, na hanaia kela keena me ka paa loa, o hiki ole ai i kona ikaika, ke hoohana aku, a no ka pau e ana o khi ihoiho kukui i kono okoa ‘ mai iaia, e hoopau i kana nana ana, a noho hou iho la oia iloko o ka puoli.

            He heookahi manawa a Felipe o ke komo ana aku iloko o kela keena mahope mai, me na meaai na Konaradi, a i ka ike ana mai a ke kanaka opio i kona enemi kahiko, lele mai la oia maluna o Felipe me he tiga la, a iloko o ko laua aumeume ana i hahau aku ai o Felipe iaia me kekahi pauku laau, ka mea nana i hookupouli aku i ko Konaradi noonoo, me ka waiho lolo ana iluna o ka papahele.

            He mau ka lehulehu mahope mai, oiai no ua o Konaradi e noho ana me ka manao pilihua maloko o kona keena paahao, lohe aku la oia i kekahi mea nakeke mawaho o ka puka, no ka wehe koke ole ia mai nae o ke pani puka, hoomanao ae la oia, aole ka paha o Felipe kela mea, nolaila hoomaka ae la oia e kahea me ka, leo nui i mau kokua, o kana mea i lohe aku ai, o ia no ka nakeke ma kela puka, a komo ana no o Pita, kela kauwa Paele, i nalowale honua ai no kahi i maopopo ole iaia.

            Aia iloko o ka lima o kela Paele, he kukui helepo a i ka ike ana mai i ke kanaka opio, hooho ae la oia, i ka pane ana mai:

            "E hoomaikaiia na lani, no kei loaa ana mai la ou ia‘u me ke ola. Ua kuhihewa maoli au, ua pepehiia oe a make, e kela mau kanaka ino."

            Ku ae la o Konaradi mai kona wahi e noho ana, a hele mai la imua, me ke apo ana aku i ka a-i o ka Paele, a hookahe aku la i kona mau waimaka o ka hooemaikai, no ka hoea ana aku o kona hoopakele.

            "Ua maopopo loa ia‘u, ua hookau mai kela mau kanaka ino. i kekahi poino maluna ou, a ke ike nei au i ka mea oiaio," i pane mai ai o Pita.

            "Pehea oe i manao ai, ua hoopaaia au maloko nei o keia keena, pouli? wahi a Konaradi, i ka mahie ana ae o kona manao kahaha, no ke ano o ka hoea ana aku o ke kokua. iloko o ka wa ana i moeuhane mua ole ai. "E kuhihewa ana ka hoi au, ua make la oe i kela mau kanaka, i kou nalowale, aole he ike hou ia, mai kela la mai, i laweia aku ai oe mai ia‘u aku."

            "O ka make hea aku auanei ia, ua piha maoli kela mau kanaka. me na manao ekaeka. Ua laweia au e laua nouka o ke kuahiwi, a maloko o kekahi ana, i hoopaaia aku ai he pio, na ka make me ke paniia ana aku o ka puka o ke ana me kekahi pohaku nui, eia nae, ua piha ke Akua i ke aloha, no ka mea, ma kela po ana iho, ua haule mai la he kuaua ikaika, ku‘i mai la no hoi ka hekili, a kahe mai la ka wai me ka ikaika mai ke kuahiwi mai, a lawe aku la i ka pohaku nui ma ka puka o ke ana, pela iho la i pakele mai ai au mai ka make mai.

 

            "Ua haalele aku au iauka o ke kuahiwi, a hoi ae la no ke kulaankauhale, ilaila i loaa mai ai ia‘u ka lohe, no ka make ana o kou makuahine.  Aia mau ka hopohopo iloko o‘u, no ka hoopoino mai o kela mau kanaka i kou ola, elike me ka laua i hana mai ai i‘u, nolaila aole au i noho malie aku i ke kulanakauhale, aka ua hele mai la au no ka hakilo ana ia oe, ike ao ame ka po, aole nae o‘u wahi mea a ike iki aku ia oe.

            Ma ka manawa poeleele, e hakilo mai ana au mai kahi mamao ai, a ike i ka hele mai o Felipe me kekahi ie meaai, me ka pakeke wai, nolalo nei o ka hale, nolaila hoomanao ae la au, eia ka oe maanei nei, pela i loaa mai ai maluna ou.

            Aole u i pupuahulu, ma ka hele koke ana mai e hoopakele ae ia oe mai ka mana mai o kela mau kanaka,aka ua kakali malie au, ahiki i kuu ike ana ua hala aku o Felipe no kekahi wahi, pela au i hoea mai la i keia po, me ka hopohopo ole, no ka ikeia mai e kekahi mea."

            "Ke hoomaikai ae nei au i na lani, i ke alakai na mai ia oe, i mea nana e hoopakele ae ia‘u," wai a Konaradi, me ka hopu ana aku i na lima o Pita.

            "Ma kela manawa e laweia ana au no kuahiwi, e hoopaa maloko o ke ana, ua lohe au i ke kamailio o kela mau kanaka, aia ko makuakane ma Amerika Hema, he pio i hoopaaia maloko o kekahi wahi, malalo o ke kiai ana a kekahipoe; a maopopo iho la ia‘u, o keia kanaka, a kaua kuhihewa mau aku ai, o kou makuakane, aole oia he makuakane nou, aka he mea koohewa, a he mea epa, i mkemake e apuhi ia oe ame ka lehulehu apau e noho nei ma keia wahi."

            "Xa maopopo ia‘u, aole keia o kuu makuakane, ia‘u e kaawale ai mai keia wahi aku, e holo aku ana au i Amerika Hema, no ka huli ana i kuu makuakane; nolaila e awiwi kaua, aole e pono e hoomau iho i ka noho ana maanei nei, e loaa pono mai auanei kaua ia Felipe!"

            Me ka hoohakalia ole iho, haalele iho la laua ialoko o kela rumi,a iloko a ka manawa pokole, aia laua iwaho o ka hale kahi i ku ai, me ko laua kokolo ana aku iloko o ka nahelehele ahiki i ke kaawale loa ana i kahi mamao.

            Aole o Konaradi makaemake e hele me ka hookau ole aku i pua maluna o ka he o konoa makuahine, nolaila ako mai la oia i kekahi mau pua makanahelehele, a lawe aku la no ka he o kona makuahine, me ke kaukau ana iho i keia mau olelo:

            "O ke aloha no kou e mama; eia au ke hele nei no ka huli ana i kuu makuakane.  xna no kona loaa aku ia‘u he pio na kona mau enemi, ke kalokalo ae nei au ma ka inoa o na Lani, e loaa ia‘u ka ikaika mailuna mai, no ka hoopakele ana ae iaia, a ina e hoopakele mai ana ke Akua i kuu ola, alaila e huli hoi hou mai no au imua ou e kuu mama aloha," alaila kulou iho la o Konaradi illo, me ka hookahe ana iho i kona mau kulu waimaka o ke aloha makua oiaio.

            Me kela mau olelo kaukau hope i kona makuahine, haalele iho la o Konaradi ialoko o ka ilina o ka halepule, a hoomaka aku  la hele, no ka hooko ana i kekahi hana nui, no ka huli ana i kona makuakane nalowale.

 

MOKUNA XVIII.

 

            Ma ka la 23 o ka mahina o Novemaba, haalele iho la ka mokuahi i ke awa o Nu loka no Bueno Aila, aia maluna o kona oneki, na ohua henui, ma kela huakai a ka mokuahi no Amerika Hema.

            No na la eono o kela mokuahi ma kana huakai moana, ua ikeia aku la ka loli o ke kai, mai ka uliuli mai a i ka halenalena, he hoailona, keia, no ka hookokoke ana aku a ka moku i na kapakai o Amerika Hema.

            Ma ka hora eiwa o ke kakakahiaka o kekahi la mai, ua ike maopopoia aku la ka waiho mai o ka aeone ma na kapakahakai, aia hoi na puu o ka aina ke oiliili mai lan ma kahi mamao loa, me ke ku no i ka hoowahawaha ke nana aku i ke ano o ka aina.

            Aia maluna o kela mokuahi, e hilinai aku ana i ka paehumu o ka aoao, e ku ana he kanaka opio, me ka haka pono ana o kana nana ana iauka o ka aina, o keia kanaka opio e ka makamaka heluhelu, o ka kakou koa no i, o Konaradi Kenekona, ma kana huakai huli i kona makuakane.

            Ua hala okoa he mau la a ke kanaka opio o ke kakali ana, ahiki i ka loaa ana o keia mokuahi e holo ana no Amerika Hema, o kona kau aku la no ia, pela iho la kaua i ike ai iaia maluna o keia moku, e hookokoke aku nei i na kapakai o Amerika Hema.

            Iwaena o na ohua apau maluna o kela mokuahi, me he mea la o Konaradi hookahi, ka mea i hoopiha loa ia me ka hauoli, no kela ike ana aku i ka aina, no ka mea he hookahi wale no noonoo nui iloko ona, no kona makuakane.

            Oiai nae ka moku e hookokoke mau aku ana i ka aina akahi no a ikeia aku na hoailona, no ka nohoia o kela aina e na kanaka, aia na hale keokeo, ke ku mai la, ke holoholo mai la hoi na holoholona ma kekahi kula nui palahalaha, a i ke kokoke ana aku i ke awa, e ku mai ana he hale ipukukui nui, aia hoi iloko o ke awa kekahi mau moku kakaikahi e pili ana ma na uwapo, ke lelele wale la no ko Konaradi oili, no ka hehi aku i ka lepo, o ka aina, i lilo ai kona makuakane he pio na ka poe lokoino.

            Hookomo aku la ka mokuahi Bolivia noloko o ke awa, a ma kahi he hookahi mile ka mamao mai ka uwapo mai, hookuu iho la i kona heleuma, a ma ka ninau ana aku a Konaradi, i ka manawa a kela moku, e halele iho ai i keia awa mua loa, a holo aku no Bueno Aila, hoikeia mai la iaia, iloko o na la elua, e holo aku ai ua moku nei, nolaila aole a Konaradi kakali hou ana iho, aka lele aku la oia iuka o ka aina, me na ohua e ae.

            No ka nui makemake loa no o Konaradi e hoea koke no Buneo Aila. ke kikowaena o kana huakai au moana, o ka hele ana mai, ua ninau aku la oia i na kamaaina, ina paha he mokuahi kekahi e holo koke ana no kela awa, o kahi nae o ka laki, hoikeia mai la iaia, he mokuahi kekahi e haalele iho ana, iloko o elua hora wale no mai kela manawa aku.

            Aole nae o Konaradi hookahi wale no ka mea i makemake nui, e hoea koke no bueno Aila, aka he elemakule kekahi iwaena o na ohua, he elemakule me kona makaaniani gula; he mea i ike ole ia kona kamailio nui, he noho mumule wale no ka hapanui o kona manawa, a ina e kamailio mai, ua kulike loa kana kamailio ana i ka olelo Beritania, me na kanaka Pelekane.

            Ma ka papainoa o naohua, o Makaio Nomana kona inoa, a o Nu Ioka kona wahi noho, a oia kekahi o na kanaka kuonoono, no ka mea he ona oia no kekahi aina hanai holoholona nui, o kahi nae i loaa mai ai kela ike, no ke kulan o keia kanaka elemakule, he ninau pohihihi loa ia, no ka mea aole he manawa a kela kanaka i ikeia ai, e launa mai ana me ka nui o na ohua a ae, maloko wale no oia o ka rumi e noho ai , i na wa apau.

            Maluna o kela mokuahi a Konaradi i kau aku ai, o kela elemakule pu kekahi, me ka hookau ana aku i kona mau ukana he nui, alaila hoi aku la e noho maloko o kekahi rumi uuku, no ka hookaawale ana iaia iho, mai na ohua a ae, no ka mea ma ka nana aku, aole oia i makemake e kamailio wale aku  me kekahi poe.

            Ma kela la holookoa ahiki i ka po ana, aia wale no ka mokuahi ma ka muliwai e holo la, ke ike mau la nae o Konaradi i ka ululaau mauka o ka aina, a i ka uhi ana mai o ka po, hoi aku la oia noloko o kona rumi, no ka hooluolu ana, mamuli o kona makemake e puoho kakahiaka nui ae oia, ma ka manawa e ku aku ai ka moku i ke awa.

            Oiai nae oia e hiamoe ana ma kela po, a mailoko mai o kona hiamoe kulipolipo, me he mea la ke hoomaopopo la oia i ka lalau ana aku o kekahi lima i kon kapa e uhi ana maluna o ke poo, o ka mea apiki nae, iaia i pale ae ai i ke kapa a nana mai la aole ona ike mai kekahi kino kanaka, koe wale no nae, kona lohe ana aku i ka nihi hele o kekahi mea mawaho o kona rumi.

 

Pale okoa aw la oia i ka pa-ku o ka puka aniani, a nana aku la, he pouliuli wale no, aole ona ike aku i kekahi mea. Ke lohe la oia i ka hanu ame ka nonolo mai o ka pukaihu o na ohua e ae e hiamoe ana maloko o ko lakou mau rumi, a o ia ka ua o Konaradi o ke kamailio wale ana iho no iaia:

            "Ea, ua moeuhane ia ka paha au!" alaila haule hou iho la oia hiamoe, me ka uhi ana mai i ke kapa maluna ona.

            Ke hoomoemoe la oia, aole nae he lulumi mai o kona mau maka i ka hiamoe, o kona lilo aku la no ia, a i ka puoho ana ae, eia ka ua ao, a ua pili hoi ka moku i ka uwapo ma Bueno Aila.

            Ua hele moku, aole oia i hele aku e ai, aka kauka‘i aku la kona ai i kona aina kakahiaka, aia a hoea iuka o ka aina. He mau dala helelei no kana, e ukuia aku ai kona mau hoolilo, o ka nui o kana mau dala, aia no ma na wahi like ole o kona puliki, he mau dala gula wale no, oiai ua hele oia ma kekahi o na hale banako o Nu Ioka, e wawahi ai i kana mau dala pepa, mamua o kona kau ana maluna o ka Bolivia, a ma kekahi po, oiai oia maluna o kela mokuahi, ua hoohala nui oia i kona manawa, ma ka humuhumu ana i kana mau dala gula, maloko aku o ka pale o kona pulki, ame ke kuka.

            Hele pololei aku la o Konaradi no kekahi haleaina, mahope o kona haalele ana iho i ka mokuahi, o ka mea apiki nae, aole he maopopo o ka poe oloko o kela haleaina i kana olelo, no ka mea he poe Paniolo wale no koloko olaila, nolaila hele aku la oia no kekahi haleaina okoa, malaiala i hiki ai iaia ke hoakaka aku i kona mau makemake, no ka mea aia iwaena o na Paniolo ma kela haleaina, kekahi kanaka hiki ke kamailio i ka olelo Beritania.

            I kona maona ana, hele aku la oia no ka makaikai ana i kela kulanakauhale ua nui kona makemake e hoohala i ekahi mau la malaila, no ka makaikai ana i ka aina, aka nae o kona nui makemake e hoea koke no kai i hoopaahaoia ai o kona makuakane o ka mea ia nana i kono mai iaia, e hoomau aku i kana huakaihele, no Kana Rosa, kahi hope loa, i loheia ai o kona makuakane, a o kahi n hoi i hoonunaia ae ai kela leka ia Habaki Dukona ana o ka heluhelu ana.

            Ka nana la keia i ke ano o ke kukuluia ana o na hale ma kela wahi, ua kaokoa loa mai na hale mai ma Amerika, aka nae he ku no i ka mahalo ke nana aku, oiai me ka pohaku ka hapanui o kela mau hale i hanaia ai, he kakaikahi loa na hale laau.

            Aole on a ike nui aku i kanaka, o ke kumu, he kikina wela kela manawa o ka makahiki, ua hala aku kekahi poe, no na wahi oluolu, ma ke ano hoomaha, aka nae ma na wahi e pili akn ana i ka muliwai, he nui kana poe i ike aku ai, e nonoho ana malalo o na kumulaau, a e ahu ana hoi ka lakou mau meaai, hoomanao mai la keia, ua hele aku kela poe malaila, mamuli o ka nui o ka wela, elike me kana i ike ai, ma kekahi mau paka o Amerika.

            Ina no kona hooholo he mau la ma Bueno Aila, e hala wale ana kekahi mau manawa waiwai loa, a e nui ana no hoi kona hoolilo o ka noho ana. Noonoo mai la oia, in a no ka loaa aku o ka ike ia Habaki Dukona, ua pakele oia mailoko mai o kela keena, i hoopaahaoia ai oia malalo o ka hale, aole ana e nele ka hoouna mai o kela kanaka i kekahi hoike. i kona puulu ma Amerika Hema, e hana aku i kekahi mea e poino ai kona makuakane; na kela noonoo iloko o ke kanaka opio, i kono ikaika mai iaia, aole he manawa no ka hoohakalia ana iho aka e hoea oia i kahi i hoopaaia ai kona makuakane e pono ai, no ka hoopakele ana ae iaia, mai ka mana mai o ka puulu okipuu.

mai kela wahi aku no Menedozam malalo o ke kumu o ka.

            Ua maopopo loa ia Konaradi he kaaahi kekahi e holo ana Mauna Anade, he ewalu mile ka mamao mai keia wahi aku, a ke hoea oia no Menedoza, ua hiki iaia ke hoolimalima aku i kekahi poe no ka lawe ana iaia a hoea no Sana Rosa, ka pahuhopu o kana huakai.

            Ma ka ninaninau ana aku ma ka hale hoolulu kaaahi, i loaa mai ai ka ike ia Konaradi, ma ke kakahiaka o kekahi la mai, e hoea aku ai ke kaaahi, e holo pololei ai no Menedoza, nolaila hoohala iho la oia i ke koena o kela la ame ia po iho maloko o kela kulanakauhale.

            ma ke kakahiaka nui ae o kekahi la mai, hoea aku la oia no ka hale hoolulu kaaahi, a mahope o ka loaa ana mai o kona kikiki, o ke komo mai la-no‘ia o ke kaaahi, a oiai ua hele ka hale hoolulu a pina i na ohua, me ka hookeke ua o Konaradi i hooikaika aku ai, ahiki i ka loaa ana o kekahi noho kaawale iaia, ma kekahi puka aniani e nana aku la iwaho o ke kaa.

            Ua kupono kela noho i ko Konaradi manao, i hiki ai iaia ke nana aku i na hiona o ka aina, oiai ke kaaahi e holo ana.

            He mau minuke helu wale no kela ku ana o ke kaaahi, ua haawiia ae la ka hoailona no ka hoomau ana aku i ka holo ana, o ka nee aku la no ia o e kaaahi, ke lelele wale la no ka oili iloko o Konaradi, no kona hoea koke aku i kahi o kana huakai, me ka moeuhane mua ole nae, i na pilikia ame na poino e waiho mai la imua o kona alahele.

            Hakalia no a hoomaka ke kaa e holo, oili mai la he hookahi kanaka kalewa buke, me ka ukali aku o kekahi opio mahope on a, me na nupepa, a he kanaka hou aku me kekahi ie i piha i na omole rama, me kekahi kuene hoi, e paa ana i na kiaha.

            Oiai nae o Konaradi e nana ana i ka hale o kela poe, me ka lakou mau mea kuai, ua hookahaha loa ia mai kona manao, i kona ike ana aku i kela elemakule hookahi no, o ka hole like ana mai me ia maluna o ka mokuahi Bilivia, a i kau like mai ai no hoi maluna o ka mokuahi holo muliwai, no Sana Rosa, e noho mai ana ma ka lanai noho ma kekahi aoao o kahi hele o na ohua maluna o ke kaaahi.

 

MOKUNA XIX

 

            I kinohi, ua hookahahaia aku ka manao o ka opio, no kona ike ana aku i kela kanaka maluna o ke kaaahi, aka nae noonoo iho la oia. he hanai holoholona kana hana, maha e holo ana oia no na aina hanai holoholona, no ke knai ana i kekahi mau welo i loaa ole iaia, nolaila hoomau loa ae la oia i keia manao kahaha on a.

            Ike aku la oia, e heluhelu ana kela kanaka i kekahi nuoeoa Paniolo, nolaila hoomaopopo iho la oia. Ua kamaaina kela kanaka ma Amerika Hema, no ka mea ua hiki iaia ke heluhelu i ka olelo a na kanaka Paniolo.

            Ke nana la o Konaradi ma na wahi aoau maluna o kela kaaahi, he poe kanaka wale no o na lahui e, ua ku a mehameha maoli oia e noho la, me kona makemake loa e kamailio pu me kekahi mea, no ka ninaninau ana aku i na ano e kela aina. He hookahi wale no mea maluna o ke kaaahi ana i maopopo, he hiki ke kamailio i ka olelo Beritania, oia kela elemakule e noho mai la, heluhelu i ka nupepa, nolaila ku aw la ua o Konaradi iluna, hele aku la a hoopa iho la maka poohiwi o ke kanaka elemakule, me ka wehe pu ana ae hoi i kona papale, a aku la:

            "E huikala mai oe ia‘u, no keia mahaoi, o ka hele ana mai la e kamailio ia oe.  Ua ike au ia oe maluna o ka Bolivia, ua kau like mai kaua mai Nu Ioka mai, a oiai hoi he mau ohua like kaua maluna nei o keia kaaahi, ke makemake nei au, e loaa he hoa no‘u e kamailio pu ai, aole hoi ka noho mumule wale iho no."

            O ka mea nae nana i hookahaha loa mai i ka manao o ke kanaka opio, o ia no ka pane ana mai o kela elemakule iaia ma ka olelo Paniolo, he wahi ike uuku loa ko ua o Konaradi i kela olelo, nolaila kamailio aku la oia ma ke ano e loaa aku ai ka ike i ka elemakule, aole ona ike i kela olelo, me ka i ana aku:

            "Aole e hiki ia ia‘u ke kamailio i ka olelo Paniolo, koe wale no he mau huaolelo uuku loa.  Ua ike au, he hiki no ia oe ke kamailio i ka olelo Beritania, pela au i manao mai ne, o oe wale no ke kanaka maluna nei o keia kaaahi, e hiki ai ia‘u ke kamailio ma kela olelo."

            O ka pane a ka elemakule no keia mau hoakaka a ka opio, o ia no kona hoomau hou ana mai ke kamailio ana ma ka olelo Paniolo, me ka luliluli ana mai o kona poo, me he mea la , aole loa he maopopo iaia o na mea a ke kanaka opio e kamailio aku ne iaia.

            "He oiaio anei, ua kuhihewa mai nei au ia oe? Aole anei, o Makaio Nomana kou inoa, a he ona oe no kekahi mau aina hanai holoholona nui?"

            Luliluli ae la no ke poo o ua elemakule nei, me ka hamunamu ana iho ma ka olelo Paniolo, me ka piha hoonauikiuki, no ka hoouluhua aku o ke kanaka opio iaia; nolaila i ka loaa ana o ka ike ia Konaradi, he hana hiki ole loa ka loaa ana he kamailio pu ana me kela elemakule, o kona hoi mai la no ia, no kona wahi kahiko a noho iho la me kanalua nui ana iloko ona, no ke ano e maoli o kela kanaka, no ka mea aole loa i kuhihewa ka ike a kona mau maka, o kela no ka elemakule i holo like mai ai me ia maluna o ka mokuahi hookahi, a ua lohe no hoi oia, i kona kamailio ma ka olelo Beritania.

            Alawa iki mai la ka nana ana a ke kanaka elemakule me kona makaaniani gula, no kahi a Konaradi e noho ana, me ka hoopinana ana ae i kona mau poohiwi, alaila huli aku la ke alo i kahi e, me ka hoomau ana aku i ka heluhelu ana i kana nupepa.

            Mamuli o ka hooko ole ia ana o ko Konaradi makemake, e kamailio pu me ke kanaka elemakule, ua lilo ia i mea hoopilikia nui mai i kona noonoo, ahiki i kona namunamu liilii ana iho:

            "Aole loa ua he kanaka hupo! ( ) kela o ke kanaka elemakule hookohi a‘u i ike ai maluna o ka mokuahi bolivia, a maluna no hoi o ka mokuahi, nana i lawe mai ia‘u a Sana Rose.  Aole e hiki i kela kanaka ke pulapu mai ia‘u; aka nae heaha la ke kumu nui o kona ae ole ana mai e kamailio pu me a‘u, me ka hoolalau ana me he mea la, aole ona ike i ka olelo Beritania.  Me kuu ike pono aku no ka i kona kamailio pu me ka kapena o ka mokuahi Bolivia, a lohe pono aku hoi i na mea e kamailioia ana e laua ma ka olelo Beritania, o kona hoole mai nei no ia ia‘u. Aole loa e poina ka olelo Beritania, i kekahi mea, i makaukau i ke kamailio ana, i kela olelo!"

            X ka hooki ana iho nae o kela namunamu ana a Konaradi, nana hou aku la oia ma kahi i noho ai o ke kanaka elemkule, a ike aku la, i ka onioni o ua kanaka nei e hoike mai ana kona ano, i ka lilo o kela hele ana aku i kona noonoo.  Aole he nana mai o ua kanaka nei ia Konaadi, aka nae, me he mea la, ke hoomaopopo mai la no oia, aia maluna mau ona, na maka o ke kanaka opio kahi i nana aku ai.

            "Ke ole au e kuhihewa, ua hana kela kanaka i kekahi karaima," i namunamu hou iho ai no o Konaradi iaia iho. "Ina o kela i‘o ka mea pololei, alaila eia oe e keia kanaka ke holo mahuka nei, a aole o Makaio Nomana kou inoa oiaio; aka i wahi e hookolo ole ia mai ai e na makai, pela iho la oe i hoololi ai i kou inoa."

            Ua paa loa ko Konaradi manao, pela ke kulana oiaio maoli o kela elemakule, a ua maopopo no paha i ua elemakule nei, na mea a ka opio e noonoo aku ana nona, o ke ku ae la na ia o ua elemakule la iluna, hapai ae la i kona paiki, a haalele iho la i kela kaa no ka hoi ana aku, he kaa okoa e noho ai.

            "Aia hoi paha la, ua ike kela kanaka, eia au ke hakilo loa aku nei iaia, pela i hiki ole ai ke hoomau iho i ka noho ana maluna nei o keia kaa," i nalu wale iho ai no o Konaradi iloko ona.

            I ka hala ana aku o ka elemakule, pau aku la ko Konaradi noonoo hou ana, a hoohuli aku la oia i kona noonoo, ma ka nana ana i ka hiona o ka aina. Ke ike la oia i na kauhale, ua hanaia me ka pohaku unihihpa, he poe Paniolo wale no na kanaka ana e ike aku la, maluna o ko lakou mau lio, he like wale no ko lakou mau lole, e komo ana, me na papale laulau nunui, e hiki ole ai ke ikeia aku ka like ole o kekahi kanaka mai kekahi ae.  Aia hoi ka pipi ma kela ame keia wahi o ka aina, me na lio kakaikahi e o-a ana iwaena o ka pipi.

            Ma ka hoea ana aku no ka hale hoolulu kaaahi mua loa, ua hele no hoi a piha i na kanaka, mai na kane a na wahine, o ka mea nae nana i hookahaha loa mai i kona manao, o ia no ka nui o na wahine puhipaka, me he mea la, o kekahi ia o na mea haaheo loa i ka noonoo o na wahine, me ka hilahila ole.  i ka poe e nana aku ana, aka e kau ana ko lakou mau ipupaka nunui, a e hoopu-a ana hui i ka uahi, mai ko lakou mau pukaihu ma, a ua hoomau hou aku la no ke kaaahi i ka holo ana.  He ano oneanea aku ia wahi o ka aina, eia nae, ua piha no ke kula i na holoholona, a e lele ana hoi na manu o na ano like ole, mai ke nui a ka liili, na manu a Konaradi i ike mua ole ai ma Amerika.

            O ka noho hoi ia o ua o Konaradi ahiki i kona ike ana iho i kona pololi, kauoha aku la oia i ke kuene oluna o ke kaaahi, e lawe mai i mau meaai nana. aole no he maikai loa o na meaai, aka nae aohe hoohalahala ana ae. aia ka pono e ka piha aku o ka opu, hooponopono aku i ka wa e hoea ai no ka aina paa.

            I ka uhi ana mai o ka po, komo pono aku la ke kaaahi, i kahi oi aku o ke oneanea o ka aina, he ululaau wale no ke ulu ana ma kela ame keia aoao o ke alahao, me ke kakaikahi loa o na kauhale e ikeia aku la i ke ku mamao mai kekahi wahi a i kekahi.

            Aole e hiki ia Konaradi ke hoi aku maloko o ke kaa i hoomakaukauia me na pono hiamoe. no kona ike iho, ke hapa loa mai la kana mau dala. nolaila okuu malie iho la no oia maluna o kona noho, me ka hoomanawanui, aia ka pono o ke ao ae.  Ma kela po, ua nui na moeuhane like ole i loaa i ua o Konaradi, me he mea la nae, iloko o ia mau moeuhane apau, o ka helehelena o kela elemakule me na makaaniani nunui, ke ku mau ai anaimua ona.

            O ka mea ano nui ka hoi ma kela mau moeuhane, o ia no ka maopopo loa o ke karaima a ke kanaka elemakule i hana ai, a e holo mahuka i‘o ana no oia mai ka paa aku i ka hopuia e na kanaka o ke aupuni; a ua maopopo hoi i ua kanaka nei, ua ahuwale kona mau ano apau i ke kanaka opio, nolaila ua hoolala kela elemakule i na hana, e hoopoino mai i ko ia nei ola.

            Ua paanaau maoli kela mau moeuhane iloko o ka noonoo o ke kanaka opio, ahiki wale no i kona puoho ana ae ma kekahi kakahiaka mai, eia ka ke hookokoke aku la ke kaaahi no kekahi hale hoolulu. aole no hoi i loihi kela kakali ana. mahope o ke ala ana ae o ua o Konaradi, ua komo aku la ke kaaahi o ka hale hoolulu.

(Aole i pau.)