Ka Nupepa Kuokoa, Volume LIX, Number 39, 30 September 1921 — Hoopau Ae na Lunakiai i ka Olelo Hooholo Pau ka Noonoo Hou Ana i ka Waiwai o Allen i Kahua no ka Hale Aupuni Kalana AIA KA NOONOO O KA PAPA I KAHUA HOU Manaoia e Holopono Ana na Kukakuka Ana no ka Waiwai o Cooke i Kahua Hale Aupuni [ARTICLE]

Hoopau Ae na Lunakiai i ka Olelo Hooholo

Pau ka Noonoo Hou Ana i ka Waiwai o Allen i Kahua no ka Hale Aupuni Kalana

AIA KA NOONOO O KA PAPA I KAHUA HOU

Manaoia e Holopono Ana na Kukakuka Ana no ka Waiwai o Cooke i Kahua Hale Aupuni

Ma ka halawai a ka papa o na lunakiai o ke aupuni kulanakauhale ame kalana o ka noho ana ma ka po Poalua nei ua hooholo ka papa e hoopau i ka olelo hooholo i hanaia ma kekahi mau pule aku nei i hala no ka hoopii hoahewa ana i ka apana aina o Allen i kahua no ka hale aupuni kulanakauhale ame kalana i hoolalaia ai a maluna o ia apana aina e kukuluia ai ka hale aupuni. He olelo hooholo ka i hookomoia ae ma ia halawai e ka lunakiai Charles Arnold e hoama@a ana i ka uku ana aku i ka huina o $90,000, ka huina i kohoia no ka apana o Cooke e waiho nei makai iho o ke alanui Moi ma ka aoao ma Ewa iho o ke alanui Puowaina. He kumuhana keia i hapaiia ae no ka noonoo ana ma ka halawai i hala a ka papa i ka manawa i hoaponoia ai na kukakuka ana aku no ka weheia o keia apana aina o Cooke no ke kuai. Aka nae, ua hoopanee iki ia ka hooholo loa ana mamuli o kekahi mau hoakaka aohe i holopono loa na hana e pili ana i ka hoopau loa ana aku i ka olelo hooholo e hoahewa ana i ka apana aina o Allen. Aole o mak@@@ e kukulu ko ke aku i ka hale aupuni kulanakauhale, wahi a ka lunakiai Pachecco ma kana hoakaka manao ana, aka nae he mea ano nui no ka loaa ana mai o kekahi kahua kupono i keia manawa. Ua heluheluia ae ka hoike a ka enekinia kulanakauhale Fred Orht no na hana hou no ka apana o Kaimuki a na kauohaia ae e waihoia ma ka papa no kekahi pule. Ua waihoia aku ka hoike i ke komite waiwai no ka noonoo ana. O na hana hou no ka apana mawaena o na alanui Liliha Wyllie ame Judd ua aponoia e ka papa. He mau olelo hooholo ka i hooholoia e hoamana ana no ke kuai ana i kekahi kahua no ka hale kinaiahi maloko o ka apana o Kalihi ame na hoolilo o $1000 no ka hoopau ana ae i na wahi i poino o ke alahaka o Wahiawa. Na Koho no ke Alanui Kamehameha. Ua apono ka papa i ka hanaia aku o ka pauku elua o ka mahele ekahi o ke alanui holopuni Kamehameha mai Heeia aku ahiki i Kaalaea a ua kauohaia ka haawi ana ae i na mea koho. Ua hooholoia ma ka heluhelu ekahi ana ka hana o ka hoomoe ana i laina paipu wai 6 iniha ma kahi o ka laina paipu wai 2 iniha e moe nei i nei manawa maloko o ka apana aina Spreckels ma Kapunahou.