Ka Nupepa Kuokoa, Volume LIX, Number 50, 16 December 1921 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, HONOLULU,T.H. POALIMA, DEKEMABA 16 1921.

______________________________________________________________________________

 

He Moolelo no ko

Helena Simoa Lanakila Ana

A I OLE

Ka Hoowalewaleia Ana o Halebatona

 

            “He mea oiaio ia au i olelo mai la, he kanaka u’i a oluolu oi, a o ua kanaka la au e mahalo mai nei la ea, e hoomanao oe i keia, aole ia he kanaka okoa aku, o kou anakala ia; he kanaka lokomaikai a puuwai hamama oia elike me kekahi keikialii, no kekahi manawa mahope mai ua hoololiia ae no ko’u noonoo me ka makemake pu nona, a ke manaolana nei au ina no ko’u halawai hou aku me ia e hoike aku ana no au ia manao o’u iaia” wahi a ka makuahine, me ka imoimo ana mai o kona maka.

            “ E Helena, ua piha loa au i ka hauoli i keia la no ka hui hou ana me ko makuakane, mahope o ko maua kaawale ama no iwakalua makahiki a oi, a ke ulu pu nei nohoi keia manao iloko o’u no ka huikala ana aku i kuu enemi ino loa, oia o Mrs. Elawoka,” a hooki iho la o Mrs. Lanakasa i kana kamailio ana me ka paa o kona manao e huikala aku i kona enemi.

            “Malia paha pela ana no ko Mrs. Elawoka manao, ina no ko olua halawai ae,” i pane mai ai o Helena.

            “He aloha no au i kela wahine, o kela wahine ke aloha ole, no ka mea, mamuli ona i hauwawaia ae nei ko kaua mau kee ma keia wahi, a i ka pa ana mai hoi ia Miss Lamasona, hele loa i ka loa ame ka laula, a ke paanaaau loa mai no hoi ia moolelo i kooonei poe, aka e ninini wale no nae lakou i ka wai mawaho o ka omole aole e komo ana iloko, e haukae ana ka omole i ka lepo, aka, o ke komo ana iloko aole e hiki oiai ua pani ka oiaio i ka waha o ka omole e hiki ole ai i ka hakuepa, ka imihala ame na manaoino ke hoololi i ka mea maemae maloko i mea haumia a paumaele.”

            Nana pono mai la o Helena i na maka o kona makuahine me ke ano pahaohao i ka manao o ka makuahine no ia olelo ana ae la ana pela, eia nae, aohe ninau mai no ko ka makuahine hoakaka ana aku iaia i mea e pau ai kona pohihihi.

            “Ke manaoio nei au me ka maopopo loa ua komo kuhohonu loa o Mrs. Elawoka ikoko o ka pilikia; aole no e nele ana ke kikeke o ka lunamanao iloko ona no ka hoopololei ana ae iaia iho no kana hewa i hana ai, elike no me kana mau mea i hana ai, pela no e uhai mai ai ka pilikia maluna ona. O ka hewa ana i hana aku ai ia ha’i me ka manao o ha’i ke poino ana, eia nae, e hoi hou mai ana no ia mau poino a kau maluna o kona poo ponoi.”

            “Aole hoi oe e mama i hoakaka mai nei i ke kumu o kou halawai ana me Mr. Lanakasa i keia la,” wahi a Helena, mahope o kekahi minuke o kona hamau ana.

            Alaila, hoakaka aku la ka makuahine i ke ano o kona halawai ana me Mr. Lanakasa, elike me ia i hoike mua ia ae nei ma kekahi mokuna i hala, oia hoi ko laua hoi ana aku a loko o ka Hokele Anetala, ko laua huai pakahi ana i ko laua mau moolelo i na wa aku i hala a o ka mihi ana aku a mihi mai no ka laua mau hana kuhihewa o ka hana ana o ia mau la i kaahope aku.

            “Ua pilihua loa kona noonoo me ka walania loa, e Helena, no kona hana ana mai i ka mea i ku-e loa i kana keiki ponoi, oia oe ma o ka hooke ana aku i ko Robaka makemake e mare me oc,” walii a ka makuahine, mahope o kona hoakaka ana aku i na mea oiaio apau no na olelo i kukaiia mawaena ona ame ke kane.

            “ Alaila akahi no oia a ike iho la i kona hewa no ia ku-e ana ona, ea?” i ninau aku ai o Helena, me ka pii ae la o ka ula ma kona mau papalina, oiai oia e noonoo ana, pehea la ka nui o ko Mr. Lanakasa hoahewa ana mai iaia iho imua o kona makuahine.

            “Ae ; ua ae mai oia me ka olelo pu mai ua kaili i’o no oia ia Robaka i ka aina e me ka manaolana ma ia hana ana e kaawale loa ai ko Robaka hilinai ana mai maiuna ou, a pela hoi oe iaia, me kona hoike pu, mai nei no kona makemake ole e mare o Robaka me ke kaikamahine a kekahi wahine kelalole.”

            “O, kanaka hoohaahaa maoli no kela ia oe! Aole oe he wahine kela lole o ke kulana haahaa, ua hana oe ia hana wahine kela lole o ke kulana haahaa, ua hana oe ia hana aole no ka poe lopa o Nu Ioka, aka, no ka poe haituna wale no, he poe i hiki ke kokua a hooholomua i kau hana, a pela no hoi i nui ai ka pomaikai i loaa ia oe i kela mau la. O, he keu aku ka kela a ke kanaka lapuwalle maoki!” wahi a Helena, me kona ike maopopo iho no hoi i ka mau o ka naaupo o kona makuahine no ka hana ino a Mr. Lanakasa i hana malu ai mawaena ona ame Habati-Alekona.

            “Pela ao, laka, e kuu Helena, aole i maopopo iaia ia manawa owau e oleoia ana i Mrs. Simoa, a he wahine kelaloli hoi o kana wahinemare no ia, a o oe no hoi kana kaikamahine ponoi.

            “Mai loaa no paha ka ike iaia ina no hoi i noii pono oia nona iho,” waho a Helena i pane aku ai i ka makuahine.

            “Aole paha o ka lilo ana o kekahi wahine he kelalole haahaa ka hana, a hana e ae pahaa he kumu kupono ia e olelo iho ai i ke kupono ole e lilo ai i hoa no kekahi kanaka waiwai a hanohano paha; he nui na wahine i hanai a i hoonaauao maikai ia a i lilo nae i poe ilihune a i nele hoi i na mea e pono ai ko lakou ola ana. Aohe ahonui a alolia iloko o’u no ka poe hiki ole ke uumi iho i ko lakou mau manaoino,” wahi hou a Helena o ka hooki ana iho i kana olelo ma ka hoowahawaha loa iloko ona no ke kanaka i hooikaika e hookaawale aku ia Robaka mai iaia aku.

            “E Helena, aole au i ike i kekahi manawa mai mua mai i ike aku ai au i ka paakiki o kou manao ame ka ikaika o kau olelo, me he mea la e olelo oloa mai ana no oe aole e huikala aku i ko makuakane. No ke aha keia ikaika loa o kau olelo ana i keia la, aole hoi oe he kaikamahine i maa ia ka ikaika o kau mau olelo mamua elike me ia a’u e lohe aku nei; aole au i lohe iki mai mua mai lou olelo hoahewa ikaika loa i kekahi mea elike me keia, o ka oi aku oia ke ku-e ana aku i ko makuakane ka mea no hoi au i makemake mau ai e ike, a oiai ua aneane loa hoi oe e ike aku iaia, a ke hoopuka mai nei nae hoi oe i na olelo a’u e ike aku nei, me he mea la aohe ou makemake e ike aku iaia?”

            No keia mau olelo hoahewa a ka makuahine o ka pane ana aku la, pii ae la ka ula ma ko Helena mau papalina a aneane loa oia e pane hou mai, no ka mea, ua ike aku la ka makuahine i ka owaka ana ae o kona mau lehelehe, eia nae, ua upoi ou iho la no oia.

            Ona huaolelo i makaukau loa e oili mai ko Helena mau lehelehe mai a i aneane loa hoi e puka mai, oia kona hoakaka mai i ka mea e pili ana i ka leka ame ke kelekalama a Mr. Lanakasa o ka hoouna ana mai ia Habati a i loaa ai ia Mere, a Mere no hoi o ka haawi ana mai iaia, aka, i kona noonoo hou ana iho aole pono i kona makuahine e ike ia mea, kaohi hou iho la oia ia manao a pane mai la nae ma ke ano hoopuhemo i ka i ana mai.

            “Ma ko’u manao ua kupono loa kela kanaka e hookauia aku na ahewa ana he nui no kana mau hana hewa lehulehu i hana mai ai ia oe a ia’u pu.”

            “A eia hoi paha, ua aloha au iaia, e Helena, me kuu naau apau ame kuu uhane pu, ua aloha au iaia, a ua huikala aku no hoi au iaaia no kana mau hewa apau o ka hana ana mai ia’u,” i pane aku ai ka makuahine me ka haalulu o kona mau lehelehe, me he mea la e noi okoa mai ana no i ke kaikamahine e hoopau i kona manao inaiana i ka makuakane.

            Ua ku koke ae la o Hekena iluna ia manawa a nanan mai la i ka helehelena o ka makuahine e kau pono aku ana imua ona. Ua hiki ole iho la iaia ke hoopaakiki hou i kona naau ia manawa no kona ike mai i ka helehelena ku i ke aloha o ka makuahine, a hoahewa iho la kona lunaikehala iaia. Hele mai la oia a ku ma ka aoao o ka makuahine, apo iho la i ka a-i, a honi iho la me ka waimaka e haale mai ana ma kona mau lihilihi, a ninau iho la.

            “Ua aloha i’o no anei oe iaia?” wahi ana; “aole anei he manaoino i koe a hoahewa hoi iloko ou nona e mihi iho ai oe mahope no kou wikiwiki loa i ka haawipio ana ia oe iho malalo ona?”

            “Ae, ua aloha au iaia, a aole no hoi au e mihi iho ana me ka minamina no ia haawipio ana aku a’u malalo ona ma nei mua aku.” i pane ae ai ka makuahine. “O ka’u wale no e ahewa nei ia’u iho oia ko’u huikala ole ana aku iaia me ka imi ole ana e hoolaulea ia maua he manawa loihi i hala aku nei. Ua poina anei ia oe ka’u mea i hoike aku ai ia oe mamua aku nei owau pu no kekahi hana hewa aku iaia, a owau pu no hoi kekahi i makemake i kana huikala ana mai, a aole no hoi i emi iho kona hoehaehaia ana ma ka manao mamua o ko’u?”

            “O, e kuu Helena, ke ike nei au i ko’u hoohaahaa loa ia, a e hoike aku no hoi au ia oe i keia, ua hoopiha loa ia mai au i ka hauole no kuu hui ana me ia i keia la mamuli o keia kunu, ua luia ae na manao kaumaha apau mailuna ae o’u, a ua loaa aku no hoi ka maha i ko makuakane no kona huikalaia ana aku.

            “O,  ina pela, e huikala mai oe ia’u, e mama! Ma nei mua aku aole au e hoehaeha hou aku ana i kou uhane; aole loa au e hoopuka hou aku ana kou uhane a e hoopauia ai hoi kou houoki!” alaila honi hou iho la oia i ka makuahine me ka naau i piha i ke aloha, elike me ke ano o ke keiki aloha makua oiaio.

            “Aole o kou mihi ana mai la oia ka mea e lawa ai ko’u makemake apau iho la no malaila, aole; o ka’u e makemake nei ia oe e hana aku e ike aku oe iaia ma ke ano he makuakane oia nou a o oe hoi kana keiki, e aloha aku oe iaia a e hookipa mai oe i kona aloha iloko o kou puuwai elike me ia au i makemake mau mai ai e hoike aku au ia oe nona i na manawa aku la i hala, kela mau manawa au e noke mau mai ana i ka niele ia’u, no ka mea, e pili ana i kou makuakane, a oiai hoi eia oia maanei i keia la, e pono oe e ike aku iaia, a o kou mau manao hoomauhala nona o na manawa aku la i hala, e hoopau loa e oe i keia manawa; elike me kuu aloha iaia, pela hoi oe e aloha aku ai iaia; hoopoina i na mea i hanaia o ka wa i hala, a e nana aku ia mua.”

            Aohe pane a Helena no nei mau olelo aku la a ka makuahine, hooekeu wale ae la no i kona mau poohiwi, me he mea la ua kikoia aku paha oia e ke kopiana a i ole e ka meli hope eha paha, me ka pii pu ae la o ka ula ma kona mau papalina.

            Ke ku la oia me ka noonoo.” e aloha aku nei au i ke kanaka i hehihehiku ia’u ame kuu makuahine me he mau mea ole la no iaia, a i ole me na wahi opala paha e pekupeku wale ia an e na wawae, a o ke kanaka hoi nana i ke’ ake’a ae mamaua oke alahele me ke kaili ana ia Robaka kuu mea aloha mai ia’u aku i ole ai oia e mare mai iaia?”

            Olelo wale iho la no oia iaia iho aole e hiki ana iaia ke ike aku ia kanaka nana oia i kumakaaa, aole no hoi oia e hopu iki aku ana i ka lima o ka kanaka i hoolilo iaia iho i enemi ino nona a no kona makuahine pu.

            Eia nae, me ia paa no o kona manao aoole e ike aku ia Mr. Lanakasa ma ke ano oia kona makuakane, ke noonoo pu la no oia no ka pono o kona makuahine aloha, aole pono iaia e hoike ae i kekahi ano ma kona helehelena a ma kana mau okelo paha e ike mai ai ka makuahine oia mau no kona inaina, aole no hoi oia e hoike iki aku ana i ka makuahine i kekahi mea e pili ana i ka leka ame ke kelekalame a ua o Mr. Lanakasa o ka loaa ana iaia.

            Ma kana noonoo iho ua manaoio maoli no o Halebkona Lanakasa o ka meahuna mawaena ona ame Habati e nalo ana ia o laua wale no ke ike iho ia mea; aole o Mr.Lanakasa e hoike ae ana ia mea, oiai nae, ua ahuwale kana noa huna, a i ole ai e lilo ia mea huna a Mr. Lanakasa i mea hoehaeha aku i ka noonoo o kona makuahine hooholo iho la oia iloko ona ia manawa aole oia e hoike iki aku ana ia mea iaia.

            A hala kekahi manawa o ko Helena noonoo anan, alaila pane mai la i ka makuahine.

            “E hoomanao oe, e mama aole au i halawai kino me Mr. Lamakasa mamua, aole no au i ikemakaiaia, e loaa ai la ia’u ka ike nona, aka hookahi wale no manawa ma ka la aku la no i hala.”

            “Pela? Aoia manawa oia ko haule ana mailuna iho o ka lio, ea maloko o ka Paka Kuwaena o Nu loka?” i ninau aku ai ka makuahine.

            “Nawai i olelo mai ia oe ua haule au i ka lio?” wahi a Helena me ka hulili ae la o kona mau maka.

            “Na Mr. Lanakasa ponoi no; ua haule ka hoi oe i ka lio la aohe nae hoi oe i hoike iki mai ia’u no ia haule ana ou, hunakele loa oe, no ko maka’u paha o nuku aku au ia oe a i ole o ae ole hou ia aku paha oe e hele me ko aikane i ka hololio,” wahi a ka makuahine o ka pane ana aku.

            “Aole i’o no hoi au i hoike aku ia oe no ia haule ana o’u; aohe no au i eha, i hoike ole aku no hoi au ia oe no kuu makemake ole e lilo ia i mea hoehaeha aku i kou manap. Aole no au i maopopo iki i ka inoa o ia keonimana ia manawa, a eia a mahope iki i ka inoa o ia keonimana ia manawa, a eia a mahope iho i ka manawa a maua me Habati e kamailio ana no kela haule ana o’u mailuna iho o ka lio, ia manawa i hoike mai ai o Habati ia’u o Mr.Lanakasa ka inoa o ke keonimana nana i hookau ae ia’u iluna o ka lio, a oia ka ko ua o Habati hakuhana,” i hoakaka aku ai o Helena.

            “He mea kupaanaha maoli no i ka nana iho ka hoike ole ia ana mai o kona inoa ia’u ahiki i kela la ia loaa mai ai ka leka a Makoli e hoakaka mai ana no Mr. Lanakasa, ia manawa akahi no a loaa ia’u ka ike, eia ka o ka anakala ia o
Robaka.” wahi ana. “E hoea mai ana oia ianei i keia wai ana me kaua,” wahi hou a ka makuahine, mahope o kona nana ana ae i ka manawa ma ka uwaki e kau mai ana ma ka paia.

            “ O Robaka!” wahi a Helena o ka hooho ana ae. “Heaha la kana i manao mai ai no’u e mama, i kona manawa i ike mai ai ia’u i ka hele ana ae mamua ona i kuu ike ana aku iaia ua haka pono loa aku ka’u nana ana iaia, me ko’u hoike ole aku nae ma ko’u helehelena ua ike mua au iaia?”

            “O e kuu Helena, e lilo ana ia i mea hoehaeha loa aku iaia, a no ka mea, aole oia i hoolili iki i kona manao paulele maluna ou, oia mau no kona hilinai, ke aloha ame ka paulele maluna ou, a ina no kona hoea mai, e lohe pno aku ana no oe i kona manao,” i pane aku ai ka makuahine.

            “ Owau pu no kekka hi i hoehaehaia ka naau, no ka mea i kela minuke no a u o ka ike anan aku i kona helehekena, a hoomaopopo aku la no hoi o Robaka oia, ua like au me kekaahi mea i hoololoia; me he mea la ia minuke, ma ko’u ike iho ia’u, ua pau ka ikaika o ko’u mau aahuki; aole au i moeuhane mua oia pu kekahi e noho mai ana iwaena o ka ahakanaka, ua manao mau au he mau haneri mile no la kona mamao mai a kaua aku, eia ka ua hoi mai, a oia pu kekahi e noho mai ana iwaena o ka ahakanaka, no ia kumu, aole mea hiki ia’u ke hana aku, a i ole haawi aku la hoi i kekahi kunou iaia, o ka nana pono wale aku no.”

            “ A me he mea la oia pu aku la no hoi paha kekahi ia oe i kona manawa i ike mai ai, aole paha oia i manao o oe pu kekahi maanei ia manawa,” i pane aku ai ka makuahine me ka akaaka ana aku, a i hou aku la “E hoopauia ae ana nae ia mau manao pohihihi pakahi o olua ke hui ae olua i nei ahiahi, a hoike kela ame keia o olua i ko olua mau manao pahaohao pakahi.”

            Ia manawa ua nohoalii hou iho la kela manao hookuoo o Helena mamua aku, a ke ike mai la ka makuahine i ka pupuku ae o kona mau maka i kekahi manawa, no ka mea ia manawa ua ulu hou ae la ko Heekena hoomanao ana no ka leka me ke kelekalama a Mr. Lanakasa i hoouna mai ai ia Habati a e waiho ana hoi ia mau mea me ia ia manawa.

            “ E hoike aku anei au ia mau mea ia Robaka ke hiki mai oia?” wahi ana o ka noonoo ana iho. “E hoike aku aneiau ia Robaka no ke ko’iko’i maoli o ka hewa a ka anakala ona o ka hana ana mai maluna o’u a maluna pu ona? Ina no ko’u hoike aku ia mea ia Robaka, ke hopohopo e nei au aole paha o Robaka e aloha hou aku ana i ka anakala ona ma ia hope aku, ekonakona ana oia i kona anakala, elike no hoi me a’u e ike nei i nei manawa, me ka nana ole ae he makuakane oia no’u. O e hoike aku anei au-e hoike aku anei au iaia ia mau mea?”wahi o kana nonau iaia iho.

            “ E Helena, heaha kau mea e noonoo la? He manao nui ka iloko ou e hana la, akahi maoli kou mumule i ka’u nana aku ?” i ninau aku ai ka makuahine, oiai oia e hakilo loa mau mai ana i ko Helena helehelena, a no ko Helena kamailio ole aku, hopu okoa mai la oia i ka lima a hoonioni mai la, a pane hou mai la.

            “Ke ike nei au i ko’u lilo ana i mea hoehaeha aku i kou manao, e kuu mama aloha,” wahi ana me ka walania loa o kona naau ia manawa, “ a i ko’u ike iho ia’u i nei manawa me he mea la he uhane haukae paha ka i komo mai iloko o’u, a na ia uhane haukae i hoopiha ia’u me na manaoino. Aka, e mama, e oluolu oe e haawi mai i wahi manawa uuku na’u e noonoo ai no’u iho,” a hooki iho la kana kamaiiio ana.

            “Hamau!” wahi a ka makuahine, i kona manawa i lohe aku ai i ke kani ana mai o ka bele malalo; o laua paha kela i hoea mai la! E kuu Helena, e a’o mua aku au ia oe e ike aku oe i ko makuakane, e hoopau oe i kou manao nonohua nona, no ko’u pono, e ae mai ana anei oe i keia noi a’u? Mai hoike aku oe i kou helehelena ame kau olelo e ike mai ai oia he manaoino kou nona, aka e hoi ke aku oe he aloha oe iaia.

            He kanaka maikai oia, he kanaka puuwai hamama, i lohe mai oe, e kuu Helena. Aole kanaka e nana aku ana i kona helehelena, a e lohe aku ana hoi i kona mau manao, a e heluhelu aku hoi i kona mau maka me ka loaa ole o ka makemake ame ka ume kokeia aku o ka noonoo a pili aku iaia, he maikai oia ma na amo apau,-ou mau maka ua like loa me kona, o kou mau kiionohi ua like loa me kona a i kela ame keia makahiki o kou ulu ana ae ua hoomahuahua mau ia ae ka like aku o kou helehelena me kona, a ina he keokikane oe, e kulike loa ana kou helehelena me kona.”

            Aohe pane aku o Helena, a ke lohe pu aku la no hoi laua i ka halulu mai o na kaina wawae ma ke alanuipii, a ia manawa ke naka wale la no ko Helena kino mau ke poo a hala ilalo o ka wawae.

            “E Helena, e hoomama oe i kou noonoo! mai maka’u oe a mai hopohopo hoi i ka halawai aku me laua; hele koke oe e palaki ae i kou lauoho, alaila iho pu ae kaua i ka rumi malalo no ka ike ana aku ia laua,” wahi a ka makuahine o ka pane ana ae.

            “ E mama, aole hiki ia’u- aole hiki ia’u ke ike aku i kekahi mea okoa mawaho ae o Robaka i nei po, aole no hoi e hiki ia’u ke halawai aku me Robaka me ka noho pu mai o kekahi mea okoa, o Robaka me ka noho pu mai o kekahi mea okoa, o Robaka hookahi wale no ka’u mea e ike aku i nei po, a malia, o loaa ae ia’u ka manao koa i kekahi manawa kupono ma nei hope aku, alaila ia manawa au e ike aku ai ia Mr. Lanakasa,” wahi a ke kaikamahine e haalulu ana ia manawa.

            “Aka, e Helena, e pono ia oe e-“ wahi a ka makuahine me ka haikea loa ae la o kona helehelena ia manawa.

            “Aole; aole; olelo aki oe ia Robaka e pii mai ilunna nei a komo ae iloko o kahi rumi hookipa uuku ma kekahi aoao mai o ka holo, a malaila au e hele aku ai e ike iaia,” wahi a Helena me ka uwe, no ka hiki ole iaia ia manawa ke hoomalu iaia iho, a no kona hoao ana hoi kekahi e hoole i ka manao o ka makuahine ma ke ano pakike iaia no ka manawa mua loa.

            “Aka, ea, e Helena, e pono oe-“ i koikoi hou mai ai ka makuahine me ka leo o ka mea i hoka loa ka manaolana ia manawa.

            “O, aole hiki ia’u-aole hiki ia’u ke hoike aku ia oe i ke kumu o ko’u makemake ole ana e iho aku ilalo,” a hoomaka koke aku la oia e holo mai ka paa ana aku a ka makuahine iaia ma kona lima, a komo aku la iloko o kona rumi moe, a pani mai la i ka puka mahope ona.

            “O, he kanaka maikai loa oia! He keonimana oiaio ma na ano apau! Hu, pele i’o anei! Ka ina paha he kanaka maikai i’o oia no ke aha-“ a hooki pu iho la kana namunamu ana iaia iho, oiai kona leo akaaka hoohenehene o ke ano uluahewa i wawalo ae ai ma na paia o kona rumi moe.

            Alaila hina aku i kona mau waimaka, me ka hooho mau ae i keia mau huaolelo:

            “O, e Robaka, kuu aloha! O, e Robaka oia mau no anei ka oiaio o kou aloha ia’u, elike me ka oiaio o ko’u aloha nou, me kuu kupaa mau maluna ou ahiki i keia la! O, e kuu Robaka, e hoike mai ana anei oe he oia mau no kou aloha ia’u? No kekahi mau minuke kona hookahe ana aku i kona mau waimaka maluna o kona moe, alaila, i ke kanahai loa ana mai o kona manao pihoihoi no kona halawai aku me kana aloha, ala ae la oia iluna, hele aku la a ma kahi o ke pa wai holoi maka a holoi ae ia, laila hele aku la a ma kahi o ke aniani kilohi no ka hooponopono ana ae i kona lauoho i pukalaki a hooponopono pu iho la hoi kona aahu mamua o kona hele ana aku e hui me Robaka.

    

Mokuna XLVI-Ko Robaka Hoopaha’oha’oia Ana.

 

            Ia Hekena i holo aku ai noloko o kona rumi moe kikeke mai ana kekahi kauwa ma ka puka o ka rumi a Mrs.Lanakasa e noho ana, a i kona aeia ana aku e komo mai, haawi mai la oia i kekahi mau apana pepa hoolauna eha e kau ana iluna o ke palaau.

            Ia ike ana aku a Mrs. Lakanasa, lalau aku la oia ia mau apana pepa eha me ka haalulu o kona lima a ke kauwa e ike mai ana a hoomaka iho la e heluhelu i na inoa e kau ana, he mau inoa no hoi i maopopo mua iaia e kau ana maluna o ia mau apana pepa.

            “Hoike aku oe ina keonimana e iho aku ana au maloko o kekahi manawa pokole” wahi ana i ke kauwa o ka oili koke aku ia no ia o ke kauwa, no ka hooko ana aku i kaua misiona o ka loaa ana aku la, me ka hookaulua oke hou iho.

            Ia hala ana aku o ke kauwa komo aku la oia iloko o kona rumi moe no ka hoomakaukau ana iaia iho, no ka iho ana aku i ka hale malalo no ka halawai ana aku me na keonimana e kakali mai ana o ko laua iho aku.

            Hooponopono iho la oia i kona lauoho a hoopaa ae la i kekahi leia-i polu mawaena o na lihilihi ma kona a-i.

“He makemake mau oia i ka ike mai ia’u e kau ana i kekahi leia-i polu ma ko’u a-i,” wale ana iaia iho me ka lamalama o kona helehelena, me ka minoaka pu.

            “Wehe mai la oia i kekahi ume maluna loa o ka pahuku, a lawe mai la i kekahi komolima i o-aia ke daimana me na pohaku momi e ae, a hookomo iho la ina ke kolu o kona mai manamanalima ma ka lima hema, me ke komolima mare o laua e paa ana no ma ia manamana.

            “Aole au i komo iki i nei komolima mai kela la mai o ko maua kaawale ana eia nae, iloko o ia manawa loihi a me ia nui no hoi o ko’u ukiuki aole no nae a’u i hoolilo aku ia komo ma kekuai a ma kekahi ano e ae hoi me ia ike no o’u i ko’u ilihune a oiai ua hui hou ae nei hoi na opua i nei manawa, ua hala aku la na la hakumakuma, na la haumalu o na ao panopano o ka ino, a ke olino hou mai nei na la o ka hauoli nolaila, e hoopaa hou ana au i nei komo ma ko’u lima i mea nona e ike mai ai eia mau no au ke hiipoi nei i kona aloha.’

            I kona makaukau an, ame kona mau kaina wawae mama me he popo laholio la i hoopiliia ae malalo, he mama hoi i ike ole ia ka lua me ia mamua aku, ame kona naau hoi e lele ana i ka hauoli iloko ona, iho la aku la oia i ka hale malalo, kahi a Mr. Lanalasa ame Robaka e u noho mai ana kakali no ko laua hoea aku.

            I ka ike ana mai o na keonimana iaia, ku like ae la laua iluna no ka haawi ana mai i ko laua aloha iaia, i kona manawa i komo aku ai i ka rumi hokipa; no ke kanaka opio nae ia manawa ua haikea loa ae la kona helehelena, no kona ike ole ana mai ia Helena, a ulu koke ae la kekahi manao hopohopo iloko ona malia, ua loaa paha kekahi ulia ia Helena ma ia ahiahi, i iho pu ole mai ai oia ilalo me kamakuhine. Hele koke mai la o Mr. Lanakasa a pili ma ka aoao o Mrs. Lanakasa, a apo mai la , a hoopili aku la iaia, me ka nana pono iho i ka helehelena o ka wahine e mohaha pono ae ana mamua ona, me he mea la opuu rose la i mohala ae o ke kakahiaka.

            “E Robaka, ua kamaaina no ia oe keia lede no kekahi manawa loihi mamua, nolaila au i manao iho la aoke o’u kuleana e hoolauna aku ai iaia ia oe, a e ike mai hoi oe i nei manawa o kuu wahine aloha keia, ka mea a’u i huli ai no na makahiki lehulehu i hala, a ke hauoli hoa nei au i ka halawai hou ana me ia.E hele nao oe e ike i ko makiahine,” wahi a ka anakala o ka huli ana aku a kamailio ia Robaka.

            Aohe waiwai o ke noi hou ana aku ia Robaka e hele mai no ka mea, ia manawa aia o Robaka mamua pono aku o Mrs.Lanakasa kahi i ku mai ai me ka helehelena hoihoi alaila hopu mai la oia i ka lima o ka makuahine a honi iho la ma ke ano o kana aloha ana ia iaiai.

            “No’u iho he hialaai mau au no Robaka nei, he kanaka opio oia a’u i makemake nui ai, no kona mau ano oluolu a keonimana oiaio, “ i pane ae ai o Mrs. Lanakasa  ke kane a mahope o kona hopu ana ae i ka lima o Robaka i ae la “ke hauoli loa nei au i kou hoi ana mai me ke oia maikai pehea la ka nui o ia hauoli o’u aole hiki ia oe ke ana mai i ka hohonu ame ke kiekie, ka loa ame ka laula.”

            “Auhea ka hoi o Helena- auhea aku nei oia, o oe wale no hoi ia i hoea mai la aole hoi oia pu kekahi?” i ninau koke mai ai o Robaka.

            “I mai nei o Helena ia’u aole hiki iaia ke iho mai olalo nei, a i mai nei nae, o oe no ke pii aku iluna e ike iaia, e kekahi aoao mai oka holo, malaila ka oia e heke mai ai e ike ia oe,” wahi a Mrs.Lanakasa o ka pane ana aku.

            Ka, o ka huluaa ia o Hauailiki! O kela helehelena kaumaha o Robaka mamua aku ua auhee aku la ia ia manawa, o kela helehelena hoihoi ona o na manawa mamua aku a lakou i ka hoi ana mai ka lakou huakai makaikai mai, o ia ke halii ana maluna o kona mau maka ia manawa, nolaila o na lima o na wawae ia pii ana aku ana ma ke alapii ahiki i-ke kau ana iluna, a huli aku la i kahi rumi hookipa uuku i hoikeia mai ai iaia malaila oia e loaa mai ai ia Helena.

            Ia Robaka i hala aku ai, ninau iho la o Mr. Lanakasa i ka wahine: “Ea, aole ka paha o Helena e iho mai ana ilalo nei e ike ia’u?”

            “E kuu hale, mai hookaumaha i kou noonoo nona, e ike aku ana oe iaia, aole nae i nei po,” i pane ae ai ka wahine: ua olelo mai nei oia ia’u aole hiki iaia ke ike ia Robaka me ka noho pu aku o kekahi mea a mau mea paha ma ko laua manawa e ike ai kekahi i kekahi.”

            “ Aha, o ia wale no anei kana kumu o ka hoike ana mai nei ia oe e hiki ole ai iaia ke iho mai ilalo nei?” I ka manawa keia ana o ka ike ana iho i ka haalulu o na lehelehe o ka wahine.

            Ua maopopo i ka wahine ke kumu o ko Helena makemake ole ana e iho mai i ka hale malalo aohe nae ka wahine i hoike aku i ka mea oiaio, no kona ike ana iho o kona hoike ana aku ia mea, he mea hoomaka e aku paha ia o ka makua i ke keiki, no ia kumu, uumi wale iho la no oia ia mea iloko ona,a hoomama wale aku no kana olelo ana.

            “ Aohe i pau kela manao hoopilihua iaia o ka wa i hala, aka, e pau ae ana no nae ke loihi iho ko Robaka launa mau ana aku me ia-aole e nele ana kona aloha ia oe i kona manawa e maopopo ai i kou mau ano, kau mau hana, ma kou hoike mau aku i kou aloha makua iaia.”

            “ Heaha ka manao o kau mea i olelo mai la no ka manawa i hala?” i ninau iho ai ke kane.

            “ O, ua manao oia ua-kaawale loa oe mai ia’u aku.”

            “ Alaila ua kanalua anei oia i kou hoi mai me a’u?” wahi a ke kane,.  “ Ae, oia; a o kekahi ua manao oia ua hoohaahaa ino loa oe iaia mamuli o kou olelo ana he hana haahaa loa ka’u i lawelawe ai ma kekahi manawa i hala aku,” i pane ae ai ka wahine, me ka ula o kona mau papalina.

            “ O, hookahi no kumu, ua naaupo loa au ia manawa, ua like au me kekahi kanaka makapo: aole au i manao o oe ka wahine kelalole a ka poe e kamailio ana,” alaila honi iho la oia i ka wahine no kekahi manawa. “Alaila ua hoohaahaa loa ia au ia oe a iaia pu a ua hoohaahaa pu au ia’u iho ma ke ano lapuwale loa. O, e noi aku ana au ia oe no kau huikala ana mai!”

            “Ua maopopo ia’u ka manao i loaa ia oe ia manawa, o ia hpi, o kou manaoio o ia no ka uhi ana ia Robaka, aole ou makemake e hui oia me kekahi wahine haahaa, elike no hoi me ko’u makemake ole e mare aku o Helena me kekaho kanaka kupono ole, a’u e ike aku ana. O kekahi aole o’u makemake e hui pu ake o Robaka me kekahi poe au e makemake ole ai o ia paha, ea? Mai hookaumaha oe ia oe iho no ia mea.”

            Aohe i lawa keia hoakaka a ka wahine i ko Mr,Lanakasa manao, nolaila ke ulu mau la ka hopahopa iloko ona no ka halawai aku me kana kaikamahine, no no kona hopohopo aole o Helena e ike mai ana iaia ma ke ano maikai nei o ke keiki i ka maku, a o ka makua hoi i ke keiki, a ke ike la no nae oia i kona hewa, ka hewa ana i manao ai ua nalowale a’o ka hoku la o ka malama ke ike ia poe, eia nae ua ahuwale mua ia mau kee ona.

            E haalele kaua, e ka makamaka heluhelu ia laua e u hoakaka ana i ka laua mau moolelo pakahi, a e huli ae hoi ka kaua nana ana ia Robaka ma.

                                                                        (Aole i pau.) 

            .